Krismas a lo hnai leh ta hle mai. He hun hi Kristiante tan chuan hun nghahlelhawm ber a ni a, abik takin Mizote hian kan nghakhlel zual thin a ni. He hun a lo thlen hi chuan kan naupan laite thinlungah lo thar leh thin a. Naupang kan nih laia thingtlanga kan awm lai a krismas kan nghahlelh thin ziate, kan nu leh pa te’n krismas kawrmawi min lei sak hak hlan kan nghahhlelh theih ziate kha aw…, kan thiante nen khan kan thawmhnaw thar velte kan in ensak hlawm ngei thin a, nuam ve thei tak chu a ni.
Tunah puitling kan lo nih hnu hi chuan naupang kan nih lai anga krismas nghahlelh kha a awm thei tak tak tawh lo. Mahni tawkah kan buai a, thenkhat tan phei chuan krismas hi hnawk sak maite pawh niin a lang tawh a ni. Mahse Kristian kan nih a, Mizo kan nih chuan Krismas hi chuan kan thinlungah hmun pawimawh ber chu a la chang tho chu a ni. Tunlai ka rilru luah bertu chu hei hi a ni, keinin Krismas hlim leh nuam taka kan hman lai hian kan kan Mizopui thenkhatte chuan huphurh takin an lo nghak ve thin a ni tih hi kan hriat tel fo a ngai a ni.
Thenkhatte chuan an chhungte mual liam tawh ngaiin lungleng leh khawhar takin he hun hi an lo hmuak thin a, an lunglennate alo thar leh thin a ni. Thenkhat chuan chhungkaw harsatna avangin he hun hi huphurh takin an lo nghak bawk thin a ni. Pa thenkhat chuan an fate thawmhnaw leina tur ngiahtuahin an hun leh tha zawng zawng an sen angai a, chhungkaw ei leh in tur ngaihtuah angai bawk a, he hun hi pa tam tak lungngaia an kun hun ni chawk thin a ni.
An fate hrilhhai taka an awm an hlau a, mi fate neih ang an nei ve lo ang tih an hlau a, hah pawh sawi loin hna an thawk thin a ni. Keini hlim leh lawm taka kan awm lai hian mi tam tak chu lungngaiin an kun thin a ni… Chuvangin tun krismas lo thleng turah hian mi pakhat tan tal malsawmna i ni ve thei dawn lawmni.
Pathianin eizawnna tha tak a pe che a, mite awt loin i awm a ni thei, mahse nangmah awttu tam tak an awm a ni tih hria la, he hun lo thleng turah hian malsawmna petu che i thungrulh ve theih nan mi pakhat tal tan chuan malsawmna thlentu i ni ve thei angem?
