mi(sual).com

Ka hmaah chuan thalai tam tak an thu hmur mai a. Keichu thusawi tura sawm ka nih avangin dawhsan lam chu ka pan a. Eng thu nge ka sawi ang aw? Chung thalai tam tak zingah chuan an ei zawng tak ka sawiloh chuan an chhuak sung sung dawn tih chu zawlnei sawi ngai lovin a chiang vek si… rilru a hah duh khawp mai.

Chutah lectern hmaah chuan dingin chung thalai ho chu heti hian fuihna thu ka han sawi ta a.. “ Nangni thalaite u, he ram kalsiam hi inni tih inhre hmasa phawt teh u. Nakina kan ram rawn hruaitu tur inni tih inhre hmasa phawt teh u. Tuna kan ram hruaitute hi nakinah chuan ram hruai thei tawh lovin an chakna chu vawm bo ang duak a ni tawh anga, chung hunah chuan nangni ho hi ram chu inrawn hruai tawh dawn a ni.

Chutih hunah chuan tuna kan ram awmdan hian that lam a pan loh chuan in hna a hautak dawn a, chu hna hautak tak chu thawk ngam lova peh hel tur chuan ram hmangaih angin insawi duh tawh suh u, inhmangaih tawk lo. ‘Ka hmangaih’ tiin sawi sawi mah ula mi nuihzat bak inhlawh lovang. chuvangin in thinlung tak takin he ram tluchhe tur hi veng ang che u.
Tunlai kan ram boruak hi thlir teh ang u. Khawvel changkanna chuan min rawn man ve a, changkang pawh kan changkang e. Mahse, kan changkan dan zik bul tak hi in hre duh em? Ngaihtuah tlang teh ang u. Lehkhathiam tamna ram kan ni a, lehkhathiam hna hmulo pawl ding awmchhun kan ni mai awm a sin. Thiamna tak tak hi neih tum lovin khawvel incheina anga kan inchei ve phak theihna turin kan zir chauh a ni mai lo maw? Kan bazar hmunte saw rinnain i han fang kual teh ang u. Thawmhnaw man to tak tak hralh a kal a, leitu pawh kan thahnem thin. Showroom chhuak lo chu tlangvalin hak an zak tan a, nulain millenium center a mi Bangkok chhuak ngat lo chu in ha ngam tawh lo a maw? Ni e, hmasawnna chu a ni chiang a ni. Chutianga inchei thei mihring fate chenna ram Zoram chu i han bihchiang teh ang u. Thirchhia tihloh thil tam tham tak thawnchhuah nei hria inawm chuan han ban phar teh u. A nih nitin i ei thin BUH kha khawi a mi nge? Mizo Buh a ni em? ni lo tlat mai. Vaiho tharchhuah a nih kha. A nih i chawhmeh duh em em SA chi hrang hrang kha leh thlai chi hrang hrang kha khawi lam chhuak nge? Mizoram chu a ni lo phawt mai tiraw u? Chutiang khawpa ram intodelhlo ram hian incheina kan ti sang em em a maw? ‘Choak arawn chang tawn ‘kan pi puten tehkhin thu an lo siam hi keimahni nundan hi zel in a lo hmuh tir vang a ni mai lo’ng maw?

Kan ram inrelbawlna lam hi i luhchilh teh ang u. Kawlphethaa intodelhlo chungin Switzerland of the east ah siam kan tum a maw? ‘Mizo kan ni kan hmel a tha, kan tum a sang bawk si..’ tih chu kan hlenchhuak chiang khawp mai. Han ngaihtuah chiang teh u, tuna kan kaldan en hi chuan kum sang tam tak pawh ral mah se kan nih hmelloh khawp mai.

Pekchhuah lama a hniam ber pawl ni chungin eirukna lamah chuan a sanglamah kan lang a maw? Zahna chang kan hria em? Thenkhat pate eiruk zara chapo ve em em; mirethei chanai a nuamchen thin inawm chuan zak rawh u. In nu leh pate eiruk avang khan veng lehlamah chuan “ Naktuk chaw thlak tur engtinnge ka neih ang aw..” tia indawm kun an awm a sin. Chung mite chu khawngaih a hnekin in nuih ru tet tet thin a, eng he huah inngailo bawk tih chu mitin ka hmu thin. Ka rilru a na thin a sin. Khang innuihte kha i pa/ nu vanga lo awm a ni tih inhmuh hmaih a, an retheihna chiah chu in hmu thin a ni si a; i nu/ pa kha a eiru thin a nih chuan khawlai leng lovin inkhung reng rawh. Inti vaitingtang taka i chhuah khan mi nuih i nih kha! Mi nuih nih i duh ka ringlo, chuvangin inah tawm tlat turin thurawn ka pe che a nih chu.

Kan Dan hmandan i han sawi leh teh ang. Milian tan Lung In tan a har dan hi mak inti ve em? Hmeithai leh pachhiate tan chuan Aiawt ang mai a ni a, Milian tan erawh pawh lamah an kalh tlat si. Nangni, ka hmaa thute u, nakinah chuan hna sang tak tak inthawk anga, mahni thiamnaa lutte chu ka ngaisang ang che u. Mahse, sawipuitu neihthat vanga lut innih chuan min hmelhriat awm ang pawhin awm suh u! Ka ngaihsan che u phei chu ring buai duh suh u. Nuihzattu ber che ka ni zawk ang. Awle, chutianga hnasang inthawh hunah chuan eng bail bail emaw lak ngailo turin in nun fimkhur hle ang che u. Bial pakhat i ziah belh vang khan thil tam tak a pawi dawn tih inhre reng dawn nia.

Kan hau leh teh ang che u. Tunlai thalai nungchang hi ka ngaihtuah chuan ka rilru a na thin a sin. Nawmchen duhna rilru lian tak innei a, chu nawmchenna chuan ram tan pawi a khawih ta a nih hi. Nulate u, in thianghlimna kha inneih rohlu ber a ni tih hre rawh u. In rohlu chu inpaih mai mai phal dawn a maw? In thu alawm! Mahse, nakinah inchhir hun inla nei dawn. Nangni, tlangvalte u, in unaunute chunga thleng lose intih hi ngatinge mi fate chunga a thlen pawi intih tlat loh thin le. In thiamlohna chu inchhungkaw chungah lo let dawn ta se induh chiah ang maw? Mahni inngaihtuah a hun e.

Nakinah chuan nangni hi ram rawn hruaitu tur innih avangin in kalsual ka hlau em a, kam ramin humsual a dai lohnan ka hrilh che u a ni. Hei ka thusawi hi a kimlo viau a, heta tanga hlawkna pakhat tal emaw, ngaihtuahna fim zawk hman theihna rilru inneih ka duh em a ni.

Fuihna thu pakhat ka han pe leh teh ang che u. HNAMAH CHIANG RAWH U tih te mai hian ka han fuih teh ang che u. a awmzia chu inlo ngaihtuah ve tawh mai dawn nia; nangni zirlai thiam tak tak innih kha!” tiin ka han saw a. ka sawizo chu kut beng thawm pawh ngaihtuah lovin ka chhuahsan nghal a. ka hnungkamah mi pakhatin min rawn zui a.. “Ka pu” min rawn ti thut chu ka harh zawk a. Ka mumang lek hi a lo ni tih ka hriaa, ka let tawp a..ka muhil zui leh ta a.

Similar Posts:

• Vanduai vannei!!
• Suangtuahna Ropui
• Zawngte leh Satel
• Aw kulh kawngkate u, in khai sang rawh u
• Thalaite u…

Recent Posts:

• Mizo tawnga Android Application thar Play store ah
• Saikhumphai-bawk Chungchang Kha…
• Induhna nei ve teh ang u!
• Chi
• Nipui Kaihhnawih

This entry was posted on Monday, November 29th, 2010 at 6:30 am and is filed under Mizoram, More than words. You can follow any responses to this entry through the RSS 2.0 feed. You can leave a response, or trackback from your own site.