mi(sual).com

A khuhhawnna

Mi tam tak hian suangtuahna leh ngaihtuahna chi hrang hrang kan nei theuh awm e. Chu kan suangtuahna chuan a tak ram thleng se kan ti thin. Chung kan suangtuahna te chu thu leh hla hmangtein kan puangchhuak thin a. Chung kan suangtuahna hrang hrang chu hlawhtling tawk awm mah se thenkhat suangtuahna erawh hlawhtling lovin mual an liam leh mai thin a, thenkhat erawh kum tam tak hnuah he an suangtuahna leh an ngaihtuahnate chuan par a rawn chhauh chauh thin…

Suangtuahna ropui chu…

Remna leh muanna duh tute hi khawvelin a ngaisanga, theihtawpa an beihna chu a hre reng thin. A thlekna lam apiangah khawvel a thle a, thle ve duh lova lo hawisan tute chu dar rul khaikan en ve duhlo te angin khawvelin hrehawm takin a awmtir thin. Chutiang khawpa pawimawh duh tute au aw thangkhawk ri chuan khawvel hi hneh takin a fan chhuak thin.

Kum 1971 khuangchawi thla chawhma lam a ni a. Liverpool tlangval pali zinga pakhat chuan a suanngtuahna ropui tak mai chu hla thu hmangin a rawn puangchhuak ta. Chu suangtuahna hla ropui tak mai chuan chappui kang vanglai ang maiin a darh chak a. Reiloteah khawvel pumin an lo hre ta…

    Imagine there’s no heaven
    It’s easy if you try
    No hell below us
    Above us only sky
    Imagine all the people living for today

Thih hnu nun hi awm tawhlo tur angin han ngaihtuah teh? I ngaihtuahna chuan awmlo angin a hruai thei maithei che a sin. He thihna, min then hrangtu hi awm lovin mipuite hi cheng turin han ngaihtuah teh? Tum chuan kawng a awm tih ang deuhin i ngaihtuah chuan i thei alawm.. I kutah a innghat e…

    Imagine there’s no country
    It isn’t hard to do
    Notihng to kill or die for
    And no religion too
    Imagine all the people living life in peace

Pathian dan kan bawhchhiaa, ama lak atanga kan inlak hran avangin buaina kan tawk a. Sualin a tuam hlawm tlat mihringte chuan Babel in sang sak kan tum leh tlat a. Chutah zet zawng awmho chi kan ni tawh lo tih Siamtuin a hriat khan, min hmangaih vangin leh kan thatna turin min thai darh ta hlawm a nih kha.

Khatianga thaidarh kha tawk lovin, khawmualpui hrang hrang leh hnam hrang hrang te hi awm lovin, tawngkhat hmangin hmunkhata awm turin i ngaihtuah chang chuan a thatna tur lai i hmu ngei ang. In itsikna leh duhamna sualte hian mihring hi min luhchilh lo sela, sem sem dam dam ei bil thi thi tih thinlung kha han pu vekin, sakhua inlak bingna te hi bo ta se chu he khawvela chhitna rapthlak tak tak, indona leh innghirnghona tam tak hi a bo anga, hlim tak leh zalen takin nun kan hmang ngei ang.

    Imagine no possessions
    I wonder if you can
    No needs for greed or hunger
    A brotherhood of man
    Imagine all the people sharing all the world

Sum leh pai duhamna hi zawng thil tenawm tak a va ni em! Rangkachak leh tangka awmna hmunah pawh duhamna chuan hmun a chang hnem thin si. Rangkachak leh lunghlu khurah pawh duhamna chuan natna a theln thei tlat zu nia! He duhamna han hringnun a vaw chhiaa, min thenhrang thin a nih hi.

Mihring ze ril berah chuan nihna sang leh hausakna bak hian hmun a changlo. Chung kan rilru diklo chu paihin, inpumkhatna nei turin thawkchhuak ta theuh ila. Engim mai chu midang gaichang cung zela tiin inunauna tha tak nei thei ni ta ila chu he khawvel hi vanram tla fual dik tak a ni dawn a sin…

    You, you may say
    I’m a dreamer, but I’m not the only one
    I hope someday you’ll join us
    And the world will live as one.

Tangka sum ngainep a, he hringnun hlutna hmuchiangtute chu khawvelin ‘mawl’ tiin an ngainep thin. Amaherawhchu, hringnun hlutna hmu chiangtute chuan dawhthei takin an tuar a, remna leh muanna a awmtheihna turin an theihtawpin an thawk thin. Mi tam tak chuan an thu leh hlate chu suangtuahna mawlmang leh hmantlakloh nia ngaiin hnawl fo mah sela. Beidawng lovin an bei tang tanga. A tawpah chuan a par chu mawi takin a lo chhuah ta thin a ni.

Ni e, khiang a chunga kan sawi zawng zawng khi nangchuan duhthusam mai mai min tihsak pawh a ni thei e. Mahse, nakinah chuan remna leh muanna pawimawhzia hriain ka suangtuah thin te hi ila rawn ngaihtuah ve anga, ka rilru ang hi ila rawn pu ve ang. Chutih hunah chuan he khawvel mi chi hrang hrangte hi thu khat vuain, rilru hmun khat puin, inlungrual takin kan la cheng ho ang. Chu hun lo thleng tur chu nghakhleh takin ka thlir reng thin.

Similar Posts:

• Playing For Change
• Assembly Session-ah Remna leh Muanna (25 Years of Peace & Security)
• Serchhipah Ex-Minister Pu Tlanghmingthanga hovin Remna Ni hman a ni
• Remna ni kolasib ah phur taka hman a ni
• Imagine…No Lennon.

Recent Posts:

• NANG NEN NGEI HIAN
• June 2017, Mizo(ram) diary
• MIZORAM POLITICS A PARTY TE INCHIRHTHEHNA TAWP THEI LO: KAWNG CHHIA “MNF hovin anmahni mawng an hlim”
• Dawihzep
• CALL GIRL AN TI!

This entry was posted on Thursday, December 1st, 2011 at 9:00 am and is filed under Luangliam, Music and lyrics. You can follow any responses to this entry through the RSS 2.0 feed. You can leave a response, or trackback from your own site.