mi(sual).com

He thu ziak theia ka awm hi Pathian hnenah Lawmthu ka sawi a. Chu tih laiin ka zak hle bawk tih kha min lo hriatsak dawn nia.

2007/2008(??) khan Pu Vanneihtluanga’n a magazine (lengzem)-ah “Tuaite Zilhna” tha zet mai a rawn ziak a. Khami kha han chhan let ka duh viau nen hun kha ka nei thei ta lo va.(chhan let tih hian a tha lam zawngin nia ka tih..:) ). Hei tunah post ngaihnawm zet mai, “Klinefelter’s Syndrome” misualdotcom-ah chhiar tur a rawn awm leh hi ka va lawm tak em, ti duah teh ang.

A hmasa ber dawttuah chuan ka han inhmelhriattir ve teh ang. Ka thar viauah in ngai anga, mahse rei tawk tak misual hi comment lovin ka lo chhiar ve ngat ngat thin a, in comment leh post-te a changkang thin sia, a chhiartua lo tan hi a tawk viauah ka lo ngai a. Tunah chuan a tlem berah mi sawm(10) talin an lo chhiar ve beiseiin ka rawn ziak ve hlawl a nih hi. “Environment Influence” ni lovin pianpui “tuai” in tih ang hi ka ni ve a, ka tet te atanga ka hun tawn khirh tak tak leh ka ngaihdan chhe ve te hi min lo chhiarchhuahsak hram hram teh u.

Closeted an tih ang chi, ualau taka va “tuai” ang hi ka ni ve lo va, tunah hian min hmu ula nangni pawn in ring kherin ka ring lo, mahse min chenpuite hi chuan an hai thei bikin ka ring chuang lo va, anni pawh hian min khawngaih haidersak ve mai mai niin ka hria.

Ka han sawi dan vel hian in luak a lo pawt deuh anih paw’n in ngaihdamna ka dil nghal e. Ka tet lai ka hriat theih chin tlema zawngahte khan hmeichhe kawr ka hak thinte, barbie ka duh thinte kha ka la hre thei. Veng pumah min hre tawh phawt chuan tuai ka nih kha an hai lo. Tichuan, a chhia leh a tha la hre thiam ta lo chuan ka duh duh chu ka inbel a, ti khan awmpuite kutah khan ka tleina a nih dawn chuan ka duh duh khan ka awm ni berin ka hria. mahse, “tuai” tih kha chu ka duh ngai miah lo thung.

Kha tih laia ka pa rilru natna tur leh a zahna tur kha ka ngaihtuah hian ka khawngaih thin. Nimahsela, min hau ngai lo reng reng. Sikulah chuan ka han lut ve ta a, heta tang hian ka nun kawng chhukchho chu a intan ve ta a. “Tuai” ka nih avanga min chhaih nawmnah-naah vawi tam tak ka tan chuan sikul kha hremhmun a lo ni tawh thin a. Pathian zara thiam theihna ka dawn vete kha nei lo phei ila chuan ka tan chuan ni tin kha ni lungchhiatthlak a ni reng dawn khan ka hre thin. Ka lo zir sang ve zel a, Primary mawlh kha ka tan chuan ka dam chhunga theihnghilh ka chak lai berte zinga mi a ni. Class 1-4 ka kal chhung zawng khan, ka lo sawi sual palh pawh a ni thei e, sikul kal niah zingah, “Aw Lalpa vawiinah tuma’n ka hming ni lova min chhaih nawmnah lohna turin ka rawn dil a che,” tiin ka tawngtai ziah thin, ka pain scooterin min thlah thin a, ka kalpuite’n min lo hmu anga “tuai” tiin an lo au ang tih hlauin ka hmai ka hup tlat thin.

Zing khat phei chu kan class-a sual zet mai hian chutia scooter hnunga ka thu chu ka hmai ka lo hup theihnghilh nen “tuai” tiin a lo au vak mai a, ka pa chu a ding dawt a, a thinrim tih chu ka hria, “Va hnek rawh” min tia, kei lah chuan ka ngam bawk si lo va, (a va zahthlak deuh ve, sawi pawh :roll: ), ka pa kha a zak ve hle chuan ka ring. Mahse, vanneihthlak takin kan hotute’n an lo hre hlauhva chu pa chuan min tibuai tawh ta ngai lo va (huizz). Mahse kum laklawhah sikul dangah ka lut ta daih a.

Middle School ka luh tirh pawh hian nasa takin harsatna kum tir lamah ka tawk leh pek a. Kan principal unaupa fate hian min tiduhdah thin lutuk a. Mahse first term-a pakhatna ka niha class 6-a ka insawn takah kha chuan ka tan chuan a nuam ve ta zel a. Pathian zarah he sikul atang hian class 10 ka chhuak a, harsatna dang engmah ka tawng ta lo. Tichuan higher atang phei kha chuan “tuai” ka ni tih kha chu min en mai chuan tumah khan an hre bik hauh lo ang. Kan sawi duah chu, tun dinhmun i han sawi teh ang.

Mihring anga piang ve ta na na na chu, hmangaihna kan lo pianpui ve tho si a, hei tak hi mi tam takte an inthup theih loh avanga an mualpho thinna niin ka hria, kan ngaihdan angin mi pangngai(straight) hoin an ngai tawh si lo va, kan sual vang em em pawh ni lovin, kan in-control theih loh vang zawkin “mi tenawm”-ah miin min lo sawi phah thin. Hemi thu hlaah hian Pu vanneihtluanga’n “hmangaihna leh sex hi chu ngaihtuah tam lo law law rawh u,” min tihna hi harsa ti chung chunga pawm hi ka tihtur niin ka hria a, hetianga zilhna tha tak min pek avang pawh hian ka lawm hle. Dam chhunga hmangaihtu neih loh chu kan ti pawh a ni mahna, Pathianin min siam ve takah chuan chhan tha tak a nei turah kan ngai thei zawk dawn lo’vem ni??. Tun hnuah hian ka “purpose of Life” hi ka chiang ve tan taah ka ngai.

Hmangaihnaa ka luh apiangin san lam ai tlak lam ka pan zel a, khawvela thil thalote khawih phah na’n te ka hmang thin. Chuvang chuan ka tan chuan he ngaihtuahna hi a dik lo a ni tih ka chiang tan ta a. Chutih lai meka kan chunga thil lo thleng hian ka dam chhan chu a tichiang tain ka hria. “chiahpuam” vel vang khan kan in sak lai pawh sa zawm thei lovin kan kawt rat a. Tunah chuan nu leh pa en ber chu ka zirchhuah ve hun hi a lo ni ta. Ka kovah nasa takin tih tur a innghat ta a; ka u leh a fate hi ka nu leh pa boral hnuah tuin nge enkawl ta ang tihte ka ngaihtuah ta a. A nih loh paw’n pasal dang lo nei leh pawh ni se, an unaua enkawl hi ka tan chuan Pathianin hna min pek a ni ka ti lo thei ta lo. Mi pangngai niin nupuite neiin fate lo nei ve dawn ta ila an unau hi engtin nge khawvel intlansiaknaah an tlan ve ang tihte ka rilruah a lo lian tawh a, ka tan chuan fa nei tawh ang zawk ka lo ni. Pathianin kan chhungkaw tlu chhe mek tung ding tura a “bik” taka duan ka lo niin ka inhre ta a, mite hmuhsitnaah chu ka hlutna chu ka hre tawh a, ka zak tawh lo. Mahse, tumah “tiluak” tur leh ka chhungte zahna thlen tur ang zawnga khawsak loh hram hram ka tum tlat thung. Hei hi, tuai dangte pawh hian hre ve se ka ti, midangte tana hnawksak zawnga khawsa lovin, Pathianina min siam chhan, kan chhungkua, khawvel tlu chhe mek tung ding tura kan chanpual lenzia hi. Hmangaihna leh sex ringawt hi mihring damchhan a ni lo: hei aia nasa zawk hi Siamtu’n kan kovah a nghat tih hi i hre thar leh ang u.

Chuan pakhat, “tuai intihhmuh” tih hi. Hei hi a awm theiin ka ring lo deuh. A lang a pauva va chhuahna ( closeted to open) hi chu a intihhmuh theih ngei ang. Mahse mi pangngai hi chu kan siam tuai zovin ka ring lo. Pianphungah eng emaw tal fel lohna a awm a ngai. In lo helh viau chuan ka ring, mahse hmeichhe it ka tumna nasatzia leh ka fail nasat avang hian, mipa pangngai chuan chuti maia a mipapui a it mai nachhan tur ka hre lo. A hmaa pa reng, a hnua tuai, tih hi chu, inkhapbehna avanga rei tak lo inlapa, a hnua lo chhuak (open) ta angah ka ngai. Kei erawh hi chu rei tak lo tuai tawh, a hnua inlapa ka ni thung . KG ka luhpuiteho chuan sawi chiah si lo hian, “i dang tawh e,” an ti leh ringawt zel. :D.

Ka chah duh che u chu, khawngaih takin, infate emaw, tute emaw zingah, tuai an lo piang ve hlauh a nih chuan, Pathian hnenah a kawng tur dil ula, (kei pawh hi ka nu leh ka pite min tawngtaisakna vang liau liaua ka dam chhan ni awma ka hriat hi hria niin ka inhria a. Hei aia ropui zawk hi min la chhawpsak reng thei bawk), hmangaih takin in duhna lam lam ni lovin, Pathian duhna lam zawkah in khalh hram hram dawn nia. In fateah tuai chu an awm lo pawh a ni mahna, khawngaih takin an sikul kalnaahte tuai chhaih nawmnah lo tura zirtir turin ka chah a che u. Mi tam tak chuan in tetlaiahte khan let leh thei ula in ti ang, kei chuan ka chak ve miah lo, hrehawm ka ti. Hei vang hian tuai tam tak chuan Pathian an dem a, Krista hi an hua a ni. Engvanga hetia min siama vanrama lut lo tura min ti si nge a nih, titein an vui thin. Hei hi hria se ka ti, Pathian hian hmeichhia a siam a, nawhchizuar a siam kher lo. Chutiang bawkin keini tuaite hi mawngkawhur turin min siam lo, he khawvelina a hriatthiam rual lohva thuk mawhphurhna hi kan chungah a nghat a ni. Hrethiam vek ila keini Mizote tal hian, kan ram hi hei ai nuama din zawk tur kan ni e. Ka’n tih deuh hluah chu a.

Last para . He khawvelah hian kan nu leh pa, u leh naute aia hmangaihtu nei dawn lo mah ila, kuta sak loh Van Kanaanah chuan piangsual kan awm tawh law’ng, an tih kha. Leiah hnehchhiahin kan awm hi, hawh u Vanramah chuan fachuam nihna hauh turin i nung zawk ang u khai. Mahni tana nung tura din kan nih ve loh hi.
Min chhiarchhuahsaktu zawngte hnenah lawmthu ka sawi nghal e.

Similar Posts:

• Ka’n PHERH ve zuai!!
• Aizawl ah Tuai an tam
• Pherh tih tawngkam hi a tul lo!
• Ronaldo leh Tuai 3
• Numeithra leh Pasalthra

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Wednesday, December 1st, 2010 at 12:00 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.