mi(sual).com

Tlang thawveng i thlarauin a chuan a, i mittui chu a lo  far kauh kauh a mahse i lungngai si lo, i hlim em em a mahse i nui si lo. A kiang Chawlhna Tuikama Hlobet hring dup mai chungah chuan i chawl a, Pathian thlamuanna rilru reng renga hriatsen loh chuan a tuam vel che a i  hlim ta em em mai a ni. Thlarau pawlna chu i chan chhah em avangin sual ngam rual i ni lo, thlemtu-a pawhin ni dang atan a khek che a; zalen i ni. ‘Pathian hian min lo va hmangaih em, min din a, min awmtlei a, min chawi mu thin- sualah ka pil leh tawh lo’ng’ tiin hlado i chham a.

Tin, heti hi a ni a, i dinhmun atangin i hun lo kal turte chu i’n thlir lawk a engvang mah hian phatsan leh i tum tawh lo-‘hnehna chu Lalpa ta a ni’ tiin lamlianahte chuan i au va, i lo bawhchhiatpui thinte hmaah ngei mai chuan khinghnihin i phar a, an rin che i phut chuang hauh lo. I tana ‘zahna’ kawn chu i paltlang apiangin hnehna i chang a, i puang thin; i sawi ngun em avang chuan nangmahah thu a lo thar zel a, hun kaltaa i hriat ngai reng reng loh- Bible chang i lo chhiar liam mai mai thinte chu thlarauvin a’n tihnun meuh chuan a lo tha em em mai zel hi a lo ni tih i han hre thar a. I hla sak apiang mai chu thlarau nun chawmtu an lo ni ta vek mai si- Hlabuah hian sak nin reng reng i lo nei ta lo.

Khawlum lo thleng pawh hlau lo, nun hring hlap reng mai-khawkhen kum pawisa lo, Pathian Biak Inkhawm zawng zawng chhir chhuah vek hnuah pawh la kham zo ngai lo nun chu i ta a lo ni ta mai si. Ni e, Isua Kraws mak tak chunga Ropuina Lal thi kha i tan a lo nung thar leh miau a,  fak tawk i inti thei lo a ni. Lalpa’n i mitte chu a thlaksak tawh miau che avangin engkimah a ropuina i hmu thar thin a, nun hian i tan par a chhuang a ni. I lungawi chhan hi i hausak vang a ni lo, sum i neih loh avangin retheiah i inchhiar ngai lo; engkim neitu chu  i ta a ni a, a ta i ni tih i hria a, rual i awt ngai lo anih kha. Amah Pathian, mita hmuh loh, kuta khawih loh leh benga hriat loh chu Rinna-in i hmu a-‘Hmangaih zual che ka duh, Lalpa Isu’ i ti mai zawk a ni.

Mahse a ngai reng thei si lo.

Hun inher vel hian hringnun a thlei dang thin a, nitina kan nun sutu hi kan duhthlan a ni si lo. Chhun hi zanin a zui ang mai hian Kan dil loh zawk peka kan awm changte leh kan thlan loh zawk min hnawn hun a lo awm a, chu chuan a hel bik si lo che. Kan dinna ber sawi(h) anih tawh chuan kan nghing lo thei si lo, Lalpa nena in inthlunzawmna ‘Rinna’ chu  tihchahsak tum chein  sawi(h) i ni mek a. A hma zawnga hnai renga i hriat Pathian kha hla ta riauin i hria a; i auh loh pawha i hnena thu sawi thin khan i auh pawhin chhang duh ta loah che i ngai a, rintlak loh zawk kha a rawn intirinawm ta zawk a ni. Tin, heti hi a ni a, i lo chau ta em em mai a ni. Hetih hunah hi chuan i chawlhna tlang thawveng atang khan chhukin kawr ruam i zawh tan ta a ni.

Chu kawr ruamah chuan phatsan ang hrimin khawhar takin i kal a, sawi leh tawn chu a lo dang ta. Pathian tih ve duh hauh lohten malsawmna an dawng zawk mah ani tih i’n hriat te, i tawngtaisak reng pawha i unau/nu leh paten Pathian an ngaihsak duh loh tlat mai te, khawvel changkang zelah i rualawhnain i duh ai thui a hnuk ta che te leh bawrhsawmna leh lusunnain a tlakbuak che avanga rilru keh darh veka i thut laite hian Pathian hnaih a har i ti a ni tiraw. Kohhran-a Pathian biak dan chuan i nun tuihal a chawm zo tawh lo hian i hria pawh a  ni thei. I tuina thlawp zo tur hmu zo lovin i tangulh pawh ani thei bawk. Englekhawle, i chau a ni; i thlarau a chau.

Thalai niha hmasawn tum ve bawk si chuan  duh ai thui pen a lo awl a, changkanna hian Kraws thawnthu hi a lo hliah hma hle bawk si. Mit leh beng chakna hian tlai tawk tih a nei si lo, khawvelin chu chu min hlui thur thur mai bawk si; a hma zawnga thlah zalentu che thlemtu-a kha a siruk lain a rawn thawk a, hlawhchham a tum tawh lo.I tui zawng, duh zawng, i chak zawng leh Pathian thu hmang ngei pawh khan a rawn veh thlem che a tan zawng a har a ni, ni e, i kawppuite nen lamin hmanruaah a hmang hreh lo. Kan tawrhna aiin kan lawmna leh hlawhtlinna hi hmanraw tha ani tih lah keini aiin a hrechiang. Chutiang anih avang chuan thalai tam tak, kumpui linglet, a sur a sa hnuaia rinawm taka rawng lo bawl thinte khan kut ni vangthla a lo thlenin zankhat thil thuah an chhandamna chu an bawh bo thin reng a ni. Ngaihsamna leh  phalzaunate chuan an ngulzem che a, mahni inthiam chawpin i kal zel chu a nih ber tawh hi.

Rinna chu phatsanin ramtiam chu i chan mai dawn em ni?

Duhthlanna chu i ta a ni. Mahse hei hi hre teh, kan retheih laia kan auh thin Pathian khan kan lo khawsak nawm ve tak hnuah hian kan Pathian nih a la beisei asin. Lungngaihna ruama min tanpui tura kan auh  Pathian khan hlim niah pawh kan Pathian nih a la phut a, natnain min tlakbuak laia a hnen atanga damna kan beisei thina khan kan dam sen lai hian amah kan auh zui a duh a ni. A tha lam leh a chhe lam kan chunga lo thleng zawng zawng hi amah kan hlatna turin ‘chhan tha’ a tling tawk lo. Kan chunga lo thleng apiang hi min hriatpui loh a awm lo, kan hmaa mi huai kal tate kha he hmunah ngei hian an lo ding nghet tawh; zam tur kan ni lo.

Mupuiin a note thlawh a zirtir ang mai hian Pathian chuan keimahni tawka kal dan min zirtir a, mahse min kalsan ngai si lo. Kan velah min vengin min awmpui reng thin.  Papay-a chuan a bialnu Olive-i hlim takin a rim a, Bluto-a a lo kal a, Papay-a chu a rawn sawisa ta a. Papay-a chuan a hneh dawn emaw tiin Bluto-a chu a’n bei ve a, mahse a ne pawh a ek lo; nakinah chuan a chak loh zia a hria a, spinach chu a ei a a lo chak ta a, Bluto-a chu a bin a bin ta mai. Mahni tawka chak intihna chuan a chakna spinach a theihnghilhtir a ni. Zion pana kan kal mek lai hian min beitu chu a lo thawk thin a, mahni chaknaa kan beih hian kan mualpho fo thin a lo ni- i rinchhan, ka rinchhan Lalpa anih chhung chuan kan dawl ngai dawn lo, i chak lohna hmang khan mi chak Lal Isua sawm zawk ta che, a hnehsak ang che.

Israel fate kha Zion tlangah inthawina hlan turin an kal thin a, kawngah harsatna tam tak paltlang a ngai thung. Kalkawngahte chuan an inhnem a, chau takin an kal hram hram thin. ‘Tahna ruam chu an zawhin tuihna awmnate an siam thin a…chakna atangin chak lehzualnaah an kal thin a…Zionah Pathian hmaah chuan an inlan theuh thin’. I tlu bo bik dawn em ni? Lalpa kha a ngai reng asin. Zing, chhun, zana danglam ve ngai lo, hmangaih avanga min en kham thei lotu Pathian hi he nun suar-ah hian i phatsan dawn em ni?  Zion tharah kan la chawl za ang. He hla hi han chhiar ve leh teh.

Life is easy
When you’re up on the mountain
And you’ve got peace of mind
Like you’ve never known.

But things change,
When you’re down in the valley,
Don’t lose faith;
For you’re never alone.

For the God on the mountain;
Is still God  in the valley.
When things go wrong,
He’ll make them right.

And the God of the good times
Is still God in the bad times.
The god of the day,
Is still God in the night.

We talk of faith,
Way up on the mountain.
Talk comes so easy
when life’s at its best.
Now it’s down in the valley,
The trials and temptations
That’s where your faith,
Is really put to the test.

This entry was posted on Sunday, January 23rd, 2011 at 6:00 am and is filed under Religion. Both comments and pings are currently closed.