NeLiCS ( New Life Charity Society ) chuan Mental Health lam zirtirna leh kaihhruainaah thahnemngai taka hma la in, Mizoramah mitin nun a hima a dam theihna hi a ngai pawimawh em em a ni. Tuna kan ram mihring nun hi a dam lo zawnga sawi chuan dam lo tak a ni kan ti thei ang. Hei hi a chhan lian tak ni a lang chu kan rilru puitlin leh insawhngheh hma a khawvel hmasawnna leh changkanna in min run nasat lutuk vang a tih theih ang.
Nu leh pate’n fate an enkawlnaah an nun hma lam tur an thlir thiam tawk lo em em a, mahni hmangaihte ngei hmanga doral insiam ta zawk kan tam hle. Thalaite zawna kan thlir chuan an nun beisei leh duh thleng zo lo, kal ngaihna hre tak tak chuang bawk si lo an thunghuk a, kawmchiana an rilru an phawrh tak tak phei chuan ram rorelna kalphungah te, kohhran lam hmalaknaah te, khawtlang in enkawlnaah te hian an lungawi lo mai ni lovin an thinrim hial thin a ni ber. Heng thalaite dinhmun hi chhutchian chuan, ‘Angry Generation’ ah kan awm mek tiin a sawi theih ang.
Mental Health lamah hian kan hriatna a la zau lo em em a, he lama hmalatute kan hmuh dan leh beisei dan pawh mangan thlak a la ni fo. Hengte avang hian tan lak a la ngai zual tak zeta, Mental Health zirtirna leh in enkawlna te hi mi tam tak tana malsawmna a nihna tur angin a chhawr tangkai tur mipuite hian kan la hrefiah zo lo hle a ni. Chuvang chuan he lama mithiam te pawhin kan thawhna tur ang takah hna kan la thawk hlei thei lova, mihring nuna rilru tihrehawm leh tina khawpa harsatna a thlen lohna tur leh harsatna a lothlen pawha hmachhawn dan thiam riauna nei tura zirtirna miin an lo dawn lawkna tura thawh hi kan tangkaina tur ni bera a lan laiin, harsatna vawrtawp an tawh hnu, a ngaihna awm tawh lo hial tura ngaihte hi kan hna hmuh an la ni ber a ni. Hei hian Mental Health zirtirna leh enkawlna kalphung kan la hriatthiam lohna chu a ti lang chiang hle a ni.
Mihring nun atana he zirtirna hlutzia leh tangkaizia hi kan la hriat tawk loh em avangin kan nitin hna leh tih tur tulah kan inhmang zo tlanga, kan buaizia thu kan inhrilh mawlh mawlh a ni mai. Chutih lai chuan kan rilru chuan chawmna leh enkawlna a dawn loh miau avangin a ril a lo tam a, a tamchhawl ta fo mai a ni. Chu chuan thawhrimna hi chawlhna nuam angin min hmantir thei lo thin. Thalai tih tur mumal hre lo, rilru dam si lo leh changkang nih duh em em si te hian thiam taka kawma chawmtu an mamawh hle tihhriatte hi kan mamawh ngawt mai. Nu leh pa leh fa te nunphurrit avanga kan inmawhchhiat mekna karah hian rilru fimputa nun dan thiam a har hle thin. Eng nge kan mamawh tak chu ni ta ang le?
Nun dan kan thiam loh avang leh in enkawl dan kan thiam loh avanga kum khat chhung leka Mizorama kan nun buaina dinhmun hi a lungchhiat thlak ngawt mai. NeLiCS Counselling Clinic hian Mental Health lam kan khawih kan tih rualin suicide lam hi khawih tel lo thei lo dinhmunah kan dinga, mite min hriatna tak pawh a ni ta hial zawk a ni. Hetiang a nih avang hian he Clinic ringawt hian kum 2010 chhung khan ‘Mahni intihhlum tum ngat chin’ hi mi 622 zet kan hmachhawn a, kan mi kawm te hi tumah an intihlum zui ta lo ni ah kan ngai. Kum 2010-ah khan kan hriat theih chinah mahni intihlum mi 96 + 1 (ama duhthu ni lovin, a pasal in a thihchilh) an ni a, kan hriat bak pawh hi la awm thei turah kan ngai bawk. ‘Aw Zoram nuam’ kan tih leh Kristian tlimpuite zalenna ramah hian mimal, rilru leh nuna zalen lo kan tam ta lutuk hi thilmak a tlinga, dawt ang hial a ni. Nuam kan tih ve hi a lo nuam lo nge? Kan Kristianna phek te hi keu that a ngai ta em ni hial zawk le?
Mahni intihlum 97 zinga hian Aizawl (Khawpui)-ah mahni intihhlum hi mi 53 an tling pha a ni. Hnam dang vai mipa 1 leh hmeichhe 1 an tel bawk. Mipa mahni intihhlumna chhan tam ber pawl chu ngaihzawngte nena inthen vang te, nupa tangthen vangte leh nupuite tlan vangte hi a ni. Mizo mipate hi kan zuau ta bik deuh emaw ni chu aw??!! tiin a ngaihtuah theih ang. Ruihhlo vang ti a chian theih chu case 2 chauh a awm a, chungte chu Zu in nasa nghei tumna lama tuarzo lova intihlum ta mai leh, Ganza in a rilru a tihbuai tak a vanga mahni hnukchhat ta mai chauh an ni. Kum dangah pawh lo awm tawh thin, runthlak em em mai chu kum 2010-ah pawh hian a thleng leh a, chu chu retheihna, khawsak harsat luat vang leh nupui fanau te chawmna tur lungkham luat vanga khawvel hmachhawn ngam lova, hun lo pawh tawi tak mai na hi a ni. Tin, Kristiante’n Pathian thu kan inzirtirna kawngah hian kan fimkhur lo deuh em ni ang? Pathian thu kalsualpui avanga mahni intihlum pawh kumtin deuhthaw an awm thin a, 2010 pawh hian an awm leh a ni. Thiltih tawh inchhir avanga mahni indahthat mai duhna hi chu a tlanglawn pawl a ni bawk a, record-ah hmuh tur a awm nual. Mizo society-a pawimawh ber ni a lang chu pa hrawn, nu hrawn, fa hrawn chungchanga inchhung khawsak kan rel dan hi a ni. A fel tawk lo tih a alang chiang khawpin a hriat, fa hrawn mahni intihlum hi a tam ber pawl an ni tlat mai. Pawn lam lan dan leh inchhungkhura kan landan hi a in ang ta lo thin em ni le? Hetiang khawpa nu/pa hrawn neite’n nun an thlakhleh loh mai hi le? Thil hote pawhina a tihhlim rual chauh kumtling lo naupang mai pawh rilru natna avanga an han intihhlum duh thin te hi eng ang fakaua nun hrehawm nge an hmachhawn ang aw, tu mawh nge ni ang le? Broken family atang hian khawtlang mualphona a thleng tam ta a, a la thleng zel dawn pawh a ang khawp mai.. Mahni intihlumte hi Inawkhlum an ni tlangpui a, hmanraw dang an hmante chu Chem hmang 2, Bomb 2, Tur ei 1, mahni inhal 1 te an ni.
Thalai Teenager (kum 13) atanga nu/pa valai (kum 45) thleng inkarah hian mahni intihhlumna hi a nasa khawp mai. A bikin vanglai tak kum 20 atanga 30 inkar-ah hian a tam ber a ni. Drugs leh AIDS ai hian thalaite nunna a suat hnem tawh zawk mai lo maw? He thil hi buaipui tham takzet a ni tawh in a lang, tan lak nasat leh zual a ngai dawn a ni. Intihhmuhna te hi a awm anga, intihhmuh nasat deuh thla te pawh hi a awm em ni chu aw? a tih thei. December thla hian hriat theih chinah an awm lo va, hmaih palh pawh a ni thei tho bawk. Zirlai intihlum thenkhat hi chu an chhungte leh an zirtirtute hian an tih tur hlen loh engemaw an nei ngei niin a lang, Selection test te hi fail theih a ni chiang a, mahse chhungte chu thu han hriattir ngam lohna hian chhan tha tawk a nei thei ang ngem le? Tin, inawhhlum der tuma thi ta mai naupang lamah an awm nual a, he an thil chin tha lo tak hi chhungte leh zirtirtuten kan ngaihven a pawimawh khawp mai.
Lutuak chu chawimawina tih hial an lo puttir thinna, kan Pi leh Pu te chungah hian kan nun a rawng lu ta deuh em ni chu le? Putar 3 zet mai chuan nunnin luat avangin a hun hmain an nun an lo pawt tawi leh ta mai a, an thatlaia an thawhrimna te chuan an hun hnuhnung lamah nawmsak deuhna pawh a thlen sak ta lo a ni chek ang, han ngaituah chian hian an lainat awm takzet a ni.
A pumpuia en chuan Rilru hrisel lohna, chhan leh vang mumal sawi tur awm si lova, harsatna ruk neih avanga damlo ngawih ngawih, taksa a lang thei si lo, khawl tha ber ber pawha an hmuh theihloh, natna thunun harsa tak mai, rilru chhungril fan ngut ngut, ngaihtuahna zawng zawng khera, eichhetu natna hlauhawm tak vei hi kan tam ta tak zet niin a lang. Hei hi kan thalaite suattu ber a ni chho ta mek a nih hi.
Kumin-ah pawh mi 7 an awm tawh nia record niin , an vai hian thlai/valai vek an ni. Kumin kan dinhmun tur hi eng ang tak ni ang maw. Mi puite hi harhchhuakin, a venna kawnga hmalak nachang hre tak ang i maw?
Similar Posts:
- Korean Flu-III
- A lanna tlang dang atangin
- Ka intihlum ve mai dawn
- Korean flu – II
- Nunna – Kan hlut lo tual tual
January 30th, 2011 at 2:33 am
e khai aw!
Report this comment
January 30th, 2011 at 2:41 am
a va rapthlak em! Damna duhin mi tam takin sum tam tak an sen laia mahni nunna mi heti zatin an chhat mai chu a va pawi tak em! Mitin hian kan inchhungkhur theuh vah tan kan lak a ngai a nih hi. Kuminah pawh 7 an awm leh tawh maw?
Report this comment
January 30th, 2011 at 2:50 am
Hei zet chu kan chet ran loh chuan ala pawi ang mawle. Ti tha in i ngaihtuah thui hle mai. Kan tuipui theuh thei ang em aw? Hetiang ang hi kan ngaihthah chuan tha lo dawn ania. Hnam fing kan ni ve tawh dawn lawm ni…..
Kan Kristianna hmelma lian tak pawh a ni thei e.
Ka sawi duh leh pakhat chu-Thupui fun tha tak post ho hi duh aiin a sei thin. Mi kan hman lo mai ni lo in chhiar te kan peih lo thei a. Thu tha post phei hi chu tawi fel at se,post tupa in vil tha mai sela te ka ti duah a nih chu.
Good Post.
Report this comment
January 30th, 2011 at 3:02 am
A hmasa in
. He thil hi ka vei tak a ni ve renga, a chhan awm ang i rawn tarlang nuala, tha hle mai. Khawvel hun hmawr tawh vang leh Setana chetna ang hian Mizo tam tak hian chuan kan ngai mai thin.Hei hi a pawi khawp mai.Ven theih a ni tih leh hmalak theih a ni tih hi in zirtir uar a va han tul tak em.
Thil 1 in lo chhiar loh takin Revd chuauthuama ziah SUICIDE chungchang, bengvarthlak mai mai.
https://www.zoin.info/mahni-inthat-chungchang/
Report this comment
January 30th, 2011 at 3:14 am
Post tha tak leh bengvar thlak tak a ni. Sawi ve niah nuah a rem em ang chu maw
Naupan lai atanga inchhung khura puitling lam thil inzirtirna awm loh vang te pawh a ni thei mahna. Tin, nupui/pasal nei tur te emaw, ngaihzawng nei tur te pawh hian chhut thui lem lovin kan nei mai thin niin alang.
Khawthlang lam ramah hi chuan ngaihzawng nei hman an ni em, ngaihzawng neih a tun dinhmunah a tha ber em tih te an ngaihtuah fel fai hmasa thlip thlep tlangpui awm e (a tlangpui thuah). Nupui pasal tur ngat phei chu, “Inngaihzawn lai ang a ni dawn si lova, kan inthurual/inrem thei reng ang em,” tih chhut uluk tak hi an ni tlangpui awm e.
Fa neih ngat phei chu a tlangpuiin an hmanhmawh lo khawp mai. Entirna pakhat kan sawi ang e. Ka thianpa leh ka thawhpui pakhat hian tun hma khan ngaihzawng nuthlawi a nei thin. A ngaihzawng chuan fa, phir mipa 2 neiin an 4 chuan an khawsa ho a, ka thianpa chuan a bialnu fate chu duat pawh a duat hle mai, an eitur thlengin rawng a bawlsak thlap thin a ni.
Kum 10+ an awm dun hnu pawh chuan an la inneih loh bakah fa neih dun chu khawilam a ni ringawt. Kan innel bawk a, a chhan ka zawt ta chawt pek a. A ni chuan, pawisa khelh zeuh zeuh a chin avangin fa an neih dun chuan chutiang chu anu atangin a chin ve palh a hlauh vangin fa a neih pui duhlo chu alo ni a. Nupui atana a neih duh hrihloh na chhan pawh chu pawisa hman a la thiam tawk lo ni a ahriat vang a ni. Tunah chuan engmah a lehpek awm lovin an awm hrang ta nge nge a. In dil kir tur leh han inchuh tur ro etc a awm lo reng reng, an kalna lam an kal hrang hmak mai a ni.
Naupang enkawl lam pawh peih chuan ka sawi leh ang hairehai
Report this comment
January 30th, 2011 at 3:22 am
A thui hle my..! Hlawkpui awk teng…
Report this comment
January 30th, 2011 at 4:03 am
Naupang inâwkhlum an awm an awm ta mai hi naupang thiam loh ni lovin nu leh pate thiam loh a ni e. Fa enkawlnaah tan lak kan va ngai nasa tehlul em!
A siamtu pawh zah zo tawh lova a nunna chhattu tluka khawngaihthlak an awm hauh lovang le..
Report this comment
January 30th, 2011 at 4:17 am
Khawvel hi a mak khawp mai. Mihring, hlim ve viau leh lawm ve viau niawm a kan hriatte hi an intihlum leh mai thin. A chhan lah chu a diverse thei viau bawk si, hei vang hian a venna lam pawh duan thiam a harsa viau ang. Ka ngaihtuahna ah chuan mahni intihhlum chhan hi chihnih in ka then a, pakhatna chu tum lawk awm lo, thinrim thut thiltih; pahnihna chu hrehawm ti ngawih ngawih reng..nun aia thih thlang zawk ta te.
Chikhatna khi chu ven a har ka ring.
Chihnihna khi chu a ven theih ang.
Mi rilru hrehawm em em, tumah (nu leh pa unaute, thiante hnenah takngial pawh) hnen a a chhan an sawi ngam siloh lai a psychiatrist an lo awm hlauh hi a tha khawp mai. Rilru tawt leh min hnawh rengtu sawi chhuah kha ven hawkna tham ani ngei ang.
Report this comment
January 30th, 2011 at 4:27 am
yeaaaaa how long will she wait for me?? yeaaaa how long is this post?
On a serious note..mizoram ah hian shrink hmuh te hi uar ve ila chuan suicide tam tak leh psychological buaina lam chi hi chu prevent theih a awm nual ngei ang.
Report this comment
January 30th, 2011 at 4:45 am
Report this comment
January 30th, 2011 at 5:29 am
‘Thalaite ….. rorelna kalphungah te, kohhran lam hmalaknaah te, khawtlang in enkawlnaah te hian an lungawi lo mai ni lovin an thinrim hial thin a ni ber. Heng thalaite dinhmun hi chhutchian chuan, ‘Angry Generation’ ah kan awm mek tiin a sawi theih ang’.
He lai thu hi chu mental disorder nen a inzawmna ka hre lo! Thalaite hi an mawl vak lo, thil hi an hre ve khawp mai. An lo ‘angry’ anih chuan a awm ka ti, lawmna tur em em awm si hek lo le..
Report this comment
January 30th, 2011 at 5:52 am
Report this comment
January 30th, 2011 at 8:04 am
A dik khawp mai. “Kan tih ṭhin dan ani lo…chutiang khatiang…blah…blah…” tia pawngpaw ṭan ṭung lo hian, tunlai khawvel kalphung mil zela kan in her danglam ve hret hret a ngai. Naupangte ngaihpawimawhna chang kan hriat hunah kan ziawm ve mahna
Report this comment
January 30th, 2011 at 8:25 am
Kan hnam Mentallity hi a vaih deuh thaw hian ” Mental Disorder” a ni mai lawng maw..? Income nei silova, engkim neih tumna kan neih tlatna hian-tute pawh rilru a diklo a ni.
NREGS leh BPL inhlawhnaah te hian Mobile Handset tha tak tak neilo hi kan awm manglo.A nei leh afford ho in an neih ang neih vek tum ho hi a diklo ..aaa..a tam lutuk..
Tleirawl thawmhnaw manto tak tak ha ho te hi-In lama eichawp zawnga inhlawhfa Fa te an bang chuang lo.Rualawhna rilru Na an nei nghal-Rukruk,Sex atanga pawisa lakluh hrehlohna..a hring
Pathian thu hi No.1 a kan dah hma chuan kan ram a dam ka ring lo a ni.
Report this comment
January 30th, 2011 at 8:35 am
Mak deuh chu,Ka Inbula mi ,Sawrkar Driver nupui Zin tur hi a fanu nen zanah an lo leng a,thenawm kan nih avangin min nel viau a,’Lal-U, i kawr ka lo en,” a ti a.Ka entir a.Pahnih a phihthla a,Ka pheikhawk pakhat nen,”Hei hi ka zinnaah ka lo hawh lawk’ Tih leh fun that a rual ta mai a. Zahthlak ka tih zawng tak a nih avangin chhanvak ngaihna ka hrelo. A zin lo haw hnu chuan mi pe ta mai lo a. Ka zu lam a,” Thawmhnaw in hak tawm hi ka ti ngailo a,ka duh tawh lo a nia aw.” tiin tha takin ka hrilh a. Mirel hrep nia maw le. A Fanu kum 18 mi chuan ,fa 3 nei, contractor a nei a, a lawm hle bawk nia.An nihna diktak hriain pawm ngam se,a zahawm zawk hle dawn si a.
Report this comment
January 30th, 2011 at 8:46 am
Sap hovin min chhuahsan a,Autonomous District Council hnuaiah awlsam takin a theiin pawisa an hui tan a,Hard earn ni lova sawrkar atanga pawisa kan neih tan atang khan-rual awhna sualin ka hnam rilru a hruaisual tan-Heng nghawng vek hi niin ka hria vawiin ni a kan hnam nun tichhetu hi. Mi neihang nei phalo, thangthar-tunlai generation a awm ho hi lainat awm tak an ni..
Post tupa..ka Tui lutuk dawn, Post chen zet komen pek a awl mai dawn alawm le..Ka thlawp bon top e.
Report this comment
January 30th, 2011 at 11:41 am
Angry generation tih a nih chhan zawk chu (Thalai fel tak2 te huam lovin)tunlai thalai Its my life titu, chhungten an hau chu sawi lo an thiltih pawh an sawisel ngam tawh loh khawpa kalsual ta te, kan hnam zia aia khawthlang & khawchhak zia kan inchhungkhura senglut tum, rilru hel tlat te sawina a ni zawk. Tin, he post hi Article pangngai ka rawn paste a nia, a thui ta viau mai a, min hrethiam dawn nia. Suicide detail: https://nelics.blogspot.com -ah a hmuh thei ang.
Report this comment
January 30th, 2011 at 11:51 am
Kumin a intihlumte hi hmeichhia 2 & mipa 5 an niin 1 tuia zuangthla tih chauh lo chu inawkhlum vek an ni. 2 hi zokhua lam mi niin a dang zawng chu Aizawl vek. A… a veitu tan chuan vei nahawm tak a ni.
Report this comment
January 30th, 2011 at 12:43 pm
A bengvar thlak in a pawi thin ngawt mai hetaing ang thu te han hriat hi chuan.
Nia, mahni intihlum duh khop a thil a om toh hi chuan.
Mahni theuh in enfiah a pomoh khop mai,
Mi te an nihna ang tak a en thiam a poimoh bok.
Space hi in pek thiam hi a tul hle mai.
Tunlaia thalai (tleirawl tete a bik in)mahni inzai ching te ho poh hi ngaihtuah tham tak an ni toh.A suicidal lem loh an ti a mithiamte zir naah chuan marawh chu hetiang ti duh tur khop a nun hman chu nun hreawm ve tak a ni(ka thil tawn toh a nia ka hre chiang khop in ka hria).Tunalaiah EMO life an tih san mai mai a mi tam tak in, chuti ngawt a ni lova, damlohna chikhat a ni tih in hriatpui a inpuih hram hram hi a tha khop mai..
Report this comment
January 30th, 2011 at 2:38 pm
#7 tsa…ka support khawp mai i thil sawi khi
Report this comment
January 30th, 2011 at 2:48 pm
Amitabh Bachchan pawh kha “angry young man” an ti thin :D..a film chan thin ho vang in. Thangkura chu an ti ve lo
Report this comment
January 30th, 2011 at 9:55 pm
Khawvel thang chak tak ah hian kan Zoram pawh a thang chak em em si a economic lamah kan thang ve si lo te hian henh thil hi a thlen ve tho ka ring ma mai.
post tha ka chhiar puat
Report this comment