mi(sual).com

VALENTINE`S DAY SPECIAL

“A sen ngei ni se, a puan pawh savun tha chi ni ngei se”
“Enge a sen kher? A vang ngawt ang!!”
“Vang mahse, ka hmuh hma chu ka zawng char char mai ang!”

Phone ka dah hnu chuan ka ngaihtuah zui ta zel a, a mawi dan turzia te, thianten an hmuh hun pawha sawi tling tur. Itsik duhtu tan pawha itsik tham. Min duhsaktu te tan pawh a lawmpuiawm. A ni, chuti ang chu a ni ka duhzawng chu.

Zawn pawh ka zawng nasa na rawh e, ‘India is my Home‘ ti ve chin ngat khan ka zinna apiangah ka zawng zel a, chutah chuan a awm ang an tihna apiang chu khel lovin ka pan chat thin. Ka suangtuahna ram a luah hneh em em a, ka duh ang chu a awm a nih ngai chuan a man lam ka ngaihtuah lo. Ka nei ngei tur a ni. Thingtlangpa mai mah ni i la, chumi ka neih theihna a nih dawn phawt chuan chhungkaw budget buai phah vekna tur pawh ni mahse ka lei ngei dawn a ni, tiin a inngaihtuah a. Tawn ni reng a her thei si lo.

Kum a vei meuh cuan thiante`n ka la nei lo tih an hre ve reng mai si. Fiamthu thawh paha a buang te, a dum te hi lei ve mai rawh, a in ang vek a lawm an tih pawh chuan,”Aih!! A sen a lawm ka duh!” tiin ka la chhang ta fan a. Dik tak chuan kei pawh ka phang tan tawhin ka inhria. Ka duhzawng hi a awm lo a nih chuan enge ka lei tak ang?? Ni lo, a awm ngei tur a ni. Khawiah emaw chuan a awm ang ka la hmu lo mai mai a ni.

‘A zawna zawng ta nafam chuan he khawvelah hian a awm a nih ngai chuan ka hmu dawn a, ka nei ngei bawk ang’ tiin ka la inpet ruh sauh sauh a. Beidawn san mai ka tum lo. A sen ringawt chu h muh chang a lo awm ve a, mahse ka lung an dum zo si lo. Dawr changkang tak tak te pawh ka tlawh ve malh malh bawk e. Delhi khawpuiah meuh pawh thiante phatsanin ka lo zawng tawh a, ka lungdumtu ka tawng thei si lo.

Vawi khat chu ka thianten ka duhzawng ang deuh chu an hmuh thu min rawn hrilh a, thawk pawh la lovin ka pan nghal vat a. Chutah chuan a ni, ka lungdumtu chuan mi lo nghah ni!! A mawi tawk chauhvin a sen a, a puan lah duhthusam. A len leh tetah sawisel bo. Ka lung chu a dum chiang a ni. A man ka pek zawh chuan dawr ka chhuah san ta nghal a. a en a, ka en ning thei lo, nei tura ka beihna te ka ngaihtuah pawhin a phu hliah hliah a. ka la bei nasa tawk lo hian ka hre mah zawk. Ka thian ka hmuh apiang hnenah chu ka thianpa thar chu ka hmuh a. Mawi an ti. Ka hmel an en a, an mawi tih a zual. A ni, ka hlim em a tin a ni.

“Aw, ka wallet sen te, i thianpa hi nangmah avang hian a hlim a, a nui asin. Nang pawh mi vannei i va ni teh lul em!! Nangmah thlahlel ngawih ngawihtu i tawng si a. Tunah chuan hlim takin kan awmdun tawh ang a, i vullai leh i chul hnu pawhin i thianpa hi i kiangah ka awm reng ang a. Tuma tihnat ka phal lovang che. Ka kalna apiangah ka hruai ang chia, thian kan ni si. I hlim lohna tur engmah a thlen ka phal lovanga, i nat ai ka tuar anga, i nat ai pawh ka thi mai ang.

“Ka hmuh tirh atang che leh tun thleng hian ka ngainatna che hi a la ngai reng a, pun belh tur chuang a awm tawh si lo. I tello chuan engmah ka dawn si lo. Hrilin sawi thiam ve la chuan maw nang paw`n sawi tur i haih hi ka ring bik lo asin. i bula ka hlim vang tal pawh hian i hlim ve ka ring thin a sin. Lungawilohna tam tak pawh i nei ve ti raw. Vawi khat ka thlauh palh che avang khan min ngaidam hram dawn nia aw. Ka duh vang reng a ni bik lo a nia. Kha mi tuma i lungawi lo hmel pawh kha ka hmuh hmaih lo asin.

“Engtik ni ah emaw chuan maw, lohtheih lohna avanga kan inthen hun pawh a la awm ang a. Mi tu emaw ta pawh i la ni ang. Chutih avang pawh chuan ka lawm tho vang. Ka lung i dum si a. Mahse chung chu a thlen ka phal ngai lovang. Ka lak atang hian tumahin an la hrang lovang che ang a, ka veng tlat zel ang che. Chuti ang hun a thleng palh anih pawhin min dem bik suh ang che awa, ka tihpalh vang liau liau ah min ngaih sak la, i bula awm ka nin ngai loh kha i hre reng thin dawn nia.

Kei pawhin ka dem lovang che. Kan hma lam hun tumahin kan hre si lo. Vawi khat ‘ka wallet sen te’ i ni tawh a, chu pawh chu ka tan chuan lawmna a tling tawh a sin. Thianten an duhzawng an sawi apiangin chhuang tak chungin ‘Kei pawhin Wallet sen te chu ka nei ve tawh a lawm’ ka ti thin ang che. Kan inthen anih chuan ka ngai ngawt ang che ang a, mahse i lakah chuan ka vui ngai lovang. Ka lung i dum si a. Kei mi tawng hi i vannei asin.”

Ka en a, ka en nawn leh a, ka en ning thei lo. Banga sana a lo rik chuan zing dar 3 a ni tawh tih ka hre mai a. Ka Wallet chu lukham hnuaia dah pah chuan dawhkana thlalak in hung chu ka en a, “Nang pawhin ka lung chu i dum a sin!!.. Mahse…mahse…” ka sawi zawm thei lo. Bianga mittui luang zung zung chung chuan ka muthmun eng chu ka ti thi a. Tawnmanga tawn tur pawh dawn chang lo leh a tuk zing ni chhuak chuan enge a rawn thlen dawn tih pawh hre chang lo chuan ka hnar ta bawrh bawrh a.

A dum chu ka hua a, a pawl erawh ka lawm
Nangmah ti hlim thei tu ai chuan i tih hlim theihte ngai pawimawh rawh
Chu chuan hlimna nasa tak a rawn thlen dawn si a..

Similar Posts:

• Thadâng – Tetei Râlte
• Khawnglung min run dawn em ni?
• Hmeichhiate hi
• Thlasik lunglen
• Thalaite u…

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Friday, February 11th, 2011 at 10:00 am and is filed under Luangliam, More than words. You can follow any responses to this entry through the RSS 2.0 feed. You can leave a response, or trackback from your own site.