Zaipawl ruahthamloh…!!!
Pawl li kan zir kum a ni ta in ka hria (upa ni awm tak hian ‘ni ta in ka hria’ ka’n ti ve leh ngawt thin a); mi fate iangin thang lian uak uak lo mah ila, ‘thangkhat lian’ a liam ve mai ti tih dawn tlat! Minute sawm chhung chawlh/banlawk lai a hun kan hman dan kha a ngaihawm thin. Ngai teh! keini, banlawk zaipawl member-te chu kan zirtirtu te min request liau liau in kan dinna hmun theuh ah hla rem turin kan ding thap a. Khatih hun lai a kan veng a hla lar ber: ‘Aw ka dam chhung ni te hai lo te’n a liam zel e’ sa tur in.
Kan zaina stage hi Khuanu’n kan tan liau liau a A ruat lawk tih a mawi a ni. Soprano dinna tur kan school office ruahtui far vanga in siam tuihawkluankawr lai takah an ding tlar tham a. Keini bass ho erawh tuihawkluankawr kotlang ah kan ding tlar thung! Stage cheimawi tur kan rawih buai lah a ngai hek lo; Khuann’n a duh taka a duan Vailen-hlo leh Japan-hlo, an phak tawk a mawi a par an vulna a ni. Tin, remchang tak bawk in kan zirtirtute zawng zawng in office tukverh atangin kan zai chu an thlir theih tawk chiah lehnghal!
Kan zai tan dawn tak tak ta maw…tih ah conductor in a theih ang tawk a tlawk in a’n ‘Doh-Ray-Me’ vang vang hnu ah ruahthamloh hlamawi chu kan sa tan ta. Kan sa zel a, a thunawn kan thleng tur chiah hi kan zirtirtu ngaihthlak chak ber a ni a. Duhthawh tawk, ka aw a lang lo bik ang tih hlauthawng tak siin ‘chuvangin…’ kan ti thum chher chher zel thin kha a nia(h). Aw thum duh luat vang a hrawk a zat palh vaih paw’n kan in sum hram hram thin.
Kan sa zel. Thianpa, tenor specialist kan nei; kan zam lo. Midang in a sakpui pawh a ngailo, ama aw special ngei mai, a mal te a a lo lan raih khan a aw ‘sial-na ti-‘sialtu a ni zawk! Ngai teh! mitin nghahfak a nih ang reng in a hun a lo thleng tih ah ‘ngai rawh…’ tih mai tur ‘ngai grawh…’ a’n ti kher thin a. Kha ringawt kha kan zirtirtu te lawm ber pakhat a ni Mak ve tak a ni kan thiana kha, ‘r’ lam na tur apiang ah khan ‘g’ hi a lam tel zel mai a. Entirna’n ‘lo kal rawh’ tih mai tur ‘lo kal grawh’ ti talh mi a ni reng reng a. Lalrosiama a ni a, kan koh fiamna pawh ‘Lalgro’ kan ti nghe nghe!
He hla hi…
Hla ropui tak a ni a, ka theih tawk ah a awmzia ngaituah in ka chhut ve neuh neuh thin. Enghelh nei miah lo a, kan phak tawk leh thiam tawk he hla kan sak thin lai kha beng ah hian a la cham reng a; midang te iangin zaithiam teh lua lo mah ila, ka sak apiang in ka nun a thu a sawi tam zia ka hre nawn fo thin. Isua Krista lo kal lehna nghak a, Ama duhzawng nun zir a, nitin A kraws pu a hun hmang te hian, kan nghah ber hi kan hlamchhiah fo thin em le? He hla hmang hian thiam ang tawkin infuih thar ang u hmiang…
“Aw ka damchhung ni te hai lo te’n a liam zel e,
Pan leh vanglaini te pawh chuai in a her liam a;
Sanna leh hausakna te’n kum tam a daih ne’m le,
Saruak mai a kir leh in kan herliam thin.”
Hun hi kan kut a awm a nih tlat loh avangin kan panlai nun; hla siamtu pakhat in ‘lawmna a khat rilru thianghlim’ ti hial a a sawi pawh hun in a her liam pui a. Hlim tak leh enghelh nei miah lo a hun kan hman lai te kha hmanni lawk a lang ni mahse koh kir theih a ni lo. Chu-achhap-ah kan duh leh beisei ngai miah loh te’n kan nun min chenchilh chang lah awm chamchi a; sanna leh hausakna duh in kan thawk a, a then in an zir mek bawk. Pathian a rinna nghat thiam lo mi tan phei chuan chu duhamna leh san duh luat tuk vang chuan nun hmang khawlo in, sualah an tluk phah fo thin. He lei kan zinna ram ah hian kan tun hun theuh hi hmang thiam a, min siamtu duhzawng a nun kan hman a tul tak zet. ‘Ka lo ti ta lo kha aw…’ ti a, sawt tawh silo hian hun kan hmang fo ang tih ka hlau hlel lo e. Pathian tana hun hmang hman lek lo te hian kan buai thin em le?
“Lalthuthleng var hma ah hnam ze tin kan inkhawm in,
Nunna bu a ziak ang a ka hming an lam hun chuan;
Lawm avang a mittui nen tlantu chibai bukin,
A ropui tur zia chu aw ka sawi thei lo”
Ringtu nunah hian ‘duhtawk chin’ a awm thei lo a, ‘zo tawh’ tih a awm thei hek lo. Kan hun hman zelah min siamtu duhzawng kan nunpui a tul fo. Hmasawn nun hi Kristian nun a nih vangin, tirhkoh Paula ngei paw’n tiam chin lam a pan talh talh thu min hrilh lawm lawm reng a nih kha. Chuvangin lawm avang a mittui nen tlantu chibai buk a, hlimna leh lawmna zam vel na hmun, ropuina lalthuthleng hma a hlimna tawp ngai tawh lo nei a, chhandamtu kiang a kan chen ve ngei theih na’n, Ama tan I in serh hrang fo ang u. Lungngaih aia lawmna par vulna ram ah, kan hmangaih kal ta te nen a Lal kan fak hun tur nawm dan tur hi sawi hian a siak lo reng a ni tiraw…
“Lal Isua nei silo a thlafam I chan ni chuan,
‘Khawngaihin kawng min hawn rawh’, tap chungin dil mah la;
‘Tu nge ni ka hrelo che’, tih hnawl na an ka chu,
A rapthlak tur zia chu aw ka sawi thei lo.”
Inchhir a sawt dawn lo, tuma’n kan indil sak thei dawn hek lo. Kan damchhung a Ama duhzawng a kan nun ang khan Ani chuan chatuan chawlhna leh lawmman min pe mai dawn si a. Engtiknge he khawvel kan zinkawng hi a tawp dawn tih tuma’n kan hre lo a, tin hria ila nun hian awmzia a nei lo ang a, nun a nuam bawk lo ang. Chuvangin barakhaih a phut zawk ai chuan in ring reng a awm a, Ama lawm zawng leh midangte tana malsawmna nih hi ringtu te tan a nitin nunah a pawimawh ber fo. Kawng awlsam min siam sak tawh hi ringhlel lo a, Ama’n min duhna ang ngei a nung a; he lei thihna rapthlak tawh nak a lai a chatuan a boral na lamtluang zawh leh tur phei chuan kan pamhmai lua tih hre chungin, min hmangaihna chhanglet in, a thu min pek te zawm hram hram ang u.
“(Chuvangin) in peih thuai rawh,
Chhumzing ah a lo kal dawn;
(Ngai rawh) tap chungin I in leh lo kalsan a tul tawh ang,
(Tahzet chuan) khawngaih hun a liam tawh ang.”
Khawngaihna hun a liam hma a chhandam ka ni tih chiang a Isua Krista lal a neih a tul. A ropuina famkim nen a inthuam a a lo kal hun ah tap chung a nghak tu nilo a, lawm chunga nghakhlel taka Ama hnen a cheng tur a in rin a hun. Thihna hlau tawh tawp lo tur a kan nunna Krista-ah chuan thuhruk a awmin, Amah ah chauh chuan chatuan nunna a awm tih hria a, nun fimkhur tak a Ama tan chuah a kan hman zel ka va duh tak em.
Similar Posts:
- Thadâng – Tetei Râlte
- Mizote hla ropui!
- Isaac-a anka nem hriattur a awm reng dawn
- In renchem
- Di Mampuii
February 19th, 2011 at 8:24 am
Ka chhiar chhuak dap e, a ngaihnawm in a tha a . Lung a ti leng hle mai .
Report this comment
February 19th, 2011 at 8:27 am
Dr. Mahminga zai lai hi a hmuhnawm asin
He hla hi kan sak lar danah hian a phuahtu Dr. Ramdinthara Sailo hian duh tawk loh lai a nei nual a, a hova kan zaipawl lai khan a duh dan ang ngeiin kan album-ah kan thun nawn leh ngat.
Mahminga chu thu pawh i lo thiam hi mawle! I lo inthup mai mai a nih hi.
Report this comment
February 19th, 2011 at 8:27 am
.. Keipwh he hla hi ka hla ngainat ber pwl a mi a nia. Lal Isua nei si lo a.thlafam i chan ni cuan..khwngaih in kwng min hwn rwh.. Tap cungin dil mah la. Tunge ni k hre lo ce. Tih hnawlna anka han rapthlak tr zia cu..i ingaihtuah nwn theuh ang u.. Chatuan chatuan rei tr zia ngaihtuah bwk u la
Report this comment
February 19th, 2011 at 8:39 am
#2 : Thianpa, Dr.Mahminga hian lung a va tileng ve ! Maneihi nena “Khawngaih takin kawng min hawn rawh” tih lai leh “Tunge i nih ka hre lo che” tih lai kan inchhawn tak dan te kha.Lalnunkima tum leh lutuk, aw chhang ta siin, “Thiana, nangma’n ti daih rawh” a’n ti te te a, a inthlahrung leh deuh siin a hnu ah muang fan raihin,”I duh chuan…” a tih lai te, …record han ngaihthlaka RI CHUP lo awm thin te kha…
Dr.Mahminga : Hlimawm takin i thupui i hawng a, i hla thlan tarlangin i sawi fiah leh a, sermon khamawm loh zetin i chhunzawm a nih hi. Thu i thiamin, i sermon mawlh mai hi a ropui hle mai. Carry on.
Report this comment
February 19th, 2011 at 8:55 am
He hla hi kan va sa khat tawh ve le… Hmanlai hla a chang leh tan dawn der a lo ni maw?
Report this comment
February 19th, 2011 at 9:50 am
lung a van tileng e, he hla chu aa…sermon thra hle bawk..Pu mahminga nge nge..
Report this comment
February 19th, 2011 at 9:55 am
Report this comment
February 19th, 2011 at 10:01 am
Student’s Christian Movement-ah tum khat chu pawh luihin Bass zingah ka tel ve a, ka thiam lo buruh seh. Ka sa ve pawhin ka inhre lo, ka chhiar thum deuh vel a ni mai.
Dr Ramdina hla hi a tha thei ka ti hle.
Report this comment
February 19th, 2011 at 10:18 am
Report this comment
February 19th, 2011 at 10:41 am
Zaithiam lo no.1 niin ka inhria,ka zai vel peih lo law law mai!a thawventhlak phian!
Report this comment
February 19th, 2011 at 11:40 am
Sir Muante (#2)leh Sir Thiana (#4), ka lawm tak zet e. Zirtirtu, zaithiam, thuziak thiam… ka nei che u hi vannei ka inti hle mai.
#6, Ka lawm e, mahse ‘PU’ em em chu a…
Vai zinga ka zai hian hei hi ka hrechhuak thin: ‘Zaithiam hi Pathian thil thlawn pek a ni a, ma’rawhchu, Pathian hian kan aw mawina nge a lawm, thinlung a tih tak meuh a kan fak na zawk hi?’
Thiam leh aw mawi vang nilo in, kan LAL hian a phu vang zawkin i fak zel mai ang u.
Report this comment
February 19th, 2011 at 12:23 pm
Ngaihnawm hle mai, a tha bawka. He hla phuah tu hi ka mi ngaihsan tak pakhat a ni.
Report this comment
February 19th, 2011 at 1:23 pm
He hla chu a va lunglenthlak ve, 94 kum khan kan lo sa ve ngang ngang tawh thin, kei zaithiam tih takah khan a tenor ah ka’n awm ngeia(h)
Report this comment
February 19th, 2011 at 1:42 pm
https://www.youtube.com/watch?v=tYYViEpxFpg
Report this comment
February 19th, 2011 at 2:26 pm
Ka tap ngai vak lo va, ka tap duh zen zen lo bawk. Mahse he hla chang hnihna
Lalthuthleng var hma ah hnam ze tin kan inkhawm in,
Nunna bu a ziak ang a ka hming an lam hun chuan;
Lawm avang a mittui nen tlantu chibai bukin,
A ropui tur zia chu aw ka sawi thei lo
Rilru taka ka sak chang leh ka ngaihtuah chang chuan….ih..ka tap thin…lawm vangin.
Report this comment
February 19th, 2011 at 2:34 pm
Report this comment
February 19th, 2011 at 3:29 pm
@muantea: #2 …“Aw ka damchhung ni te hai lo te’n a liam zel e,”
helaia hai tih hi, a phuahtun engtin nge a phuah? Theihai anga hai kum nei lova liam zel a sawina nge ni a. Chiang em em, mi chanve tan pawh a hai theih loh, liam zel?
Report this comment
February 19th, 2011 at 6:04 pm
He hla hi avan han mesaging tak aw….. Alo kal lehna chanchin hi a pawimawh a ni… Tui pui deuh deuh ang u… Tha khawp mai..
Report this comment
February 19th, 2011 at 8:42 pm
Report this comment
February 19th, 2011 at 8:58 pm
@17 (Ozima) : Muantea chu ka lo chhan khalh ngawt teh ang. “Theihai”-a “hai” ang hi a ni e. Theihai hi kum tin a rah ziah lo tlat mai pek a, a rah loh kum chu a “hai” kum an ti. Infiam laia i “hai” a nih chuan i la bansan lo naa, engemawti chhung chu i inring lo emaw i chawl lawk emaw tihna a ni thei ang. I/kan dam chhung nite erawh hi chu chutianga han haisan theih chi a ni lova, chawl lovin a kal, a liam zel e….tihna a ni.
Report this comment
February 19th, 2011 at 9:07 pm
Ozima @17, min zawt lo naa ka’n chhang ang che. “Aw ka damchhung nite hai lo te’n a liam zel a…” tih hi hla thu tluangtlam pangai, hriatthiam awl tak a ni. hai => chawl, thulh.
Eg : kei chu ka hai…
Inbiak remna anga inkah hai puan a ni… “aw ka damchhung nite chawl lo te’n a liam zel a…” tihna ang tho a ni e.
Pu Dr-a chu thuziak lamah pawh Dr. tling phak i lo nih hi!
Report this comment
February 19th, 2011 at 11:11 pm
#21(Pu-kawlhawk) Ka lawm tak zet e.
In hnung ka rawn zui tan ve dawn a ni a, in fakselna leh fak(derna) te tangkai tak a hman ka lo tum zel ang…
Report this comment
February 19th, 2011 at 11:30 pm
@22 Dr Mahming, rawn tizel tak tak rawh khai. I komen te atangin mi puitling, thu&hla chhiar tlak pai i ni tih ka hria. Ni e, infak chang a awm ang a, inkalh bawp2 chang pawh a awm ang. Inzir tlang vek kan ni e. Nang aia thu thiam leh post tha thei vek anga mi i hmuh chuan insitnain i khat thin ang. Mahni insitna hi min tithuanthutu a ni fo. Keini aia thiam leh ril chu an awm ngei a, mahse, chu2 insit nana hman tur a ni lo. Tun aia a let 100 pawha thu thiam mah ila, keini aia thiam leh ril an awm tho tho. Chuvangin, luhchilha beih ve mawp2 mai tur…
Report this comment
February 20th, 2011 at 12:30 am
#20 & #21: zawhloh tur tur muantea ka lo zawt pek a ni maw. pu thiana leh pu kawla ka lawm e.
Report this comment
February 20th, 2011 at 12:36 am
He hla hi Dr.Ramdinthara phuah ni in ka hria, a hla phuah ho a bu a an siam kha middle sikul kan kal lai ani daih tawh ang a… Harmonized leh unharmonised tekha an dah hrangin ka hria, a music leh thluk lam hrethiam miahlo in a hla thu vel kha chu ka chhiar ka chhiar ve thin.
Teenager nih lai hi chuan kan hriat phak tawka mi ngaihsanawm tehi kan ngaisang thina, chung zingah chuan Dr.Ramdinthara hi ka Idol ve ania. Khatih hunlai vela a chanchin thu thang ka hriat danah, a doctor hna sacrifice-in missionary ah a inpe niin ka hria.
Report this comment
February 20th, 2011 at 12:47 am
Ozima, ka chhang tawh che emaw ka tia a lo lut lo anih hi!
Funny, tunah chuan missionaty-in Solomon’s Island ah a awm alwm, misual senior a nia mahse hei a reh rei ta riau mai.
Report this comment
February 20th, 2011 at 12:53 am
@muantea iti lawmawm reng reng e. hman deuh khan mi inhnial(fiam) ka hre fuh a, kan dam chhung nite hi liam zut zut, hai theih reng reng loh anga sawi kha an awm bawk a, phuantu phuah dan tak ka hriat bik loh vang a nia ka’n zawh ni. Dr. Ramdinthara hi chu ngaihsan awm khawp mai.
Report this comment
February 20th, 2011 at 12:56 am
@funny, Dr.Ramdinthara hi chu pa inngaitlawm leh hawihhawm, mi belhchian dawl, keimah ang mai a ni… a hla te khan zoram khawvel a dengchhuak in mi thinlungah thu a sawina sa hlawm a nia.
Report this comment
February 20th, 2011 at 6:45 am
Dr. Mahming, thu leh hlaa i duailoh zia a va lang chiang em! A ngaihnawm hlimawm hle mai.
Report this comment
February 20th, 2011 at 12:23 pm
#23 & #29…Ka va lawm tak em.
Nia, tunlai hian ka awmna (Bangalore) ah thalai inkawmkhawm chang hian in fak (kan phu a nih phawt chuan) kan uar thar a. In rel leh insawisel (kawng tam takah a tul em em tho a..) reng aia, infak leh inchawikan tawn te hian kan nun ah awmzia a neih thui zel ka ring thin. Faksel te hlei hlei hi pawm thiam zel ila, hma kan sawn leh zual ngei ang…
Tun tum ka thuziah chu, Dr Ramdinthara Sailo hla phuah thiam zar ka zo a ni ta ber e..
Report this comment