mi(sual).com

Pathian hi a phu tawk angin kan fak tawk zo lo tih hi nang leh kei tluka chiang kan awm lo. A mi enkawlna Bill hi min thing dawn se kan phurh zawh rual a ni lo, boruak man nei lova kan han hip luh kawk kawk thin pawh hi leia ralah chuan a lo u viau. Kan thlai bul tinah hian tui pe dawn ila dai chhuah sen a ni hek lo, tui tin khat hi han leih ila ‘huau’ a ti a a chim chin chauh hi a huh  tlurh ringawt; bul tina tui min peksaktu chu Pathian bawk. Thim tieng tura eng kan leina man huin ni eng man hi min bill dawn se, tui kan leina man huin ruahtui min bill bawk se  a hautak hle ang.

Han dam sen viah hi chuan dam hlut ziate hi kan manghilh dawn dawn mai- dam loh hautak ziate hi, natna avangin chhung tluk ta ila kan sumpai lakluh hian rei a daih mawh khawp ang; mal tluk pawh hi kan phur tawk viau zel.Kan chuanna lirthei break fail lo mai pawh ni lo kan lam pana lirthei lo tlan break fail tur thleng hian min vensak a. Tihpalh awm se nunna chan ila ‘a vanduai a ni’ tih bak hi kan chungchangah miten sawi tur an nei chuang lo.

Nang leh keia hnuk chhat tur hian kan lungphu vuak hi a kat thui teh chiam a ngai lo, vanneih thuah thihna em thlen lo pawh ni se kan degree, kan thiamna leh finna bawh bova mi ang lova min siam tur hian kan thluaka thisen zam chhete chat keuh hi a tawk. Pa pakhat ka hria, a zan mu tur a nupui nen tha takin an ti ti a, a zing tho chu ‘tun tum ka zin chu ka va haw har tawh ve’ tih ringawt kha a rawn sawi a, chu chu a damchhunga a sawi ber a ni ta mai.

Zualko thu leh thu thinthawng laka min huma rala khata kan laichinte chanchin a chhe lam thu benglut tur awm lova ‘kan damtlang e’ tih thu kan dawn theihna hi khawi atangin nge? Mite chunga thil rapthlak tak thleng hi kan hmaah tunge min lo thenfaisak a, tunge mi nunrawngte kawng pumpelh tura i hmangaihte hruaitu? Mi vanduaina chhim pha lova muangleia min sasengtu hian kan mamawh kan thlen nghak lovin a thlawn liau liauvin min hlui bang lo anih hi. Lang leh lang lo liama kan fate tualchai him dama min vensaktu pawh hi tu dang a ni hlei nem.

Pathian hi kan tih seng hauh lo, a thupek lah kan zawm seng hek lo. Mahse kan tawngkamah erawh hi chuan kan fimkhur tur a ni. Thenkhat Pathian zahna nei miah lova tawng chiam an awm thin heng mite hi an tluang ngai lo tih kan dam chhung ni tawiteah pawh hian fiahna tur an thahnem mai. Zu rui thin leh kohhran hnar lo-ho rau rauah pawh hian chhungrila Pathian hlauhna nei leh nei lo chu an hriat khawp mai. Mi pakhat ka hre leh pek- sawrkar officer  a ni a , ‘tu mah ka hlau lo, Pathian pawh ka hlau lo’ tihte hi a tawng duh dan a ni a, Pathianin a zuah rei lo khawp mai. Heng, ‘Pathian rawng ka bawl ve peih lo-Ka ngaihsak peih lo’ tihte hi sawi hauh turah ka ngai lo. Tawngkama Pathian sawichhiatna hi Pathian duh loh ber niin ka hre thin. Kan fak peih lo anih pawhin ngawih mai tur.

Tui taka kan han mu a, dam taka kan han tho leh te, kan ei duh zawng kan han vam hmak hmak mai te, kan chak zawng thawka zokai perhte ang maia kan han ri phat phat mai te, kan nunna atana kan mamawh apiang Pathianin min lo hlui reng maite hmuh pawh a a tur ve renga ngaia lawmthu sawina chang hre lo tam tak an awm; heng mite hian harsatna, vanduaina leh tawrhna an hmachhawnin a tur ve rengah an dah thiam mawh khawp. Lawmthu sawi thinte hlei hlei hian thil duhawm lo pawh hi an dawngsawng thiam zawk. Khawvel thila zakhawrawi tak Pathian tana vai deuh ruaite hian dam chhung ni hi an lo chhiar thiam lo deuh nge nge a lo ni.

Buai hi a tha, Pathian be hman lova buai erawh buaina lu bul a ni. Kan tana kan buai hman chuan min buaitir theitu tana hun rei lote han serh hran hi tihmakmawh a ni. Kan buaina tam tak hi chu Pathian tana kan buai peih loh vanga lo thlengte hi an ni hlawm, khawvel hmasawnna hian buaina a keng tel a kan buai a zual zel  dawn pawh ni fa hmiang. Kaichhan leh lawmrual tha a thuma zau binga mal tlat ngam an than a duang mek; huhova kan intuichhuahnain mual min liam san a hmasawnnain min thehdarh mek; hebrai mi sal thingthi anga mahni awmna pindana Zion hre rengte kha a ni hlu tulh tulh tur chu.

Kan ngaihsak hman loh-a hian ngaihsak hman lo thei lo hian min siam anga a tlai ruih si ang tih hi a hlauhawm a ni. Aman a remti bawka pa pakhat chanchin ka’n zep leh teh ang, ani erawh chuan mual min liam san tawh. ‘Hei  i dam chhung kum chhutin a chanve aia thui mah tur chu nangma tan i hmang tawh a, tun hnu  lam chu Pathian tan aw’ tiin Pathian ngaihsak turin ka sawm thin a, ‘ka duh tawh tak tak a sin’ tiin min chhang thin. Pathian hnena inher luhna remchang tak a lo thleng a, chhim ve turin ka sawm a. Mahse ‘contract hna chhete ka hmu ve a ka la ngaihsak hman lo’ a ti mai a. Contract hna a thawh chhung  zawng chuan zu leh sa a tlan leh a;  a hna thawh hlawh a lak hma kar chuan cancer-in a na tih an hmuchhuak ta hlauh mai a, an han inenkawl tak tak chu-a pawisa lak khan a inenkawlna tur a lo daih hauh lo. A inchhir thu min hrilh bang lo, mahse Pathian khawngaihna chuan a la um zui reng a, natna khumah a chhandamtu chu a tawk ta a ni; tichuan, hlim tak mahse inthlahrung ru tak chuang siin a dam lai ni chu a vai liam ta a ni.

Pathian ngaihsak hi a lo tha dam chhung ni la la paw’n a tha. Kei zawng zir thiamnate hian Pathian lehkha thu hi lo su deuhin Pathian ropuina lo dal deuh dawn ni se-aa deuh tak pawha Pathian ngaihsak hi tha ka ti zawk e a, Aman min ngaihsak em em si a.

This entry was posted on Sunday, February 20th, 2011 at 1:16 am and is filed under Religion. Both comments and pings are currently closed.