mi(sual).com

1^st. Tuesday:  Kolasib district-a Meidum khuaah ONGC chuan tuialhthei lai chhuak turin lei verh hna an tan ta; a tanna hunah hian ONGC-a hmarchhak bialtu, Joy Solu chuan khawl tinungin, Directorate of Mineral Resources Jt. Director, Dr. H.Lallenmawia’n a telpui. Joy Solu chuan, tuialhthei lai chhuak tur hian lei chhungah metre 4,500 vela thûk laih a ngaih tur thu a sawi rualin, metre 3,500-ah chuan oil emaw gas emaw laih chhuah an beisei thu an sawi.

 2^nd. Wednesday:  Kolasib – Bairabi inkara Chatuan Leimin tia hriat bulah Bairabi lam pan pick-up 207 a chesual a, a mi phurh Tuichhuahen vela feh tur leh hmunphiah kêk turte zinga 31-in hliam an tuar a, thi erawh an awm lo. Hliam tuar na zualte hi Aizawl lamah phurh chhoh an niin; hliam tenau dangte hi Kolkasib damdawi inah dah an ni thung. Kolasib DC, Niharika Rai-in hliam na zual pathumte hi Rs. 2,000/- theuhin a kan a, Kolasib damdawi ina enkawlte pawh Rs. 500/- theuh a pe bawk. Motor hi Dorothy, Kolasib Convent Road ta niin, a khalhtu hi Lalrinzela, Meidum a ni

3^rd. Thursday: Khawbunga thlanmual hlui, ringtu hmasa mi 15 lo phûm tawhna chu Mini-Sport Complex atan siam a nih dawn avangin an ruhrote phawrh a niin, Upa Thanhlira’n hunserh tawite a hman hnuin Pathian Veng thlanmualah phûm leh nghal anni.

4^th. Friday:  ‘World Cancer Day’ a ni a, he ni pual hian Aizawlah pawh a vawi khatna atan Mizo High School-ah inkhawm buatsaih a ni a, Parliamentary Secre­tary Lal Thanzara’n a telpui. World Cancer Day hi kum 2000-a Paris khawpuia World Summit Against Cancer inkhawmpuiin  February ni4-a hman tura a rel angin, khawvel pumah hman thin a ni.

 5^th. Saturday: Khamrang leh Kawnpui inkara New Khamrang-a F Mal­sawma huan enkawltu, Ngurthandanga (56), Sairang Dawrveng chuan a nupui Lalsangluri (41), Ratu khawchhuak chu thlam kalkawngah a vawhlum. 

6^th. Sunday: Central YMA hnuaia ruihhlo dotu pawl Central Anti-Drug Squad chuan Edenthar YMA duty-te nen tangrualin Edenthar Vengah Sapzu IMFL (McDowel) um 224 an man. He zu neitu hi excise leh YMA te pawhin an lo man fo tawh Vanlalliana (Vanlala) a niin a tlanbo nghal.  CADS hian kumin January thla khan ruihhlo chi hrang hrang Rs.11,01,190/- hu man tawhin, hengte hi: No.4 – Hawng 7, Can 88, Caps 49, Parvon Spas 26,528, Nitrosun mum 26 a ni. Hei bakah hian excise/police hnenah mi 23 an hlan tawh a, home-ah mi 7 an dah bakah mi 132 te chu nun an siamthat nan counselling pek an ni. February thla kal mekah CADS-te hian No.4 – Hawng 8, Can 19, Parvon Spas 2,356, Rs.5,89,775/- hu an man tawh bawk.

7^th. Monday: Agriculture committee room-ah ICAR (Indian Council of Agriculture Research) buatsaihin Agriculture and Allied department hotu hrang hrang te’n ‘Interface meeting’ an nei a, hetah hian Mizoram chhungah tlangram lo neih chu 13% laia a tlakhniam thu tarlan a ni.

8^th. Tuesday: Bunghmun Police-te chuan an thu dawn bawhzuiin, Dengsur khuaah-ah naupang kumtling lo pawngsualtu nia puh Biaktincheu (42) s/o Zamluai, Myanmar chu an man. Biaktincheu hian Dengsur khuaah hian In leh lo neiin, nupui fanau pawh a nei a. Tunhnai khan hmeichhe naupang, kum 11 mi chu a khawih a. Tun hma pawhin vawi thum vel lai a lo khawih tawh niin naupang hian a sawi. Hun rei tak chu naupang hian a sawi ngam lova, tunhnaia a khawih leh avangin a chhungte chuan an hrechhuak a, Bunghmun Police hnen-ah an report ta a ni.

9^th. Wednesday: MNF leh MPC aṭanga Aizawl Municipal Councillor te chu Hotel Ritz-ah an inhmukhawm a, Mizoram Sorkar-in State Finance Commission a din loh avanga AMC tan hnathawh a har thu an sawi.

10^th. Thursday: Department hrang hranga sum khawihtu, Drawing & Disbursing Officer-te leh Aizawl khawpui huam chhunga Treasury Officer-te tan, Finance Department chuan Vanapa Hall-ah seminar an buatsaih. Seminar-ah hian BC Medhi, IRS, Asst. Com­missioner of Income Tax (TDS), Guwahati; KL Mang, Income Tax Officer (TDS), Guwahahti leh LH Rosanga, Asst. Commissioner of Taxes, Mizoram ten, “Tax Deduction at Source” (TDS) leh VAT chungchangah zirtirna an pe a ni.

11^th. Friday: Daia Bamboo Chipping Unit, Dapchhuahah mau phel siamna khawl (Chipping Machine) an enchhin a, Industry Minister S. Hiatoa’n a hmanpui. Mizoramah hian Bamboo Chipping Unit pakua awmin, Mizoram sorkar chuan an bul tanna atan cheng nuai 66.95/-
theuh a pe a ni.

12^th. Saturday: Bairabi bul Tlawng luia Marboat kaiah Lalawmpuia (20) s/o Lalmuanpuia, Pehlawn leh Lalrosiama (23) s/o Lianzuala (L), Rulpuihlim-te chu an tlahlum. An ruang hi an bul hnaia awmte’n la chhuakin Bairabi YMA-te’n kuang siamin an khua ve ve panpui an ni.

13^th. Sunday: Mizo puanthuitu lar, RC Khuma (70) chu Septicaemia natna avangin Durtlang Hospital-ah a boral

14^th. Monday: Aizawl Civil Hospital compound  0PD Bldg. pan pheinaa AMBULANCE MZ01B-8639 chu amaha lirin, Zachunga, MADC Marshall (68) s/o Mangchuta (L), Saiha Bazar chu Damdawi In Gate-pui bul zun ina a zung zo rawn chhuak chu gate ban thlang zawk leh bangah a zuk nawr chilhin ka pawh chhawn lovin a boral nghal. A ruang hi a chhe hneh hle.   Zangnadawmna atan Zachunga fate zinga mi hi sorkarin hna pek a tiam. Bus hian Maruti car a su chhe bawk.

 15^th. Tuesday: Zosap Missionary Pu Zawna (Rev. Basil Edward Jones) nupui Pi Zawni (Margaret Jones) chuan  Mission Veng Biak In sak mek Library a hawng. Hemi pual hian British pound 5,000/- a thawh nghe nghe. Rev. Basil Edward Jones (Pu Zawna) te nupa hian Mizoramah kum 1942 atanga 1953 chhung khan rawng an bawl a, an fate 3 pawh Mizorama an awm laia piang leh baptisma chang vek an niin Mizo hming an puttir vek bawk. Pu Zawna hi cancer natna avangin Bangor, Wales-ah kum 2002 December thla khan a thi a ni.

 16^th. Wednesday: Barak Area hnuaia ringtharte nupui pasal neih chungchang avangin  Kabuganj Mission Compound-a thawktu chhungte – Pastor G.S. Ropianga leh Santikumar Singh-te’n Meitei ringlo thalaite kut an tuar.

17^th. Thursday: Art & Culture Dept. hnuaia thil hlui leh record pawi­mawh vawn that tur, ur thianghlimna khawl, ‘Fumigation Chamber’ chu Archive Hall-ah Art & Culture Minister, PC Zoram Sangliana’n a hawng. Fumigation Chamber hi Narang Scientific Pvt.Ltd., New Delhi atangin Rs. 6,08,029 sênga lei a ni a. Chamber-ah hian lehkhabute chu chemical chi hnih – Para di-chlorobenzene leh Thymol hmangin ni 6-8 chhung ur tur a ni a, ṭum khatah lehkhabu 150-200 a ur theih a ni.

18^th. Friday: Aizawl Civil Hospital chu tehna hrang hrang hmanga ngun taka enfiah a nih hnuah, International Organisation for Standardization (ISO) certificate, ISO-9001:2008 hlan a ni. Heti hian Civil hospital hian hmarchhak biala International Organisation for Standardization (ISO) certificate hmu hmasa ber a ni.  ISO hi khawvel ram 161 telna niin, khawvel pum huapa thil changkang tehna siamtu a ni. Kum 1987 khan thil ṭhat dan teh­na ISO hi hman tan a ni a, an tehna standard azirin ISO-9000, ISO-9001, ISO-9004, ISO-19011-te a awm a; ISO-9001:2008 hi damdawi in chungchanga hman bik a ni.

19^th. Saturday: Chief Minister  Pu Lal Thanhawla chuan Shillong-a Govt. Mizo Boys’ Hostel-II Building thar Lachumeire a mi leh Mizoram House sak thar Cleve Colony a mi Mizoram sorkar PWD enkawl chu a hawng. Mipa hostel hi kum 1994 khan Chief Minister hian Brig.Ṭ.Sailo hnen atangin a hmun hi a lei a, kum 17 hnuah building hawn theihin alo awm ta a ni.

20^th. Sunday: Synod Moderator Rev.C.Lalsangliana chuan chawhnu leh zanah Zemabawk North Kohhranah rawngbawlna a nei.

21^st. Monday: Champhai district Sazep khuaa C .Vanlalvunga in (Assam Type) a kâng a, C Vanlalvunga fate pahnih – Lalfakhlena [8] leh Cindy Lallawmzuali (6) te an kâng hlum.

22^nd. Tuesday: Kristian Thalai Pawl din champha vawi 57-na a ni a; he ni hi branch tinte’n mahni remchan dan ang angin an lawmin mi dang tan an theihna hrang hrang an hlan bawk.

23^rd Wednesday: Pu Mordekhai Ngurbawiha Hlondo  (78 ) Tuikual chu Cancer natna in  a boral.

24^th. Thursday: ZOPPEN Club-in Mizo tawng thumal thar eng emaw zat an siam leh hman atana an rawtte dahkhawmna, ‘Mizo tawng thumal thar’ tih lehkhabu an buatsaih chu Aizawl Press Club-ah Prominent Journalist, C Lalkhawliana’n a tlangzarh.

25^th. Friday: Mizorama district SP, battallion Commandant leh unit hrang hranga SP-te chuan   Police Headquarters-a Arya Mess-ah crime review meeting an nei a; nikum January leh kumin January inkara thil sual tih (crime) thlen dan khaikhina; nikum aiin kuminah thil sual tih vanga thubuai ziah 23.48%-in a tlahniam niin an tarlang..

26^th. Saturday: Anti Tobacco Squad, Mamit District bultumin Mamit khawpuiah Vaihlo Do Rally neih ani. He Rally ah hian Mamit khawpui chhunga School naupangte bakah Zirtirtute nen mi 600 chuang an tel a ni.

27^th. Sunday: Lunglei district-a Ramlaituiah Zosiamliana in,  Assam type a kang a, thi leh hliam an awm lo. Amherawhchu, bungrua erawh chu a kangral vek thung. Kangmei hi zan inkhawm hlana chhuak anih avangin thelh theih a ni lo a ni.

28^th. Monday: Assam Rifles Lammuala hnimlem, artificial turf phah zawh tak chu   Chief Minister Pu Lal Thanhawla chuan a hawng. He artificial grass chunga inkhel hmasa ber atan Chief Minister XI leh Speaker XI te’n football an khel a. Chief Minister team hian Speaker team hi 2 – 1 in an hneh a ni.

for admin, ni 21 a naupang kanghluma a upa zawk khi kum riat a ni. Ka dah dik thei lo. Hei aia tihdan awlsam a awm ka ring deuh tlat. Min lo hrilh leh tu a. Hemi min hrilh avang pawh hian ka lawm khawp mai.

Admin note: Sawi zing pawh ni mah i la, chhana, Mizoram Diary i rawn submit thin avang hian i chungah kan lawm hle a ni. Chuan i zawhna ang hi chu a rawn lut fo tawh a, hetah hian kan lo chhang mai a nge midangte pawn an hriat duh chuan. Smileys (emoticons) vang hian number thenkhat bracket chhunga dah leh smiley code a lo in ang theia, chuvangin a number ai khan emoticon a rawn lang zawk thin a ni.

Entirnan – ( 8 ) hi a pangngai (inzawm) a in ziah duh chuan hi a rawn lang daih ang. Heti hian ti mai ru – [8]

Similar Posts:

• Mizo hnam zingah Gangte telh an ni ve ta
• Zanah inkhelh theih nan Lammual-ah êng dah a ni ang – Lal Thanhawla
• NLUP atan Rs 100 crore hmang hman ta lo
• Mizo Day 2010
• Lalsawta’s resignation not accepted: Mizoram CM

Recent Posts:

• How to locate your misplaced Android phone
• KUT HNATHAWKTU TE TANA HAMTHATNA
• Mizoram Electric Power Dinhmun Leh Hmalakna Te:
• YMA
• Hringnun thim lam

This entry was posted on Tuesday, March 1st, 2011 at 11:00 am and is filed under Mizoram. You can follow any responses to this entry through the RSS 2.0 feed. You can leave a response, or trackback from your own site.