Kum 2005 YMA inkhawmpuilian, Zawlnuama palai rorelte chuan kumpuan atan ruihhlo do an pawm a. 2005 October-ah hawn a ni a. Kum 1989 vel atangin Mizo thalai ten ruihhlo chin an intihhmuh a, ruihhlo hmansual vanga thi leh ramtuileiloa awm phah pawh an tam hle a ni. “Demand a awm chuan Supply a awm” tih a nih angin, ruihhlo tihching an tam ang zelin a zuartu pawh an tam a. Ruihhlo chi tinreng, zu leh damdawi ruihtheih chi (drug) in Mizoram a chiah hneh hneh em avangin, do rem tur chuan thapui thawha beih a ngai a. YMA chuan thapui thawhin an bei ta tak tak a. CYMA chuan ruihhlo do bawhzui kawnga laipui pu atan squad a din a, a hmasa ber chu- Mizo Tlangval (MTV) a ni a, a dawtah Supply Reduction Service (SRS), tunah Central Anti Drug Squad (CADS). Heng squad hian ruihhlo do kumpuan a nih atanga vawiin thlengin ruihhlo zuartu leh ruihhlo ching dawklakte man chhuakin, heng mite zinga tam tak chu sawrkar thuneitute rorelna hnuaiah kuntir lo vin, anmahni (CYMA)-in tha an tih angin ro an relsak ve mai thin a ni.
CYMA kan hlau: Kan hlau YMA Ruihhlo do bawhzui chungchang chu kan sawi tam tawh a, tun atan chuan khiti zawng khi tawk se la; Tunlaia Saikhumphai thil thleng leh Rangvamual /Phunchawnga Burma Mizo unaute hnawh chhuah chungchangah, ka mimalin emaw, human rights pawlin emaw CYMA chethleihluakna dodal zawnga engmah kan tih loh avangin eng emaw ti tura nawrna leh demna kan tawk nasa hle a. “YMA hian mi sawisak theihna leh hnawhchhuah theihna dan a nei em ni? Mi an sawisa a, an hnawt chhhuak bawk a. Misuala puh pawh, ram dang mi (foreigner) pawh, dan bawhchhia an nih chuan, an chungah dan kengkawhtu ten dan angin action an la tur a ni si a. CYMA hi dan kengkawhtu leh dan hmanga roreltu ang hrimin an che a, 2005-06 vela Ruihhlo do bawhzui vanglaia, ruihhlo zuara puhte leh ruihhlo ngawlveite chunga YMA chet hleihluakna in khak thin a, engati nge tuna kan khawchhak unaute chunga an chetdan hi insawisel loh? Burma Mizo te hawtu inni ve em ni? Nge CYMA in hlau?” tia min ankhum bawrh bawrh an tam a ni.
‘Ni e, kan hlau a lawm. Dan chunga leng CYMA an ni miau a. Hmanah chuan kan at huai a, hlauhawm chin chhinchhiahna pel rawka CYMA chet hleihluakna kan sawisel vangin yellow card min pe a, mi dang pawh an pe teuh a, kei phei chu kan in chhung ngeia yellow card min rawn petu pawh patling sawm rual an nia, chutah pawh ka lo mawl fal bik a. YMA chu vantlang behchhan pawl pakhat mai a nih avangin hlauh nachang ka la hre chuang lo va, YMA dinchhan leh a thiltum ka ngaihtuahin hlauh turah pawh ka ngai lo va. Chuvangin YMA dan (anmahni an inpek chawp) bawhchhiain kan la foul zel a. Red card min pe a nih kha!
Tin, YMA hian mi sawisak theihna dan an nei a ni chek ang chu: kan hriat theuh angin an sawisa mai a. Mi hnawchhuah theihna pawh an nei a ni bawk ang chu: kan hriat angin an hnawhchhuak hnem tawh em mai! Dan chunga leng tawh chu engtin nge keini, eng thuneihna mah nei lo, eng thiltihtheihna mah nei hek lo, mahni phak tawk tawka Indian Constitution bulpui, Fundamental Rights humhalhtu pawl tetham takin kan khak ngam teh lul ang. Tichuan kan ngawih tlawk tlawk a, eng nge lo thleng leh dawn tia nghah chawrh chawrh bak tih theih kan nei lo, kan ngam hek lo,’ tiin ka lo chhang thin a ni.
Dan chunga leng an nih finfiahna: Central Young Mizo Association (YMA) hi dan chungah a leng a. ‘Dan chunga leng YMA’ tih hi thu dik tluantling a ni. A chhan chu YMA chunga lungawi lo, an chungah YMA te dan bawhchhiaa thil an ti nia hria ten, dan hmanga police hnena First Information Report (F.I.R.) thehluh tum an awmin, Dan kengkawhtu police ten, “YMA chu kan ngam lo,” tiin F.I.R. an lo register ngam thin lo a ni. Hei hian YMA chu dan chunga leng an ni tih a lantir a ni.
Police leh Excise ten search warrant tel lova mi in dap (check) theihna an neih loh laiin YMA chuan an nei a, an dap mai a. Dan chuan mi vuak a phal lo va, YMA chuan zu zuar te, ruihhlo ching dawklak te, dendrite hnim te, commercial sex worker te, rukru tenau te (rukru lian chu-politician leh sawrkar official, contractor leh supplier lian, dik lo taka mipui chhiah pek tlingkhawm eirutu te hi an ni) an duh tawkin an vaw thei a. India leh khawvel ram danga mi ten unau kan ni tih min hriatsak, Burma rama kan chhulkhatkualpui, Mizorama awmte hnawh chhuah theihna dan pawh a nei a, an hnawt chhuak thin a nih hi. Heng hian YMA chu dan chunga leng an ni tih a en tir.
Dan chungah YMA a leng a ni tih lan fiahna chiang tak dang leh chu- Tunlaia mi tam takin an sawisel huai huai, Tawngtai Bethel Camping Centre, Chawnpui-ami chu kan hriat theuh angin, YMA-in khawtlang nun thianghlim siam an tumna kawnga khawtlang tana mi hnawksak, ruihhlo ngawlvei leh CSW te an dahna a nih vangin a support-a. Inmates te chu YMA dah an ni emaw, nu leh pa thenkhatin Pathian thu nena inenkawlna emaw an ti a, an fate enkawl harsa an dah emaw pawh ni se, inlak chhuah theih loh tluk a ni a. Camping Centre inenkawlna chhiat zia hria, nu leh pa thenkhatin an fate lak chhuah leh an tum a, an lo phal lo va, Criminal Complaint siamin Court-lamah an zualko thin a ni awm a. CYMA hotu ten Tawngtai Bethel Camping Centre hotute hnenah, Court kohna lehkha (summon letter) ngaipawimawh lo turin an ti a. Chuvangin Court kohna mai mai chu Centre hotu ten an ngaipawimawh lo va, an kal ngai lo. Hei hian YMA chu dan chunga leng an ni tih a en tir.
YMA hruaitute tawngkam kan hriat thin chu- “Dan kan hlau lo. Tuma’n kan chungah engmah an ti thei lo. Human Rights pawh kan pawisa lo va, Human Rights Activist te pawh enga tan mah kan ti lo” tih a ni thin. Hetiang a nih avang hian, Human Rights pawl kan nih angin tumah kan tanpui ngam lo va. Mi tu emaw, YMA duty ten an chungah dik lo taka thil an ti nia kan hriat, Police-hnena zualko mai tura kan tihte pawh, Dan chunga lengte chuan “Human Rights-ah min hek a, Police-ah F.I.R. theluh i tum vei a, anni nge thiltithei keini tih i hre mai ang,” tia a hma aia nasa-a an chunga hlei an lo len leh thin avangin, Police te ang thoin, tumah kan tanpui ngam lo a ni.
Kohhranin a hlau: Dan chunga leng YMA tih ka sawi duhna chhan chu- Democracy kalphungah ‘Dan’ a lal ber a. Tumah dan chunga leng an awm lo’ tih tawngkam kan hre theuh ang a. Dawt muhlum a ni. Tin, “Dan hmaah mitin kan intluktlang” tih pawh hi YMA dan kenkawh mekah chuan a dik lo. He ramah hian dan a lal ber lo. YMA thiltih a nih tawh phawt chuan thil thalo a nih tih chiang taka lang pawh ni se, sawrkarin a khak ngam ngai lo. Kohhran phei chuan tualthah pawh a thlawp emaw tih mai turin, Ruihhlo do bawhzui vanglai khan, ruihhlo zuara puh mi eng emaw zat tihhlum an ni a. Eng kohhran mahin- “Nunna leh thihna hi nunna petu Pathian kuta awm a ni a, misual pawh ni se, keini lo tihhlum hi a dik lo ve…” tia tawng chhuak an awm lo. Pakhat temah an awm lo a ni.
Sawrkarin a hlau: YMA chak viau hi sawrkar chak loh zia lanna a ni a. MNF party sawrkar emaw, Congress party sawkar emaw pawhin an thlawp zia an puang mai thin. A nia sin. Khawi ramah pawh sawrkar a chak loh chuan vantlang emaw, sakhua emaw behchhan pawl an chak thin tih a ni a. Sawkarna vawnfung chelhtu zinga mi, MLA, minister leh chief minister ten, vantlang hriata YMA an thlawp thu an han puang ngat hi chu an nep zia an puang a. YMA in sawrkar a thlawp tur zawk a nih laia sawrkar zawk in a han thlawp tlat mai chu, sawrkar chak loh zia, sawrkar chak loh vanga vantlang behchhan pawl chak an nih zia a lang chiang em em a ni.
Thudik an hua a nih chuan an hua a ni mai: Dan chungah YMA an leng tih hi thu dik a nih vangin, YMA member leh hruaitute tan huata lak chi a ni hauh lo. “Ni e, kan leng a lawm, tun aia kan khawtlang nun a lo thianghlim zawk nan, Dan chunga lengin, khawtlang thatna tura kan hriat angin thil kan ti a ni. Hetia dan chunga leng a, dan lo anga thil kan tih loh chuan sawrkarin zu zuar te, ruihhlo zuar te, Burma Mizo te a ti rem thei si lo va…” an ti thei lo a nih chuan, Dan chunga an len loh zia tal an insawi fiah turah ka ngai a ni.
CYMA hian Sakhua hial pawh an diriam ta em ni? Hei em hi chu finfiahna ka nei lo a, zawhna leh ‘niin a lang’ tiin ka’n sawi dawn a ni: Tunlai Phunchawnga thil awm zia nia lang chu- CYMA-in thuneihna a kengkawh deuh ber niin a lang a. Zu leh ruihhlo do a chak theih nan, Mizo Insuihkhawm Pawl (MIP) din a ni a. MIP hian CYMA-ah zu leh ruihhlo zuarte an thlen thin niawm tak a ni. Chutiang chuan Burma ram sawrkar chhiat vanga mipui an inhek nuai nuai ang maiin, CYMA–ah an inhek nuai nuai a. Sawkar tha lovah chuan mi hi an inhek nuai nuai thin. Chutiang khawtlang, ram leh hnamah chuan mipui nun a ralti a, mimal inhuatna vangin misual loh pawh tihchhiat an ni chawk thin. Chutiang chu tha ti lovin Phunchawng Local Council secretary tanglai chuan remna leh muanna a awm theih nan, India danpuiin a phalsak angin a thil vei zawngte Press Conference koin a au chhuak a. Chu chu CYMA ngai huain, August 10. 2013 khan an hnawt chhuak ta a ni.
Khami ni khan CYMA chuan Phunchawng khuaa a tul tul ti turin, Aizawl khawpui chhunga YMA Branch te hnatlang a ko a. Mi 70-120 vel an thawk chhuak a. Hnatlang zinga tel ve ngei ten an sawi danin an hnawh chhuah tak kha an kohhranin Crusade an neih lai a nih vangin Biak inah a awm a, Biak ina a awm lai chu an ko chhuak a, Chaltlang YMA Branch, Phunchawng Section Office-ah an ko lut a. “YMA ti mualphotu” tiin an beng a. Diriam takin zawhna tam tak an zawh hnuah, khua leh tui a nihna, in leh lo nghet a neihna, a fanu kum 9 mi, 2008-a motor-in a chilhlum lu a phumna, khawtlang, Pathian leh a kohhran rawng a lo bawlna atanga an hnawh chhuah thu an hrilh ta a ni. Hetah hian “Eng Pathian nge i biak?” tiin vawikhat ai tam an zawt a. “Kristian te Pathian bia ka ni” tiin a chhang a. Deusawh nan “Ram hnuaiah va Belthel ila…” tepawh an ti a ni.
Heihi a tha lo tak zet a. Mi pangngai chuan zu leh ruihhlo zuar te, dan phal loh thilti zawng zawng (eiruk hmang pawh telin) chu kan dem vek a. Dan bawhchhia pawh ni lo, (dan bawhchhia pawh ni se, danin a chungah ro a rel tur a ni) CYMA duh loh zawng a sawi vanga a sakhaw biak lai hmutsit niawm fahrana diriam chu a dik lo hul hual a ni. Kristan biakin atangiin an ko chhuak a, Kristian sakhaw zuitu a ni tih chu hairual a ni lo. An haider lui a, eng sakhua nge a biak tih an zawt hi a serious lutuk! Lal Isua, a chipuite ngeiin misual tawpthanga puh a, an diriam laite pawh min ngaihtuahtir rum rum a. Mi tam takin kan hlauh em em, CYMA hruaitu ten an din hual laia a hlauh tur zia ka ngaihtuahin keipawh ka khur hial a ni.
Tin, heihi zam hauh loin ka sawi duh. CYMA in Mizoram zu leh ruihhlo zuar an thenfaina kawnga an thiltih thenkhat hian, Lal Isua zirtirna a kalh fai vek a. Chuvangin Pathian Isua hming lama; mipui hnena “Min lo tawngtaipui rawh u,” an tih h ti tawh lo se ka duh. Dik tak chuan Kristian thurin pawnah, dan chunga lengin khawtlang then thianghlim hna an thawk a, Kristiante thurin, tehna diklo thei loa kan pawm, Bible chuan “Tupawh dan ngaithla duh lova hnuchhawntu chu a tawngtaina pawh tenawm a ni,” a ti thlawt a. Pathian hmaa kan tawngtaina tenawm a nih loh nan, kan thiltih leh tawngtai a inhmeh em tih ngaihtuah hi a pawimawh hle a. Rilru fel lo pu chunga tawngtai hi, Van Pathian chhan duh chi a ni lo.
Similar Posts:
- Engtin Nge An Fihlim Theih Ang?
- Ruihhlo do… Heti zawng hian…
- SRS tih tawp a ni ta
- Drugs – Hremhmun Sipai
- CYMA LEH RAM LEH HNAM HUMHALH
August 14th, 2013 at 7:16 pm
‘Comment chauh chhiar teh ang’ tiin ka keu a, comment a lo la awm lo
Report this comment
August 14th, 2013 at 7:41 pm
Mizo Tlangval(MTV)tia invuah ho chanchin hi chiang deuh zawka hriat chakna ka nei…sawi thei mai kan awm em?
Report this comment
August 14th, 2013 at 8:15 pm
Ekhai, lung a leng tlat. Misualho in dam maw? Nizanah ka mut hmunah ka ngaihtuah vang vang a misuala kan han titiho lai kha ka ngai ta tlat mai nih chu.
Chu chu Hriatpuina ang deuhin ka han dinpui ve a ni.
Report this comment
August 14th, 2013 at 9:49 pm
Mizoram hi “Lawr primary” aka literate (Ziak leh chhiar thiam) ram ang hu in Nazi style politics pawi zia hrethiam an tlem.
Report this comment
August 14th, 2013 at 11:29 pm
A lehlam zawnga ngaihtuah chuan a sawi dik ve khawp mai.
MTV ho kha YMA in ruihhlo do tura pawl a din anni takzet em aw? An man tum khan hnamdang deuh anni hlawm khan ka lo hriaa. Amahi pawh hi man tur list-ah an dah nghe nghe a nih kha. Chutatanga hetianga intilar chho ta kha a ni reng a.
Mahse, Kristian sakhaw bia anih avanga Phunchawng veng pa deusawh taka ramhnuaia tawngtai pui tura an sawm hi erawh tak tak a nih ngai chuan a pawi thui ve khawp ang.
Report this comment
August 14th, 2013 at 11:34 pm
CYMA hi kan Sorkar chak tak hian a khak ngam lo nge nia tun thleng mai a ala ngawih mai mai ni, Dan lo ang in an che (CYMA) tih hi a hre ve ngei awm si a, Mitha leh dan lam a kan mithiam tamtak pawh an tawng duh lo nge ni a Ruatfela Nu sawi ang khian CYMA hi an hlau zawk
Ruihhlo do kawng ah chuan do rem theih a ni lo tih chu kan CYMA ho pawh hian an hriat ka ring. mahni chhungkua ah theuh a thatloh zia in zirtir ila, a intu an awm loh chuan tuman an zuar paih(peih?) chuang lovang
Mahni chhungkua fa te pawh zilh tha thei lo a kawngdik kawhhmuh thei si lova ruihhlodona kawng a phur viau leh tha thawh tha viau ho hi miten kan hnunglam a tang in min nuih tih hria ila, mahni chhungkua member chenpui ngei te pawh i thunun zo lo a nih chuan engtin nge midang chu i thunun zawh lul ang ni.
“A nia sin. Khawi ramah pawh sawrkar a chak loh chuan vantlang emaw, sakhua emaw behchhan pawl an chak thin” kan Politician ho khan he thu hi hria se sorkar chak tak an nih leh nih loh chu in en chiang hlawm teh se
Report this comment
August 15th, 2013 at 1:23 am
At kan so leh ta maw? harh teh harh teh CYMA…. eng vang hian nge maw thuneih kan chak a, rorelna kenkawh kan tum ve ngawt zel le… a khalhngiltu awm a ngai ta a ni e….
Report this comment
August 15th, 2013 at 1:25 am
chhana,
MTV chu CYMA note ni tehreng e.
MNF lallai kha ani a, an hlauhawm ther ther hkawp mai. Ka hriat sual loh chuan Mizoram pumpui ah a lang chuan mi 2 chiahin an kalh ngam, Ruatfela Nu leh David M. Thangliana. DMT erawh hi chu Cognress lam mi niawm tak ani. Tunah chuan CYMA a do tawh lo niin a lang.
CYMA kan sawi hian mimal YMA member leh tualchhung leh Group level YMA kan telh lo tawp, tih hriat a tha.
CYMA hraitute hi Sorkar dan (Conduct Rules) kalh thak a NGO hna full time deuhthaw a thawk anni. Hei ringawt pawh hian sorkar kan neih nep zia a tilang khawp mai.
Mizoram roreltu ni ila chuan sorkar hnathawk pakhat mah CYMA office bearer anni thei lovang. Ofice ah zing dar 9 atanga tlai dar 5 thleng an thawk char char ang. An hun awl ah pawh CYMA angin politics an khelh ka phal lovang.
Report this comment
August 15th, 2013 at 5:08 am
Nirvana
Ka lawm e.
Nia, keipawh i ngaihdan khi ka ngaihdan chiah a ni. NGO hruaitute hi sorkar-ah hna nei anni deuhvek mai sia, an hna an ti chhe awm mange ka ti.
Report this comment
August 15th, 2013 at 8:51 am
Nirvana, Aizawl South I ah rawn ding rawh. Ka lo vote kauh ang che.
CYMA kal fur fur hi chu a inpaltlu leh khut thin ni berin ka hria. A awmzel dawn a nih pawhin Inspirational body ang deuhv chauhvin che thei se, hmalak tak tak chu Branch ten an mahni context milin hma mai se. “YMA Panchayati Raj” ka duh a nih ber chu.
Report this comment
August 15th, 2013 at 8:57 am
Ka lo hriat ve thin dan chuan, MTV ho khan an ruihhlo man khawm kha a rukin an hralh chhawng leh thin tih a ni velin ka hria…ka chiang chuang lo a nia.
Report this comment
August 15th, 2013 at 9:21 am
Ruihhlo do hi a tha e, mahse pawimawh ber chu ruihhlo tithintute vei zawk hi niin ka hria….a parah thliah tum lovin a bulah thliak zawk ang u… ?(O)
kristian ram ni si, nundan mawi leh hawihhawm mi zawng zawng chunga angkhata kan lan tir thei lo hi chu aw….
thil engemaw a lo thlen a,a huhova pawr tak, thuhnu dawnlo kan awm leh tlat thin hi kan hnam hmel a ti bal…
CYMA te pawh hi thurawn petu , thurawn pengamtu awm se a tha e, an dai thelh leh khet thin…
Report this comment
August 15th, 2013 at 11:00 am
Sawrkar hian a tihtur ti zel se tuna kan buaina tam tak hi chu a kiam ngei ang. Tu pawh mai hian huaisenna kan tlachham ta a ni phawt mai.
Report this comment
August 15th, 2013 at 11:18 am
Tuna kan buaina hi a bul leh bal takah chuan sawrkar chak loh vang a ni. CYMA hi kan hlau a ni mai lo, ram tana an thawh zozai kan hmuh hian an thu kan zawm lo ngam lo mai chauh a ni.
Report this comment
August 15th, 2013 at 11:28 am
A sawi zawng zawng hi a dik vek ang. Ruatfela nu ka ṭan
Report this comment
August 15th, 2013 at 2:05 pm
tuna kan awmdan nuai nuai hichu hnam boral tur in chuk nuai nuai kan ang khawp mai !!
Report this comment
August 15th, 2013 at 3:07 pm
Ruatfela nu kan nei hi chu a lawmawm thin ngawt mai.
CYMA ni lovin, CYMA O.B te hian inenfiah chu an mamawh a ni.
indypressny.org
Report this comment
August 15th, 2013 at 9:13 pm
Ruihlo hi chu mizo kan nihna ang pawh in kan do ngei tur a ni a, mahse tuna CYMA kal dan hi chu a fuh chiah em aw ka ti. Kan sorkar chak tak leh India ram a Police nei tha state hian CYMA hi a hlau ta em ni ?. Eng party mah an tawng ngam lova, ngawih an chuh diak a, hei pawh hi mak tak chu a ni. Kan politician ho hian ram an ve lova VOTE AN VEI ZAWK ta em ni ?
Ruihhlo do hi Phunchawng leh Rangvamual atang a tan lovin kan chhungkua tang theuh in tan ila, mahni fate pawh ruihtheihthil lak a ti fihlim thei lo in ruihhlo ka do e kan tih hi chu miten kan hnung atang in min nuih palh ang tih a hlauhawm nia.
Saikhumphai ah a vawtu ten kan ek kan cheh tawh a court ah an zual ko a kan hneh lo a nih kha. Tunah pawh CYMA hi tu in emaw min khing ta se kan ek hi kan cheh leh palh ang e. Office bearer meeting thuchhuah leh Court thu chhuah chu a dang zaih mai nia. India danpui ah chuan mi hnawhchhuah phalna te mi man leh vual theihna dan CYMA hian a nei lo tih chu kan chiang theuh mai awm mang e.
Report this comment
August 15th, 2013 at 9:27 pm
Hetiang zel a CYMA hi kal chho tur a nih chuan MIZO Hnam ang a kan hmabak chu thim hle dawn in ka ring. Lai leh Mara, Hmar leh Manipur a cheng Zofate an hla sawt ang a, Lunglei Area lam in beng an chhi tan dawn bawk a. MIZO Hnam tan a pawithui hle dawn a ni.
19900 chho vel khan Mumbai vel ah Shiv Sena Thalai ho kha an che hluar thin khawp a, Marathi ni lo India mi dangte chu khawlai ah te an vai khawm a, hnathawh ve an phal lo thul, mipui vantlang ‘Civilised Society’ te nun an ti ralti hle thin a nih kha.
A pawithui lutuk hma hian, tuamdam thuai a tan a tha mang e.
Report this comment
August 16th, 2013 at 11:36 am
Pressure group tha tak ni tur si mahse a kal sual chuan governing body ang mai a chet a a awl an ti thin, a dikhmel ta viau mai tunlai CYMA chetdan hi chu.
Report this comment
August 16th, 2013 at 6:55 pm
Ruatfela nu hi a ti dik tlat.
Report this comment
August 16th, 2013 at 8:35 pm
Hetia tih ve hi ka chak tlat pek a!
We are not God, but we are of God. To each of us is given the opportunity to shape and define the quality of the world we live in. To each of us is given free will and the opportunity to make things better or worse. Wake up CYMA. You can do better than this!
Report this comment
August 16th, 2013 at 11:17 pm
Mak khawp mai, CYMA hi a in tawng harh thei dawn nange maw aw tih tur a ni tan tlat. Duh aiin YMA leh Mizo nunmawi a tichhe tam dawnin a lang. Tihthat 1000 aiin tihsual 1 hi hriatreng a awl a, a pawi thui zawk asin maw le.
CYMA O.B ah hi chuan sorkar hnathawk hi chu ni theilo se ka ti ngawt mai. YMA din chhan leh motto kan theihnghilh tan mek niin ka hria. Hma lam hun a englo khawp mai hetiang reng kan nih chuan.
Report this comment
August 17th, 2013 at 4:03 pm
Phak ve tawk atanga kan history te thlirin YMA hi Zofate tana Pathian ‘ordained’ a ni. Mahse, CYMA hi hetia a kal zel a nih chuan khawvel hmun hrang hranga Zofaten YMA kan hnawl hun a hla tawh lo khawpin ka ring.
Insiamthat theih erawh a la ni. Chumi atan chuan Aizawl lama YMA memberte leh Branch YMA te an pawimawh hle ang. Dikna an tan ngam ang em? I lo thlir zel ang….
Report this comment
August 17th, 2013 at 8:18 pm
sorkar hian a tihtur hi ti sela, a dan thra pui pui siam zozai te kha bawhzui in ti hlawhtling se buaina a tlem ngot ang, dan siam ngot lo deuhin a tih hlohtlinna tur, eg: a zawmlo hrem dan tur leh hrem tu tur man tu tur etc te siam nghal vek se…
foreigner cc ah hi chuan mi ram changkang a immigration police??? ang deuh te hi awm ve se (central ah nawr dan awm se) tin ILP neilo a lolut etc ang hi chu zoram police hi check tur branch/division deuh awm ta se,vai reng mai se ka ti khawp mai…
Report this comment
August 18th, 2013 at 8:27 pm
Ngaihtuahna sen tam deuh chu a ngai a ni… Tuna kan kal dan hi chu… a fuh lo dawn tlatin alang…
Report this comment
August 19th, 2013 at 11:52 am
Human Rights advocate ka ni lova, mahse humanity hlutna leh pawimawhna hi ka dahsang em em thung. Ruatfela nu te ang hian Civil society platform tangkaina leh pawimawhna an tarlang niin ka hriaa, society alo changkan ang zelin amah ang activist huaisen leh tum tlang hi kan mamawh zel dawn ni pawhin a lang. Kudos to her.
India ram hi democracy lalna ram ni lo se chuan YMA leh a tlukpui pawl ang reng reng hi engtikahmah a ding dawn lo, ding pawh nise a chawr chhuak hek lovang. Democratic, secular ram kan nih avang chauha hetiang pawl lian leh tangkai tak hi nei thei kan ni a; sawrkar dik lo, hleihnei, chak lo, lal hrawt emaw mumal lo lutuk laka society tuamhlawma mipuite thlavang hauhtu tur, khua leh tuite (hetah chuan Mizote bik) thlamuana an aiawha au chhuaktu tur a ni. Sawrkar chak lo leh nep lutuk awmna apiangah non-state actors te an hluara, an inluling thin. Sawrkar chak leh viak tha, mumal taka rorelnaah pawh non-state actors te pawimawhna hi a nasa chho zela, sawrkar leh mipui inzawmna, an inkara karawl awm, hmun zimte tangkai zet si hi ‘Civil Society’ tih a ni a. Mizoram context ah chuan YMA (leh NGO dangte) hian a(n) represent chiang ber awm e. Public space chu sawrkar chan a ni a, private space erawh chhungkua or kohhran pual a ni leha, chumi inkarah chuan YMA hi a ding a ni.
YMA or CYMA chu non-state. non-judicial body a ni a. Hetah hian Mizo society-a a role chan hi mumal tak, chiang fek fawka sawifiah leh hriatfiah hi a tul takzeta. An kuang lo an nawrna reng rengah mipuiten kan sawisel a thianga, kan dodala kan kalh a thiang bawk. Chutiang ni lova lal sual rorelna (tyranny) ang maia thil an kalpui fo mai chuan mipuiin anmahniah rinna kan nghat hreh tial tial anga, Voluntary organisation an nihna anga an goal hi a hlawhchham mai ang. Tun hun hi inenfiahna leh inenletna hun pawimawh tak a ni a. Mipuiah lungawilohna a nasat lutuk hma hian CYMA puipaten YMA kalphung uluk taka an thilrleta, an siamthata, kawng thar an duana, hma thar an laka, an tihtur chin ramnri fel taka an kham hi an tih makmawh a ni. Mizo hnam chhantu tur hian Mizo hnam lakah lal hrawt lul suh se.
Report this comment
August 19th, 2013 at 1:35 pm
Tunlai YMA hian identity crisis an nei.
A chhan chu Mizoram leh Mizo hrehrang lo kan tam vang ani.
Tunlai YMA in immigrant an do dan sawisel pawl thenhkat chuan foreigner diktak chu Chakma, Bru leh Gurkhali te zawk anni, ti tawk an awm.
An hriat loh chu heng ho hi Indepedence (1947) emaw state kan nih (1986) laia Mizorama awm sa der, legal resident anni daih tawh a. Mahse Mizoram chhunga awmte huamzo pawl (NGO) pakhat mah a awm loh vangin heti zawng sawi an vang hle.
YMA hi ethnic (racial) based NGO anih chuan harsatna tam tak a awm. Mizoram state sorkar tan hle hlei an hnawksak thei. Mizoram mipui aia state dang, ram dang mi duhsak tlat chu policy hlauhawm tak ani, ethnic Mizo pawh ni mahse.
YMA hian soul searching nei sela, eng policy nge an zawh dawn, in ngaihtuah rawh se. Racial based NGO nih an duh leh inthurual sela, state based association an nih duh chuan state sorkar nen pawh an thawk tlang thei viau ang.
Report this comment
August 20th, 2013 at 5:03 pm
Report this comment
August 20th, 2013 at 9:30 pm
”Dan chunga leng CYMA” a dik khawp mai..(Y)
“Dan kan hlau lo. Tuma’n kan chungah engmah an ti thei lo. Human Rights pawh kan pawisa lo va, Human Rights Activist te pawh enga tan mah kan ti lo”- YMA hruaitute.. He thu hian kan sorkar nep zia anti lang chiang hle mai. Sorkar chaktak chu kan mamawh a nih hi.. Chuan hetiang pawl, dan hlaulo leh Human right pawh pawisalo in min chenchilh chuan kan va buai nasa dawn ve aw.
Report this comment