Bible a thumal pakhat, Setana’n ringtute rinna sawinghin nan a a hman thiam deuh mai pakhat chu PIANGTHAR/PIANTHARNA tih thumal hi zuk ni a.
“Rin chu ka ring a, mahse ka la piangthar silo” tih te,
“Ka hre vek tawh, mahse ka la piangthar silo” tih te,
“Hman ah ka piangthar daih tawh, mahse tunah chuan…” tihte,
“Vawi 5 ka piangthar tawh, mahse….tunah chuan …..” tihte hi I inzawt ve tawh ngai em? Heng zawhna inzawttu te hi an buai ani, he thumal hi an mutan zuk ni tlat a.
A GREEK TAWNG IN
Gennatha anothen tih ani. Chunglam atanga lo piangnawn tihna ani zawk. Mihringten a kan tum leh kan tih tur lam ani lo. Mari chhul chhung a chi lo awm ah khan Mari tum lam ani lo a, a tih ve theih pakhatmah a awm lo bawk, chung lam atangin a lo thleng mai zawk ang kha ani ber. A rai tak hnu ah erawh mawhphurhna a nei zui ta thung.
ISUAN A UAR LO
Bible pum ah hian Piantharna tih tawng kam vawi 2 chiah hman ani. Isua khan mi pakhat hnen ah chiah “I piangthar tur ani” a ti a, chu chu Nikodema hnen ah ani. (cf John 3:1-8). A zirtir 12 te hnen ah a sawi lova, mipui 5000 leh 4000 a hrai tum pawh khan a sawi lang hek lo. Damlo, piangsual leh a thilmak tih reng reng ah te khan a sawi lang ngai miah bawk hek lo. Keini’n ngei ngei tur a kan zirtir hi Isuan a ngai pawimawh lo nge a va sawi uar lo em em ve? Chutiangin Petera, Paula leh Bible ziaktu dang zawng zawngte pawh khan an lehkhathawn leh thuziah ah reng reng khan “I piangthar tur ani” tih hi tu hnen ah mah an sawi ngai tlat lo. An zirtirlo hrim hrim ani zawk. He thumal hi an hmanglo tawp ani ber mai.
Isuan Nikodema zawhna a chhan dan pawh kha a hriatthiam theihloh tur in a chhang lui tlat bawk. Nikodema chu khami zan counselling ah kha chuan a piangthar ta lo reng ani, a hawi a nasa em mai. Isua chhanna chu “Thli a lo tleh a, khawi atanga lo kal nge, khawi lamah nge a tleh dawn tih i hre lo, chutiang chu piantharna chu ani” tiin a sawi a (cf John 3:7), a chiang lo lutuk ani. Engvang a Isua khan Nikodema hriatthiam hleih theih loh tuar chhang nge anih le? A chhan pahnih a awm thei ang.
Pakhatna ah chuan Piantharna hrim hrim hi Isua thih hma a thil thleng thei ani tlat lo. Pentikos ni atang chiah a Thlarau Thianghlim hnathawh lo awm thei ani chauh ani. Thuthlung hlui a mi tute mah khan piantharna hi an chang thei tlat lo. Piantharna hi van lawn ticket a kan lek dawn anih chuan Lal Davida meuh pawh kha van ah a lawn lo, i.e. a piangthar lo ani. ( cf Tirh 2:34)
Pahnihna ah chuan Piantharna hi ringtu zawng zawng chan tur ani lo. Isuan zirtir 12 a thlan(ruat) te bak ah khan midang zirtir nih tum ve an awm nual a, Isuan a hnar vek thung. Hnawl an nihna chhante kha a ho hlawm ania-‘ka pa tawng tha in mi thlah tir zet rawh…’ tihte, ‘ka sebawng te ka va khalh haw phawt ang e…’ tihte leh neih zawng zawng hralh a pachhiate hnen a pek loh chungchangte anni hlawm. A nihna tak ah chuan THLAN leh RUAT anni velo tihna ani. (Hei hian Rinna avanga chhandamna a va khawihbuai miahlo. Hrefiah tur erawh chuan Disciple leh Believer group hrang a awm zia leh Chhandamna thu hi topic hrang ah khel zawk tur ani ang)
PIANTHAR UAR TAN DAN
Piantharna tih tawngkam lo lar chhoh tana tak chu kum zabi 17-na tawp lam a German ram atanga intan Pietist Harhna ah khan ani. Chu Protestant harhna chang tute chu Europe ram a Roman Catholic nekchepna tuar lovin ramthar, America khawmualpui an zuan a, tichuan kum 1700 chhovah chuan America ramthar zuan ho, Mormons leh Quakers ten pu lut in 1730 a Harhna chuan Piangthar tih thumal hi an rawn hmang uar chho ta em em ani.
Mizoram ah erawh chuan 1960 Harhna Mission veng Biak In ah he Pianthar Harhna (Chhandam nih inhriatna) hi alo lar chho veleh ani. Kan Zosap te leh ringthar hmasa te khan an lo la hmelhriat tlat lo thung. Mahse Rinna in chhandam nih chu an lo inring ve tho. Nih pawh anni ngei reng bawk ang.
A NGHAWNG THALO
A hun lai in harhna thlentu nimahse, zirtirna ang a alo kal hian buaina alo awm thei tih tlai khaw hnu ah alo fiah chho leh ta tlat ani. Ringtu nun a kan buaina ber zing a pakhat chu pianthar tumna leh piangthar ang a inhriatna hi alo ni ta a ni.
Mitam tak in anmahni (mihring hlui) chu pianthar tir an tum ta a, Nikodema ang deuh khan, an bei chiam chiam a, an buai zo ta. “Kei chu ka piangthar tawh”, “Vawi 3 ka piangthar tawh” ti ten an sawi thin. Pianthar theih ni a an hriat avangin an bei vak vak a, an hah em em mai thin ani. Tin, pianthar zirtirna uar leh pawm te chuan an rindan leh pawm dan nilo pawm te chu he thumal hi talhtum a hmang in an vaw let vak vak thin bawk. Tin, thenkhat erawh chuan “Rin chu ka ring vek a, mahse ka piangthar thei ngang lo ani” ti ten an sawi bawk thin. Chung ho chu kan han hrilh leh ngat ngat a, a tawp a kan thutlukna chu an lo hriat tawh sa, “Rin chu ka ring vek a…..” tih ah khan ani leh tho tho thin. Chutiang mi te buaina ber chu piangthar tih tawngkam ah khan alo ni. He tawngkam hi Mizo Kristian te mutan, tul lova kan buai kan buai na alo ni reng mai zawk alo ni.
PIANTHAR ZIRTIRNA PAWIKHAWIH CHU ENGE NI ?
Pawi ta em em mai chu, pianthar theih nia hria, chang ngei nia inhria ten rawngbawlna ah leh ringtu nun kalzel ah buaina leh harsatna an tawk nasa lutuk hi ani. Chungte chu :
Pakhatna ah chuan anmahni mihring hlui kha piangthar nia inngai te chuan an nun ah tisa chakna hrang hrang an han tawng chho ta a, piangthar tawh nia inhre ngei mai chuan a chak ngai kha alo la chak reng mai si, a thar emaw inti tawh kha a hlui ang diak diak kha a lo la ni reng mai si. Chuta Setana hun remchang neih that zia chu turu tak ani.
Piangthar niin an inngai bawk si, mahse an chak zawng, mizia tinreng chu alo la ngai vek bawk si, inrinhlelhna lian lutuk an nei ru ta reng mai a, an sawi chhuak ngam tawh bawk si lo, sawi chhuak pawh ni se tuman an hrilhfiah thiam tak tak lo tih an hre bel tawh lutuk, camp ah vawi 3/4 an lut tawh a, a ngai hlir ah an in keuh leh tho tih an hre vek tawh bawk si, chutah chuan an thinlung ah thar, thar leh lo, thar deuh roh ???? tih ang reng chu a in buk tawn ta reng mai thin ani. Hetiang a tang, kal ngaihna hre tawh lo, an dinhmun a lungawi meuh si lo ringtu leh rawngbawltu hi an tam lutuk ani.
Pahnihna ah chuan piangthar ngei nia inngai chuan rawngbawlna ah chanvo an chelh ta ngei a, an taimakna leh an inpekna in a tlin bawk a, Kohhran ah a khaipa tak tak ah a tang chho ta zel a, KA PIANGTHAR an tih tawh tlat avangin an rawngbawlna leh thawhlawm thawh te zawng zawng pawh chu an tih emaw an ti ta zel mai chu ani. AN TIH niin an ngai lo thei lo ani, anmahni kha an piangthar niin an inhre miau a. Thu pawh sawi tha an inti thei hle, pawimawh pawh an inti.
Tin, an insum theih em avangin thei velo te chu an ngaithiam thei lova, an hrethiam thei ngai lo. “Ka thei” anti rilru tlat tawh mai thin ani. An hriat miah loh hlan in sual zawng zawng a sual senior ber Chapona sual ah anlo lut reng tawh mai thin ani. Chapona rau rau ah pawh hausak vanga chapona te leh hmelthat vanga chapona te aia pawi zawk daih THLARAU CHAPONA (Spiritual pride) ah an lo lut daih tawh thin. Chutiang mi te chu drug addict te ai pawh in an inhmuchuak har fe tawh zawk ani. Heta tang hian KA piangthar tih tawngkam a “KA” tih in a “SELF”, Pathian in a a huat em em, siamthat pawh a tum loh, vulh nun zel pawh a tum loh, tih keh sawm, tih boral daih a phumbo (Baptizo)a tum lo lansarh em em dan chu a chiang thei tawh mai awm e.
PIANTHARNA DIKTAK:
“Krista chu nangmahni ah a awm tih in hrelo em ni…..” (II Kor 13:5)
A thumal tlukpui diktak zawk chu chunglam atanga lo piangnawn tih zawk tur ani. Mihring tungchhova kal a piangnawn thei awmchhun chu ISUA chiah kha ani. Hei hi Setana’n a counterfeit a lo duang lawk vek tawh a, Hindu re-incarnation hi ani. Piantharna dik tak ah chuan amah kha piangthar a chu nilovin, Isua zawk chu Thlarau Thianghlim zawk in a thinlung ah chuan alo piangnawn leh zawk a ni, rawngbawlna a a tihve ni a lang zawng zawng te pawh chu ama tih ni tawh lovin, amah a Isua (Thlarau Thianghlim in) tih tawh zawk chu alo ni a, chapo pui tur a lo nei reng reng si lo. A mihring hlui chu a pangngai reng kha ala ni a, a mihring hlui in a a peih loh zawng tak rawngbawlna ah te chuan Thlarau Thianghlim chuan hmanrua ah leh kal kawng ah a rawn hmang ve mai zawk alo ni a, a tih pawh ni hauh si lo chu Pathian in a tih ah a pawm sak mai zawk alo ni, a hming ah thawhdunna (Co-operation) tiin alo vuah mai zawk alo ni.
Amah chu a piangthar lova, chuvangin a tisa chakna te pawh chu ala awm reng a, mahse amah a rawn piangnawn Thlarau Thianghlim thu thu a awm a duh zawk avangin chak chung chung in a ti tawh lo mai zawk thin alo ni, tah chuan chhuan tur reng reng a nei lova, Thlarau Thianghlim tello chuan pen khat pawh a mah chuan a kal dik dawn lo tih a in hre chiang em em ani.
PIANTHARNA LEH SIMNA INKUNGKAIHNA:
Tin, Simna pawh hi pawh piangthar thei nia inngai chuan a tih emaw a ti leh bawk thin. Mize chak deuh chuan sim thei a a inhriat tlat avangin sim thei lo te chu a hrethiam tlat lo, a ngaithiam thei lo ani. Tin, a sim theih tak tlat avangin a nun ah chuan Thlarau Thianghlim pawh chu alo mamawh tawh mang reng reng lo mai thin. “Mi bawrhsawmte chuan doctor an ngai a…” tih hla te chu midangte sak tur alo ni zo tawh thin. Hetih lai vek hian mize chaklo deuh, Piangthar thei nia in ngai ve tho, piangthar ve ta ngei a in hria chuan sim an tum veleh ta tak tak mai chu hahthlak tak ani. Engemaw chen chu a thei ve mai a, tah chuan a mihring hlui chu alo thar ta takzet a, chakna sual te pawh chu a sim ta emaw a ti thin. Mahse rei a daih ngai lo, a atang fan fan a, a hah em em a, a tawp ah a tlu sawp leh nge nge thin. Piangthar nia inngai chu a tluk/ a chauh chang hian Setana’n DOUBT leh CONDEMNATION hmangin a rawn bei a, a hruaibo daih thei ani.
Thlarau piantharna hrefiah erawh chu a thu thei tawh lo tihna a ni hauh lo, a inthlahdah phei chuan nu in nau a chhiat ang chiah hi ani mai. A danglamna ber chu a nghawng ah daih ani. Amah tak chu piangthar lova, amah ah Thlarau Thianghlim(Isua) zawk lo piang(nawn) ani tih hrefiah tu chu a tluk palh chang pawh in mak a ti lem lo, tisa pu, sual a hrin ala nih zia a hrechiang a, Setana’n thang – DOUBT leh CONDEMNATION ah a awk ve thei ngai lo, awh a hnek in chutiang dinhmun a la ding thei, Thlarau Thianghlim ngei pawh chu a tih vui fo chuan ala tinsan mai thei ani tih a hriatchian em avang leh, Thlarau Thianghlim tello chuan thlemna pakhat pawh a do zo lo tih a inhriat chian em avang in Pathian hnen ah a tlu lut vat zawk thin ani.
SIMNA HI ENGE ANIH CHIAH?
Mihring hlui (natural birth, old nature) sual sa a piang, corrupted DNA, sual lam awn, Pathian in thi ngei tur a a tih hi a sim tak tak lova, a thar tak tak thei bawk hek lo. Simna dik tak chu Thlarau Thianghlim keimahni a lo piang(nawn) in mihring hlui chu a chakna active laklawh tawh te chu a rawn hmatiam ta a, la active lo te chu dormant ah a rawn dah zui a, zawi zawi a a rawn tihral na, thlan thlen hma loh a la awm ve reng zawk na chu ani. Sual ti chak tho, mahse sual ti thei tawh lova a rawn phuarbeh na hi ani. Sual ti thei tawh lo han tih pawh hian nupui in ” Tunah chuan mipa dang mutpui thei ka ni tawh lo” a tih a ti thei tawh lo ang zawk, tih chu la ti thei reng tho (a pasal zin bo hlan phei chuan), mahse hmangaihna dan leh inneihna dan in a phuar tawh avanga ‘thei tawh lo’ ang zawk hi ani. Chakna reng reng te chu anlo chaklo hret hret a, an lo chau ve tial tial a, anlo thi chho zel mai zawk thin ani.
Science leh medical lam zawng a sawi chuan DNA hualtu acid leh protein leh gland chi hrang hrang insiamchhuak chu a minimize/control anih chu. Mi thenkhat chuan heng tisa chakna chi hrang hrang te hi piantharna dik ah chuan bo ta vek tur ah an ngai thin, Pathian hnen ah pawh heng tisa chakna te hi la bo turin an tawngtai thin. Mahse simna diktak kawng zawh tur hmasa ber chu chak reng tho a tih tawh loh na hi ani zawk. Process leh habitual atanga biological clock set dik leh tih lam biahthu di ani zawk e.
THU BELH:
Engpawh ni se, hei hi ringtu zawng zawng chantur ah ka ngai lem lo. Isua lo pian chhan chu purpose liantak nei, chumi hlenchhuak tur a commissioned a ni a, chu chu hriakthih(Messiah/Kristos/Anointed) anihna chhan pawh kha ani. Chu Isua chiah chu thlarauva(higher dimension) alo pian nawn leh na te reng reng chu commissioned anni leh ngei ngei tur ani. Hriakthih(Messiah) te reng reng chu thil engemaw hlenchhuak tur anni ngei ngei. Chu chu Isuan a zirtirte a commissioned khan “ram tin ah kal ula, thilsiam zawng zawng hnen ah chanchintha hi hril ula, an zing a mite zirtir(disciple) ah siam rawh u” ati a. ‘Mi zawng zawng zirtir ah siam rawh u’ ati miah lo. Hei hi ania disciple leh believer class a awm hrang tih tichiangtu chu ni.
Similar Posts:
- PIANGTHAR LEH SUAL HUAT
- PIANTHARNA
- Pentecost pualin
- Tute nge Khawvel mi?
- Thlarau Thianghlim (Pentecost Pual)
March 20th, 2011 at 3:25 pm
A thui viau nain ka chhiar chhuak dap e. Simna chungchang i rawn sawi hi ka pawm zawng tak a ni.
Report this comment
March 20th, 2011 at 3:36 pm
Tha leh fu mai..Mihring finna leh chhut peihna atang hian Pathian ‘thudik’ hi a hriatfiah theih angem le? Penticost ni a ‘thlarau thianghlim’ an chan ang kha chang ve lem lo ta ila an ‘rilru’ tur ang kha kan suangtuah chhuak dik thiam angem le?
Piantharna dik chu setanna thiltih theihna hneha Isua Krista hi min chhandamtu a kan pawm a, a thupekte zawm hi ani. Hriatna ringawt erawh a tawk hauh si lo.
Rawngbawl tur a koh bik leh ringtu pangngai hi chu an awm khawp ang…
Report this comment
March 20th, 2011 at 3:40 pm
Chhiar chhuah kan tum tehreng nen, nakinah ka chhiar tha leh mai ange. Nizan inchungah thlaeng ka chaih rei deuh aniang, pollen allergy a chhuak a ka hahchhiau nasa lutuk, chhiar tui theih hlawl loh a ni e.
hah chhiau
Report this comment
March 20th, 2011 at 3:42 pm
Chhiar atan a that dn hi a
Report this comment
March 20th, 2011 at 3:50 pm
@ZOHO, Ih..Pathian thu hi chhui chhui chi a ni dawn em ni? Nih leh, Pathian rilzia hi nanga hriatthiam i ring em ni? Joba Pathianin a chhuahchhalhna thu kha chhiar la, eng ang takin nge Pathian hi a lo ropui.. Mihring mihrinna hian a ngaihtuah chhuah theihloh dan chu i hre mai ang!
DIK TAKIN KA’N SAWI ANGE. I THUZIAH HO HI KA EI VAKLO! BIBLE THU HI ZIAH A, NGAIHRUATNANENA TIH VAK VAK CHI A NI LO. PAWM A, ZAWM MAI TUR A NI E.
Report this comment
March 20th, 2011 at 4:00 pm
Piantharna leh simna chu akal kawp ngei ngei ang.
Saptawng i va hmang nasa ve akar ah..chhiar a khaih lak duh.
Report this comment
March 20th, 2011 at 4:09 pm
@keimah Thingtlang pa, #5, i thu hlawm hnihna khian min vahan tinui nasa em.
Zir peih teleh ngaihruat peih mi tehian an duh ang ang in han ziak kawi mai mai sela a tha ve a lawmle, ngaihdan leh pawm dan dang dang hian kan khawthlir tehi a ti zau ve a atha mai mai alawm.
Engang pawn phuah belh in tei te mahse ” ka rin a chu ka hria” ti thei tur hian kan rinah hian chiang ila a tha mai. @Zoho tha khawp mai rawn tizel rawh khai Pathian chawimawi nan zel aw. . .
Report this comment
March 20th, 2011 at 4:17 pm
ka Amen zawng tak a ni e
Report this comment
March 20th, 2011 at 4:23 pm
Report this comment
March 20th, 2011 at 4:37 pm
A va mak teh hrep ve, rinna ban nghet vaklo tan chuan khabe dawm a inngaihtuah vung vungna khawp thu a tling in ka hria.
Report this comment
March 20th, 2011 at 4:42 pm
” Pathian thu hi lo awih ve tawh rawh u” tih theology kha a tawk viau a ni. Pathian thu hi chu hriat tam pawh a ni lo. Zawm tam a ni zawkin ka hria.
Report this comment
March 20th, 2011 at 4:57 pm
Ka chhiarchhuak hman rihlo tlat mai..mahse..Title khi..Keimahni lam piantharna hi chuan a daih rei ngai lova, kan piangthar fovin, rei vaklo tihsual chu kan sim thei..Pathian a Piantharna tak tak chu-Keimahni-ah Pathian a lo pianthar a ngai zawk..Mihring mit a hmuh ngailoh, chenna ngailoh ram tak tak hmuhna a ni tawh zawk a, chu chuan automatic in..a ma hming avangin felna kawngah te min hruai thin zawk a ni.
Report this comment
March 20th, 2011 at 5:17 pm
Sei rapthlak… A sei apiang chhandam.A ring apiang chhandam tih ang deuh khan ni ve ta se…. NOI
Hman deuh hunah ka la chhiar ang. A that hmel khawp mai.
Report this comment
March 20th, 2011 at 6:39 pm
crusader ho hla, piantharna chu tihdan thlakthleng kualna mai mai hi a nilo, isua nuna a neih a ni. Anlo tih diam tawh kha mawle
Report this comment
March 20th, 2011 at 6:42 pm
I thu ziak a ngaihnawm viau rualin duh aiin a sei lutuk mah mah in ka hria. Tuna i rawn chai ang Thlaraua piantharna/Sual thihsana Kristaa nun tih hi chu Tirhkoh Paula’n Rom Bung 6 leh Bung 7 ah khan felfai takin a sawi tawh kha, Pathian belruat a ni chung pawha a taksaa Setana kutthak hnawihna la awm te nen. “Mi rethei ka va ni tehlul em! He thihna taksa lakah hian tuin nge mi chhan chhuak ang?” tiin kan mihring sualna laka fihlim a duh ve tho a nih kha.
Tin, Nikodema buaina khi piannawn lehna (born again) ah a ni, “Thli a lo tleh a, khawi atanga lo kal nge….” khi chu Isua’n a chhanna a ni.
“Mi, a tar hnuin engtin nge a pian theih ang? A nu pumah vawi hnih lutin a piang thei em ni?”(Johana 3:4) a ti he haw anih kha.
Mizo hian Born Again hi Piangthar tiin kan let maia Piangnawn tih tur a ni, chutia kan leh chuan Nikodema buaina (“Engtinnge ka piannawn leh theih ang?”…) nen pawh a inmil chiah ang. Piangthara Nun thar nei nilo in Adama chu Pathian thlarauah mitthi alo tawh a, Krista avangin chu Pathian thlarauah chuan kaihthawh nawn lehna, Piannawn lehna kawng min hawnsak zawk a ni. Chuvang tak chuan a ni Isua pawh Adama hnuhnung tih alo nih.
“Tisaa piang apiang tisa a ni; Thlarauva piang apiang thlarau a ni.
I pian thar tur ka tih che hi mak ti suh.
Thli khawiah pawh a duh duhin a tleh thin, a ri i hria e, nimahsela khawi atanga lo kal nge, khawiah nge a kal dawn tih pawh i hre si lo; tupawh Thlarauva piang chu chutiangin an awm,” a ti a.” (Johana 3:6-8)
Chu piantharna (born again) hnathawh chu Thli angin a tehkhin zui ta a nih chu, Thli chu a duh duhnaah a tleh thin ang hian kan pianthar hian kan hnena cham hlen nghal tur a ni tihna a nilo. Vawikhat chu Thli chu kan dawn avanga kan hnena cham reng tur tihna pawh a nilo ‘A duh duhnaah a tleh thin’ a ti, chuvang tak chuan a ni “Thlarau thianghlim chu ti vui suh u” a tih ni.
Kan tisa sualpu taksa bawlhhlawh tak chhunga chatuan atana cheng reng lo hian Thli angin engtik lai pawhin, min tanpui turin kan velah, a ri hriattheih turin a tleh reng zawk a ni. Chumi vang tak chuan a ni Tirhkoh Paula’n
“Isua Krista kan Lalpa avangin Pathian hnenah lawmthu ka sawi a ni. Chutichuan keimah tak chuan ka rilru chuanin Pathian dan rawng ka bawl thin, ka tisa erawh chuan sualna dan rawng ka bawl thin.” (Rom7:25)
ka rilru in Pathian dan rawng ka bawl thin a tih khi, ka tisa erawh chuan sualna…
Report this comment
March 20th, 2011 at 6:42 pm
“I piangthar tur ani ka tih che hi mak tisuh” tih kha Bible ah khan awm ngei in ka hre sia ka zawng hmu zo hauh lo mai a.
Report this comment
March 20th, 2011 at 6:44 pm
Thuhriltu tamtak hian rawngbawltute hnena sawi tur ni awm ang tak hi mipui nawlpui min fah leh nek thin.. ka veina a rei ve ta.. Disciple leh believer class chungchang khi rawn la bitum leh teh..
Report this comment
March 20th, 2011 at 6:49 pm
Ziak tha khawp mai ..
Piantharna, simna, rinna chungchangah hian Mizote chauh nilo, sap ho hlei hlei khu an tal buaiin ka hre thin.
Kan tihve tel miah lo a, Pathian duhdan leh remruatna ang zawka Isua Kristaa thil siam thar kan nihna hi kan piantharna chu a ni [a thihna leh thawhlehna-ah]. Chu chu kan pawma kan rin chuan piangtharte (Pathian fate) nun dan tur Isua Krista leh apostle ten min zirtir ang khan kan nun a lo tul ta a. Chutianga nung te chuan an ‘sim’ tihna a lo ni reng zawk — mihring hlui duhdan nilova, thlarau duhdan anga an nun tawh zawk avangin. Anmahni theihna leh chaknaa chu nun chu nei an ni hek lova, an chhunga Thlarau Thianghlim hnathawh a ni zawk.
Report this comment
March 20th, 2011 at 6:52 pm
@Asteric, i va kawmen thui deh duah ve mawle, mahse a sei loh chuan i sawi a fiah tawkloh i hlau ve tho a nimaw? Ka Bible chang zawn 1 minrawn tarlan khalh chule.
Report this comment
March 20th, 2011 at 7:02 pm
#19 @Lersia I Bible chang zawn kha ka hre renga ka NET a muang lutuka, i chung chiaha ka ziah thu hrilh tur che in ka edit thei ta lo anih kha..
Report this comment
March 20th, 2011 at 7:07 pm
16
Lersia # John 3:7
Report this comment
March 20th, 2011 at 7:55 pm
@Asteric & @mr.Duhlova ka lawm hle mai.
Report this comment
March 20th, 2011 at 8:03 pm
I thu ziah ho hi a ngaihnawm thei khawp mai, informative bawk. ‘ani tih ho zawng zawng khi a ni ti in han ziak phei la chu chhiar a hahdam lehzual ngei ang.NOI
Report this comment
March 20th, 2011 at 10:23 pm
Hei kan hman ve chauh chu le. Nia, a sei lutuk ani. Vawi 5 chuang ka kaitawi a, khi aia tawi chuan ka thiam tawh bawk silo. Inthlahrunawm mai bak ah chhiar a huphurhawm khawp ang le. Ziak a han dah ve hrim hrim kha ka duh bawk si a, tun emaw nakin zel ah pawh ala rawn chhiar duh tak in ti tawh mai ang.
Report this comment
March 20th, 2011 at 10:25 pm
5 sawi dik khawp mai,(Y)
Report this comment
March 20th, 2011 at 10:35 pm
@ Zodin_RM – ‘ani’ tih hi ‘a ni’ ti a ziah tur a ni maw? Ka chaurau ru riau a ziakzawm leh zawmloh ah hian. Ka lawm e, ka hre reng tawh ang.
Report this comment
March 20th, 2011 at 10:42 pm
@vivia – disciple leh believer class awmhran thu hi keipawh ka veina a rei ve tawh khawp mai. Rawn chhawpchhuah leh kan tum ang e, ei lo fe fe pawh an awm leh ngei in ka ring sa.
Report this comment
March 20th, 2011 at 10:49 pm
@Asteric -comment sei ve pah reng. Post a ka ziah i rawn sawi nawn nual, i chhiarchhuak hman biklo ani maithei.
I last para leh 2ng last para te khi a dik khawp mai. Thli tih hi thlarau tih nen a greek tawng ah chuan thumal inang ani reng tak asin-pneuma.
Report this comment
March 20th, 2011 at 10:57 pm
#11 @ CFL – ” Pathian thu hi lo awih ve tawh rawh u” tih theology kha a tawk viau a ni.
A dik a, a diklo bawk. Pathian hian a thu awih tur bak hian min phut miaulo hek.
A dikloh na lam chu tunah chuan a tawk viau tawhlo tih hi ani. Tin, mizote heti khawp a kan chiri nachhan pakhat a ka hmuh chu hmanlai ringtu hmasa te khan enge an awih tur chu tih lam engmah ngai pawimawh hmasa lova an lo awih tawp side effect ani thei bawk.
Report this comment
March 20th, 2011 at 11:03 pm
#6 Kilung- Nia thumal pakhat lehlin dikloh pawizia uarna ani bawk a, sap thumal ka hmang nasa tih ka inhre reng, a fiahlo hlauh vang ah min lo ngaihsak mai teh. Tin, chhiar nuam tur a ziah a ni lo bawk atin a ni.
Report this comment
March 21st, 2011 at 12:13 am
ka sawi ve ange mihring te hi tlan tawh nimah ila mahni mai chuan kan lo piangthar thei hauhlo mai alo ni a,amaherawhchu thlarau thianghlim puihna azarah erawh chuan kan piangthar thei ani. Thlarau thianghlim puihna dawng tur chuan keimahni lamin kan pawm hmasak a pawimawh viau ang,heng atan hian rawngbawltute ,fakna hla,bible chang te a hmang thin….
Report this comment
March 21st, 2011 at 12:21 am
A ngaihnawm leh pek hle mai. Mahse, hetiang lam hi ti vak vak teh suh, nakinah nangmah ngei kha a la tibuai palh ang che.
Report this comment
March 21st, 2011 at 12:24 am
Kei pawh piangthar tawh ka ni vawikhat chauh a ni ka la pianthar. chuan he thu hi kan tarlang mai mai ang e:
“Chutichuan,chhumpui nasa tak ang thlirtuten min hual vel avang hian, min tihnawk apiang leh sual keimahnia bet tlat chu i dah ve ang u,tin,Isua, kan rinna siamtu leh tifamkimtu lam chu enin, kan hmaa intlansiakna tur awmah chuan chhel takin i tlan zel ang u”. Hebrai 12:1,2.
Report this comment
March 21st, 2011 at 7:12 am
Zoho : #28 a Grik word i rawn tarlan hi a modern version tawh deuh. Original rendering ang chuan, gennethe anothen tih a ni a, BORN FROM ABOVE tih a ni a, piangthar/piang nawn/ hrin nawn tihna tlukpui mah ni se, CHUNG LAM ATANGA HRIN tih ber mai hi a original ber asin, kan Bible neihah te hian awm ni se, kan buai nep ngei ang.
Report this comment
March 21st, 2011 at 7:36 am
Nu pawhin vawi khat min hring, chung lam pawhin vawi khat min hring, sang chhuaktu hriat chian a pawimawh, hrin tawh chu a thang lian tur a ni. Piangthar fo piangthar an lo ni lo tìh finfiah a ngai tawh a nìh hi, rin dawn pawhin rin dik a ngai tlat, tawngpawng rin a ni lo.
Report this comment
March 21st, 2011 at 7:42 am
I Petera 1:23 ah chi chhe thei leh chi chhe thei lova chung lam atanga hrin a hriat theih. Lo infiah ve mai la.
Report this comment
March 21st, 2011 at 8:04 am
chawnghilh-a comment ho leh a la comment zel tur (?) zawng zawng ka Like e.
Report this comment
March 21st, 2011 at 12:11 pm
I thu ziak chu a rilin a dik hmel khawp mai. Engpawhnise, thu reng reng hi ngaihsual theih tur tam tak a awm ve a, “Piangthar” tih hi Bible tawngkam dik tak a ni e. Isua ngeiin a hman a ni a, a tawngkam hrim hrim hi chu a dik lohna kei chuan ka hre lo. Vawi engzatnge a hman tih lam chu a ni ber lem lo. Pathianin ama hminga “AWMA KA NI” a tih te pawh hi vawi tam tak a sawi nawn loh avangin a dik lo a ni chuang lo ang hian.
Piantharna hi Thlarau Thianghlim atang chauhin a theih tih hi ka pawm thlap. Amaherawhchu, chu Thlarau keimahnia lo piang tur chuan mihring lam hi thingtum ang maia engmah tangkaina nei ve lo ang hrima inchhuah hi zirtirna dik lo a nih avang erawh chuan kan tawngkamah fimkhur a ngai khawp mai. Thlarau Thianghlim hi keimahnia lo piang tur chuan kan duhthlanna lo chuan min tilui ngai lo. Chu kan duhthlanna pawh chu amah Thlarau Thianghlim vek chuan hmang dik turin min pui a, thutlukna erawh chu min siamsak ngai lo. Mihringin ama duhthu ngeia Pathian dan a bawhchhia ang bawkin ama duhthu ngei bawkin LALPA hnenah a intukluh leh a tul a, chumi tak chu Thlarau Thianghlim chuan min tanpui a, Lal Isuan kan ai a awhna leh a mi chhandamna chu thlang tura duhthlanna kan tihfela thutliukna kan siam rual rual khan Thlarau Thianghlim chuan min chenchilh a, “chi chhe thei lo laka piangthar” kan lo ni a, mihring thar zia keimahniah a thawk chhuak ta thin a ni.
Chhandamna leh piantharna chungchang hi Tirhkoh Paula ten keini aia chiangin an sawi fiah tawh a, sawi belh vak tur a awmin ka hre lo. Sawifiah kan tum luatah hian kan sawi buai zawk fo thin. Pathian thu hi mihring finna leh chhutnaa sawifiah phak a ni lo tih hi hre phawt ila. A Grik leh Latin zawnga sawia fiah phak lo, Thalarau Thianghlim zara MIZO tawnga fiah zawk daih te pawh a awm ve fo nia!!
A tawp berah chuan, Pathian thu hi a sawia sawi aiin a taka zawm hian a lo chiang ber zel an ti.
Report this comment
March 21st, 2011 at 2:25 pm
@zoho #28 chhiar chhuak vek e, ka rawn thual lehna chhan tak chu ‘Piangthar tih hi Bible ah pawh lang tamlo tak, tirhkoh te phei chuan an hman ngai lem loh, tun hnua kan uar chawp tak mai mai leh tawngkam hman than tullo tak’ angin i rawn ziak deuh hlekin ka hriaa chuvangin Piangthar awmze dik tak leh kan Pianthar ngei ngei a tul thu Lal Isua sawi atang ka rawn sawi chhawng leh a ni. Lal Isuan a uar lo/sawi tam lo ti mahla a sentence tawite hi Order (Tur a ni tih) a ni.
“Mi tupawh tui ah leh thlaraua an pian loh chuan Pathian ram an lut lo ang” tiin Lal Isuan a sawia, tirkoh dang ten an sawi ve hauhlo, chumi anih tullo leh uar loh tur anga ngaih hi a fello. Lal Isua kha’n he leia kan hamthatna tur leh khawvela kan ropuina tur lam A sawi khat khawp ang, Pathian ram kan luh ve na tur kawng hlir A sawi tiila ka uar lutuk awm love. Hei tak hi Pathian fa A nihna leh Van mi A nihna pawh niin ka hria.
Paula te, Petera te, Johana te chu Pathian hman mihring ve mai anni a keini ang bawka Beiseina neia nung anni, Lal Isua erwh chu Beisei chawp ngailoin alo chhuahna a ni a kan tan a Beisei zawk a ni. Chumi avang ringawt pawh chuan A thu leh mihring thu chu in anlohna a awm ngei ang (huat a hlawh reng a).
Tirhkoh te khan Lal Isua angin vanram pawh an sawi tamlo reng a ni, Beiseina bak confidence an nei chuang bik reng2 lo, Lal Isua anga an la hmuh miau loh avangin. Kan nitin nun leh chu mi a Pathian awmpuina leh a tawp thlenga min hruai tur thu a ni an sawi ber(Paula lehkhathawn zawng2 te pawhhi). Chu vangin Lal Isuan “…tur a ni” a tih tawh hi chu van lam thu a ni a a pawimawh teng tawng hle a ni tih hriat tur. Thank u
Report this comment
March 21st, 2011 at 11:21 pm
hmmm..Asteric..i sawi te khi an dik tho bawk. Mahse, Isuan a sawina context hi han zirnawn leh teh. Zan reh ah, a fal in, mi pakhat hnen ah chauh, a sawina pa lah a inner circle ami nilo lehnghal. Kha zan kha Top Priority sawina atan right place, right time, right person ani lo ani.
Isuan ngaihpawimawh viau chu nise a sermon hmasa ber Mat 5 chho ah khan a zeptel ve hrim hrim tur ani dawn lawm ni? Tin, Vana a lawm dawn khan a sawinawn leh dawn lawm ni? Tin, Van atanga AD 98 a Johana hnen a inlarna (Thupuan) ah pawh a sawi tur ani dawn lawm ni?
Tin , a zirtir 12 te tal chu a hrilh ngun viau tur ani dawn lawm ni? Chu chu zirtir te khan an sawi chhawng ve leh ngei ngei tur ani dawn lawm ni?
PIANTHARNA hi Isua zirtirna laimu leh TOP PRIORITY ani lo a ni.
Ka chan ber chu mizote hian zu hi sual No.1 ah kan ngai a, kan chai luih luih a, ani der silo. A aia sual leh pawi zawk kan hai theih nan a setana tactic mai mai ani ang vel deuh hi ani ber.
Report this comment