mi(sual).com

Lunglên châng hian thumâwi tak hmanga lunglên biahthu puanchhuah ka châk fo thin. Zanmû chhing lo va lâikhuma ka zâl laite hian sulhnu hlûi dâwnkirin mitthlain ka fang nawn fo thin. Mahse, hmâna kan lênna hmunhlui leh nunhlui zawng kha dinthar leh theih hian ka ring si lo.

Romei bâwm tlâng te mahin inngaizawng tawhte tân an nunhlui a hriatchhuahtir thin a nih chuan, engvangin nge tukloh ram dur khup te; chûl ram thing riap te; thangvan mawitu chhawrthlapui leh siâr te; pheilai chhepa an hrût dun hnu lamtluang leh biahthu di an hril dunna hmunhlui te; hla taka sirva thlawk delh delh te; zothlifim thaw heuh heuhte pawhin nunhlui min hriatchhuahtir bik loh lêm ang ni?

Hlimthlabu(Photo Album) en châng te; hmangaih lehkhathawn(Love Letter) leh Card hlui en châng te; tuemaw hnen atanga di hluite chanchin hriat chângte leh, khawvela kan hmuh leh hriat theih thildangte hian nunhlui chu min va chhuikir tir ngun tak êm!

Kum sawm chauh la liam mah se, ka tân chuan nunhlui ngaihawm a ni tlat si.

Kawngsira putar hnâng hlai malh malh chuan, “Nangni pahnih chu in hmeltha dun hle mai; in puitlin hunah innei ngêi ngêi ang che u,” a ti a. Angela-i nen chuan kan phu dun zawk a, kan in en a, kan nui dun sak ringawt a.

Khami nî khân engvangin nge Angela-i nen kha kawngah khân kan kal dun kha aw? Kan inkâi rial bawk si a. Ka han chhuikir vang vang hian ka hrechhuak mai thei lo; Angela-i khân tih tur a neih avangin ka kal pui ta ni berin ka hria.

Khami nî khân Pu Lengate in kawngah khân kal dun lovin, putar tawngkam kha hre ta lo i la, Angela-i nena kan nunhlui ngaihawm tak hi tunah hian ka chhuikir khêr ange’m aw?

Pawl sawm zirlai kan ni a, kum 15 ve ve kan ni. Kan khaw pâwn hmun thêngthaw nuam takah chuan High School kan kal ve lauh lauh a. Angela-i nen chuan kan inkâwmngeih hle a. An in chu a hlat zawk avangin School kal turin min rawn sâwm a, kan haw dun leh thin. Midang pawh kâwm tho mah i la, kan pahnih chuan kan induhsak tawn bîk tlat a ni.

Thûi fê kan kal hnuin Angela-i chuan, “Putar khân eng’ati nge ‘innei ngêi ngêi rawh u’ min tih le?” a ti chhuak phâwng mai a.

“Ka hre bîk miah lo.”

“A mak tiraw?”

“Nia, a mak khawp mai.”

Ka thinlungah hian Angela-i chu engtin emaw tak hian ka ngaihtuah a, ka zah ru deuh ta tlat a. Chumi nî atang chuan infiam bawrh bawrh thin leh, ngampa taka inkuah nawk nawk thin kha kan taksa a inhlat hret hret a. Inkâwm reng tho mah i la, kan inkâwm dân kha chhûngril lamah a lût zual bîk tlatin ka hria.

School-ah kan thian thenkhatte’n, “Nangni pahnih inkâwm dân hi, in inkârah eng’emaw a awm aniang,” an tih pawha nuih liam mai mai kha kan ni thin a. Putar kan hmuh hnuah erawh chuti anga min han chhaih châng chuan engtin emaw ti deuh takin ka thinlung hi a rawn nghâwr thin.

Ngaihzawng chung chang chu kan hre ve a. Kan thiante ngaihzawng neihte kan hria. Mahse, Angela-i nen chuan ngaihzawng kan la neilo ve ve a, ngaihzawng chungchang vel pawh kan sawi dun ngai lo.

Putar kan hmuh atanga thla thum ral hnu, September thla a lo thleng a. Nikhat chu kan School bang Pu Lengate in kawng lamah kan haw dun leh a. Kal pah chuan Selection Exam kan neih tur chung changte kan sawi dun mai mai a. Mak deuh maiin putar kha kan hmu leh nawlh a. Putar chuan ngun takin min en dun vang vang a, engmah sawi lovin min nuih seih ringawt a. Kan kal pelh hnu chuan, “Kha putar khân min va’n en duh êm êm tiraw?” Angela-i chuan a ti a.

“Nia, min nuih var var lehnghal a,” tiin ka chhâng a. Chutah, eng’e ka sawi pawh ngaihtuah chiang lovin, “Angela, kan pahnih hian…” ka tawp chawt a, ka ngawih vang vang hnuah, “Kan awmdan hi a mak! Ka rilruah i lang reng!!” ka ti phawng mai a.

“Keipawh”

“Engtin?”

“Ka hrethiam bîk lo”

“Angela, inthianna ringawt a ni tawhlo tiraw?”

“Eng’e i sawi awmzia chu?”

Ka thil sawi chu ka’n ngaihtuah chiang a; ka zak thar thut a, ka ding chawt a, Angela-i pawh chu a ding a. Mak ti deuhvin kan in en dun tlawk tlawk ringawt a.

Kan bul velah chuan tumah hmuh tur an awm lo va, “Ihmaw, Angela…,” ka sawi tum ka theihnghilh thut a. Ka tihngaihna hre lo chuan Angela-i kokiah ka vuan a, dîmtein ka lamah ka kuai hnai a, ka pawm ta ringawt a. Ani pawh chuan min kuah lêt ve a, kan inpawm dun vang vang a, chutah kan inthlah leh thut a.

“Kal ang,” ka ti a. Mahse, kal turin pên khat pawh ka pên lo; kan la ding dun reng a. Eng hian nge min mawlh ta pawh ka hre lo, Angela-i nen chuan kan inpawm leh a, chutah tumlâwkna pawh nei miah lovin kan infâwp ta ringawt a.

Electric current man ang mai hi ka ni a, ka pum hik mup mup a, ka khûr ru der der a. Kan zei dun vak lo nain vawikhat mi kan fawhna ve ve anih avangin, kan chhungril lam thlengin min fan thla raih raih a.

Kan inthlah hnuin Angela-i chuan eng’emaw sawi tumin a kâ a han âng a, mahse, engmah sawi lovin hnuailam a bih leh daih a. Engmah sawilo mah se, thil tam tak a awmdan chuan min hrilh thung si ni berin ka hria.

Inthianna atangin hmangaihna tuipui chu kan dâi lût a. Chu tuipui chu kan vawikhat dâina a nih ve ve si avangin a va’n lo mak tehlûl êm! Selection exam kan zo va. Result a chhuak nghal thuai a, vanneihthlak takin kan tling ve ve a. Kumthar a Matric exam tur lungkham rân chungin, Angela-i nen chuan hmangaihna rahbi hmasa ber chu kan zawh chho hret hret zel a.

Kan hlim dun thei khêr mai! Midang hriat ve hauh loh hian pâwn lamah leh chhûngrîl lamah hlimna hi kan ta a ni tawp thin si. Inthenna lam rêng rêng kan sawi ngai lo va. Rinawmna chu amah leh keimahah hian a bet tel tlat a ni. Chu chuan hma lam hun thûi tak chu tâwitêin min thlîr tîr fo va; tleirâwl hmangaihna thinlung thianghlim tak chu hliamin a awm thei ang tih kan ring ngai lo.

Christmas hma, School kan chawlh tawh hnu si ah chuan, Angela-i te thianzaho leh keima thiante ho chu ramhnuaiah thingphurin kan kal fo va. Angela-i phurh tur thingro han fawmkhâwm sakte chu nuam ka ti thei êm êm a, amah ngêi pawh khân nuam chu a ti thin khawp mai.

Kum a lo thar a. January ni 14 ah School kan lût a. February ni 5 ah exam kan tan tawh dawn avangin lehkha pawh kan zir nasa hle a. Kan la hmachhawn ve ngai loh, mite’n a har zia an sawi fo, paltlang zo lo tam tak awm thinna exam chu engti ang tak ni ang maw? tiin exam hma zawng chuan ka ngaihtuah thin a. Mi thenkhatin, “Matric hi thingkûnga a kâkpui ang hi a ni a. A kâkpui i lâwn thlen tawh chuan i duh lam lam zârah i pêng thei tawh angin, matric i pass hunah chuan i tuina subject chauh kha i zir thei tawh dawn,” tia min hrilh fo avangin matric pass thuai thuai chu ka châk hle a.

Kan han exam ta a, nidanga kan exam ai mahin a har lo ka ti a. Matric hi an sawi ang êm êma huphurhawm anih loh hi maw te ka ti vel mai mai a. Angela-i pawh chuan a rûktêin a rin ai daiha awl a tih thu min hrilh a. Kan lawm dun viau mai a.

Thla khat dawn lai mai exam nan hun kan hmang a. Kan exam zo chu kan thawveng hlawm khawp mai. Angela-i hnenah chuan, “Exam chawlh chhûngin ka rawn rîm char char ang che aw,” ka tifiam chhin a.

“A ngailo, ka nute’n min hria ang,” a ti ta tlat a. Angela-i nu te hian kan inngaizawng tih hi an hre miahlo va. Ngaihzawng nei turah pawh min la ngailo a ni mai thei. Kan inkawmngeih êm avangin thian ni reng turah min ngai pawh a niang!

“Ka rîm i duh siloh chuan engtinnge kan inhmuh theih ang? ka ti ve thung a.

Ani chuan, “A tam alawm, ka lo ngaihtuah mai ang,” a ti mai a. Ka aiin a rilru a puitling zawka ka hriat avangin, ama kutah kan inhmuh dan tur chu dah ka pawiti lo a ni.

Angela-i nen chuan naupang chhia ang maiin kan inkâwm thin a, a châng phei chuan inngaizawng ang pawh hian kan awm lo ni berin ka hria. Vaihlo zûk rûk zeuh zeuh ka hrât avangin min hâu nasa thei hle a. Ka zâwm chuang lêm hlei lo va; khatih lai khan a thu kha lo zâwm ila, tuna vaihlo vanga ka hloh zawng zawng hi ka hlêp a ni vek mai tur hi a nia.

April ni 1 tûk chu a lo thleng a, intihder ni anih avangin mi tihder tumin zîngkâr atangin ka chhuak pek a. Tihder a múal múal chu ka nei ve thluah a. Hemi ni hian ka nu in lamhnai leipuia a thingro chhehkhâwm sa phur turin min tîr a. Chaw eikham veleha mi tihder tum kha ka ni si a. Ka tihder theih dawnloh avangin phür lo zetin kan leipui lam pan chuan ngâwi rengin ka kal hnak hnak a. Ka hnunglamah min ko tu awm tlatin ka hria a, ka’n lehhawi a, Angela-i lo tlân mêk chu ka hmu a, ka ding ta nghal a. Min tihder a tum aniang a ka ti rilru a. Min va’n tihder dawnlo chiang tak e aw! ka ti mawlh mawlh bawk a. Ka bul alo thlen chuan, “In inah ka rawn kal a, i nûin leipuiah thingro dah sa phur turin a kal chiah a ti che a, ka lokal ve tawp. Thil hrilh tur che pawimawh deuh mai ka nei a,” a ti a.

Min tihder a tum tih ka rin tlat avangin, “Vawiin hi April Fool anih hi aw,” tiin ka nuih a. Mahse, a nui ve miahlo a. Mak ka ti ta riau a, “Enga’tinge?” ka ti leh ringawt a. Angela-i mittui chu a bîangah a rawn lûang ta ngîai ngîai a, ka ëm phurh chu ka nghat a, “Enga’tinge khatia i awm?” tih pahin ka kuah a, ka âwmah chuan a hmai a phûm a.

“Kan inhmu thei tawh dawn lo,” a ti ta mai a, Ka phu chiang khêr mai. Amaherawhchu, min tihder a tum anih ka la rin deuh tho avangin, “Min tihder tum lo la,” ka ti leh a.

“Ka tihderlo che. Ka pa an sawn dawn. Thla tharah kan khua hi kan chhuahsan dawn a. Nizan khan ka nuten min hrilh ve chiah alawm,” a ti ta a. Chu feh kawng zîmtêah chuan tleirawl inngaizawng pahnihte chu kan hma lam huna thil lo thleng tur avangin kan rilru a hah ngawih ngawih a, hnêmtu kan hmu si lo.

Angela-i chuan a tifiam mai mailo tih chu a lanchian tak êm avangin, “Matric kan pass ang a, Aizawlah School thuhmunah kan lut thei tho alawm,” ka han ti veleh ringawt a. Mi feh kal tur thâwm kan hriat avangin rangtakin kan inthlah a, ka ëm chu ka phur nghal a. Min hmuh ka hlauh avangin, “Min rawn zui ve mai rawh, a hla chuang lo,” ka ti a. Chak takin kan leipui lam panin kan kal ta hmawk hmawk a.

Kan leipui kan thlen chuan kan thlâmah chuan kan thu dun a, mei kan chhêm a, thingpuite kan lum a. Kan núi dun leh var var thei tawh a. “Engtikah nge nupui neih i tum?” min ti thut a.

“Tun atanga kum sawmah,”

“Ka va’n senior tawh awm bik ve, chu aia hma chuan nupui nei mai la,”

“Kan kum a inang reng dawn tho alawm. Ka nupui tur i nih avangin i senior leh niar loh khan pawimawhna a nei dawn em ni?”

Chutah, “Nia… Virgin ve ve in aw?” a ti leh a.

“I tih dan dan,” ka ti a.

“Haw tawh ila, ka chhûngte’n ka kalna an hre dawn bawk silo va,” ati a. Kan inzui haw leh hnak hnak a.

Ni a liam zel a, April thla pawh a ral ve leh dawn ta. Angela-i nena kan inhmuh theih hun chu a rei ta lo ngêi mai. Chawhma inkhâwm bàn veleh Pu Nghaka te inah ka kal a. Thla a lâk theih leh theih loh ka zawt a, a lo la thei a. Chawhnu inkhâwm bànah Angela-i nen chuan thla kan la dun ta a. A tùk tûk leh thawhlehni chu kan khua an chhuahsan hun tur a ni tawh si a. Kan thlalâk hun chu a fuh riauin ka hria a. Angela-i chuan, “Pu Nghaka’n a tihchhuah veleh min rawn thawn ve ang che,” a ti a.

Hun hi a kal liam chak bîk rîauin ka hria. Angela-i te’n kan khua an chhuahsan nî a lo thleng ta mai si a. Zîngkârah kan inah a rawn kal a, ka lo la tho lo lehnghal a. Min rawn kaihthawh pahin, “Kan khua kan chhuahsan hma chu he lehkha hi lo chhiar suh ang che,” tiin lehkhathawn min pe a. Ka lukham hnuaiah ka dahtha nghal a.

Angela-i te chuan Dar 10 velah kan khua chu an chhuahsan a. He khawvel hi a reh tlawk tlawkin ka hria. Ka han hawi kual vel thin a, ka khua hi a har ngawih ngawih a. Ka mitthlaah Angela-i nen hlim taka kan inkawm laite chu a rawn lang uar uar reng bawk a. Keimah hi keimah ringawt ka ni ta!

Angela-i lehkhathawn min pêk chu ka han hawng a:
“…Ka ngâi dawn lutuk che…Kum sawm hnuah chuan kan inhmu reng thei tawh ang tiraw?…Ka rawn hrereng dawn che a, min theihnghilh bîk suh aw…” Chu lehkhathawn chu ka chhiar chhuah hnuah ka chhiar nawn leh zel a, ka chhiar ning thei thlâwt lo.

Matric result a lo chhuak a, Angela-i nen chuan first division-ah kan pass a. “Khawiah nge School a zawm ang âw?” tia ka ngaihtuah lai takin a lehkha ka dawng a. Chutah chuan Shillong-ah St.Edmund College ah a zawm dawn tih ka hria a. Ka kal ve châk ngêi mai. Ka nu bulah ka’n sawi a, kan neih sumin a tlin ve miau si lo. Angela-i chu a pa kha J.E a ni a, a hna a kaisân avangin an sawn kha a ni reng a. A tân chuan Shillong a kal kha a harsa vak si lo a ni.

Class-XI chu Synod HSS ah ka zawm ve ta a. Synod Boys Hostel-ah ka awm nghal a. Angela-i nen chuan kan awmna inkâr a hla ta in chanchin kan inhre zui thei ta lo va. Kum tâwp School chawlh a kan khuaa ka hawin Angela-i Christmas Card min rawn thawn chu ka hmu a, ka thawnlêt ve hman tawh silo va. Lehkhathawn pangngai ka ziak a, dâk-ah ka thlâk a, a hmu hman êm turah ka ngai ve ngawt a.

Kum a lo thar a, class kan tan leh a, hostel ah bawk chuan ka in pu lût leh ta a. Class-XI kan exam thuai a. A titha pâwl tak ka ni ve hlauh a. Class-XII ka zawm leh ta a. Tlêmin ka tlangval ve hret a. Kan School luhpui zingah tum vang rêng pawh ni lovin ngaihzawng ve deuh te ka nei ve a. Angela-i nen lah chanchin kan inhriat pawh tak loh avangin amah ka ngaih ngawih ngawihna chu ka ngaihzawng ve deuh bulah chuan a kiam thin a. A nuam rîauin ka hria a ni. Chuti ang chuan Class-XII chu ka zir chhuak ve ta a.

College ka kal hnu ah pawh Angela-i chu ka rilruin ka zawng ru reng thin a. A taka hmuh thut mai te ka inring thin. Bazar leh khawiilo a ka vahchhuah chângte hian bangbo takin amah hmuh ka inbeisei fo a. Tum hnih ngawt mai excursion neia Mizoram pâwna ka zin ve tum te pawhin vai ramah daih te hian lehkha zirin a la awm ang a, ka tàwng thut mahnâ te ka ti a. Tun thleng hian kan intawng ta si lo. Kum sawm chauh la liam mah se, kan intiamna a hlawhtlin hun chu tun hi anih tâk mîau avangin kan intawnloh kâr hi réi ka ti tawh khawp mai.

Ngaihzawng dangte pawh han nei ve láwp láwp thin mah ila, Angela-i ngêi kha ni zâwk se la âw ka la ti ziah thin a. Thinlungah hian a reh thei dawn lo anih ka ring. Tunah hian eng dinhmunah nge a din ang tih te hi ka hre châk ngawt mai. Pasal nei lo va a la nula a nih ngãt chuan ka chunga a rilru put kha la thlâk lo hrâm së áw…

Similar Posts:

• HSLC 2007 Result
• MESLC English Question Leak Out
• HSSLC Result hi
• Selection test hi ka hua
• Re-employment

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Tuesday, March 29th, 2011 at 3:02 pm and is filed under Fiction. You can follow any responses to this entry through the RSS 2.0 feed. You can leave a response, or trackback from your own site.