mi(sual).com

Thau hi a va han thaw ipik thlak tehlul em. Chutia han thau chhe em em chu ka ni chuang lo a, mahse min hre ngailo chuan min hmu ta se (misual ho te hian min hmu ta ula) “Te ve deuh, thau lam deuh, muk il el deuh” min ti ngei ang le.

Thau tak hi ka ni ngai lo a, ka naupan lai phei chuan cher ve thei tak ka ni. Ka kiu te hi a bawk liau a, ka hrawk hi a khuar dek a, kheimit te hi a ki van mai a, thau hi ka chak ve em em thin. School T-shirt hak ni te hian kamis hi ka ha lui hram hram zel, hrawk vel lo lang kha ka zak anih chu. Ka khup te pawh kha a lo lawk thei liu liau ngawt ang. Ngo tak kha ka lo ni ngailo nen, hmel lamah lah chhuan tur pakhatmah awm silo, hmuhtlak kha ka lo awm lo thei awm mang e!

Han nulat chhoh kha chuan tlemin cher zualpui kha a lo reh a, mi pangngai kha kan han ang chho ve a. Mahse thlalak hlui en erawh chuan “Ka van lo cher” ka la inti reng thin tho. Chuan kan han nula zel nula zel a, kan la nula cheu a tun thleng hian, kum a lo tam ang zelin kilos lam pawh an lo inchhek muk ve zel a. Hna hahthlak kan thawk silo, exercise la bawk si lo, thau chiah kan lo hmabak reng mai a lo ni.       

Kumin hi kum hriatreng tlak a ni. Rih lama half century vaw ngai miah lo kha nimin ka han inbuk chu ka lo pel duai mai a. Ka vai thiante lah chuan mi hi an nuih an nuih lehnghal a, “I dul te chu a va han kiar em em”, “I ban te chuuu” an tia min nuihsawh nasa mai. A lo ni reng a, han thu ila dul te hi thuah sarih vel hian a rawn inthuah tup mai a, kawr la hak tawk reng te hi hak han tum ila a banah hian harsatna hi a lo thleng thin a.

Thawmhnaw lei turin kan han kal ve a, “Hei chu a lian em mai, ka thawl ang a” kan tih te hi kan lo ha tawk chiah mai tawh thin a, a lawmawm loh theih khawp mai. Vawikhat pawh ka kekawr pakhat hi ka ha a ni, a kawng pawh ka la tawk a, a zipper pawh thlan tla hluama zip a la ngai lo a, ka lawm khawp mai a. Mahse, ka han thu chhin chu a malah hian ka lo tawt ta em em a nih chu. Ekhai heti te chuan nileng ka daih zo lo ang, ka tia ka inthlak leh ta ngawt a.

Tunah chuan mi tam tak cher duh vanga clinic pan te, gym kal te, diet chi hrang hrang zawm te, exercise la tlauh tlauh te pawh hi an dinhmun ka va hrethiam tak em! A hahthlak ngawih ngawih. Kawr banbul han ha ila kan chak hmel tung a, kekawrbul emaw pawnfen chhing emaw han ha ve dawn ila chawn a lo lian tung a, dul tihlan te chu a ngaihtuah pawha ngaihtuah chhin eih loh tur. Double chin mai pawh nilo triple chin a rawn insiam a, ngalrek te pawh hi a rek lo zo tawh.

Thil ei hi insum ve deuh tur a ni, han ti mah ila ril a lo tam duh si. Chaw tlem te te chauh ei tawh tur, han ti ila chaw ei loh inkarah khan eitur dang kan ei leh tho si. Zingah tho hma ila, park ah khan va walk ve tawh tur a ni, han tih leh thawh hma kha a harsa leh bawk si. Chhuanlam tur hi a rawn lang zut zut mai a.

Tihngaihna tak pawh ka hre lo e.

Similar Posts:

• Thau leh chêr lutuk hriattheih dan
• Ni berin a lang!
• Boney M leh Gate-Crash
• Thau inanglo
• Exercise hian min ti cher em?

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Monday, April 25th, 2011 at 10:30 am and is filed under HAHAHA, Health. You can follow any responses to this entry through the RSS 2.0 feed. You can leave a response, or trackback from your own site.