mi(sual).com

A hming atang chuan sexy tak a ni. Ka pu hi Khawvelthanga a ni, ka hmu hman lo. Ka pa hian an khaw chanchin min hrilh teh fova, ngaihnawm ti takin ka ngaithla thin. a hming erawh Raldan ni mahse rual u deuh te chuan he khua hi Chhu hlawh khua tiin an hre tlat. Chu chu a larna pawh a ni. Nikum khan ka pu te khua khaw ram tawh tuma chenlohna Raldan aka Chhu hlawh khua leh a hming put chhan (Chhu hlawh leh Raldan) tlawh chhuak turin kan han zin a. Ka pi leh pu te tuallo lenna, tuikang an lo nghahho thinna vel han hmuh chuan lung hi a engemaw ti len ve riau zu nia. Hei thlalak thenkhat ka chhawpchhuak bawk e

Raldan khua hi Chhingchhip atanga Khawbel peng a kal tur a ni a, Thentlang thleng Pickup in a kal theih. Kan motor pawh a tang kawng lakah. Thentlang atang hian Chhu hlawh khua kal tur hian ke in Km 10 vel kal a ngai.

Thentlang leh Raldan (Chh*hlawh) kan kal a thl chhinchhiah tlak deuh kan hmuh te chu:
1. Thing daikal : hei Chhu hlawh khaw kiang a THING DAIKAL an tih chu. a ek hi a lawr ve tet nia

2. Chh* hlawh chho chu: He hming a put chhan chu he kham chho tak maiah hian nuthlawi leh pa pakhat hi an chho dawn a, kham thui tak a nih avangin chu nuthlawi chuan chu pa hnenah chuan, “Ka kal peih tawh lo. Chho chhuah thleng khi min pua la, min puak thlen chuan min t* dawn nia,” a tiin bete hrai khat darbak a vaithang hrui a paw chho turin a ngen a. Chu pa chuan chu thil itawm tak hlawhchhuak tur chuan a paw chho ta ngat ngat a, he kham hi a lawn chhuahpui tep tawh tih ah chu nu invawnna a dar chu a uai bal palh a, CHH* erawh a hlawh ta lo a ni awm e. Mahse a hmingah Chh*hlawh chho tih a put phah ta tho a

3.Ar Lei: He Ar Lei hi Chhuhlawh chho hnuaia awm a ni a, Raldan (Chhuhlawh) khua hi tlangchhip a awm a nih avangin feh kawng pawh a chhukchho hle. He Arlei pawh hi an feh kawng ber a ni a, kham panga an kalna a ni. Tun ami khi kum 50 chuang a ni tawh. A hnuai hi kham sang tak a ni a, a hlauhawm hle. Thlalak a remchan loh em avangin chiang takin a lang thei hlawm lo

4. Raldan : Chhuhlawh khaw hming official zawk Raldan hming put chhan hi helai a ralvenna remchang tak hi a ni. Raldan tlang an luah tan tirh hian he khaw mi te hi Pawih ralin an tibuai fo thin a. Tum khat chu Pawih hoin rawn run an tum leh a. he raldan hmun thlang deuhah hian chung Pawih ho chu an hah chawl a. Chu chu nu pakhat thingphur tur chuan hmuin a tlan let vang vang a, dai a lo awm tuai pakhat Puallenga chu a hrilh a, hmanhmawh takin Puallenga chu hmeichhe incheia incheiin silai nen he ral danna hmunah hian a tlan phei a, amah chuan a bei ta a.

Helai raldanna pawng inkar sir ve ve hi kham sang tak nichina Arlei kham kal zel kha a ni a, hei bak hi khan dang a awm lo. Pic 2 a mi ang hian Puallenga chuan ral chu a silaiin a bei ta a. a hnungah mi dang an la awm emaw tiin Pawih ral chu an tlan let ta a ni. Hei vang hian Raldan tih chu a khaw hmingah a pu hlen ta a, he hmun hi raldan nan a remchanghle bawk.

pic 2

*** Ka pu pa leh nu te thlan pawh kan han hmuchhuak a (hnim zing atangin)

Thentlang pa hovin he hmunah hian min kalpui a

Similar Posts:

• Mizoram kawng kam quarry
• ‘Lung-khaw-sa’ hi i hre tawh thin em?
• Biate Hnam leh Zialung Khua!
• Lung Nupa : N. Bualpui
• A ni thei mai ang em?

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Wednesday, April 27th, 2011 at 5:30 pm and is filed under Pictures, Travel. You can follow any responses to this entry through the RSS 2.0 feed. You can leave a response, or trackback from your own site.