Kan chung Thlapui pawh khi a la ngai reng; kawlah a rawn inchhawnga lunglen rawn kaihthawh a la thulh lo, a chekawi arsite lah theihnghilh awm miah lovin min la hlui reng a; tuktina chhuak Ni lah a la dai lo a sat ngaiin a la sa reng.
Kumpuisula hun inher chhuak turte chu a pangngaitein an la her chhuak a, tlangtin mualtin leh kawr ruamte chu an hmunah an la bawk tlang far ; mahse kei leh ka thiante hi kan va dang ta em! Ka dam rualpui, ka veh ka veh thin savate pawh kha khawnge an awm tak ang le, Sairawkherh kak atana ka lak hual Sehawr zarte kha engtiat tak ni tawh ang maw le? Ka thangchep kamna, Chepa kawngtum kha a la kaw phat ang em le? Ka rilru mitthlah chuan a la kaw reng.
Tawlailir za atana ka sah loh zawk a phirpui kha a lian tawh viau ang nge a tlukar daih tawh zawk? Khiang thing hi a la me rengin Vawmbal hnaiin thak a la siam thei em le? Thakpui leh Zawngkangthai hian mi a la kang theiin Chhimhruk hi ka la haw tho ang em le? Han fiah leh thei ila aw!
Thenrual thaten Gas thuk mawi tak leh electric tha chakna hmanga bel mawi tak chhunga an lum thingpui, Australia Bawng chi tha mi hnute ngeia an pawt, Solomona lal no ang maia mawia thingpui min han han hlui chang pawh hian ram palailenga mautheia thingpui lum Hnahkhar tang ro alha hliau, Pu Ranga kurtai nen a sena in kha ka la thlang zawk ka ti. Mi Car mawi leh man tam chhunga chuana hawi hawi ai chuan theih ni se tawlailira, kan khaw dawrkai fapa kha han nawr leh ka va’n chak em. Sikul chawlhlai takte kha aw!
Ni, huna zawnga in nang khawm fuh ber berte chu sikul chawlh lai leh sava thau lai, krismas leh kumthar, Tlangsam par leh thlasikte hi an ni lo vem ni? Ni dangah pawh kan lo sawh fo tawhna thin kopangah chuan bungbu kutin hlum kan han sawk ngei a inthemthiamna tur nen lam hrual kepin thlangraah kan han pho tuar mai thin kha a nia le; fur laia kan bun chhiat savun pheikhawk lei ngei mai kha sairawkherhphan atan kan han tan leh hmawk mai a, chutah ram palailengah a tam thei ang ber tuhrik kai turin kan han chhuak ta thin kha a nia.
Kal pahin sikul kawng hnimbuk pali-nga kan han bawh eng thla uau mai bawk a, sikul tual phula lailen nupa veha kan han kun pheite kha aw…thlir leh hi ka chak thin. Zo lentu hnuaiah lung lem nei lo khan ‘khawnge, khawnge kelbuh-thingthiang’ kan hriatna hmun apiang in ‘share’ chung khan kawrtin kanin mualtin kan hrut thin kha a nia.
Chung lam hawi ila ‘khi khi sairawkherh kak tur’ kan ti a, hnuai lamah lah ‘saw saw tawlailir za tur- a zapui tur’ kan ti bawk a; a changin vazar rual kan fin a, a changin vate rualin min rawn fin ve bawk a. Vahrit ram tla kan thawnna piah a Thingvawkpui hnuaiah chuan dai theuin sahdal thang kan han kam a, kan kam laia Ramparva thlawk ri pharh han hriatte chuan en hun min tinghakhlel zual thin. Beai erawh chu Vahrit bual kan hmuh hun atan kan khek a; kawr kama changel hnah leh a hnuaia tumbu khaileng chu engemaw chen inthemthiam nana kan hman hnuin kam ramah thingsemimte chu kan han chhar leh lawp lawp bawk a.
Hlim takin kan vak vel a, kan au va, kan khek a, kan nui a kan kuk bawk thin; ral lehlama thian dang kalte nen kan inchhawna a tawp khar kan tum talh thin. Mahse haw har thei kan ni lo zanin hi Mc Gyver chhuah zan a ni tlat.
Sava perh tla kher lo mahila kan hlawk tho, krismas hnah lakna tur kan hual miau a. Krismas hi khawiah nge an nghah ang le chu chu a pawimawh fo, lengkhawm ve chiah lo mahila a kiang velah kan tap zankhua leh awm si a. Chhungte sawi dan chuan Vawk kan talh ang a, hmarcha kan hralh that bawk chuan Puanpheikhawk tha tawk, T-saat leh Pistol lem kah tak tak theih kan lei dawn. Mahse hlauhthawnna a la awm cheu, puanpheikhawk lei lo hian sikula rin nghal tur savun pheikhawk min lei leh palh ang tih a la ni cheu. Engpawh nise eng zawng a thawl, zan a lo nia lehkha zir a ngai lo, zing a lo nia sikul kal a ngai bawk si lo. Tui chawi erawh hna kal lai a ni, mahse a hrehawm lo sava veh pah a ni leh mai.
Thla en zana tualchhuak tingtang tar lam nen a, ‘lung ka mawl em mai’ kan tih laite khan kan lo mawl tak tak a, mahse a va nuam si. Kan lung a awi a, kan chan tawk kan hlimpui thin. Nun kha kan tan a par a, a vul chiai thin. Ngaihvarungthawn kan han nei a, kawnga kan han tawk tur ringawt kan ur nasat ziate kha, lehkhathawn kilthum nei ngei maia thleh inchibai paha kan han inhlan zauhte kha tu hmuh chhuah nge? Envelope hian lehkhathawn hlutna a lo keng hlei nem maw le…
Thil chhuak thar han awh ngawih ngawih tur a awm lo kha kan hlimna siamtu pakhat a ni. Kan neih a inrualkhai a, kan tui zawng a inhmu a, kan tlatna mual a inang za thin. Engkim mai kha chhnungte thawhchhuah atanga lei anih avangin kan ren lo. Tun hnua chi leh zel pawh mahni puala kan han lei thlap thlap takah chuan leh pawnchhia tur takngial pawh intodelh a lo tul takah chuan min delhtu hi a rih dan a dang ta hle mai a lo ni.
Sarep rawh rukte kha a hmui dan a va dang em, a hmin that leh that loh lam a ni lo hrawkah khan engkim mai kha a tui a, tuichen nikhua phei chuan kan pai apiang mai kha intihtheihpui tham vek a ni thin; chhun kan hlimpuia zan kha nuam kan ti thin. Aw khanglai hun tak kha aw…
(excerpt fr.Blogger)
Similar Posts:
- Thian ngaihawm.
- “Masi” ka nghahhlelh thin kha
- Thlasik leh nunhlui te
- Krismas Videos
- Krismas laia chhas neih thatna te
April 28th, 2011 at 1:29 pm
kan nau pakhat zai “aw ka nghakhlel em e nunhlui mual liam hnu”
chhiar ang awww
Report this comment
April 28th, 2011 at 1:57 pm
ngaihnawm e
Report this comment
April 28th, 2011 at 1:58 pm
A va ngaihnawm, 1st ka nih loh phah. Ka chhiar chik em a ni!Ngaihnawm ka ti tak zet, ka mangnghilh tawh ka hriatchhuah phah leh nasa ngiang.
Ka chhiar nawn leh dawn … krismas tuka chhungkaw thlalak, kan pause vel dan zawng zawngte rawn ziak belh leh teh … saphing pet hun lai te, sarzuk lawh ruk lai te …
Report this comment
April 28th, 2011 at 2:03 pm
lehkhathawn khian ka lung a ti leng hle mai. mite chuan nunhlui thawnthu in nei ngaihnawm bik thin teh e!! ka’n chhiar nawn leh lawks
Report this comment
April 28th, 2011 at 2:04 pm
Chhiar a nuam….‘khi khi sairawkherh kak tur’ he thu tak phei hi cuan ka lug a ti leg leh jual…. Tunlai thalai te hi cuan an hrethiam pha toh lo ag, khang hun lai nun nom jia kha, a dik ciah, han “awh” goih goih tur kha om bok ci lo.. Kan nunhlui min ti hre chhuak….
Report this comment
April 28th, 2011 at 2:07 pm
va ngaihnawm ve male
Report this comment
April 28th, 2011 at 2:12 pm
mamoite ot lawks tunlai thalai chu i ti duh, tunlai naupang ho hi an khawngaihthlak zawk, nunhlui thawnthu rothap deuh deuh sawi tur an nei tlem dawn sia, a bikin khawpui naupang
Report this comment
April 28th, 2011 at 2:12 pm
Pu Vakul nge²…thil reng² hi i ziak ngaihnawm thiam bik!
>”Mahse hlauhthawnna a la awm cheu, puanpheikhawk lei lo hian sikula rin nghal tur savun pheikhawk min lei leh palh ang tih a la ni cheu.”
He sentense hi ka lawm lehzual. In thiltih i sawi piah lamah i rilru suangtuahna i rawn tarlang tel hian in naupan lai boruak ah min chen tir zual.
Report this comment
April 28th, 2011 at 2:14 pm
” Ka thangchep kamna, Chepa kawngtum kha a la kaw phat ang em le? Ka rilru mitthlah chuan a la kaw reng…””.
….tih lai tak khi ..i va sawi thiam tehlul em…
Report this comment
April 28th, 2011 at 2:18 pm
Sawm………. !!!!!!!
Nakina chhiarah
Report this comment
April 28th, 2011 at 2:21 pm
Tha ka ti hle mai. Hetiang thuziak tha hi chanchinbu darhzau deuh a pho chhuah atan a itawm mang e, helai ah hi chuan chhiar ve atan a ka duh tak te pawh in an hmu lo tlat thin a
Report this comment
April 28th, 2011 at 2:38 pm
A thupui in a zir bawk a, nunhlui ngaihawm tak ani e,
Ngawiteh u…. he site lovers ho hi kan nunhlui/naupan hun lai kan hun hman dan tlangpui hi chu a lo in ang deuh paat a nih hi maw… post tha…
Report this comment
April 28th, 2011 at 2:50 pm
Ngaihnawm reuh khawp mai. A ni, nunhlui hi a ngaihawm thin zawng a nih hi! Kan lian tulh tulh a, kan upa telh telh a, khawvel a changkang telh telh a, nunhlui ngaia kan kur ni hi ala tam ting mai dawn a nih hi! Post tu ang hian keipawh nunhlui ngaia kur duam duamna tur ka ngah ve ta mai, ka la rawn auchhuahpui ve phawng mai thei.
Ka chhiar a, ka lung a tileng riau va, a ziaktu hi environmentalist/Nature lover a ni ngat mai tih ka hre thei. A nunhlui ngaihdan leh lunglen dan han thlirpui hian hla phuah thiam chu nise hla a phuah chiang ang.
Report this comment
April 28th, 2011 at 2:56 pm
ka lug in ti leg…
Report this comment
April 28th, 2011 at 3:06 pm
Sawithiam bok ah, ngaihnawm hle mai,
Report this comment
April 28th, 2011 at 4:03 pm
Ngaihnawm dawn chiang sa, han chhiar thuak2 pawhin. Hun thawl deuhah aw vakul?
Report this comment
April 28th, 2011 at 4:05 pm
Lung hlui a leng chuai chuai mai!! I va han fun khawm thiam tak em! Sikul chawlh leh serthlum hmin a inrual thin te kha… Lehkhachaih chaih vel te kha…han sawi zel teh!!
Report this comment
April 28th, 2011 at 4:15 pm
Beisei aia a’n ngaihnawm chu le. A bengvarthlak bawk.
Pan lai nun min ngaih tir e.
Report this comment
April 28th, 2011 at 4:23 pm
Lung i tileng e
Report this comment
April 28th, 2011 at 4:30 pm
Ni e, nunhlui hi zawng a ngaihawm bang dawn lo anih hi… Time machine te hi awm tak2 se,kan han zin let leh tur:-)
Report this comment
April 28th, 2011 at 4:46 pm
Pu HV, America atang in eng hian nge i lung tileng ve a? Mizo sentiment draw i tum mai mai a ni lo maw? (fiamthu deuh)
Report this comment
April 28th, 2011 at 4:46 pm
Nakina chhiarah tiin ka khek tang tanga ka chhiar zo ta, ka lo mitthla zel a hriat phak loh leh tawnloh nei nual mah ila rilrua ramngaw hnimbuk lui ruam dai rim nam rum rum khawpin ka lo suangtuah pui a che.
Lung ava leng em ‘Mc Gyver leh Street Hawk’ ngei mai kha maw
Report this comment
April 28th, 2011 at 5:05 pm
sillyBoy #21 Mizo tam tak, an rilru leh an sawi chhuah inang silo ang ka ni lo tih han hre phawt mai teh. Aizawla piang, seilian e tilo chuan Mizo ze pangai…thingtlang nun ang chi emaw nuam ti tak ka ni. Naupan lai atanga chhungte remtilo chung pawh a thingtlang kal ru tang tang thin ka ni.
American ho hian an ram an hmangaih em em a, an ram pawh an duat tlangin an uluk hle bawk. Thuneitu te leh mipui an inzah tawn a, a pawnga puia inhlau emaw Mizoram anga sawi chhuak mang si lova inrel ringawt erawh an awm lemlo. Eiru ni awma an hriat chu tunge anih lam ni lovin, ram tan an chhui zui hrep a, an man chhuak a, kum tam tak tang turin an chungthu an rel mai thin. Mizoram a apply atan a awhawm hle.
Mahse, mahni pian leh murna tluka lung tileng tu a awm chuanglo. Chuvang chuan alawm, Mizoram a development pawisa eiru tu te hian kan rilru an lo tih hah ve em em, kan thlir ve reng si. Mipui lah hian sawrkar puih aiin a puih nih kan tum fur a, ram kan duat silo, kan tih theih kan tilo lutuk hian hnuk a ti ulh thei tep thin, ka ngaihtuah thui lo mai zel.
Mizoram dung leh vang hi Buhfai supply thiarin emaw, adventure sports thilin emaw, engemaw scheme awareness thilin emaw, zin pangai pawhin ke (on foot) leh motor pawhin ka fang chhuak kim titih tawh a, ka lung tileng tu tur atam kher asin.
Report this comment
April 28th, 2011 at 5:13 pm
Pu HV, i sawi hi a dik, ka thlawp e. Ka hrethiam, khawi hmunah pawh awm ila, kan identity hriat chian tluka hlu a awm lo.
Kei tuhlul pawh hian Mizo thlavang hauhin Uppal, Hyderabad-ah vai tlangval 4 zet mai ka hmachhawn ve tawh a sin, tan a na duh khawp mai.
Report this comment
April 28th, 2011 at 5:17 pm
sillyBoy #24
Report this comment
April 28th, 2011 at 6:08 pm
Tih tak zetin blog lamah kala chhiar ang. Thawh hlawk thin mange.
Report this comment
April 28th, 2011 at 6:43 pm
Aw ka ngai nunhlui zamual liam hnu
Hmanlai an chang ta maw
Dawn chang ni hian ka ngai nunhlui liam hnu\
Koh kir theih chang si loh..
Report this comment
April 28th, 2011 at 7:57 pm
Post tha khawp my..word play pawh thiam khawp my..i sawi tumah min hnuk lutin min ti lungleng vawng2 mai lawm le..
Report this comment
April 28th, 2011 at 9:33 pm
Nunhlui ami tho a ni bawk a, OT em em lovang chu maw
Chandigarh lam Punjabi thianpa paw’n a thiannu hnenah, “May i horizontalize your perpendicularity?” nui huin a sawi. A hnungzang a ri dawp hairehai
A awmzia ber chu, Horizontal = ding sawi nan a hmanga, perpendicular = khamphai kha mut (sleep) sawi nan a hmang. A awmzia chu, “Ka mut tir thei che ang em?” a ti a ni ber hahahaha
Report this comment
April 28th, 2011 at 9:45 pm
Hv-a hi maw lungleng chiang e a. Mizo vantlang nun nuam ti lutuk a nih hi keimah ang thoin mizo biak tur a neih tam loh vang leh mizo tawnga titi nuam a tih em vang hian a lawm Misual.com pawh hi.
Panlai nun kha a lo nuam hle mai a lo ni. A Sei hlau miah loa a bua chhuah tak a ni ka nap ni.
Mc Gyver khan kan lung min len fo thin, kei chu.
Report this comment
April 28th, 2011 at 10:35 pm
Ka chhiar puat e. Khitiang life khi sawi ve tur ka neilo a, ka man pha meuhlo a ni ber e. A nuam hian ka ring thin. Khimi hnu hret, in tleirawl chuah lai ‘first love story’ han thehchhuak la mawle. Ka hrechak khawp mai.
Report this comment
April 28th, 2011 at 10:38 pm
32.chutiang chu ka nei leh lawi si lo, in neih ang khan- a nawm hi ka ring ve thin-zoho han thehchhuak zawk teh; ka rawn sawi khi chu puppy love lam a pawl zawk e.
Report this comment
April 28th, 2011 at 11:11 pm
haha….@ vakul ka neilo, HAHAHA bawm a khung tur bak.
Report this comment
April 29th, 2011 at 5:47 am
Sahdal thang kam te, ruaithehna tur changel sah te, sava veh te khi nuam ka ti thei ve thin khawp mai. Thing hmanga tawlailir siam phei chu ka uar thei asin aw. Thian zahova thla eng hnuaia tukchawp tingtang hmang ngeia kan zai thin lai te pawh ka hrechhuak uai uai mai. I thuziak hian ka lung a tilengin nunhlui ram min fantir ram ram mai.
Report this comment
April 29th, 2011 at 6:15 pm
I ziak ngaihnawm hle mai !
“fur laia kan bun chhiat savun pheikhawk lei ngei mai kha sairawkherhphan atan kan han tan leh hmawk mai a”
Kei a phan atan chuan pa te boot chhia-ah pawh a lei nem lai kha kan hlep tha thin. Tin, sairawkherh-phan hi a spare kan pai ziah bawk !
Khatiang “Age” atang khan ‘Computer Age”-ah kan chuang kai ta mai hi khang hun a thi tawh te kha lo tho leh se, engtin rawn ngai maw tunlai khawvel hi. Internet chu sawi loh, cell phone ringawt pawh hi mak an tih ka ring thin! Sms te hlei hlei hi maw le…!
Hmanlai i ziahthiam ang hian tunlai hi i ziak thiam hrim hrim ang tih ka ring. Rawn thawh leh teh…..
Report this comment