mi(sual).com

I
Khûa tin khûal changa in vangkhua kan lo lâwi khân,
In rûnsângah lo kâiin ka tawng ta che a;
Annêm biahthu inhlânin tuahrem hun kan thlîr,
Mahse, sâmang in\hen nan kâwl a lo eng si.
II
I bahsam ngîl seng dar vaw hnâp ka en ning lo,
Lâitual i mawi chuang e, i pheichheh kârkalak;
Engvang khêr nge kei chhuihthang lungmâwl val tân,
I ânnêm thinlai hnêma’n min lo hlân duh le?

III
Sâmang kan in\hen lai khan lunglâi a zîng riai,
Dâr ang intawn loh nî thlîra lûnglên tuarin;
Rinawmna pâr phün a châwm puitlin tum dunin,
Inthlahlel êm êmin kan in vài liam anih kha!
IV
Kan Mualkhawpui ‘tûal ngaite’n bêl leh mah ila,
Nang ngaih suihlunglên hian bân zâi a rêl thei lo;
Tuar hãr lunglên vang \uanrêl a hãr \hin ngêi e,
Vangkhaw zâu dan kâra lûngkhamtu dî neih zawng.
V
Ka aihnahphahpui, ‘puarak’ ka lunglâwm siamtu’n,
Nang nghilh zâi rêla lêngdang chhâi zawk tur hianin;
I zûn zâm phuar vel lûnglên ka tuar dam theih na’n,
Ka hmakhaw ngaih vangin min râwn e, a fâlah.
VI
“Vangkhaw kâr hlaa’n lûngrûk ‘sâm dah reng lo la,
Nghilh zâi rêl zawng hãr mah se, a rei chuang lo’ng e;
Kan Mualkhawpui lânu hël duna chhãi zâwkin,
Kâr hla i dî nen in intawn leh hma loh chuan.”
VII
Kan Mualkhawpui lânu lûngthlu lovin ka chhãi,
Mahse, thlafam ka chan hma chuan ka nghilh lo’ng che;
Rinawmna pâr i châwm zel chuan engtin ngâi che?
Min dem lûl suh, i zûn ngaih lûnglên vang a ni.
VIII
Ni leh thla ralin hun a in her liam zel a,
Nang nen suihlungrûala lêndun nî a herchhuak lo;
Nang iang pha lo ka chhâilai lânu tâwnah hian,
I zûn phurh ka bun rûak thei si lo duhlâi.
IX
Hunpui lo thleng \hinah kan lâwm dun thei si lo,
Kan Mualkhawpui lânu duhâisâm loh nen hian;
Puanang i hnâwl chawlhtui ningzû dâwt dunin,
Awi âw! duh loh puan min pe, ka rinawm lo ve.
X
Hringnuna ka rinawm lohna rah mûalah ka pho,
Zahfâkah lu êm chân lo mah ilang;
I zûn ngaih hnêm nâna ka lo thlan lânu hian,
Ka hraileng châwilen tur pâiin a râi ta e!
XI
Ka thâia’n chetsualpui chu duha pawm turin,
Chûn leh zua, lenrûal zawngte’n min tîr lui ta si;
Nang ka hmangaihzia hria rêng an awm ta si lo,
Lûnglam vâiin ka âu ruai ruai, lûng ka chhîr e.
XII
Fâte nu tura nang chauh ka thlan lai che hian,
Mi tâwnah puanang hlûi turin mûal i liam ang maw;
Ka rinawmloh tuara ka hringnun kalsual hi,
Dem lûl lo la, ka hmangaih vang chauh che a ni.
XIII
Thaikawi bâwngte nunrâwng ka rawn thawnah khân e,
I tân nung tlâklo ka nihzia ka târlang a;
Mahse, chhânlêt i thaikawi ka hmu ta si lo,
“Engtin lo ngâi che maw?” ti hian ka dâwn \hin.
XIV
Kan rûnsâng kâia ka thâi a chan nî chuanin,
“Nang ni zâwk la,” tiin duhâi ka sâm kúal a;
Mahse, ka \âng bei turin i rem tawh si lo,
Van khûangruah nan angin nang ngaih ka zâwr hnâp reng.
XV
Thâi nena nun hlimawm Zotuithîang iang lûang chuan,
Suahsualna tui bawlhhlawh chu rang takin a fin;
Lûngngaihna tui bawlhhlawh fâwn hlup hlup kârah chuan,
Inngeih lohna chuan Lalber nihna a chang ta!
XVI
Chawlhtui ningzû dâwtin ka chianglo rûai reng a,
Tûkzan \ha nei thei lo hian ka vân laitûalah;
Zilhna dawng \hin mah ila, ka zâwm thei lo ve,
Ka thâi pawmlâi leh nang ngaih vang nunkhûa buaiin.
XVII
Kumsûl vei mah se, thâi nen hlim zâi kan rel lo,
Sâmang in\hen nan kâwl a eng, kei lûnglâwma’n’
“Mahse, mi tâwnah puanang i hlûi tawh ang a,”
Tiin ka zawng rûai che, khawi lam \uanrêl che maw?
XVIII
Pathian khawngaih leh zahngaihna thlazâr hnuaiah,
Inhlan tharna duhawm tak ka lo nei ta a;
Mahse, nang ngaih lûnglên ka bâng thei chuanglo ve,
Sualna hnâwlin Pathian duhdan zâwm mah ila.
XIX
Sakhmêl kan intawn leh nî hnuhnung berah khân,
I hmaa’n zak chungin ngaihdam ka dîl che a;
Mahse, “A rem tawh lo,” tih ânka mai ka chantâwk lo ni,
“Aw, Hmangaihna hi a nun a va râwng tak êm!”
XX
Chutin ka aihnahphahpui pûarak ka \hian chuan,
Ka hringnun awmdan zawng i hnena’n a pûang a;
Mahse, “A rem tawh lo,” tih ânka nunrâwng chuan,
Ka tâna beiseina nei fân fântu pawh a tlâwm si.
XXI
Thlafam chan a dang chuang lo ve, i zûn ngaih hi,
Famrolung mûalah sûlrûlte chhunrâwl mai a tân;
Fam changin nang nghilhzâi ka rêl zawk mai ta’ng,
Chutin lûngkham thinlâi natna a dam mahna.
XXII
Min hmangaih ve \hin kha min nghilh hlen dawn em ni?
He thlalêr ramrova hmangaihna tuithâwlah hian;
Ka dangro hnâwn turin tuihnâng reng a awm si lo,
Rinawmna ka vawnnun loh vang a pawi ber mai!
XXIII
Ka nunkhua tisei theitu chu nang chauh i ni,
Ka lam hawia ka \ângnêm i belh leh chuan;
Mahse, i rem si lo, lûngngâiin ka kûr reng,
Aw, hringmi lêngzingah hian vân a dûai chuang e.
XXIV
Ka nunah ka Lalber! Ka tih chu tih a ni,
Ka chungchâng thu ah tûma’n ro an rêl thei lo;
Mahse, hmangaihna vanga fam chang mai tur hi,
Damte’n pheilâi vâwrin han hrereng na’ng che u.

……………

Similar Posts:

• Thlang ta mai zawk che
• Love Story- IV (Ka Thài)
• Hmangaihtu’n a tuarna chu
• Ih maw…?
• Hmangai CFL min dawn pui ve la…

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Friday, May 6th, 2011 at 1:32 am and is filed under Poetry. You can follow any responses to this entry through the RSS 2.0 feed. You can leave a response, or trackback from your own site.