mi(sual).com

Hostel  lamah ve thung…

Tichuan pawl 12 te chu zo tlangin thiante nen mittui nen mangtha tiin kan invai liama, he ka thianpa nen erawh zawng hrignun rahbi kan lo la zawh dun dawn chauh! College pakhat mai ni lo, hostel pakhat ah, bath room, dining hall, toilet, Toothpaste, Sahbawn etc etc inhmantawm turin (kan intawm zawng zawng hi chu sawi vek chi a ni lo!) Mizoram sawrkar hian min vawmlut dun ta a ni. He hostel awm hun chhung hi a lawm he ka thianpa chanchina a ‘main chapter’ ni ta chu!

Kan Batch puite an luh hun aia tlaiah hostel-ah chuan kan han insuan lut dun ve phawt a, kan bungrua em pawh kan inrem fel hmain pawi a khawih ta! Kan senior te khan min ko nghala, chutah chuan alawm, Vai senior, a room kawngka pawnlama ahming tarah pawh ‘Dr’ dah tel vung tawh kha, “Hei hi tunge ni a in rin?” tiin min zawta, ka thianpa chuan, “Hostel cook a niang a…” a lo ti ta pek a nih kha mawle!

Lungngaihna tamtak hi han ngaihtuah let leh hian kan nuih pui bawk bawk thei thina, mahse khami zana ka thianpa in pawi nasa lutuk a  khawih vanga vaipa khumhnuai chep leh rimchhe zeta thosi ka vai tlaivar kher kha chu tun thleng hian nuihzatah ka la la thei meuhlo chu a ni. Bawhkhup phal a ni bawk si lo, mahni in lam ngaih lunglen nen, kan hre lo te pawh lo ti liam ve ta mai se tha zawk tur…!

Tichuan kum 5 dawn teh meuh mai hostel life chu kan han hrut dun ta a, a hmaa a mizia ka lo hriat ve chin kha chu a them te mai chauh a lo ni e. Kan luh tirh chuan senior-te kha kan hlau thin khawp mai a, mi tirh an hrat bawk si, thil tul lo zet zet min tirh tir a, a lam thiam lo lo kha lam tir hlawhah kan la tang zui! Mahse hetah chiah hian a ni ka thianpa khabe hmanthiamna chu kan chhawr tak ni.

Kan senior-te zingah khan rawp tak tak an lo tam khawp mai a, kha’ng hovin an room a min koh tawh kha chuan ka thianpa chuan a ngaihzawng lo neih tawh dan leh Khumpui lingleta an lo chet tawh dan zawng zawng an sermon khum thin mai zawng senior dangin min koh pen hi an phal tawh lo re re, bawp an khawkherh sauh sauhva chilthli tla duah hian an ngaithla tawh mai thin. Mahse kei ngei paw’n tlai khaw hnua zan khat a riak bo lo haw lehin a thianghlim tak loh thu a rawn puan chiahin a ni kha’ng hun laia kan senior te a hrilh zawng zawng kha dawt vek a lo ni tih ka hriatchhuah ve chauh!

Zan khat a leng chu a rawn haw har viau mai a, kan ngaih a tha lo hman khawp mai, tichuan zingkarah enge chanchin tih ngaichanga ka va lut chu a khumah hian a lo thu ngui lup mai a, a chhan ka han zawt, eng danga min chhang ta lo chuan kan bulhnai velah nula ringruh tliak an awm leh awm loh min zawt let ta daih pek a nih kha! Tual i that em ni? ti a ka dawp ngial hnuah tihian a inpuang ta -  “Nizan khan ka thlah haw ve a, step thim laiah khan muah ka va tum kha a lo tang tung bawksia, ka’n kuai lui deuh kha a ri ta rup mai alawm mawle a ngawi vung vung sia, ka rawn tlan haw san ringawt!” Tual em kha chu a that ta lo niin kan hria.

A hawl kim phiana, a tih lampang chu over taka ti ve tak zel chi a lo ni bawk, Pathian thu a sawi chuan kohhran upaho ngaihthat lohna tur rum rum khawpin nuho a in ngaihzawntir thei a, a inchi lamah lah khawilai Zu dawrah pawh pawisa neilo pawh ni ila ba tur chuan ka thianpa hming hi a tawk a,  inkhelh nikhua lahin scarf hian a lu a tuama, lawk bir ber hian a card hmu chi hlirin a khawsa ve ziah lehnghal! Ngaihzawng a neive a nih chuan hla a phuah hnan chawpchilh zel ang a, a hla sa te reng reng hian an hming a chham tel ziah bawk! “Aw hmangaih Lalnunnemmm….booohooh” tihte hi a sak dan a ni deuh kher zel! (Boohooh tih hi chu a lungchhe insut thawm a ni).

A bialnu nen an inthenhlim pawh hian zankhat chu dar 2:00 am vela thawm ka hria in a room ka va bih mai chu(h)! A thianpa pakhat nen hian funte an lo theta, Guitar hrui thum chauh nei tawh nen khan mittui nen hnaptui nen hla an lo phuah pek a nih kha! An hla phuah sa kha tape recorder hlui fahran tawhah hian a thluk siamin an lo record pah zel bawka, keia va dak ve pawh chu min lo ngaihsak loh em avangin ka mutsan leh ta daiha, mahse a tuk zinga an hla phuah ngaihthlak leh tuma ka va kal leh chuan a hma zana mittui leh hnaptui nen meuhva bei ve ngial si khan chang khat tha tal pawh lo phuah chhuak si lova mawle!

Hnamdang ho nena kan buai tum kha ka la hre reng mai, Vai hovin mizo zirlaite min lo hek vanga kan thinrim chuan a mawhphurtu ber ni a kan hriat kha zanah a room ah kan luh chilh a, chutia thinrim tawka kan lo inchapchar lai chuan ka thianpa bawk hi a rawn tlan lut, “Who challenge me??” ti a au chunga vaipa khuma zuan lawn pahin a kawr a’n phelh ta tehreng a nih kha, chutah chuan thinrim reh vek khawpin heng thilte hi ka lo ngaihtuah hman:

1. Mihring anatomy zirtur hian an taksa zai hawn kher a lo ngai miah lo!
2. Thau leh tisa tello hian mihring hi an va’n lo dam rei thei ngai em!
3. Kan hostel mess chhiat zia.
4. Mihring hian ruh 206 kan nei an ti maw?? Ka thianpa hi chuan chu aia tam chu a nei hrim hrim ang!
5. Ka thianpa ang hi Africa khawmualpui ah khuan mi maktaduai tam an la awm, Christian-te hian thilpek ah tan kan lak a va ngai nasa tehlul em!

Vai ho chuan ka thianpa taksa an hmuh chuan min zuam zo tak ngial dawna ka hriat vangin chhuata a kawr paih chu chhar sakin ka va pe a, keipawh chu thinrim lam a lan tawh tlat loh avang leh a mood-a la chenve ka duh bawksi a vai hovin min lo hek dan zawng zawng a bul bal atanga ngaihtuah chhuaka intithinrim thar leh turin pawnlamah ka chhuahsan ta a nih kha.

Hetiang taka hawl kim a nih vang hian thlarauva a khah lai leh tisa mi  anih lai hi hriatthiam a har khawp mai a, mahse thil chiang em em erawh chu zingkarah a inbual turin bual in lam pana a kal paha Pathian hla a sak rat rat tawh chuan  a hma zan lamin thil sual a lo khawiha, inthen thianghlim a ngai hi a lo ni ve ziah!

A zirlai a zawha hna te a han thawhve tak hnu hian vawi khat chu kan inhmu nawlh maia, amah ang lo takin a lo mum kang tawh mai, a chin tha lo te bansanin a piangthar ang a, a hlawh a tam tawh bawk nen, damdawi tha te eiin a lo thau ve ta a nih dawn hi tih rilru pu chungin, “Thianpa eng damdawi nge i ei, ka thau ve duh tawh a nia min lo hrilh ve teh.” tiin ka zawt a, nui hiu heu chunga a mi chhanna chu heihi a ni “ I chaw ei dawn apiangin a senchi no khat tal inziah la, bawngsa rep hmeh ziah bawk rawh!!”

MLTP Act hmanna state-a khawtlang leh kohhran rawngbawltu inti ve meuh tan chuan mitmei ven tur a tam dawn em a ka hriat avangin tun thlengin ka thianpa thurawn min pek ve chhun pawh hi ka la zawm thei ta hrih lo chu a nih hi!

‘Sex’ han tih a ngai ‘sexy’ nghal viau ringawt zel mai, sex hrilfiahna dang – ‘Either the male or female division of a species, The condition or character of being female or male; the physiological, functional, and psychological differences that distinguish the female and the male’ tih ang chi te hrechang tawh lo leka mipat hmeichhiatna lampang ringawta ngai chi, form fill up pawha sex column-a ‘Never’ tihte la dah nulh nulh mai kan la kuh tulna ramahah hian zawng ka thianpa chanchin hian he topic hmang hian chhiartute beng a fah lul lovang. Mahse ka thianpa sex life ah hian zawng mipat hmeichhiatna lampang han zeh tel tur ka hmu tlem khawp mai a, a sex life ah pawh hian mipa a nihna anga a hringnun ka han tarlan sak mai a ni e.

Amah hi Mi(sual) ve tho, post pawh ngaihnawm tak tak lo chhawp chhuak teuh tawhtu a ni a, ka sex life min rawn ziahsak ve a nih pawhin a ziak sexy lutuk bik lo turah ngai ang.

Similar Posts:

• An zak chem chem!
• Jeny Mizo Nula
• JIMMY….JIM…ka thianpa
• Network Problem
• Ka thianpa sex life!

Recent Posts:

• Open letter to Dr. Mahminga
• How to locate your misplaced Android phone
• KUT HNATHAWKTU TE TANA HAMTHATNA
• Mizoram Electric Power Dinhmun Leh Hmalakna Te:
• YMA

This entry was posted on Thursday, May 12th, 2011 at 7:00 pm and is filed under Luangliam. You can follow any responses to this entry through the RSS 2.0 feed. You can leave a response, or trackback from your own site.