Khawvel hnam tinina an neih; fak aia sel kai zat zat, buaina intamna leh intanna, tharum thawhna nena laikhat tla emaw tih tur khawpa inlaichin hnai, tlakranna aihnah phahpui, hurherhna leh khawlohna nena suar khata tla, nupa inthenna tam ber thlentu leh chhungkaw kehdarhna kaikuang, a rim atang reng reng pawha Gehena rim nam tlat ni-a mi tam takina an ngaih ‘ZU’ hi sual tinreng bula ngai hi mi eng zat tak awm ang i maw?
Kum sul sawm zet liam tawh-ah khan Ka pate Makima (JFL Junior) chuan zu hi sual tinreng bul a nih dawn chuan a in hmasa bertu pawh Setana a nih a ngai ang a lo ti dimdiam tawh a. Zep nak emaw zu hi sual a ni lo ve ti-a tai pawng zawrh zawrh khawpa tang na thin te hian kohhran leh mi pangngaia inngai chin te sadai thiatin an mit an tikham thin a ni tih thu hi chu tui tel lovin tuifinriat a awm thei lo tih tluk thawthangin a pawm nahawm awm e.
Bible-in,†Tangka sum ngainat hi sual tinreng bul a ni,†a tih lawm lawm laia zu hi sual tinreng bula ngaia ar chuk tui lova chhuaha kan sawi phar chiam chiam thin hi chuan sualna bulpui Setana meuh pawh a tilungzurin a tilunghnur zawk hial ta ve ang!
Kan pipu te nunah khan zu hi a serh zinga a mei ang maiin a tel ve zat zat a. Mi huaisen leh tlawmngai, mi kawlh sakawlh laka khawtlang chhanhimtute an chawimawina sang ber ‘Nopui’ chhunga awm pawh zu tho hi a ni! Mahse khang hun lai kha chuan khawtlang nunin a tawrh phah lem lo ni-in a lang. Zu hi tlakranna atan an hmang kher lo tih chu an intodelh dan atang khan a hriat theih vek awm e. Chhungkaw kehdarhna pawh a ni lem lo aniang, zu hi hmanlai khan nupa inthen phah nana hmang hi sawi a awm lem lo em mai.
Tuna zu suala ngai tlattute pawh hian nopui dawm pha chin pasalthate kha zu in mah ni se tun thleng hian kan la ngaisang zel tho chu a nih si hi! Zu hi kan piputen an hman thiam chuan an tuchhuan keini pawh hian kan hmang thiam ve tho dawn lo’m ni?
Kan rama Kristianna rawn tuhtu kan missionary zahawm tak takte leh kan kristian hmasate kha zu chungchangah hi chuan a bilh-ah an tho lo a ni ta ber awm e. Zu hi suala puangin an hmu Hmuithla a, vanram kai min khamtir theitu ni hial ah an puh thlu der a ni. Zu in tawh dek dek chuan U Mafaa dan takah sual rawng ka kai ta sa sa tiin rui hnepin an in phah ta thin a ni. Chu chuan nghawng pawi tak a nei a, zu in thiam lo hnamah kan chhuah phah lo chauh a ni ta ber e.
Zu hi ka ti leh pek thin ang he ‘Zu’ ngei hi sual chang ni lova sual tinreng bul a nih dawn chuan Isua kha sual tipungtu satliah mai ni lovin sual tinreng bul tipungtu-ah kan puh tihna a ni ang! Thil mak a tih hmasak ber pawh kha tui, Uain-a chantir anih kha. Zu hi sual chu ni na se la chuan Uain awmsa ho zawng zawng pawh kha tui ah a chantir vek zawk hial ang chu.
Mawl lai hun a pel a, changkanna-in min rawn run a, sum kan han hmelhriat tak chinah chuan kan nun ropui leh kan ze chhuanawm tak tak te khan min tuithlar ta mai emaw ni chu aw tih turin min tinsan ta duak mai! Heng kan nun tichhetu thamna te, eirukna te leh hlemhletna te hi a hnarkaitua zu hi kan puh a nih ngat chuan ar ha a timin sakhi a nui thei hial ang!
Annania leh Saphiri te nupa thlanmual lama tir liamtu pawh kha zu an in ruk vang ni lovin sum an chhep relh a, an hlep ruk vang anih kha. Kha an sum chhep relh lah kha an ta ngei, an ram an hralhna sum a ni leh nghal a, chuti chung chuan hremna chu an pumpelh chuang lo a nih kha. Chutiang bawk chuan Juda Iskariot-a’n Isua a hralhna pawh kha zu no 30 ni lovin tangka 30 a nih kha. Zu hi sual tinreng bul chu ni na se la chuan Sakawlh number kan tih tei vet pawisa pakhat inhman tawm tur pawh hi zu pakhat hnam tin-in an in intawm tur anih ka ringhlel lo.
Kohhran pawh hian zu kan do nasat tluk hian hlemhletna leh eirukna hi a lang a pau hian do ngam se la chuan tun ai chuan eiru ho hi an lim-ik ngam lo vin an tawmim deuh tur ani na aleh! Mahse a mawh lo ve U Mafaa dan takah Pathian thuawih aia Biak In chung awih kan ngaih pawimawh tawh zawk vang pawh ni fahmiang, eiruk sum pawh kan awh zel tak ni.
Veng pakhatah pawh hetiang lama fihlim teh chiam lo hi a awm a, kohhran-ah pawh a inhman duh loh phah reng a; mahse a sum neih hre rengin, â€Kohhranah te hian inhmang ve la, building committee member-ah kan dah ang cheâ€, tiin zu han sawm pek a! Kan hetih chhung hi chuan tuang tichhaha at-huai kan chhuah lui te a nih ngawt loh chuan corruption do te hi sawi mawi ngam chi pawh a la ni lo.
Shakespear-a em ni, “Sum hian engkim a si thluâ€, titu kha? A va vawr fuh tehreng em! Ni e, sum leh pai hi chu mi hausate tihausa-a mi retheite retheihna thlentu zawng a ni chiang a ni. Bible chuan, “Sum tam tak aiin hmingthat hi thlan zawk tur a ni a, tangka leh rangkachak aiin duhsakna a ngainatawm†a ti a, he thu hi chu eiruk sum atanga intilian ho chungchangah hian a dik zual hian ka hre thin. Sum tam tak an han nei a, kohhranah sum an chhung lut huau huau a, fak an hlawh leh nge nge thin.
Tangka leh rangkachak an nei im em e, a aia ngainatawm duhsakna an la dawng tel zui nen! Lungte pakhatin sava pahnih an vawm thla a ni ber e. Eiru thei chin tan phei chuan eiruk mai hi a lo chakawm dawn hle ni te hian ka hriat phah thin. Eiru te hi khak ai chuan fak mai hi an awl leh nge nge thin pawh ni fahmiang.
Isua hun lai a Pharisai te em pawh kha kan tluk lo ni te hian ka hre thin. An ni kha chuan chhiahkhawntute kha chu ui ek pu tluk pawhin an hmu lo a nih kha. Keini chu sum kan hmuhna ai chuan sum kan hmanna hi a thianghlim chuan kan lawm tawk em em a ni ber e. Inthawina aia thuawihna lawmtu Pathian hi kan tilawm zo ngut ang emaw chu le.
Kei chuan zu hi in ai chuan in loh ka thlang a, khap ai chuan khap loh ka thlawp thung. Mahse eirukna leh hlemhletna-ah hi chuan inhnamhnawih ai chuan inhnamhnawih loh ka thlang a, do loh ai chuan do char char hi ka thlawp thung.
May 12th, 2011 at 9:43 am
I va han ziak tha em! Chhiar a nuam a,thu I thiam hle mai. Ka ril rem zawng takin I ziak e
May 12th, 2011 at 9:52 am
Chhiar ila
May 12th, 2011 at 9:56 am
sual tin reng bul an tia mi? in zo daih ila ni mai lawm 😉
May 12th, 2011 at 10:08 am
Zu hi sual tinreng bul a ti lova, nuihzat bur a min siamtu tih a ni zawk e. Mi tamtak hian kan Bible thianghlim a thu ziak te hi hrechiang mang si lo a mahni duh dan a lo modi hi an ching thin a.
Sual tinreng bul chu TANGKA SUM NGAINAT HI A NI E.
May 12th, 2011 at 10:12 am
a va han tha ve….JFL Jr. chu nang ngei hi i lo ni e….ka thlawp che..:/
May 12th, 2011 at 10:15 am
Mi fing zawk leh mi rilte chuan thliarhran a har kan ti khwp mai..
May 12th, 2011 at 10:25 am
Sangpuiipa, hla phuahtu pakhat chuan “Sual tinreng bul zu” a ti ve tho sin… an sawi an sawi hi chuan thu dik hi chu tel ve leh zeuh thin.. Zu pawh hi keini a in ve lo tan chuan sual a ni lem lo, sum pawh hi sualpui tham khawp ka nei chuang lo.. 😀
May 12th, 2011 at 10:26 am
Veng pakhatah pawh hetiang lama fihlim teh chiam lo hi a awm a, kohhran-ah pawh a inhman duh loh phah reng a; mahse a sum neih hre rengin, â€Kohhranah te hian inhmang ve la, building committee member-ah kan dah ang cheâ€, tiin zu han sawm pek a!
Ka awihlo kher mai.
Zu leh tangka sum ngainat hi sual tinreng bula ni ve ve.
Khawvelah zu in thiam an awm lo.
Zu khap hi kan la mamawh deuh deuh zel ang.
May 12th, 2011 at 10:26 am
I ziak ngaihnawm hle mai. Article tha tak a ni.
May 12th, 2011 at 10:26 am
I thuziak chiar a nuam hle mai, a tha ka ti hle bawk (Y) Bible berin Sum hi sual tinreng bul a tih miau chuan ani ah ka ngai hmiah mai. I thuziak zinga ka sawisel ve thung chu Uain hi Bible ah chuan dawidim pawlh loh chiah ani chuang ni, tunlai zu te chu dawidim pawlh vek ania. Chhang pawh dawidim pawlh loh a tih kher zel kha. Tunlai chhangthawp te pawh hi dawidim a tel sia hei pawh hi a khap em aw tih hi ka hre chak :-S
May 12th, 2011 at 10:44 am
@kiddo, hla mai nilo, thu ziak leh thu sawi tamtak ah sual tinreng bul hi zu ni anga sawina a awm alawm. Mahse a post tu hian Bible a rawn sawi avangin Bible ah hetiang ziak a awm lo e, ti zawk hian a inziak e ka tihna anih kha. Mi tam takin Bible ah inziak angin an ngai a, an sawi a, an phuah a, an sa a, an ziak thin. Mahse Bible ah chuan ka sawi ang khian a inziak zawk ani.
May 12th, 2011 at 10:57 am
va ziak tha ve.
save keuh ang.
May 12th, 2011 at 10:58 am
Pu JFL-a rim te pawh a nam rum rum e! I ziak thain tawngkam i thiam hle mai. A ngaihnawm dap dap e!
Amaherawhchu, Sangpuiipa sawi ang khian Bible hian sum hi sual tinreng bul a ti lo va, sum ngainat hi sual tinreng bul a ti zawk a ni(1 Tim 6:10). Sum nei leh hausa apiang hi an sual tihna a ni hauh lo. Sum ngainat avanga sum hmuhna tur a nih chuan sual engmah tih hreh nei lo hoah hian sual tinreng bul a nihzia a lang mai zawk a ni.
May 12th, 2011 at 10:58 am
thil thalo ti turin zu a thlem thluk theih nge tam ang sum a thlem thluk theih? 😉
May 12th, 2011 at 11:06 am
Zu chu zu ania sum chu sum ania, han tih chiam ka tuma mahse ka zuih ral mai ange, ka duh ve ve sia.. 😀
May 12th, 2011 at 11:09 am
Mizo tawng i thiam hle mai..chhiar a nuam e, tuemaw tihdan takah a tazaih mai alawm..zu in chu tha ka ti lova, mahse zu khap hi chu awmze awmloah ka ngai
May 12th, 2011 at 11:45 am
A hmangtu a zir ni mai in ka hria…..
May 12th, 2011 at 12:15 pm
Isua’n Uain a tihpun kha dawidim telh nge telh loh.? Zawlaidi ang hi chu a nilo deuh ang a. Rakzu, xxx Rum ang phei chu a nilo chiang.
Chuan e Vala, Missonary te khan ramdangah zu inlo turin an tive lova, ngatinge kan ramah chiah an tih, tih hi ngaihtuah chian ngaitak a ni. Zu kha min khap saklo se chuan zarkawt pheia In awm zawng zawngte hi vai ta, vai in a nilo ang tih hi i sawithei bik a mi.?
May 12th, 2011 at 12:15 pm
Great post!
Zirlai bua telh-ah ka va it ve aw .. (Y)
May 12th, 2011 at 12:48 pm
thu ziak i thiam hle mai….ngaihthlak fo tawh mah nise ngaihnawm ti takin kan chhiar thei tlat!
Ti zel rawh (Y)
May 12th, 2011 at 12:54 pm
Bible chuan Zu hi sual tinreng bul a tilo,thra tinrengbul pawh a ti lo.Khap loh lam thiam taka an sawi chuan thra viauin ka hria a.Khap lam an han sawi leh chuan thra ka ti in min hneh leh viau zel.Mahse, thilchiangsa anga lang chu, in duh an awm chhungchu a zuar an awm dawn tlat.
May 12th, 2011 at 1:11 pm
Zu far khat pawh la in ngai lo, fel em em mai, hmeichhiat mipatna lamah pawh fihlim em em si, mahse sum erawh hnar thei miah lo hi an awm teuh!
May 12th, 2011 at 1:32 pm
Kan chhungte zingah hian zu nghei theilo a awm a,keini chhung chu zu khap burna hian min tibuai khawp mai.Zu in hi tha kan ti lo,mahse nghei hlei thei tawhlo kawl bawk si chuan zu khap burna hi tlakranna a ni zaw mah elo maw aw kan ti hial thin.Zu man a to em em ringawt a,local te phei chu in tlak pawh a ni meuh lo an ti bawk sia,a sen chi lah chu a to hle mai bawk si a,zu hi chu khap lo mai se,zuruih erawh khauh takin khap se.
May 12th, 2011 at 1:33 pm
Pi Lalsangzuali Sailo in a a hla phuah sual tinreng bul chu zu a tih kha a dik ka ti ngailo reng reng. Amah pawh khan a thih hma khan he hla avang khan a in chhir an tih kha mawle. (H)
May 12th, 2011 at 1:49 pm
#8,@Chhana, i awih kher lo mai thei a, hemi thu hi chu an zinga tel ve ngei putar pakhat dikna ngaina tak mai min hrilh a ni! Mi pakhat fihlim tehchiam lo ka tih hi sawrkara EE hna chelh lai a ni a, a hming leh a veng hming chu ka sawi kher lovang; mahse a tak tak a ni e….
May 12th, 2011 at 2:03 pm
Bible chuan sual tinreng bul chu sum a ti ringawt lo, sum ngainat a tikher.
Zu in avanga vanram thlengzolo tur tamtak thi tate avang khan zu hi thiltha chu anilo phawt. Chutiang bawkin sum ngaingatna sual avangin mi tamtakin vanram an thleng zolo. A khawi zawk zawk pawh hi thiltha a ni love. Ka sawiduh ber chu he khawvel reilo te a hlimna minpe tu nimahse vanram min thlenlo tur thil zawng zawng hi sual an ni vek. Engmah hi sawimawi tum lovang u.
May 12th, 2011 at 2:06 pm
Sum duh vangin hmeichia tam takin an taksa an in zuar a,sualbul a ni phawt a,sum duh avangin tual an that bawk a, sum duh avangin sual chu tih duhna a tam em avang in sual bul ka ti zawk.
May 12th, 2011 at 2:19 pm
Zu hi sual a ni lo. Zu in hi sual a ni lo bawk….
Hei hi chu Hnam Sakhua khan kan Zosapte dem zawngin han comment reuh se la mawle….. 😀 😀
I ziak tha hle mai. Good Post. (Y) (Y)
May 12th, 2011 at 2:29 pm
tha dap dap hle mai, (Y)
May 12th, 2011 at 3:00 pm
Zu in nana sum an duh avangin ruk an ru a, (TS-a te thiandun phei chuan Tintangin buhfai an hralhru thin) Khawi zawknge a bul chu. A tlangpuiin zuin mi te hi an rinawmloh tlangpui.
May 12th, 2011 at 4:24 pm
Zu khapna Dan chungchang hi eng nge misual ho te kha in ngaihdan le? Mizoram a zu khapna hi chu KOHHRAN vang ani ka tilo thei lo,.. (B)
May 12th, 2011 at 4:44 pm
Nia, tha khawp mai…Zu pawh a ni lo,sum pawh a ni lo,Tangka sum ngainat a ni e 🙂
May 12th, 2011 at 4:48 pm
Zu bawk hi ani le pek mawwh:-O . AAAA a hun le tawh hi han birh le pawp mai ang aw.. misualte hian (B)
May 12th, 2011 at 5:10 pm
Sual tinreng bul chu kan ngaihtuahna. Ka lawm e
May 12th, 2011 at 6:40 pm
(¯`·._.·donald duck·._.·´¯) Nick chu type chhung a rei duh awm mange! 😀
May 12th, 2011 at 10:07 pm
nia
May 13th, 2011 at 7:13 pm
:-S