A hming ringawt pawh hian thu tam a hen a, sawi fiah a harsat tluk zetin nunpui pawh a harsa thin. Zonun ze mawi chi hrang hrang te parfung chawina kuhmum ani a, hmangaihna leh lainatna aihnahpui, thatna leh ngilneihna sangawi zawnpui, felna leh rinawmna nena chhul khat chhuak, huaisenna leh chhelna nena laikhat tla a ni ti ila kan sawi sual tampui awm lo ve.
Mi chanhai leh riangvai te vaihna laka an hnungdawla chhawmdawltu, mi hausa leh neinung te hmahruaisaktu, phut let nei miah lova vantlang mipui te kaihza vensaktu hi kei chuan TLAWMNGAIHNA bak a awm hian ka hre lo. A lo awm anih pawhin ka hriatna a zau tawk lovin hre tur hian ka beng a hlai tawk lo ani tal ang.
He TLAWMNGAIHNA nun neitute hi chuan an nunah thu an nei phal tawh lo va, midang tan an nun an hlan a, an thisen leh thantui, an tha leh tui midang tan an luanraltir thin. An finna leh an theihna te chu mahni hmasial nan an hmang tawh lo va, mi dangte hma sialsak reng rengin a thim a var pawh thlu lovin an thawk thin.
An nunah KEI tih hian hmun a chang pha lova, mi dangte hahchawlh nan an hah a, tui halte dang hnawn nan an dang a rovin an dang a char a, tui taka mi an mut theih nan an meng a, mi dangte puar nan an tam thin. Chu chang a ni hleinem midangte nun nan an nunna hial an la hlan phal nia!
He tlawmngaihna nunpuitu te hi chuan an buk tawk rangkachak hi an hen tak meuh meuh hian ka hre thin. Sakei rum ri chu hlauhawm viau mah se nunau thlabar rum ri hriat ai chuan an bei thin. Hling leh hlang inkarah an ring an rawlh a, an thatlai hun zawng zawng midang tan hlanin thih leh dam an thial tak meuh meuh thin a ni ber e.
Serhmun khaw pasaltha Zingkela leh Vungtawna te thlafam chantirtu, Taitesena zingphula tir liamtu sakei kha hrangin a hun lai khan rum ring viau mah se an tlawmngaihna ri hi a ri ring zawk hial awm e! Thih an chak vang leh dam an thlakhlel tawh miah loh avanga nunna chan huama phek chhuak ni lo, a tulnain a namseh tawh zawk avanga thi ta te hi Zofate thinlunga dam rei ber ber chu an va ni si em!
Buhtui tumphit khat lek a in pawh a,”Ka va puar tak em! Randanga sairawkherh ang mai ka ni ta” Vanapa tih tirtu pawh kha a tlawmngaihna bak a ni hleinem! Chutiang bawk chuan an ramvahnaa riltam lutuka an awm lai pawha theipui hmin a hmuha thiante ko hmasa te tea pum khat pawh hmawm duh lova lo siamtu pawh kha a tlawmngaihna tho hi a ni. Ni e, mahni hmasialna leh tlawmngaihna hi chu a inchemhar tlat reng a ni. “Sem sem dam dam, ei bil thi thi” tih thu pawh hi tlawmngaihna atanga rawn in-irh chhuak leh tlawmngaihna chhul rawn keutu a nih ka ringhlel lo.
Kan pipute nuna thil hlu ber, chhawmnun leh vawnnun atana duhawm tawp thang, an tuchhuante thlenga tangkaina leh hlutna la hloh eih lo, hunina a hlutna a tihkiam theih eih loh, tuiek leh sul rulin-a a eichhiat theih miah loh; mahse thlahthlam luat avanga kan hloh hlen theih ni bawk si chu TLAWMNGAIHNA hi a ni ti ta ila thu kan ngam lutuk em lovang chu maw! U Mafaa dan takah kuhva ka ei ngai loh avanga ka hnar hi tlawmngaihna a ni lova, ei chak reng chunga midangin an chang lovang tih hlauh avanga ka hnarna hi a ni tlawmngaihna chu a tih ang deuh khan kan phur zawng leh nuam tih zawng kan hlenchhuah hian kan tlawmngai ta em em tihna a ni chuang lo a ni.
Chuvang chuan ka lo tlawmngaiin midang tan malsawmna nge ka nih anchhia tih hi I in zawt nawn leh thin ang u. He ka thil tih avang hian mi hian min ngaisang sawt ang nge min ngainep zawk ang tih te hi ngaihtuah thin ilang chuan tlawmngaihna nunpui turin kan nun kan inbuatsaih tanin kan inzir tan tihna a ni thei ang. Kan hmaichhana min fak dertu ten hnunglam atanga min nuih loh nan kan nunkhua hi kan chheu zawk tur a ni!
Kan nuna tlawmngaihna-in hnahpui a chhuana duah taka a than theihna atan chuan kan taksa vaivuta siam hi a tawk em em a ni! kan thlantui hi tlawmngaihna tualto theih nana chawmtu a ni thei bawk a, parfung mawi taka a chawi theih nan chuan kan incheina mawi lam ai mah chuan kan nungchang mawi leh mawi lovah te a innghat zawk a ni. Zofaten zotawng kan hmang chhung hi chuan TLAWMNGAIHNA tih thumal pawh hi a awm rengin kan nunpui reng tur a ni dawn lawm ni? TLAWNGAIHNA nunpuitu nun chu midang mithmuhah a tlawm thei tak tak ngai lovang.
Similar Posts:
- Tlawmngaihna, kan chhuang ‘over’ em?
- Tlawmngaihna
- Tlawmngaihna hi a tlahniam em?
- Tlawmngaihna
- TLAWMNGAIHNA vs NIHNA
May 16th, 2011 at 11:30 am
Ka lo t1awmngai a nge aw… Hmanlai chuan, tlawmngaihna lan chhuah tirna hmun kha a la tam deuh a. tunah erawh, Chhiatni thatni ah deuh chauh hian a ni ta mai a!! hnatlan nikhua chu sawi loh a lum ni ta se..
Report this comment
May 16th, 2011 at 11:34 am
Pakhatna nih khi tlawmah ka la a, ka ni duh lo vel! Ka tlawmngaihnain a tlin lo.
Mizo hnam hi kan tlawmngai vak em ni, mi tlawmngai awm pheuh pheuhte nungchang kha kan MAGNIFY ta mai niin ka hre thung. Liandova khua lah kha… tlawmngai lo ropui, kan Mizo thawnthu reng rengah mi tlawmngai individual an lo awm zauh ve thin a, chu chu kan lungfing ta deuh zel bawk a, khang mi thenkhat lawr falte nungchang kha kan imitate ta nual ni maiin ka hria. A tlangpuithu kha chuan hnam tlawmngai vak kan nih ka hre ngai lo.
Ka tan chuan DUTIFUL IS BEAUTIFUL tih hi ka la duhtawk viau. Hnam ang chuan —hnam tlawmngaiah ka puh ve thei lo.
Report this comment
May 16th, 2011 at 11:46 am
Pahnihna nih hi ka tlawmngaih theih loh na lam tak ani, tlawm la lek lova 1 ngei nih hi a hlu…
Mi huaisen kan tih te kha huaisenna nileng leng a tilang an ni kher lo, darkar reilote huaisen mai an ni. a hun leh a hmun .. chutiang zel in.. tra la la la la
Report this comment
May 16th, 2011 at 11:49 am
Vanneihtluanga’n Mizo Driver-te a fak chiam a, chawimawi letna pawh a dawng. Mahse, Mizo driver ka tawn tawh te, chuti teh luaa an tlawmngaih ka hre ve lo. Vanneihtluanga ka dem lo, a hriatte an tlawmngai a ni mai!
Hman zan lawk khan Kulikawn atangin Taxi dam lo tan miin an hire a, uchuak takin a fare a chhiar. Tlawmngaihna man to pawl tak a ni awm e. Emergency thil chu ni lo se, an hire awm tawp si lo.
Road construction-a thawk ka thianin a hnathawhna hmunah lung, boulder, cement, baloo a dahtir a. Hawn lam a ruaka hawng tur driver chuan thingtuai pakhat pawh a phurh letsak duh miah lo.
Mahse, hmingthatna chu Vanneihtluanga kawlawm hmangin an lo la tawh, an duhtawk tawh ni fahmiang!
Thenawm leh thenawm ramri innek reng an tam mai. Rilru insi lovin, bang leh bang insi hnai tak tak an tam. Tlawmngaihna a lang mawlh lo. Chu chu tunlai thilthleng tho a la ni. Thenawm in leh mahni in inkara tuihawk luankawr siam theih lohna a tam ta, tlawmngaihna a lang vak lo. De set set pawh a mit zo palh ang e.
Report this comment
May 16th, 2011 at 11:58 am
He post chu a va tlawmngai ngai ve le.
Report this comment
May 16th, 2011 at 12:01 pm
Japan ho keini aiin an tlawmngai zawk, tih lirnghing hnuhnung ber an tawn hnu khan a lang chiang hle. Tunlai Mizo tlawngaihna hi chu der tak ani tawh. Inphutchhuah tlawngaihna.
Report this comment
May 16th, 2011 at 12:09 pm
Keichu khawhar in kal, Thlan laih, etc. te hi tlawmngaihna ka ti ve lo.. kan society function dan pakhat ah ka ngai mai.
bus a ai upa emo thutna ken hi chu tlawmngaihna chi khat chu ani veau mai. . ninom hlee mahse.. govt. hian city bus vel ah hian din phallo daih se ka ti ngot mai..
Report this comment
May 16th, 2011 at 12:23 pm
Ziak tha khawp mai .
.a tak a nun pui hi a har a ni .min fuih tu a tan hetiang chhiar tur a awm thin hi a lawm awm e .
Report this comment
May 16th, 2011 at 12:33 pm
Tlawmngaihna hi a sawi a sawi a ni lo, a taka nunpui lam a ni zawk. Mahse kan nunpui dan tur erawh chu kan khawvel chenna a zir leh hmasawnna mil ni thei se.
Report this comment
May 16th, 2011 at 12:45 pm
Ramthar hmun pakhata(kan mizo hnahthlak tho) ka zinna ah chuan mitthi an awm hian nu&pa, pi&pu te hi an tlaivar a chuan thalaiin thlante an lamai thin. Thlan nghahni te leh a tukah te chuan khawhar lenpuite pawh an awm tawh ngailo, lusun chhungkhuate pawh an leng bo daih zel. Vai zia an pu tawh bawk sia, tlawmngaihna chu a tlem kher mai.
Report this comment
May 16th, 2011 at 1:26 pm
Good Post…Tlawmngaihna kan tih hian hmun hrehawm leh hun harsa ah te, midangte tana inpekna leh thawhna; peihlo leh hreh tak chung pawh a, a taka tih lan hi a ni ber awm e.. a sawi a sawi liam mai chi pawh ni lo, chetzia a lan chhuahtir chi a ni.
Report this comment
May 16th, 2011 at 1:43 pm
tlawmngaihna chu pakhat chiah a awm…chu chu hmanlai leh tun thleng pawhin a la pangngai reng a..tlawmngaihna a la ni reng….hun leh hmun avangin a danglam thei lo….kung kung mai a…
Report this comment
May 16th, 2011 at 2:09 pm
Isuan min zirtir ang chiah hian nung thei ta ila,mi tlawmngai tawp kan ni ang. Chawnghilh sawi khi ka tawm pui a. Tlawmngai nih ahar em avang leh mi tlawmngai an van em avang tak erawh chuan mitlawmngaite hi an hlu ani. Thil awlsam leh mi nazawngin awlsam taka an neih theih hi a hlu ngai lo viau. Arunachal ah hian, thingtlang khuaa Pathian thu hrila kea kal chang hian kristiante hian thawmhnaw rit kan phurh an phal ngai lo. Hmana assam tuiliana chhangchhe bungbawra kan tan lai khan Adi tlangval 3 ten kan bungrua min thiarpui vek bawk. An tlawmngai ka ti thin hle.
Report this comment
May 16th, 2011 at 2:46 pm
Tlawmngaihna tih thu te i han post tak hluai le, Mipa leh hmeichhia an inlaichin dan bak sawi tur i hre lo e maw ka tia……hahhaha
Report this comment
May 16th, 2011 at 2:50 pm
Mizote birthright bik emaw kan ti ngawt ang e. A teuh lo mai! Intihluih ngai a nih hi. Isua pawh khan a lo zirtir daih tawh, “Biang lehlama bengtu che chu … i kawr laksakin … mel khat kala phut luitu che … etc., —Rome sipate khan an kulite kha chhawr nawmnahin mel khat kal turten an phut lui fo, Jews-ho hmelma leh Jews awpbettute lakah pawh a let hniha thatchhuah zawk turin Isua khan a zirtir thin. Inzirtir chawp ngai a ni. Thil zir tawh pawh hi a hlamchhiah leh theih bawk.
Taitesena kha a motive a tha deuh ber, a danghote kha chu at-huaia che, mi dang nun chhan dan tur kawngah pawh atthlak leh strategy fing leh fel awm hauh lova che-chhuak mai mai mi an ni! Finna tel, a tlo leh mawihawih zawng pah renga tlawmngaihna hi kan zir thar a hun ta.
Riltam reng, riltam lova insawi thinte kha DAWT VAR a ni. Khuangchera pem bo chhan kha i hre chiang.
Report this comment
May 16th, 2011 at 2:56 pm
Zirsangzela Hnamte khan 2001 kum tawpah min liamsan tawh a, min liamsan hma khan, Mizo chhulchhuak zinga “a auh din zawh loh kha” eng ber hi nge?
Report this comment
May 16th, 2011 at 3:03 pm
‘Fukushima 50’ te kha aw..! An zinga pathum an thi tawh an tia mi?
Tlawmngaihna hi hnam dangin nei ve lo anga ngaihna leh Mizote chauh tlawmngaia ngaihna hi mizo tawnga “Tlawmngaihna” hi hnam dangte’n an tawngah an neih ve loh vang a niang a
Report this comment
May 16th, 2011 at 3:14 pm
chawnghilh #16 khi 2002 anilo maw?
Report this comment
May 16th, 2011 at 3:23 pm
@HV : Ni zawk awm tak e. 2002 October vel.
Khatih lai hnu hret boruak chhehvelah khan, Zira Hnamte hi kan inah tuisik in-in a rawn peng zuai a. Ka nu khan a tunu (ka fanu kum 8 mi awrh) hnenah khan, “Tuna rawn lut, chhuak leh ta kha i Pu Zira Hnamte a nih kha, i hria em?” a ti a, a zawt a.
Ka fanu chu a meng kal mai a, a ngaihtuah vang vang hnu chuan, “Hman nia thi kha maw?” a ti he haw zu nia!
Report this comment
May 16th, 2011 at 3:29 pm
chawnghilh, ka’n tihna chhan chu ‘a ni’ chiah ni lovah a sarhu (ti mai ang) lai khan ka rawn ral ve tlat a ni. Republic chhungkaw lane (Pu zela cabin em ni) Baptist biakin thlang mai ami nula fel tak Ruatpuii khan min kalpui nghe2 alawm
Report this comment
May 16th, 2011 at 3:33 pm
Tlawmngaihna hi “Zonun zemawi,” tih ani a, tih zel a infuih nan hman atha ka ti khawp mai. Hnamdang tlawmngai tak tak an awm avangin Zonun zemawi anih loh phah chuanglo. Hawihhawm dan mawi tak2 khawvel mihring te hian kan hria, chu’ng zinga mi chu a ni.
Tunlai tlawmngaihna tam tak erawh hi chu, Aurinnaa tlawmngaia hnatlang tur te chhuah hun inhrilh te ania. Tlawmngaihna a nilo. Tlawmngaihna chu phut chawp kher lova mahni bengvarna atanga midang peih loh tur thlenga tih duhna neih hi a ni.
Report this comment
May 16th, 2011 at 3:34 pm
Kei pawh, a ruang niin TUEMAW TE TE chuan mi kalpui a, chumi atanga calculation rawn nei thar ru lehin … hrethiams? Mi rawn beng harh a ni e.
Report this comment
May 16th, 2011 at 3:38 pm
U Hungchhungi’n an pa hlabu min pek a chhunga kuta thu inziak awm ngei min pek ka roh hle. :Insawithei:
Report this comment
May 16th, 2011 at 3:38 pm
Zonun Zemawi Tlawmngaihna ken tel tura kan mamawh nia ka hriat tak riau chu, “Excuse me, Welcome etc.,” han tihna tur ang chi —hnam dang changkang zawkte kalphung ang chuan kan ti ve ta fo va, Zotawng ngeia hmante hi zir ve ta ila … a ho in tih loh zawng a ni ve em?
Report this comment
May 16th, 2011 at 3:41 pm
#24 a dik khawp mai. Ka rilru a awm ta thin tlat pek pakhat chu. Mizoram lamah hian kan hmang vak lova mahse khawvel hmun dangah hian an hmang uar phian a… Zan lama inthlah nan “Mangtha,” chhun lamah “Chhun tha”. Ka hre ngun a ngaiah ka nei a, a mawi ka ti phian mai. A hawihhawm riau asin. Ka hriat tirh erawh chuan ka lai deuh hu.
Report this comment
May 16th, 2011 at 3:58 pm
#14,D_auva leh ta chiam chiam thin hi aw!! Heti lai hi hmeichhe bawm emaw i ti leh ringawt a ni lo maw..
#16,”Hla phuahtute hi zawlnei, an thil sawi erawh dik vek ngai si lo te chu an ni” tih te pawh kha a awm thanin ka va hre e…
Report this comment
May 16th, 2011 at 4:09 pm
#24 #25
Aizawl city bus-ah khan ka chuang zing ve angreng khawpa, thutna ken awm ngawih ngawih aia upate, pitar putar leh nu valaite pawh ka kian ve zeuh zeuh thin inti-polite takin !! A hreawm ber mai chu thutna kan ken-a-te an han trang trung mai a, an han thru duh miah lo thin kha chu ka zak ve thin khawp mai. Thutna kianin kan lo ding ve uai tawh bawk si a, han thut leh ringawt kha chu nuam tawh chiah bawk si lo. Ken awm ngawih ngawih kian lovin ka chuang tlang fo.
Hnam dang zingah chuan thutna han kian ila, “ka lawm e, tlangval” an ti a, an thu mai a, keinin, “engmah a ni love” kan ti ve mai a. Engmah zahna tur a awm lova, a nuam letling phian.
Tlawmngaihna erawh a ram amite zirin a lan chhuah dan a dang mai niin ka hria.
Report this comment
May 16th, 2011 at 4:10 pm
Ni e, tlawmngaihna hi kan hnam rohlu, kristianna nen pawh in hne rem thlap ani. Dal tial tial angin lang mahse, mi tlawmngai tak tak hi chu zofate zingah hian an la inphum ru teuh a ni. vanneihtluanga ang hian tlawmngai kan hriat te hi chu mi dangte cho phur nan i chawi mawi thin teh ang u. Zu nopui aiah ziakin kan chawimawi thei ania.
Report this comment
May 16th, 2011 at 4:15 pm
a reng rengah tlawmngaihna hi chu a hlu alawm…..
Report this comment
May 16th, 2011 at 4:19 pm
#27 miin thutna min kian emaw, thil min pe a kan duh zawng anih chuan lawm taka pawm sakin, “Ka lawm e,” tih mai a finthlak ka ti.
Report this comment
May 16th, 2011 at 4:30 pm
Ni e tiraw Pu HV, Mizo zingah chuan polite viau dawn pawhin ‘Over’ kan ni leh lawi si thin.
Pu chawnghilha sawi ang deuh khian ‘excuse me, welcome etc.,’ tih ang te khi mizotawnga hman thran a chakawm ka ti khawp mai. Chumi inzirtir nan chuan Korean film Mizotawnga lehlin hi a hman tangkai theih ang em le te ka ti deuh.
Report this comment
May 16th, 2011 at 4:39 pm
Bawngtlaia #31 ka fanu kum 5 hi ka tluk chiahlo
Report this comment
May 16th, 2011 at 5:04 pm
Chawngbawla tlawmngaih dan leh huaisen dan kha ka ngaihsan chi.. Hmanlai pasaltha huaisen leh tlawmngai te kha athuai an tam ka ti mah mah.
Report this comment
December 8th, 2013 at 2:50 am
Hetiang postte hi a van ngaihawm ta ve le
hairehai
Report this comment