He thil hi ka rilru ah a awmna a rei ta khawp mai. Tunhnai mai khan chanchinbu lamah chhuah a lo ni bawk nen, kan thai lang ve leh duh a. Nikum 21st October khan khumchiktheiin a rawn post tawh a, kan tuihnih ve leh a nge.
A awmzia: Euthanasia hi mawlmang taka sawi chuan khawngaih tihhlum (mercy killing) tihna a ni. Mi in natna khirh tak tuar sela, a natna chu damchhuahpui beisei awm loh emaw tihdamtheihloh natna tih chiang sela; dam thlakhlelhna reng nei lovin, chutianga natna tihdam theih loh hrehawm taka tuar reng ai chuan natna tuar lovin damdawi hmang emaw a, a ma duhthù ngei a a nunna lak (chiu hlum emaw damdawi eitir) chu a ni ber awm e.
Damlo chu engmah hre tawh lo leh thu thlûkna pawh siam thei lo dinhmuna a awm in, a chhungte remtihna vanga nunna lak sak tak te pawh an awm. Euthanasia hman duhna chhan tlangpui chu, natna hrehawm tak tuar reng duh loh na vang te, sum leh pâi ah chhung leh khatte laka inthlahrunna vangte, in enkawl zelna tur sum neih loh avangte a ni.
Inhnialna: Euthanasia hi eng tik hun lai atanga hman tan nge chiang taka hriat a ni lo a. Ram tam takah chuan a rûk leh dân ang thlap a hmanna a awm ta nual mai. Mi tamtakin an thlawp laiin thenkhat erawh chuan an duh lo bur thung. A tlangpuiin Sakhaw lam hruaituten an dodal nasa a,”Pathianin nunna hlu tak min pek hi keimahni duhthu a lo tihtawp theihna kan nei lo” tihte an tanfung a ni.
Dam thlahlel tawh lote an thih thuai theihna tura puitu pawl Exit Vice President Berhard Sutter chuan,”Thih theihna chanvo hi mimal thil a nih avangin State emaw Kohhran emaw a khawih lo” a ti ve thung. Tunthlengin inhnialna te, man (arrest) tawk phahte an awm bawk. Thenkhat chuan, damlo chu nikhaw hrelo leh a má duhthù a thutlûkna siamthei lo dinhmuna a awmin, a chhungte remtihna á a nun lak sak hi Euthanasia in a huam lo an ti bawk.
The Aizawl Post, May 17 2011 chhuak a, Euthanasia chung chang an ziah tlem tar lang ila. Switzerland hi dân ang a Euthanasia hman phalna ram a ni a, tûr hmanga dam beisei tawh lote khawngaih avanga tihhlum mai na dan an siam a, mahni hmasialna emaw duhamna thil emaw anga tih erawh phal a ni lo.
Zurich region phei chu ‘khualzinte thihna hmun’ ti hial sawi a ni. He hmuna pawl pakhat Ludiwg Minelli-a din Dignitas chuan kum 2010 tawp thleng khan damlo natna khirh tak tuar mi 1,138 chu an nunnain a chhuahsan theihna turin an lo pui tawh a ni. Heng an mi tanpui tawhte hi Germans 592, French 102, Swiss 118, Italians 19, US khua leh tui 18 leh Spanish 16 an ni.
Ngaihtuah a ti thui: He kan Zoramah hian Euthanasia hi dân anga hman a ni lo a, tlanglawn takin kan la hmelhriat lo pawh a ni maithei. Amaherawh chu, he thil leh a kaihhnawih hi hriatloh lamah hian kan lo hmang der tawh mai lo maw? Kan Hospital thenkhatah hian hetiang lam hi sawi tur a awm tawh em? A rûk hian kan lo hmang reng a nge? Han ngaihtuah ve teh u.
Kan hun kal zel hian min la hman tir ve mai dawn nge Kristian ram kan nih angin kan do zawk dawn? Inawkhlum te hi Euthanasia pêng pakhat a ni mai em? Zawhna hlir zawhna hlir, ngaihtuah peihte tan….
Note: Chhiar chiang duhte tan Buaipui tham thilte tih lekhabu ah Mrs J.C.Bonar-i ziak chhiar tur a awm.
May 18th, 2011 at 9:05 pm
Hei hi issue harsa tak ani. Kristianna nena en phei chuan rilru siam a har (or awl) duh khawp mai.
May 18th, 2011 at 9:06 pm
tualthat / mani in tihlum nen an danglam na a awm lo…. ka duh teuh lo kei chu 🙂
May 18th, 2011 at 9:16 pm
Hetiang hi chu Kristian rindan nen chuan in kalh tak ani, a chhan chu Kristiante hi chuan ‘miracle’ te kan beisei tlat thin a…..abortion/family planning ho ai pawhin araapthlak zawk alom male…. (N)
May 18th, 2011 at 9:20 pm
A damlo berin a duha a rem tihna a nih ngat chuan pawi ka ti lo. Ka thlawp.
May 18th, 2011 at 9:52 pm
Na tuar reng renga hrehawm deuh a an awm a, damchhuah beiseiawm loh a, damlo in a duh ngawih ngawih phei chuan pawi ka ti vaklo mai.
Chhungte damlo na tak tuar te hi hmuh hrehawm ka ti thin.
May 18th, 2011 at 10:20 pm
Mahni chhungte ngei ni ta se euthanasia hi kan ti thei angem? Kan hmangaih tak te an nih chuan engang pawhin beisei tur awm tawh lo mahse kan tih theih ka ring lo. Kan naupan laiin kan uite hi a damlo a, a thi tep tawh a, chet pawh a che peih tawh lo a, Mi hian ‘vaw hlum mai rawh u’ hi an ti thin a mahse kan phal tlat lo. Mahni chhungte emaw thiante emaw ngei phei chu ka theilo sa.
Mahse damdawiina khawl hmanga inenkawl hi a to em em ve thung a. TOI ah Jug Suraiya article ka chhiarah chuan a thiante chhungkua ami pakhat kha khawl hmang chiahin a nung tawh a, an inseng nasa tawh em em a. Mahse tumah khan decision kha an siam ngam si lo a, chuan an chhungkua chu a rawn vek hnuah inti neitu takin doctor chu a va bia a, tichuan a khawl chu an off ta a.
May 18th, 2011 at 10:23 pm
Min siamtu hian duhthlan theihna zau tak min pek laiin, duhthlan theih miah loh leh a phal miahloh hi hring nunah hian a zep tel a. Kan pian leh murna, kan nu leh pa, kan pianna tur veng/hospital etc, kan pianpui sam rawng, mit rawng, san zawng, len zawng…a tam mai, kan thlan theih miah loh a ni. Nun/dam hi kan thu a nih loh rualin, thih pawh hi kan nunna chunga thu neitu, min siamtu thu chauh a ni.
May 18th, 2011 at 10:30 pm
Rilru siam har tak tur a ni ang. Ka ngaihdan ah chuan eng anga na tuar hrehawm, engmah hre tawh lo pawh nise han tihhlum ngawt mai chu Kristianna atang chuan a inhmehlo/thalo ka ti a. Kristian lo ho tih tur ah ka dah deuh.
May 18th, 2011 at 10:34 pm
Damlo chu a damchhuah beisei lo mah ila, a nunna chunga rorel thei leh rorel tu tur kan ni lo tlat. Ka chhungte hetiang ang tih ngai khawp hi awm sela chuan ka tihtir hauh lovang kei chuan.
May 18th, 2011 at 10:36 pm
Post tha hle mai a, dup dup a
May 18th, 2011 at 11:11 pm
Ka ngaituah a kei chu, tawngthuchhelovah kan chhungte hetiang tawk hi awm tase rilru siam har ka ti viau ang. An na tuar lai han hmuh reng ai chuan han hahchawlhtir kha hmangaihna avang pawhin a thleng ve thei viau lovang maw le!!. Nge ni a, na kan tuar hlum thak tir dawn?? Miracle kha chu lo dahtha ta ila…
May 19th, 2011 at 12:13 am
He topic hi chuan mi tam tak ngaihtuahna a la tibuai dawn a nih hmel. Ka ngaihdan chuan he thil hi ka thlawp lem lo. Nu leh pa, engmah ti thei tawh lote, oxygen chauh hmanga la dam ve tawk tawkte pawh hi chhungkaw tam taka fate chuan an la thlamuanpui ve em em tho asin. Nimahsela a damlo berin dam a duhtawh loh miau chuan a thu thu le. Mahse a chiu hlumtu nih erawh engtikawng mahin ka thlang ngai lovang. (I)
May 19th, 2011 at 4:19 am
P-thian DAN kalh a ni. P-thian thu kalh leh DAN lo anga kan kal duh leh duh loh chu kan duhthlan-naah a innghat. P-thian thu pawisa lo tu chuan HREMNA a dawng thin, a thu zawmtu erawh chuan MALSAWMNA, SURE lo pawn NGEI NGEI…… 😛
May 19th, 2011 at 5:59 am
D_aua, eng nge P-thian chu, Pathian i tihna a niang chu maw 🙂
A tuartu berin thih a duh tawh chuan a na tuartu pawh ni ve lovin lo khap ngawt kha a fuh ber lo maithei, kan tawrhsak thei a zeng a nih si loh chan. Ka chhungte chanah erawh chuan ka duh lo khawp mai.
Damlo natuar te pawh nachhawkna chak tak takin an chiu muhil fo a lawm, an muhil hlenah ngai ta mai ila a zia deuh ang em :-S
May 19th, 2011 at 9:45 am
He thil hi buaipui tham tak a ni reng a ni. Ngaihdan hrang hrang a tam a, a inang lo nuk bawk. Ka ngaihdan chuan Kristian te hi chuan kan duh lo kumkhua ang. Kan Bible nen pawh inkalh ni tein an sawi bawk. Thusawmpek ah “Tualthat suh” tih a awm a, hei vang hian Euthanasia leh Bible hi inkalh tlat niin an ngai bawk.
May 19th, 2011 at 9:26 pm
Kristian tan chuan tih chi a ni lovin ka hre ve e. (I)