Selesih Sangsarih khua hi a hun laiin a ropui bawk a, mi hmingthang tak tak pawh an lo awm teuh mai. Chung ho zinga mi pahnih chauh an chanchin tlêm hi tarlang ila. An chanchin hre zau deuh in awm a nih pawhin comment na lamah aw niang, A ngaihnawm a lawm le. Tunlai hun angah te phei chuan ni se, Mizo Idol / Icon kan ti dawn nge? Chu zawng a nêp deuh World Idol emaw Guinness World Record-bu a an hming ziah luh tham a ni.
Buizova: Zaithiam hmingthang hi Selesih vanglaia awm a ni a. A zai hi a tlawk tha hle ni a sawi a ni. A zaithiam zia sawi nan ” Buizova a han zai meuh chuan Sunhlu hnahte hi a til er er mai a ni,” tih te, Tuipui ngáwi an dawh a, Buizova chuan,
“Luiah lengngha suarah kan dan a,
Thahnimi runah ka dang zo lo”.
tih hi an sa ta mai a, patling pui pui hian lung lian pui pui pu er ur chung hian, “Buizo zai suh,” an ti a, an lungleng lutuk hi an meng tuau mai a ni, ti tein an sawi. “Buizova a han zai meuh chuan Tuipui luang lai te pawh hi a chawl dut dut mai ani,” ti tein an la sawi zel nia!
Buizova a zai dawn chuan vawn tur tha tawk neih a ngai an ti thin a ni awm e. Buizova nu hian Buizova zaithiam dan hi a lo la hre lo va, loa an fehna ah chuan a zaitir ta a. Buizova chuan ruahtham loh hla,
“Ka vauva thuvate, i hràm lai bang teh aw
Keipawh Lalngo ngaia ka tah ni tam e”
a han ti chu loa feh zawng zawng chu an tlu ta dual mai a, a nu ber pawh chu a tlu ta a, he hmunah hian Buizova nu chu a boral ta nghal ni awm tak a ni. A zaithiam zia an sawi dan hi an uar lutuk pawh a ni maithei. Amah hi hmelchhe tak a ni te pawh an ti bawk.
Aihniara: A hming atang hi chuan Fanai mi ni ngeiin an ring. Kal chak (tuanrang) hmingthang a ni . Vawi khat pawh Selesih atangin Chipui hi an zuk teng a; chutia an chi teng lai chu,” I pa a na hle mai,” tiin an hrilh a. Chipui atang chuan Selesih ban tumin a kal ta vang vang mai a. Chaw fák hun lai hian Sailam laiah hian tlangvalho kuangsui a hmu a, “Selesih ka la ban ang em?” tiin a zawt a. Anniho chuan,”Tuna Selesih ban tih chu le!” tiin mak an ti deuh va.
An hotupa chuan,”Chutia tih mai tur em ni? A lo chhuahna han zawt teh u,” a ti a, an han zawt a. “Chipuiah,” a ti a, “E, i ban ngei ang,” an ti leh ta theuh a ni an ti. Thenkhat sawi dan chuan hemi ni hian Selesih a thlen hnuin an khaw thenawm Zawlseiah Keldawi a va lei a, a thawi leh hman a ni, an ti. Chak zawng a chak a ni awm e. Chipui atanga Selesih ban chu Mizoram vâng lam hi ni khatah a kal chhuak thei tihna a ni.
Hemi bákah a chanchin an sawi then khat chu: ‘Tumpáng tleirawl nen an inúm pha tawk chauh a ni,’ tih te, ‘A vau tui chawiin a kal lama a lung rah lum, a haw lamin a tawk leh hman,’ tih te a ni.
[Thulakna: Mizo awmdan hlui by Rev. Liangkhaia & Tuipuiral Pi Pu sulhnu leh mi chhuanawmte by C.L.Liantluanga Leithum]
Similar Posts:
- Hman lai Mizote zinga ‘ber’ kai te
- Buizova thlah zai mite
- Hmánlai Mizo zînga ber kai te
- Aihniara
- Youth Idol 2008 update thei kan awm em?
May 24th, 2011 at 7:40 am
heihi chu sihphir bul ami selesih khi chu a nilo phawt ang chu maw…
Report this comment
May 24th, 2011 at 8:02 am
Amaria.vch, Khawchhak ami a ni e. Khawbung piah lawkah a khaw hmun hlui hi a awm.
Report this comment
May 24th, 2011 at 8:18 am
An michak hmingthang kha Chula a ni em? A chanchin hi ka hre vak lo va, a hria in awm chuan han sawi ula mawle.
Report this comment
May 24th, 2011 at 8:22 am
A ngaihnawm hle mai. Chipui atanga selesih hi k.m engzat vel nge ni ang le?
Report this comment
May 24th, 2011 at 8:44 am
Selesih ti tawp lo hian Selesih Sangsarih an ti thin in ka hre tlat mai a, in 7000 awmna khua anih vang ni nghe nghe a ka hriat chu
Report this comment
May 24th, 2011 at 8:52 am
Buizova leh a nu chanchin hi nakinah ka rawn paste ang, a ngaihnawm hranpa tlat! Ramhnuaiah ka la awm si!
Report this comment
May 24th, 2011 at 8:59 am
@4, a ziaktupa hian Mizoram vang zawng chen vel aniang,a tia. Chuti a nih chuan 285 km vel a ni ang,by road chuan. Hemi inkar kal nan hian darkar 10 vel hmang angah chhut ila darkar 1 chhungin km 28 vel a kal/tlan hman tihna a ni.
Report this comment
May 24th, 2011 at 9:00 am
a ngaihnawm ka va ti e ka kham lo hle mai a
Report this comment
May 24th, 2011 at 9:11 am
mibik hi chu na awm chiang a ni. misual mibik te nen pawh hian
Report this comment
May 24th, 2011 at 9:33 am
Chhunzawmna ala awm chek ang chu maw….hnarkua aiin, knowledge a zau leh ta…
Report this comment
May 24th, 2011 at 9:35 am
#5 Selesih Sangsarih chu an inti deuh kher thin. A bul tan naah khian ‘Selesih Sangsarih’ tih ka hman tawh avangin in hriatthiam tho ka ring a, a awlsam zawngin ka dah mai a ni e.
Report this comment
May 24th, 2011 at 9:53 am
Selesih tawp a ni e. Sangsarih tih hi a hming tak takah a tel lo. Hei hi chu ka historian-te phuahbelh a nih ka ring. A chhan chu an hun laiin number an thiam lo.
Report this comment
May 24th, 2011 at 10:52 am
Buizova: A zaina sunhlu kung kha Khawruhlian leh Khanpui inkarah a la awm’ anti.
“Lova a zai tum hian a nu hian chuti ema zaithiam a nih a rin loh avangin thil a vuan ve duh lova; a’n zai takah khan a lum ta mai. Buizova’n lo mawnga a chu pan thlak nak chuan a nu chuan, ‘Buizo, keinite zawng min duh ve chuang lovang,’ a ti e” anti.
Aihniara: “Selesih ban a tum tuma mi a zawh tum hian mite khan a lo chhuahna an zawt a nih kha. Chak an ti ta lutuka, ‘E! Chuti zawng, mu mu mah la, i ban hman thovang’ an ti e” an ti.
Report this comment
May 24th, 2011 at 10:54 am
“Buizova a han zai meuh chuan Tuipui luang lai te pawh hi a chawl dut dut mai ani,” ti tein an la sawi zel nia! ______________
Report this comment
May 24th, 2011 at 10:58 am
bengvarthlak hle mai
Report this comment
May 24th, 2011 at 12:20 pm
Selesih Sangsarih khua hian Pipute hunah khan ber nihna a hauh nual mai:-
Mi chakah – Chula (1887 vel)
Hmelchhiatah – Saichhawnkhupa
Hmelthatah – Lianchia
Zaithiamah – Buizova
Report this comment