mi(sual).com

-  C.H.Liana, Durtlang-Leitan. [Source : MUP Tlangau February 2011]

Khawvel pumpui mai indona avanga kan buai mup mup lai – 1941-ah khan Japan ral kha an lo chak buan buan tak em avangin Mizoram ri bul bul vela vengtu sipai thiar luh zung zung theihna turin Kawngpui (lamlian) tha neih angai a, Aizawl-Silchar kawng laih zauhna turin Sawrkar thupek a awm ta a, chumi lamlianpui chu an han laih tak tak meuh chuan kan khua Durtlang pawh hi a paltlang ve ta miau si a, borak thar kan hip a, kan nitin nundan te, kan khawsakna te, kan sakhua te chenin a tha leh tha lo lam thlengin, min chawisangin min tibuai ta ni berin a hriat theih.

Hawiher zau leh sang zawk kan neih lai hian vawiin thlenga kan buaipui ngai harsatna eng eng emaw te min thlentu kawngka chu a ni ta bawk lawi si. Hemi kawnglaih chanchin hi sawi seng lo mah ila, a then a zar tal chu han sawi lan ve hi a chakawm hran pa ve hrim hrim a ni.

He kawng  lai tur hian British India Sawrkar chuan Indian Tea Estate Association hnenah contract hna a pe ta a. Hnathawktu labour 3000 zet a rawn hruai a, an zinga Mizo pakhatmah an tello hi a mak hle a ni. Kum 1941 ah chuan an lai tan ta mup mup mai a, Jeep leh 15cwt Truck tlantir theih ngei tura siam hi an tum ber a ni.

Hnathawktute hi camp hrang hrangah an awm thleh thluah nain an hnathawh dan tlangpui a inang deuh vek a, lung hal darh leh luikawr leihlawn dawhah sipai hovin an tanpui tih mai loh chu mihring kut ngei maia Silchar-Aizawl Road mel 120 zeta thui an han lai mai hi thil chhihchhiah tlak danglam tak a ni ve ang. Tunlai huna kan khawl tha ang hi hman tur a awm lova, chuvangin mihringin an laih avangin khampang atanga tlahlum palh labour an awm nual reng a ni.

Lehkha thiamlo hnathawktu (labour) 3000 zet enkawl hi a namenlo hle ang tih chu a hriat theih a, a bik takin zunram thiar hi an fimkhur thiam theih ngai loh ber chu a ni fo mai. An kawng laihna bul velah thing tuluang a awm chuan a sei deuh leh ek a tang tam ting a ni mai a, kawng sir zawng zawng hi ekin a khat a ni ber a, chuvangin Mizo-ho ram kal pawhin an chilpherh palh ta thin a, an thinur chuan, “Hei chu mihring ek emaw ka ti a, Bondhu ho ek zuk ni reng a,” tih tawngkam te pawh a chhuah phah kha.

Tichuan he kawngpui siala hmahruai turin Chief Engineer, Col. D.C.T Swan, Royal Engineer leh Platoon Officer Commanding, Lt. A.Dixon, Royal Engineer, 4 Corp, 14^th Army, Assam and Burma (SEAC) chu dah an ni ta a. Special Engineering Platoon  tih takah lung hal darh te, Kawng zauh theih dan endik te, lungrem ngai laia lungrem te, kawrte dawhkai tul te, a tha thei ang bera hun tiam chhunga Jeep leh 15ctw Truck tlantir ngei tur chuan beisei an ni. Khawl tha leh hmanraw tha tunlaia kan neih ang hi an kawl si lova, mihring tha veka thawh a ni hi a khirhkhan hle a ni. Durtlang tlang hriam (Gateway to Aizawl ni ta hi) huntiam chhunga laih tlang ngei tumin an bei nasa hle bawk a ni.

Durtlang leitan chanchin han sawi belh ta hlek ila, motor kawng a awm hma chuan Bawngpukawn atanga Leitan inkar hi Aizawl Bazar kal hawng tan chuan, ni a sat vang leh kawng chho avangin chauh phah hnawkna tham a ni thin a. Bazar kalte chawlh hahdamna hmun Leitan (Leitan hlui)  kawngkam tuakah hian Pu Zusiama (Doctor Sap Sakawr pu) leh Pi Lalengi (Pu Manphunga nupui) ten thingpui dawr an siam a. Kum 1940, thal lai ni ngei tur a ni. I.H.C (ruang la sipai) indonaa kal hmasaber turte thingpui in in an chawl khawm a, Mission Sap Pu E.L.Mendus (Pu Mena) khan Pathian hnenah tawngtaiin a thlahna hmun a ni. Chuta tangin sipaiho chuan ke ngatin Silchar an pan ta zel tih kan hria.

Hemi hnu 1941-ah kawnglaitu Special Engineer Platoon sipai awm laiin Tv.Chheuva chuan naupangho hruaiin sipaiho chu saptawngin a han be vel a, “These boys want to see Leitan, I look deo,” a han ti ta telh telh a nih chu, an lo hrethiam aniang chu an hmuh duh a piang an entir ta mai a. Vawikhat pawh sipai ding tlar then thawm hi Tv.Chheuva bawk hian a hmu a, “about turn” ring fe hian a ti thut a, an hawi ve dial an ti a lawm.

Kan sawi tawh angin a hnathawktu te hi an hotute Thingpui huan sap (Planters Officer) leh Army Reserve Officer te leh British Civilian Officer te an ni ber a. Hna an thawh that zawk nan camp 5 laiah hlawm te deuh zelin an inthen a, hetiangin :-

Camp 1-na: Bilkhawthlir leh Kolasib inkar, Civilian Officer .A.N.Olivefield in a hova.

Camp 2-na: Kolasib, Thingdawl, Bualpui, Army Reserve Officer Capt. Esselmond in a hova.

Camp 3-na: Mualvum, Taitaw, Kawnpui, Civilian Officer Lt. Gilson in a hova.

Camp 4-na: Neihbawi, Sihphir, Melriat, Civilian Officer M.A. Mason in a hova.

Camp 5-na: Durtlang, Chaltlang, Civilian Officer H.T.Johnston in a hova.

Heng ho enkawlna hnuaiah hian labour 3000 zet chuan hna an thawk ta tluar tluar mai a ni.

Kum 1941-1944 (kum 3 zet) an laih hnu chuan, 1943, November ni 7 ah khan civilian convoy hmasa ber 15cwt truck 15 zet mai sipai ration leh bungraw phur chuan Silchar atangin kawngpui thar chu rawn zawh chhovin Durtlang Leitan hi an tantlang thei ta a, Aizawl an lut ta a ni.

[N.B: Hemi hma hian Sipai lal Jeep hi patling rualin leitan an zawh hma deuh si hian an zawn kai tih upa ti ti ka hre tlat tawh]

Similar Posts:

• Durtlang Leitan
• Hmanlai Hian Maw(m)…
• State government surrenders again
• Labour Camp
• Modern Mercenaries?

Recent Posts:

• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN
• The Alaskan serial killer
• Thanglian, Aw…… Thanglian !
• CFL Hmingthanga Thihcham Vawikhatna Pualin

This entry was posted on Saturday, May 28th, 2011 at 2:30 pm and is filed under Mizo Society & Culture, Mizoram. You can follow any responses to this entry through the RSS 2.0 feed. You can leave a response, or trackback from your own site.