mi(sual).com

A lo rei ve ta hle mai a, kum 19 mi chauh ka la ni a, chutia mahni chauha zinkawng ka zawh tur chu ka nu leh ka pi chuan min ngaihtuah ve hle mai a. Chumai piah lamah keimaha vairam ka zin vawikhatna tur a ni a, Mizoram chhunga khawdang ah pawh zin ngailo ka lo ni hrim hrim bawk nen ngaihtuah awm reng pawh ka ni.  Rawlthar tha zat lai a ni a, engkim ka ti thei ta emaw ti a hmalama harsatna lo thleng tur lam aia mahni in tih pa na hmu lian tlat an tih ang mai hian min ngaihtuahna tawngkam te chu ninawm ah ka la ta vek zawk a. Pawisa pawh a tlem thei angber ka dil lui a, tichuan May 28 chuan Aizawl to Guwahati lam chu ka pan thla ve ta rawih a.

May 29, Guwahati ka thlen chuan mahni a kal ka ni bawka khua a har lutuk lohnan man to deuh mahse zankhat riahna tur atan  nanana chuan Hotel tlema changkang deuh, Single Room, TV awmna ngei mai hi Book ila a zia ang ka ti a, Hotel Ambassador ah chuan ka in vawm lut ve ta a. Khua a chhiat avangin leh tui lian vangin emawni rel kawng lamah harsatna a awm a, rel chhuak tur tih khawtlai (train delay) a lo ni a, a tuk May 30 a chhuak tur chu ka riah leh a lo ngaia, zankhat dang ka riah leh angaih takah chuan ei leh in nen ka beisei aia tam pawisa pawh ka chawi a ngaih phah ta a. Ka riah leh tur thu chu chhungte ka phone a an mi ngaihtuahna a zual sauh a, mahse ka in sawi thawveng ve zel a.

A tuk zing ruahsur hnuaiah chuan Hotel chu ka chhuahsan a, rel tlai taka chhuak chu boring ti em em in ka nghak chhuak ve ta a. Sleeper Class ah chuan Orissa pan turin ka invawm lut ve ta a. Ka ei leh in man leh ka hotel thlenna man ah khan ka sum pai Rs 2000 atanga a chanve aia tam daih mai chu ka lo hmang der tawh maia, ka ticket confirm na atan Rs 200 ka han chawi leh bawk nen ka kalna tur ka chhut a ni 2 leh a chanve lai alo la ni a, ka mangang ve ta hle maia, chutah ka chhukna tur station a tlawh dawn lo tih min hrilh leh ta zel a, ka rilru hah a zual tial tial  a.

Tlai alo ni a rel a chaw siam tute chuan Dinner kan ei duh leh duhloh min rawn dawr kual a, indaihloh ka hlauh avangin zanin chu ei lo ve phawt maiang ka ti a. Ka bul chiaha awm pakhat, Bangalore a Bible zir tur Myanmar atanga lokal nen chuan kan inhmelhriata. Chaw ei a lo hun chuan ka sa duhzawng Ar sa ngei mai a hmeh ka hmuh chuan ka riltam a ti zual hle a, ka lo en ngun deuh ni tur a ni “Lo ei ve la” hawihawm deuh hian min ti a, ka chak reng si kha “Ka ril a tam lo a ka order ve duh lo a” ka ti ve tawp a.

Bula mi te chaw ei en ringawt chu hrehawm emai tiin rel kawngkhar lamah chuan zan thim hnuaia khaw thlir tur awmlo chu ka thlir duh ta zawk a. Ka senso tur leh Orissa ka thlen hun a ka chawlhna tur ka panna tur man awm vel chu ka chhut a ka indaih thei thlawtlo a. Chutia rilru hah taka ka din lai chuan ka thianpa chaw ei kham chu kut sil turin puar pengpawng in a lo phei a, ka bul ah chuan a rawn ding ve ta a. A ha kara sa ti tang kher fai nauh nauh pah chuan Ar sa kan hmui rim namin min biaa, riltam a ti zual ngei mai. Kan titi bawrh bawrh a, kan career te kan in zawt a, kan titi kar lakah chuan ka sana chu ka en ka en a, dar 11:00 pm vel hi a lo ni tawh a.

Ni hi ral thuai thuai se ka ti a, chu tih lai chuan vawiin nileng a ka rilru hah in min theihnghilh tir, kum 5 ka nih atanga kan lawm tak pawh ka hriat leh tawhloh, May 31 vawiin ni hi ka Birthday a lo ni reng alawm le tih ka hre chhuaka. Ka thianpa chu ka hrilh thuaia, kan pahnih te mai chuan chu rel ah chuan chumi ni chu ka tana ni pawimawh bik a ni tih hre tu kan ni ta a. Min hriat pui tu awmchhun chuan nui sangin min wish a “HAPPY BIRTHDAY” tiin min kuaha min chibaia, ka thla a muang suai suai a.

He khawvel ah hian lo piang ve lo ila chu heng rilru hahna te, manganna te, hlimna te hi ka hre ve dawn der si lo a, ka lo hlu em a min hringtu ten a min ngaihtuahna pawh chu a lo awm reng a nih hi. Chumi ni atang chuan May ni 31 alo thlen apiangin chu ni pawh chu ka theihnghilh leh ngai ta lo a ni.

Pathian khawngaihna zarah hritlang satliah lo chu taksa damloh sawi tur ka neih pawh ka la hre lo a, chu ti chung chuan ka lo upa ve ta hle mai…

(Ka lung a tih len thar em avangin midang te tih ngai loh mahni Birthday ah keimah leh keimah ka rawn in ziak ve tawp, zak theilo tih awihloh. A duh tan OT ka phal bawk )

Similar Posts:

• Birthday tak tak lawm ang u
• Winter meet and Advance Christmas hlimawm
• Happy Birthday Sandman!
• Happy Birthday Goldie and mystic
• Happy Birthday ThugAngel

Recent Posts:

• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL
• President Trump ka hmuhdan (amah thlawptu lam atangin)

This entry was posted on Tuesday, May 31st, 2011 at 12:00 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.