mi(sual).com

– Lalzapliana Lengpui [L]

He thlawhna tumhmun tur ruahmanna  leh, chumi vanga thil thleng chi hrang hrang tlangpuite hi chanchinbua chhuah atan a tha ti mi tam tak an awm a, kimchang thawkhat si, a tlangpui deuh deuhte han lawr tur pawhin  thiam tawk a harsa hle mai a. Khual atanga rawn en  zeuh zeuh te chuan, “a khua a mi hian in hrechiang ber ang,” an ti mai thin a.

Kan lehkhathiam neih vete lah chuan an til then lohna lam pang emaw ni, ziah an tum hauh lo mai a. Kei, pa mawl berte zinga mi leh thu thiam lo ber hi “nang” an ti leh mai thin a. mite lo chhiar leh ngaihthlak tlakin ziah puitlin theih ka inring lova; Mahse, ka ngaimawh leh chak ve zawng a lo ni bawk si nen rualrem lo deuh pawh nise tiin ka rawn ziak ve phawng mai a ni.

Lengpui rama Thlawhtheihna tum hmun tur sawi leh tumna chu a rei tawh hle awm e. 1960 hmalamah tawh khan  tuna an ruahmanna hmun hi ngawpui an lo tukdarh bua zo vek tawh a. Brig. T.Sailo ho pawhin Helicopter-te pawhin an rawn en thuak thuak tawh a.

Kum 1984 atang khan Sawrkar thu chhuak chuan, “in ram Thlawhna tum hmun tur tha ber lai turah chuan tuman hmun ram lo pe suh u,” tiin V/C-ah thu a lo thleng a, Lengpui ram, Leisachuap ram an tih mai tlangdung sei tha tawk leh ram zau tak mai chu an lo humhalh tlat mai a. Chumi ramah chuan tuma’n hmun ram an nei lova, compensation pawh a ngai hauh lo tur a ni reng a.

Nimahsela, mifing leh mithiam pui puiin an enin tha thawkhat hle mahse, an duhthu a sam ta ngang lova, a kiang lawka Lunghmul Luiruam zautak leh thuk tak, tui pawh tam tham tak awm avang chuan an duh ta lo ni a hriat a ni. Khamin a hualchhuak deuh hmuk bawk si a.

Chutatanga khaw lampang  ram zawl zau tawk tak awm chuan an lung a len ta tlat mai a. Hetah hian kan siam tur a ni, mimal ram a awm em? Thuneituten an han ti ta mai a. Helai ram hi chu mimal ram vek a ni, ram awl leh lui awl reng reng a awm lo an ti a. A pawi lo, hetah ngei hian kan siam ang an ti ta tlut mai a ni.

Tuna an siamna hmun ngei hi a ni ta. Sorkar thu leh hla in fah tawn dan kan hre si se hek lo, 1995 kum bullam atang chuan PWD-in hma an rawn la tan ta mai a, an teh a, an sam a, thinglerah an lawn a, pholeng an tar a, puanthem var leh sen sang takah an tar a, mimal ram an huam chhunga nei chu an sum lo sen tawh rulin, zangna dawmna an pa a, an veng zui nghal a, thing phurh chhuahte an khap a, Check Gate an siam a. BRTF Road sir lawkah Chiahte lui kamah Gate an siam a, mi pakhatin a venga, motor-in tuman thinghring an phur chhuak lo. Beer-la-hai-Roi Gate an ti.

Kum 1995 November thla atangin Qriental Company (OSE) chuan a laihna hmanrua chu an rawn phur lut ta zut zut mai a. Mizo pa tan chuan a awmzia hriatthiam a har khawp a, Motor thuthlawh nei te,  Suahdur nei te, Chingal thlawrbur ang a mawng lam zuih tlang arh huau, Silai zawn zem tia dawn dawn te an rawn phur lut zut zut mai a.

Phaizawl mah ti ila, kawrte thuk fe fe, sangha dil zau tak tak  a tam mai si a, engtin hnawh tak ang maw, tia ngaihtuah nasa tak tak an tam. Pu Thangmawia phei chuan zan thum a tlaivar phah an tia lawm!

An inrem fel tawk ta hle tihah Minister Nirupam Chakma, PWD Minister –in ni 20.12.1995 ah laih phalna a rawn hawng ta a. An hawnni atangin hna an tan nghal a. Motor te, tractor an ti a, za rualin an han lai mai chu a hmuhnawm duh hle mai ! Engtik lai maha kan la hmuh ngai loh za rual zet maiin an han lai chu sawi mai aiin enrei a awl hle.

Kawrte, sangha dil lo li king keng te chu an theh kang hneh rep rep khawp a, a mawnga tui chim diak hnawng zawng zawng kha motor suahdur nei khan a suak fai ro rat mai a, chutah lei chunglang ro tak hlir kha an chhung lut leh a, thirtum lian tak rit tak chunga motor khan a thirtum ke khan a chil bel leh ta a, a maka maka belin a mam thei mai a.

Hmawlhte lah chu ek ther thiarna ang tia lek pawh an chhar fai vek mai a, mau zung leh thing zung zawng zawng kha motor thleng lianpui phur buk theiin a phur a, kawngsirah a bun ther huang mai a, chemfawng tur zawn a awl duh khawp. A lo ro a, naupangin motor siam chawpin tlai tin mai hian thingtuah atan an phur sap sap mai a, a tangkai reuh khawp mai.

Tichuan, Centre Point atanga chhim lam zawng chu  lei chunglang an khawk zova, kawr tam tak kha zawl nuam em emin an han chhungkhat ta mai a. Feb. ni 20, 1996-ah Pu Lal Thanhawla, Chief Minister zahawm tak leh kan Larsap duhawm tak PR Kindyah hova tawngtai rualna kan hman ho ni te khan motor-te chu khute khu tih mai turin an in tlar tlep um mai a nih kha maw! Khami ni kha Lengpui khuaah motor zam vawikhatna a ni.

Ring lo mite tawngkam “Choak dum bak a tum chuang lovang” tih leh “Thlawhna hi a rawn  tum hmasa ber chu a pil hmawk mai ang” tih a ni a, chu chu a dik leh dik loh kan la hre lo tlang rih a. Tunah chuan khang laia phaizawl leh tlang ram awm ho kha khawiah nge an awm tak, a bo zo ta vek mai.

Tunah zet chuan PWD IB kawt thlangah han dak ila, Rulngan pa ang a lo tle zur tawh a, a tawp atanga han en chuan a zuih ral thak mai a, a tawpah laikingin bel a lo rawh mam mam mai le.

Kawr lian deuhte lah chu a kawi ningneng thei lo, a ngil awt mai a, tui luang sa chu an paih bo a, chuti chungin lungpher mam takin kawr dung zuiin an phah chhuak zak a, thirin in an sa a, a bang nen a chung nen thir hlirin zing tak takin an  tung chhuak vek a. Cement concrete an chhung khat leh vek a, a chungah nen a laiah kawrawngin motor te chi tlan tlang theiin. A…., kan Pathian thua “Tlang tin rawt hniam a ni anga, kawrtin chhun khah a ni ang a, kawngkawite tih ngil a ni ang a, a bumboh laite  tih mam a ni ang” tih kha hei hi a ni ta ber awm e, a tih theih rum rum mai.

Tunah hian a enkawltute PWD Division hnih, Airport Division leh Building Project Division an awm a.  Office Building sei tawk tak leh Inspection Bungalow  lian tawk tak leh Quarter Thailand type (design)-a sak tam tawk tak leh la sak lai mek leh la sak tur tam tak a awm.

Khual atanga en tura lo kal hi nitin Town Bus khat khatin Bus 2, 3, 4, 5 te an lo kal reng a, khuaa mite pawh hi nitin hian en tawk chu an awm thei reng bawk. Pathian ni tlaiah phei chuan eng eng honey emaw  hmang an awm ta ve ang. Tin, khual atanga entu mi chi hrangte hian khua a mi leh hnathawktute an ti buai ngai lo, MZP-te tih lo chu.

Khua a mite hian hlawkna leh tangkaipuina a bik taka kan chan a tam em em a. Compensation-ah khan mi engemaw zatin cheng tam tak takte an dawng a. Tin, thiamna nei lo tan daily-a inhlawhna a tam a. Theka a thawh tur te a tamin Kohhran Deptt. Hrang hrang leh YMA, etc., ten sum tam tak a huhovin an hlawh theih phah bawk a. tlema high school rap phak vete pawhin office lamah an level chin ang te an thawk ve nual a, chungah te pawh chuan an thiam lohahte pawh duat takin an lo enkawl a, sawisen lohin  Pathian malsawmna kan dawnna hnar a ni kan ti thei awm e.

Pathian ram thawhlawmah pawh zawi zawi chuan a petu hnena pek let ve nachang kan la hriat chhawm zel a beisei awm hle mai.

Tin, hnamdang (vai) an lo chhuah tam phah hle  a, chungte pawh chu remchangah hmangin Non Mizo Christian Fellowship Evan. ten mi  engemaw zat Kristianah siamin an thlarau bo chhanchhuahna hna an lo thawkin an hmunahte Inkhawmnate an va neihpui bawk.

Heng bakah hian kan Mizoramin hetianga ram hmasawnna ropui tak kan chang hi Pathian leh kan Sawrkar-a hotute hnenah lawmthu sawi fo tur kan ni.

Lengpui khua hi khaw hlun tak pawh a lo ni reng a, tuna thlawhna tumhmun an siamna lai hi khawhmun hlui a ni a, a awm a te an tam lem lova, an khawhmun pawh an  sawn an sawn thin a, 1894-ah khan khua chu an lo din tawh a, 1896-ah tuna Terminal Building  sakna mual hi khawhmawr chhim lam a ni a, 1900-a Kumpinu England Lalnu thi pawh kha hemi khawhmawr thlang hretah a lung an phun ve a, tun thlengin “Kumpinu Lungphun” an ti thin.

Terminal Building thut hmun hi Thlanmual a ni a, lungphun pawh emge maw zat hmuh tur a la awm a, 1996   April/May  vel khan an nawr bo ta a ni.

Pu Kapa Zawlnei an tih mai pawh khan Lengpui khua lo than chhoh dan tur chu 1950-60 inkar vel khan a lo sawi thin a; a sawi lawk vel lai hian Lengpui khua chu in 15-20 vel, thingtlang in pangngai ve mai kha a ni a. Tuna ‘Venghlui’ an tih lam  Sairang kawng lam, PWD Road lo luhna lamah hian a awm a, chuta tang chuan Chiahte lui hi mel 1 dawn  laia hla a ni a. Pu Kapa chuan, “Lengpui khuaah hian Rangva in a la tlar tuar ang, Chiahteah hian in Varakte an la leng dual dual ang, khaw ropui takah Lalpa’n a siam dawn,” a ti a. Chutih lai chuan awih an vang hle a ni.

Tunah chuan In 1500 chuang a ni ta, Rangva in lo chu tam vak a awm ta lo. “Chiahte lui” chu tuallai a ni tak tak ta. Sawrkar tuikhuahah chuan Varakte, rak lote pawh an leng dual dual mai le! Chiahte ral maiah hian PWD Quarters leh IB te an awm a, a tlep tuar mai!

Hman hmu ve lo tan chuan a ropui vak pawh in ti kher lovang, hman atanga vawiin ni thleng hmu thin tan chuan Pathianin mi thiam leh fingte hmanga leimite hnena hna a thawh ropui zia a lang chiang hle mai.

Sawisen a ni lova, rawn en ve la a chiang mai. 1998-ah hian State Day 20^th Feb. kha kan pu CM zahawm tak hian Zoram pum huap eng programme emaw rawn siam leh sela kan lawm viau ang.

Similar Posts:

• Aizawlah gas leh petrol awm lo!
• Bible hi aw….
• Shimla daifim leh Delhi vaivut
• Krismas Thuchah
• Keima thu nawi bawk

Recent Posts:

• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL
• President Trump ka hmuhdan (amah thlawptu lam atangin)

This entry was posted on Tuesday, May 31st, 2011 at 2:00 pm and is filed under Information, Mizo Society & Culture. You can follow any responses to this entry through the RSS 2.0 feed. You can leave a response, or trackback from your own site.