mi(sual).com

-   by Rev. Vanlalzuata

Thihna thihnaah an ngai lo, Lalpa hmangaihte chuan; An van kawngkhar hawn ni a ni, An pa hmel an hmuhna.

Mihring tan vawi khat thih ruat a ni a, chumi hnuah rorelna a awm ang (Heb. 9:27).

Khawvela kan cham chhung hian mahni nihna aia lan mawi hi kan duh vek a, kan nihna chiah hi chu kan puang chhuak duh mang lo va. Kan rilru ang lo takin kan tawng chhuak a, kan tawngkamin kan nihna tak chu kan hâi khuh a. Hetiang lemchang nun hi a tak chan a tul phut hunah a buaithlak duh phian thin a ni. Chutih laiin rilru ang tak leh mahni nihna dik tak sawi nulh nulh hi chu mi â tiin kan dem hlauh thung a. A dik tak chuan a derin kan nung a, lem chang thiam thiam hi kan ngaisang emaw tih mai tur a ni a.

Mahni nihna dik tak zahpui lova nungte hi chu kan ngaisang vak hauh lo va, chawimawina No pui phei chu kan dawmtir reng reng lo. Hei hi khawvel hrehawmna pakhat chu a ni ngei mai. Holywood-a filmstar channaa an hotupa Samwood-a chuan, “Filmstar-hote hian mahni nihna kalsanin mi dang nihna chan phet in duh a. In chan tum kha chu mi dang nihna a ni tawh sa a, in nihna kha lungawi takin ni ve mai ula, kha kha mi dang la nih hauh loh chu a ni,” tiin a sawi a. Tunlai khawvel buaipui pakhat chu lemchan hi a ni a, a tak en peih mang si lo hian a lem chu kan en peih hle si a nih hi.

Kan thih dawn darkarah chuan lemchang nun hi a bo vek tawh ang a, a takin kan nung tan tawh ang. Kan khum bulah chhung khat laina an inpun khawm rap rap ang a, “Mate, fian khat tal hi i la lem thei lo maw ?” min tih laih laih hunah chuan kan rilru leh kan nun dan chu a inmil thlap tawh ang.

Chumi hunah meuh chuan chhandamna la chang lo kha a derin a thlamuang thei tawh dawn hauh lo va, a chang tawh lah chuan a hlau der thei hek lo vang a, tu nge ka nih tih chu a chiang tawh ang. Chuvangin heng a hnuaia mite hian an thih dawnin eng thu nge an sawi tih hi zir ila, keini pawh kan thih dawn hunah eng nge kan sawi ve dawn tih zir chhuak bawk ila a tha ang e.

Martin Luthera: Ka Pathian hi pathiante Pathian a ni a, amahah chuan he thihna hi ka bih ruksan dawn a ni.

John Knoxa: Ka nunna, Kristaa ka nunna chu he thihna tihbaiawm tak hian a ngam loh avangin hlauh reng reng ka nei lo ve.

John Calvina: Lalpa, thihnain min chim mah se, i kuta ka awm ni atang khan ka lungawi tawk tak zet mai.

Richard Baxera: Natna zawng ka nei na meuh mai a; nimahsela ka nunna a khawih buai lo. Muanna, muanna chu a kim ta.

Charles Wesleya: Lalpa, nangmah anna famkim neia ka meng ve dawn ta hi ka lung a va awi em! Lungawina, lungawina chu a thleng ta e.

Dr. Prestona: Ka thi dawn lo va, Pathianin ka awmna hmun a thlakthleng mai dawn zawk a ni e. Chumi hmun pan chuan Pathian nen kan kal dawn a, a hnenah thlamuangin ka chawl hlen tawh ang.

Samuel Rutherford: Ka thinlung hi hlimin a luang liam a,van mana-a chawm ka ni si a, ka kut hi amah pawm turin ka phar a,anin min lo lawm ang.

Mrs. Heman: Lal Isua khup kiangah Mari a thu a, a thu a ngaithla ang khan tunah hian ka Chhandamtu bulah ka awm a, a thlamuanna aw mawi tak min hriattir mek a ni.

D.L. Moody: Ka hmaah hian pialral a rawn tawlh lut a, chumi hmun mawi lutukah chuan ka lut mek a ni, min lo ko hrah tawh reng reng suh ang che u.

Napoleon Bonaparte: Ka thi dawn ta a, ka taksa hi fanghmir chaw atan ka pe dawn ta. Chu chu Napoleona chanvo a ni hlen tawh ang.

Voltaire: Pathian leh mihring kalsan ka lo ni ta. Thla ruk chhung chauh pawh ka nunna hi min pawhseisak theih chuan ka thiamna chanve hi ka pe ang che u, tiin a rak chul a. A enkawltu doctor chuan, “Ka pu, thla ruk chu sawi loh, darkar khat pawh hun i nei tawh lo,” a ti a. Ani chuan, “Chuti a nih chuan hremhmun panin ka kal dawn a, min rawn zui ve nghal rawh,” a ti a.

Kan sawi tak atangte khan khawvela mi ropuite thusawi tawp ber leh Pathian mite thusawi tawp berte hi an ngaihnawm hlei hle mai. Engtik niah emaw chuan thihna hian kan nun hi a la pawt chat ve dawn a, chumi hunah chuan kan thusawi tawp berah eng thu nge kan sawi ve ang? Chuta kan thusawi tur chu dâwt a tel thei tawh dawn lo va, Pathian leh mihring pawm tlak thu dik a ni hlen tawh ang.

Chutiang thu dik chu kan sawi thut dawn avangin thu dik hlauhawm nge kan sawi dawn, thu dik lawmawm? Kan natna khum bulah chhung khat lainaten mittui parawl teuhva min en thap hunah chuan thu dik kan sawi hun a thleng tawh ang.

Bible-in, “Thih thlengin rinawmin lo awm rawh,” (Thup. 2:10) tih thu min chah hi keini chuan hla duaia kan hriat avangin thih thlenga rinawm hi kan huphurh thin a. Nimahsela thih thlenga rinawm chhung hi a rei reng reng lo mai. A chhan chu mitthi vuinaah kal ila, “Heti theh thut hi a nih kan ring lo asin mawle,” tih hi mitthi chhungte tawngkam a ni fo mai. Heta tang hian kan tum loh tawpin thihna kut vâwt hian min man thut thut thin tih hi a chiang a.

Vawi khat chu Hnahthial dâiah sawn Bus accident kan buaipui a, zing dar thum vel a ni a, mau hmun nal takah ruang kan zawng a, khua a la thim avangin an thawm riah kan zawng tawp mai a. Nu pakhat chuan, “Aw, heti teh thut a nih hi ka ring lo asin mawle,” tiin a lo rum a. Kan pan phei a, “Eng nge i sawi duh?” tiin ka zawt a, ani chuan, “Ka kuhva rah phurh…”tiin sawi zawm thei lovin a liam ta a. Kan thih thut thut avang hian thih thlenga rinawm hi a hla hauh lo mai.

Mi pakhat a awm a, mi mawl tak leh hlauihawm tak a nih avangin tumahin an kawm duh lo va; nimahsela a ni chuan a hmuh fuh tawh phawt hi chu a kawm zel a. Khawvel ram hrang hrangah a zin kual a, tawng hrang hrangin thu a sawi thiam bawk a. A kal tawhna khuaah chuan miten amah an hlauh avangin awm ni an lo kham rup rup a, chutah chuan thu lungchhiatthlak tak a sawi ngei ngei thin a. A lenna in chhungah reng rengah chuan an pindante hi a thiatsak a, an khumte chu pawnah a theh chhuahsak lawp lawp mai a, tumahin an ti ve ngam si lo va.

Thusawi lah chu a thiam lailêng khawp a, thu a sawi tawh chuan a ngaithlatute mittui hi a tla zung zung mai a, thenkhat an taphawm hawm bawk a. Thusawi thiam viau e ti lo chuan miten an haw em em hlawm a, haw em em chungin an kawm lo thei bawk si lo va. An khua a lo luh tawh hi chuan amah lawm nan Biak In dar hi khât ruihin an vaw bul vul a, chumi dar ri hriate chuan a lo thleng a ni tih hriain a thlenna in chu an rawn pan sup sup a. A lo thlen tawh chuan thusawi laklawh laite hi a rawn pawt chat hmawk hmawk a, lova fehte hi an hawng dawr dawr zel a. A hming chu THIHNA a ni.

He thihna taihbaiawm tak hian kan thusawi tawp ber tur chu a rawn tar lang ngei dawn a ni. Tlangval pakhat thi tur chuan, “Ka dai ngam lo thihna luipui lian chu, mahse kalna dang a awm lo Lalpa, thlamuantu nangmah ka ngai che,” tih hla hi mittui nen a sa a. “Jordan lui malin ka kai lo vang, ka thih ai Lal Isua a thi si,” tiin zai thei sela a va duhsakawm em !! Nula pakhat thi tur pawhin a nu hnenah, “Ka nu, ka pa nena in inhauna tawngkam chanve tal pawh hian chhandamna thu hi min lo hrilh ni ula, hlim takin ka thi ve thei tur,” tiin thlabâr chungin thlan a pan ta a ni.

Lal Isuan, “Kei hi thawhlehna leh nunna chu ka ni, tu pawh mi ring chu thi mah sela a nung reng ang,” tiin a sawi a (Joh. 11:25). Hebrai ziaktu chuan Lal Isuan thih hlauh vanga dam chhung bawiha awm zawng zawngte chu thihna hmangin a chhanchhuah thu a sawi bawk a (Heb. 2:14). Chu thihna chu chovin Paula chuan,”Aw thihna, i hnehna chu khawiah nge a awm tâk ? Aw thihna i tur chu khawiah nge a awm tâk?… Nimahsela kan Lalpa Isua Krista zara hnehna min petu Pathian hnenah chuan lawmthu awm rawh se,” tiin thihna hnehna hla do a chham a (I Kor. 15: 55).

Waterloo indona hmunah Wellingtonan Napoleona a hneh khan, “Hemi hmunah hian Wellingtonan Napoleona a hneh ta,” tih thu hi an tar kulh mai a ni âwm e. Chutiang bawkin Paula chuan, “Hnehnain thihna a lem zo ta,” tih thuziak hi kan thihna hmunah tar tur a nihzia min hrilh (I Kor. 15:54).

Hmanlaiin Phrugian-hote chuan an hmelmate an hnehin an lam tangah an siam nghal thin a ni an ti a. Chutiang bawk chuan ringtute chuan thihna hi kan hneh chauh pawh a ni lo va, Lal Isua avangin kan lam tangah kan siam tawh a ni. A chhan chu kan lei taksa hi a thih phawt loh chuan khi lam khi kan thleng thei dawn si lo va, thi thei lo phei ila chuan Lal Isua thihna hi a kimin kan chhawr thei dawn lo tihna a ni ang. Chu chu sawiin hla phuahtu chuan –

Thihna thihnaah an ngai lo,

Lalpa hmangaihte chuan;

An van kawngkhar hawn ni a ni,

An pa hmel an hmuhna

tiin a lo phuah chhuak tawh a. Chutichuan thihna chu kan hmelma ni tawh lovin, kan thian tha ber, van kawngkhar gate min hawnsaktu, kan receptionist tangkai tak a ni.Chuvangin keini ringtute hian chuti taka thihna hi hlau tur kan ni lo ve. Kan thih hun lovah chuan kan thi dawn lo va, a hunah erawh chuan kan pumpelh dawn bawk hek lo. Kan dam emaw, kan thih emaw hi a pawimawh ber lo va, dam dan leh thih dan kan thiam a pawimawh a ni. “Thih hlauhawmah kan awm, mahse hlimin kan zai,” kan tih theih chuan a tawk a ni mai lawm ni?

Vawi khat pawh Rev. E.H. Bickersteth-a hian a thianpa dam lo a kan a. A thianpa chu thih hlauvin a lo thlaphang hle mai a, awm ngaihna pawh a lo hre mang lo va. A thianpa thlaphang lutuk chu Pathian thua a hnem mawlh mawlh laiin he hla hi a phuah chhuak ta phawng mai a –

Muan, muana kim khawvel sual thimah hian,

Krista thisenin min muan thinlungah;

Muan, muanna kim, thihna lo thleng mah se,

Isuan a hneh ta, theih a nei tawh nem.

This entry was posted on Sunday, June 12th, 2011 at 9:33 am and is filed under Religion. Both comments and pings are currently closed.