mi(sual).com

April 1942-ah Burma atanga lo tlan chhia buaipui an ngaih tak avangin a rang thei ang bera haw thla turin Riga leh Rolling doctor leh Pangin-a compounder-te chu koh thlak an ni a. Kei a hla ber Karko-a awm pawhin kan Dispensary-ho chu kan khar thla zel a, Pasighat-a SDMO kutah engkim ka hlan fel a, Sadiya lamah ka chho ve ta thuai a.

April thla chawlhkar thumnaah ka thianpa Dr Kaia pawh a lo thleng chho ve a, he lai ram buaina hna thawh tumin a nupui a han thlak zet a, Sedar-a Ledo kawngpui lam a pan a. Kei pawh Nauchik lama kal tura tih ka ni a. Margherita-a PO Pu L.T.D Lambert-a ka han hmu a. Nauchik lama kal lovin Lohur Vasty lama kal turin min lo ti a, Sadiya-a Assam Rifles-ho nen chuan Pansipur pel zakin kan han kal ta a. Chindwin lui peng Nayang lui hnar kan thleng a. Hemi kawng zawh hian Burma raltlan ho an lo chhuk thla hlawm a.

He hmuna ka awm lai hian lui ral lehlama lo thleng thla ho tam tak an dam lo an tih avangin lui kanin va kal ka tum a. Lui hi a lian viau tawh mai a, mihringa kai lovin sai chunga chuangin an kan tlangpui thin. Lui rala ka va kal, damlo ka en zo ka haw leh chu mi phurtu zinga sai pakhat chu a khek ta vak mai a, pumhrut thirhrui lian tawk tak mai chu a zu su chat a, kan chuanna hnung chiaha sai leh a chunga chuangte chu tuiah chuan an tal buai ta a. Tui a khauh bawk nen, an invawn tanna thirhrui chat ta vek si hek, tuiah chuan an tla ta vek mai a lo ni a. Kei erawh chu sai zin-a hruizen chuang khan ka kawngah ka lo inveh tlat avangin ka tla ta lova. Ka chuanna sai chuan tuilian chu a hleuh ta a.

Min han pil pui leh zak zak thin naa vaukama sai dang pu khan auvin a lo fuih nasa mai a, vanneihthlak takin hla deuh feah vaukam min kaipui ta a. Ka chuanna sai pawh hian a hlau ve hle a ni ang, kan han kai chu a khur hlawk hlawk mai a. Sai pu dangin min hruai ta a ni. Kan ruala kal, tuia tla ta sai pakhat leh a chuang mi pali leh saipu nen an chin hriat lohvin an awm ta a, an ruang pawh kan hmu ta lo. A tuk thlenga chamin kan han thlithlai a, a sai ruang pawh kan hmu ta lo a ni.

He laiah hian thirhruiin lei an dawh leh a, May leh June thla tir thlengin an hmang a, July thlaah chuan pumhrut lei chu tuiin a lak leh tak avangin he kawng hi chu a ping titih ta a, hman a nih lai pawhin kal an awm vak lo reng reng tawh.

Tluang takin Margherita kan thleng thla a, kei erawh Subedar Dharam Singh-a hote nen Burma-a kal turin kan chhuak leh nghal a, ni ruk kan kal tihah Nayang lui lian vek khan min lo dang leh a. Burma ram chhung kan lut zet tawh tihin kan kir leh ta ringawt mai a ni. Fur ruahtui a tla nasa si a, a hrehawm dan a namen lo hle. Vangvat leh rul a tam si a, chaw pawh kan nghei nual a, kawng kan bo bakah Ration thlakna nen an kan intawng fuh thei lova, kan buai hle a ni.

Heta tanga kan haw leh hi raltlan an lo thlen runpui lai nen a lo innang a. North Tirap camp-ah min tir leh a, heta ka awm lai hian Burma sipai signal-atang ho Muana te, Ringa leh Kunghuaite ho an lo thleng thla ve a. He camp-a ka awm lai hian Camp Commander chuan min lawm hle a, mi rintlak tak ka nih thu kan PO pawh a zu hrilh nghe nghe a ni.

Hetah chuan thla khat pawh kan la awm hman lo tihah PO-in min ko leh a, Pasno pana raltlan an tam vanglai tak a ni a, he kalkawng hi a rapthlakzia chu sawiin a siak lo. Kawng tluan maiin kawng sir tawn tawnah mitthi ruang tawih hi a uih hluah hluah mai a, lui tui in tuma kal, chauva kawng sira tlu ta mai an tam hle bawk nen. Tuna Nampong an tih tak Hell Gate an tih mai thin bula camp-ah te chuan ruang a tam lehzual a, luikam dungtluan mai chu ruangin a khat tlat a ni ber. Heta tang chauh hian camp tih tlak deuh an siam a, India ram chin a nih tawh avangin ruang hmuh tur a awm tawh lo.

Panso Pan Burma lam hnaiah dil lian tak a awm a, hei hi Nayang lui hnar kha a ni. He dil hi huai neia ngaih a ni a, a kam vel a dum nasa hle a, a chhak tlang chhipah American Air Force sipai camp-a awm a, chuta awmte zinga dila inbual tura kal sipai panga chu an zavaiin an tla hlum vek a, an ruang pawh hmuh lohvin a pil ril zo ta a ni. Rangpang/Tangsa Naga hovin an sawi dan chuan heng mite hi huaiin a la bo vek niin an sawi a, sangha leh dil chhunga nungcha dang reng reng an man ngam lova, rul ang rannung lian pui hian an ei thin an ti a. Awle eng emaw zawng a awm a ni mai thei, a bulah ka zul kal lo naa. He lai hmun hi July thla tirah ka zu tlawh.

He hmunah hian a rualin mi 3,000 te an lo thleng thla thin a, a buai thlak em em mai. Doctor tana a buaithlak lehzualna chu chau leh dam lo zawnna tur hlang (stretcher) keng tur tirh a ngai thin a, tin, chak ve tho, harh tha ve takte zawnna tur pawh min dil tho thin a, a buaithlak dan a thuahhnih hle a, damlo na tak tak, camp-a an thih phei chuan buaipui tur a tam zual thin. Buai leh manganga lo raltlan e ti lovin thenkhat chu nupa inthen, midang laka tui ta, nulat tlangval thila rawn inkawp, mak tak taka khawsa an awm tho bawk a. Mihring mize mak pui pui hmuh tur a tam a, mihring ngaihnep hial theihna tur khawp nungchang  danglam hmuh tur a awm zut mai bawk.

Tun hma atanga APO-a awm Lambert chu political bial thara an siam denchhenin PO nghetah an dah ta a, kei pawh ka awm zel ta lo. Tui a len nasat avangin Panso lui chu kai theih a nih tak loh avangin kawng dang reka kal kan tum a, a pawla kal turin min ko thla a. Margherita kan thlen chuan damdawi chaw turin Digboi leh Dibrugarh-ahte, ITI Hospital-ah te ka kal kual chhen a, ka hmuh theih theih ka la khawm a.

Hemi zan hian PO chuan phone-in tu emaw a bia a, General a nih ka ring ringawt a. ‘Japan Force an ang’ ti ang nawk nawka an sawite chu chiang mang lo hian ka ngaithla a. PO chuan min kova, “Kan chhuak nghal ang, naktuk chawhnu lamah kan kal dan tur kan ti chiang ang,” a ti a, min kalsan ta daih mai a. Azan azanin General headquarters-ah a lo zuk kal a lo ni a, thlawhtheihnain kan awmna ram chehhvel chu an han thlir chiang a. Burma hmar tawp Syngbwiang bula China sipai tawm khawm chu an zu hmu a. Japan sipai em an lo ni lo hlauh va.

An lo haw chu keimahni ngeiin han hruai ila a ti a. China Air Force Colonel nen, China sipai thenkhatin min zui a, Syngbwiang pel chuan kan han kal a. Syngbwiang hi Burma-a an district sub-divisional headquarters ve a ni. An SDO chu mingo a lo ni a, Kristian fel tak Mr White a ni. July thla chawlhkar hnihnaa kan han thlen zan chuan Japan hovin thlawhnain min rawn bei ta mai a.

Thla eng ruih mai karah chuan bomb tla te chu a lang luang luang mai a, chutia an han bomb vel lai chuan kei a mik amak la hre lo chu trench khura luh nachang ka lo hre lova, ka hnuai chiaha chuan kan pawl Hav. Pom-a ho an lo tawm niin! Hav. Pom-a chuan rang mangkhengin ka keah a min hnuk thla a. Trench khurah chuan ka thu lut ve chiah tihin ka dinna atanga hlam hnih vela hlaah bomb a lo tla a, a lei han vawrh darh chuaih chuan kan thu chu min thlawh khumin vaivutin tlemin min phuh a. Lo la ding ni ilang chuan ka dam khaw chhuak lo chiang kher awm e.

Heta tang hian zan hnih riakin Mandalay lam panin kan kal a, motor-a kal theihna kawng a lo awm ruah mai a. Thai ramhnuai camp-ah chuan Chinese Lt. General Do an tih chu a lo awm a, 22^nd Army-a Major General thah pathum nen. An zinga ni hnih kan cham hnu chuan kan kir leh ta a. Haw pahin khaw tam tak kan tlawh a, sipai silai leh a mu kan hmuh theih theih chu pawisain kan lei sak hlawm a. Rifle chu Cheng 50/- in, a mu pakhat Re 1/- zelin kan lei a, tam fe kan la khawm a ni.

Kum 1942 August thla tawpah Mergherita kan thleng leh a, khaw chhe kara thla hnih zet thang bo kan nih avangin ka thawmhnaw zawng zawng chu a mawih vek mai a, kan PO chuan min khawngaih a, Dibrugarh-a kal nan a motor min hman tir a, kawr leh pawnthuah leina tur pawisa min pe bawk a. Ka haw leh chuan Chindit Force an tih mai Brig. Wingate-a hova kal leh turin min ti a.

Kei chuan ka hah tawng khawng rih avangin chawlh ka dil a, ani chuan min hre thiam em em a, Assam-a IGCH zin vel chu phone hmangin a zu bia a. Chhuti min phal san dawn tih hriain Sadiya lamah min kal tir a. “Sadiya atangin i chhuti-na tur order lo han nghak rawh. In IGCH hnenah Assam-in amah chauh hi em ni doctor in neih? Ka rualin tum thum zet Burma-ah lutin thla hnih aia rei fur chhia  kan han tuar a, kan haw chiah a, a chawl tur a ni ka tih kha,” a ti a.

Lambert-a nena China-ho kan han hruai chhuak hi thil hrehawm tawp tlingin ka hria. Ni eng reng reng ka hmu ngai miah lo tluk a ni a, ruah a sur nasa em em a, pawnthuah huh chungah kan mu reng a. Camp siam hman loh chang a tam a, chhawl chungah ground sheet kan phah a, a chung zawnah hmawlhte paliin puan kan zar a, ruah a tam zual lai chuan dang zo hek lo. Rul lah a tam em em a, rul tur neiin tumah min chuk lo hlauh va, damlo thih phah ta em kan awm bawk lo. Rul leh vangvat lian pui pui a tam kher lah tak a, ruah sur nasat lai phei chuan vangvat a sur tel ta emaw tih mai turin in chung lam atangin a lo tla a, an che vel chu a ri sung sung hial nia. A chang phei chuan kan mutna chhawlahte chuan rul a lo inkual leh rui thin.

Vangvat hi serh leh mawngkuaa luh an ching hle a, mi an zuk na hle bawk. Ka vak tam hle naa Tirap ram ang ema rul leh vangvat tamna hi ka la hmu lo. Phaikin ngaw khawi laiah pawh an tam, a, ruah angin an sur ve thei han tih loh rual zu ni lova!

Rangpang area hi tunhma chuan Sadiya Frontier leh Lakhimpur Frontier Tract tih thin a ni a, Burma atanga inlak chhuah runpui kan neih lai hian Tirap Frontier Trail tia vuah a niin Political Officer pakhatin a awp a, Mergherita chu headquarter-a hman nghal a niin buaina bial a nih avangin APO pawh paruk lai an awm a, an zinga pakhat chu Senior EAC forum-a awm tawh Pu German-a kha a ni a. ani hian court lam a buaipui a. Loktamchhe zingah hian thil inruksak leh nupui inchhuh mai mai a tam nen, heng lam thil hi an buaipui ber mai a. APO dang erawh camp leh raltlanho buaipuiin an zin vel reng a, an buai thei em em theuh mai a ni.

Syingbomang chhak lamah khan 22^nd leh 5^th Chinese Army han hruai kha kan ni a, anni ho hi mi 50 vel zawlin a pawl pawl khan an lo chhuk thla a, keinin khua kan fang a, thingtlang khaw ho kha an thlabar em em hlawm a. Raltlan kal thawm chu a lo na deuh nge, sipaite chu tlawn nan bawng te, sial te, vawk te an lo talh sak hlawm a, heng mite hnenah hian bawng, sial, leh vawk manah PO chuan Rs.20/- zel a pe hlawm a ni.

Sadiya kan thlen chuan Bama Medical College, Dibrugarh Principal hmasa ber Dr He chu CS a lo ni a. Min han hmu chu, “Enga ti nge i lo kal?” a lo ti chawt a. Lehkha chu ka pe a. Political Officer ziak chu a han en vang vang a, chutah min han en leh a, “Aw, a tha, i chhuti dawn maw? Leave la lovin Sadiya-ah hian awm rih mai la,” a ti ta roh va. Kei chuan, “Ka han haw phawt ang e. He laiah hian sipai aia sipai hna ka thawk a. Sipai ka nihna tura min kohna pawh ka chhang hlei thei lova, hetah hian ka tawm reng a nih hi,”ka tih san a.

Tirap-a ka awm chung hian ‘dak’ reng reng kan hmu thei lova, chuvangin commission-a interview tura min kohna pawh ka hmu ta lo a ni a. Lambert-a nena China-a kan kal lai phei chuan thu kan thawn thei lova, kan hmu thei hek lo. Thla thum chhung chanchin inhrilh thei ta lo chu in lama ka chhungte ngaih pawh a lo tha lo hman hle reng a. August 1942-a ka kir leh a Mergherita atanga, “Ka dam e,” tia ka pa telegraph ka han thawn tuma ka nu lawmzia min hrilh chu a mittui a tla zawih zawih mai.

Ni thum chama ka inbuatsaih fel hnu chuan ka chhuti-na tur order pawh a lo thleng a. Kan CS chu kan zir laia kan zirtirtu a ni a. Ani chuan, “Aw le, han chhuti la, commission-in i kal ngei ang. Tirap-a i awm chhungin i chungah Political Officer a lawm em em a, i hna thawh that avangin lawmman eng emaw tal chu i hmuh ngei ka ring. Kei pawhin ka lo pui ve che a nia,” a ti ta mai a. Keia junior lutuk khan thil ka lo hre lovin ka lo ngaihtuah phak lo hle mai.

Hemi hnu hian hlim takin ka haw chho ta a. Aizawl kan thlen dawn ni chuan ka nau Biakthansanga’n thirsakawrin a thianpa nen min lo hmuak a, min hre lovin min tlan pel a, Durtlang Leitan-ah ka thianpa Lianthiauva, Muthi-a MO leh a mi hruaite an lo awm khawm teuh mai a. Aizawl kan thleng chu ka nu chuan min chibai zawk a, a lut leh ta mai a, a lova tapin a lo tawngtai a lo ni. Thi bo hial tawhah min ngai a,  thirhrui hmangin ‘ka dam;’ tih ka han hrilh pawh khan ka hmel a hmuh hma chuan a ngaih a la ngam zan lo a lo ni.

Kum 1943 Feburary ni 12-ah inneih kan titlu ta a. Kan inneih ni tak hian  Helio message kaltlangin Bawrhsap hnen ata thu a lo thleng a. Bawrhsap chuan, “Kum 1943 New Year Honour List-ah Kaisar-I-Hind an pe che,” tih a lo ziak a. Ka pa Sainghinga’n Gazette-ah ‘Dr Thantluanga, Esquire’ tiin an chhuah che min ti bawk a.

Hemi hnu thla ruk velah Commission tura interview ka hmachhawn ta a. Chu hna chu ka zawm nghal a. December 1944-ah 62 Combined Hospital-ah ka awm a. Skin Department-a awm chu Indian Officer 2 leh radiologist tih loh keimah chiah Indian ka ni. Thla thum vel hnuah Barakpur-ah Blood Transfusion training neiin min tir a, mahse, an lo tan tawh avangin Bangalore lamah min tir ta zawk a.

Ni 10 chhung ka training hnuah ka kir leh a, thla khat pawh awm lovin Comilla-ah min chhoh tir a, chuta tang chuan 146 Mobile Surgical Unit Front ka va zawm a, mahse, Japan-in min bomb darh zawh avangin Comilla lamah ka kir leh ta a. Thla khat zet pawl bik pawh nei lovin duty hrehawm leh buai ber mai ka va thawk a.

Imphal leh Kohima beih runpui lai tak mai kha a ni a, ni tin thlawhna hian hliam a rawn thiar lut reng mai a. Hospital unit 3-a mite chu kan insem darh zel si a, kan buai takmeuh a ni. Chhun zan zawmin kan duty a, mi kan zai hnem hle mai a, Japanese-te pawh kan zai nual. Hliam dangte lah field atanga an hliam tuamsak satliah mai mai kha an ni si a, enkawla sawngbawl tur an tam ngei mai.

Chaw eina hmun mumal pawh pan hman lovin Operation Theatre side room-ah chawi te kan ei hial tum a tam hle. Rei awm ve ta lovin Dacca lamah min tir leh ta a, ka Unit awmna tur dik tak 62 IGH (Combined) lam ka pan leh ta a ni. Heta kan Surgical Officer Commanding chu Lt. Col. Young a ni a, ani hian, “Durtlang Doctor kebaia pawlpui kha ka ni,” a ti.

Heta ka awm lai hian Forward area-a aawm ka nih avangin ka Medal dawn tur pawh Delhi-ah ka han dawng thei lova, Bengal Governor  Mr Casey khan mi dang pakhat nen Dacca-ah min rawn tlawh pahin min hlan ta a ni.

[P.S: Muantea'n min fuihpawrh a, ka pawrh turh mai. A sei inti mai thei, a aia sei pawh ka la nei a nia ]

Similar Posts:

• Arunachal, China!?
• Puitling zirlai
• A bug in Mimi’s CD
• Ka ring reng a ni
• Road Train!

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Wednesday, June 15th, 2011 at 11:30 pm and is filed under Information. You can follow any responses to this entry through the RSS 2.0 feed. You can leave a response, or trackback from your own site.