India hian Bangladesh leh Pakistan hi chu a thamlo ve thei khawp mai mahse, a ngam loh lakah chuan inhrosa chunga a zia lang takin a uipui meikhup zul zul thung niawm tak a ni.
1962 khan Jammu and kashmir chhung a Ladakh District a mi Aksai Chin chu China hian a lo la tawh a. Helai Himalayan border kilometer 3,225 lai a sei ah hian China chuan awlsam takin a duh duh in a lo lut chhuak tawh a, Pangong lake bul, Karakoram pass velah te lek phei chuan Chinese sipai te chuan India sipai post te chu an nawr chhuak mai pawh ni lovin, a su per (eject) chhuak nawlh nawlh mai anih kha.
map source: Wikipedia, click for larger size
East lamah pawh Assam/NEFA bawr vel chu PLA (Chinese People’s Liberation Army) lakah India chuan theih tawpin lo dan tum mahse, Chinese sipai ralthuam tha eltiang hmang, training tha zawk bawk chu dan ngaihna an hre hlawl lo a ni. A ni hmasa berah ngawt pawh Tsang Le post, Namka Chu thlang lam a awm te, Khinzemane post, Dhola kiang ami te chu an nuai pherh nghal vek mai a ni. Tichuan, October 23 ah Tsang Dar an la leh a, October 24 ah Tawang, India 7th Infantry head quarter chu an hrual leh hrep bawk a nih kha.
India chuan China hi India ram 38,000 Sq Km awpah puh mahse, China erawh chuan an ram chhung ngei a ni a ti mauh mai si a, India tan chuan tih ngaihna vak a awmlo a ni maithei, a ngam miau si lova!
Sipai indo chu reh tawh mahse, politics lam hmangin kum 30 chuang an la in nghirngho zel tho a. Kum 1994 atang khan, “confidence-building measures” tih hming chawiin hotu lian zual te chu inremna awm zel nan an in be chhunzawm ta zel bawk a.
China chuan Arunachal Pradesh chhungah te hian kawngte siamin, rel kawng (rail road) te pawh a rawn siam lut ruih tawh a, India chuan engmah hrelo angin a ngawi hle hle mai. Boruak a in mung chho zel a India chuan tlawm ngawt ai ti niawm tak chuan October 2009 khan sipai tam tak Tawang area velah hian a han thawn chho leh a, tah hian Mizo, India sipai officer te pawh an tel nghe nghe a ni. Tawang, Arunachal Pradesh ah hian a khaw mi te ang zat deuh thaw India sipai hi an awm reng thin bawk.
India sipai hotu te khilam an han kal ve hian, kawng a bumboh avangin 4WD engine chak tak hmang lo chuan an kal thei lo. China lam hotu te chuan border a an sipai te an tlawh ve dawn chuan, black top kawng nuam takah foreign car in an inkhalh lut zal zal bik thin a ni, an ti.
Engpawh chu lo nise, India map hi han en ta ila, North East region intanna chiah mai hi te reuh te in a rek rat mai a nih hi. Hemi atanga Hmar lam zawng hi India chhung ni tur reng hi a ni thei angem, India hian a claim loh tur claim ve ngawtin, Tawang, Arunachal Pradesh hi India ram a lo ni reng em ni?!!
