mi(sual).com

“Ka tawna tui ang nem tur ka thai ve kha, A tawnah tui ang ka nem duai ta si”. “Ka ti dawn chiah a, i lo sawi hman zel, ka tih tur tak min lo sawi khalh zel mai” tih pah a tlema ka han men nur ve deuh hi chuan huaisen ka inti in, chhungkaw pa ber ka nihna hi ka hre ve chiang a lawm.

Mahse,”I hriat reng te chuan sawi hma khan ti mai ta che, i che muang thei de du lutuk a nih kha Satel ang mai, tuan hi i nei lo lutuk teih tuih mai-Tela” tih anka nem han dawn zui thak hi chuan, Pa ber hi pa nihna ang ngei a tawng duah lova ngawih chuh mai hi thil finthlak leh damdawi tha ber a ni tawh mai.

Tihtur tul chu ‘Hebrai sal tlangval’ ang maia ngawi renga tih mai kha sermon ngaihnawmloh deuh ngaihthlak lohna tha tak a ni mai. Amaherawhchu, Nu berin, “Pa ber hi a hah lutuk ange” ti niawm taka inchhung rorelna zawng zawng PA hnen atanga a han hnehchhuh tawh hi chuan duh ai hian kan inchhawk zangkhai leh lutuk mah mah thin a ni.

Thil pakhat nuamlo deuh mai chu, chawhmeh siam fuh loh tum hi a ni. Chawhmehah khan hmarcha emaw, chi emaw, ajinomoto emaw, a engemaw ber a lo tam lutuk a, a lo fuhloh deuh hi chuan, “A va han tuilo fuh chiang tak em! Chawhmeh lah hi I siam ngun tawh the reng nen i thiam thei thlawt lo, hmeichhia pawh tluk lo” tiin min han fak sak teh luam a, dik tak chuan eirawngbawlah na na na hi chuan hmeichhia hi tluk lem lo mahila ka pawi ti lutuk hran lo khawp mai.

Kum sawm kalta kha I han thlir kir leh lawks teh ang hmiang. Kha tih hun lai kha chuan chhungte thawhchhuah sa ringin nuam takin kan la khawsa ve kha ania. Tuna ka kawppui awmmi Pathian min pek ka chunga roreltu lo ni ta pawh hi nula zaidam leh nunnem, rualpawl thiam, hawihhawm leh biak nuam tak, a naupang ber atanga a upa ber thleng pawha kawm thiam kha ni thin mahse ‘NU’ nih dan a thiam ta a ni ang.

Hmanah kha chuan han biak pawhin a chhanna tur dik taka min chhan pah khan min han melh seki vel a, za lo mahse intih nelawm nana a han kiai deuh sak mai te kha mitthlaah hian ala cham reng. An inah va leng ila, a nu leh pa a unaute sedai thiat lo hian min kawm thiam a. A rimtu chhuihthangval rual te pawn,”Keimah min duh berin ka hria” kan ti thei thum mai a. Chuti khawpa rual kawm thiam leh inthup thiam leh hawihhawm chu zuk nia.

Kohhranah nise a kutzala tla tawh chu hneh tak hian a hlen pap pap zel a, khawtlanga a inhmanna hlei hlei chuan ani a to na ti zualtu chu. Mitthi lumen naah nise lerh vang ni hauh lovin tlawmngaihna diktak rilru puin a tlaivar a.(Tlaivar ho hi an lerh e ka tihna a ni chuang lo, mahse thenkhat hi chu tute emaw an awm chauhvin an tlaivar peih).

Nula ho tih a tan a mawi hi chu tihloh a hleih a neih pawh ka hre lo. Chutiang chuan chhung te phal chin ramri a kan ngai reng reng lova, chuvang tak chu a ni a nu leh pa, unau te pawn an duat rawn na chhan chu. An inchhung a a vawng faiin a vawngfel a, eirawngbawl lah chu an chhungkuaah a thiam ber emaw tih mai tur hian an eirawngbawltu ber a ni bawk a. Ei siam dan pawh duh se chuan ‘A bu’ in a siam thlap thei hial mai thei a ni.

Tun hmain chutiang tak chu lo ni mahse tunah erawh a lo dang ta. Ka han ngaihtuah kir leh chang ni hian a nulat laia khatiang ni si kha a ‘Pa’ (mushroom) eisual vanga rilru lo danglam ta a nih ka ring chiah bawk si lo.

Khawtlang(YMA)-a a inhman laia a mitthi buhfai khawnnaah te, Sunday tuka a Faith Promise khawnnaa a vah velna ah khan tute chhungkaw nu ber emaw lo awmdan leh tihdan vel te kha a rilruah a cham reng anga, “Nu ka nih hunah ka la ti ve ang” tiin a lo suangtuah reng te anih nghalloh chuan a chhan tur awm hi kei ‘Pasaltha’ meuh pawh hian ka chhut chhuak thei lo chu a ni e.

Sap pachalin, “Men are April when they woo, December they wed” a lo tih te kha a hlauh ve theih teh reng nen khan aw….Hetah kher kher hi chuan ka va han failed chiang kher em ve le, ka zirlai khan a mawi ka tiin ka lo tuipui ve em em a, ka zirchhuak leh mang hlei lova.

Tunah lah hian, “Women are April when they maiden, December when they wed” tiin lo zir ta zawk ila ti tein ka ngaihtuah vel ta mai mai a. Ka thianpa pakhat pawhin heti hian a thuruk pakhat chu min rawlruk a, “Nupui ten kan bawp inkarah an bawp an rawn rawlh a, awma bei thlap chung leh mittui tla deuh par chunga thil engemaw an han sawi keuh keuh tawh hi chuan, zing thawh veleh chhemtheia nu te ngalchara khawn fawk fawk hi kan duh rum rum mai alawm maw le,” a ti mauh mai nia maw le.

Chutiang chu thil awmdan alo nih tak si avangin, hmana kan zirlaibua Darchhawna’n ‘Huaisen’ tih a ziah ami,”Mipa huaisen chuan an nupuite an ngamlo ngam” a lo tih kha kei chu dik berin ka hr eta riau mai. Lal Solomona’n, “Hmeichhe an hmang leh khawcheng chu angkhat an ni” a lo tih pawh hi rilru leh thinlung leh chakna zawng zawngin ‘Amen’ ti mah ila a ri lo pawhin ka sawi chhuak ngam der mai si lova.

Ni a rei zawh poh leh ka thu lo rei a, ni a tawi deuh leh ka thu lo reilo deuh a ni mai. Nimahsela zan pawh hi eng the ual chu a ni chuang lo kei ka tan reng hianin.

Zan alo ni a,’Zan lo thleng mahsela, Isua ka nei” tichung zelin laikhum kan bel a. Dik tak chuan,”Keipui bulah zan mu ka chhing” ti ila ka rilru a dam be rang. Chhuna lam a buai hrep vangin mut a lo tui a, han mut tui deuh a lo hnar palh lah hian lirpui a nghing emaw tih tur hian min han sawi harh a, mangtha deuh mang fuh tum lah hian chuti bawk.

Thinrim taka khum atanga tlawh thlak pawp tum a ke han lek uaih pawh hian pa rilru chak ta na na na chu inlamlet thuaiin rizai ka han siam tha leh ringawt a. Mahse mutchhuakin min zem hneh hrim hrima, ngaihtuahna akal thui tak tak hmain ka muhil leh ta hlauh thin a, vanneihthlak-khawngaihthlak bawk siin..!

Zing alo ni leh ta, pang him piala ka han tho leh hlauh thin hi chu,”Zan mut dawna ka tawngtaina Lapan a chhang a ni” ka ti lo thei lo. Mahse he khawvela ka zing thawhpui tam berte te erawh chu kei anga Pasaltha nilovin, nu emaw nula emaw an ni hlawm a, khawiah emaw chuan keimah ang chu an awm ve zauh zauh mahna le.

Thil pakhat hahthlak deuh mai chu, zing han tho ila, naupangho hi an upat dan indawtin an rawn tho thliah thliah a. Chutah zing tho hma thenawmte emaw thiante emaw an lo len chang a, “Khawnge nu ber hi?” ti a zawhna han dawn tak mai hi chhan nuam lo leh harsa chu ava han ni em..!! Sunday tuk chhung inkhawm na a naupang ho hmaah, ‘Dawt sawi loh tur’ tih hi sawi zin pawl a ni a, mahse chu chu mahni bawkin bawhchhiat a ngai leh thin si a.

Amaherawhchu tih than deuh reuh a nih avangin,”Nizan a mu tha thei meuh lova,ka kaitho duh ta lo mai ani’ tih loh leh “Ka awm a nuamlo deuh dawn emaw ni a tia a la mu anih kha” ka han ti liam puat a. Inthiamlohna em em ka neih pawh ka hre chuang hlei law.

Mahse hetianga dawt var han sawi ngai ta thin hi hahthlak ka ti deuh thin chu a ni kei Pasaltha hian. Tichuan eirawngbawl paha naupang tiffin pai tur siam chung hian, ‘ka buaina ram thlalerah hian” tih vel hi faifukin ka han sa a, chaw ei dawn tuibur hmuam da awm velah hian kan Home Minister chu a lo tho ve ta a. Ka thu ve hun chu tih tawpin a lo awm ta a.

Thingpui thlum tak ngelngawl leh a hmeh naupangho nena inzat theuh a sem, chan khat chu ka han hlui bawk a. Thingpui a lo sat deuh chang phei chuan a hmehin a lo daih lova, khek ve lo tu nih kan hlawh a, inti remhre taka a dai deuh han pek leh” Khawharin riak te thingpui in ang mai dai dek duk si, bawngpui zing zun a ang relh rulh” tiin min han fak sak leh vei bawk nen.

“I tawnah Pa lu a hai ani e, aw Lalnu Esther ka ti dawn che nge, Lalnu Vasti ka ti zawk dawn che.Kei erawh chuan,”Nitin ka hnenah awm reng ang che Lalpa” tih hi ka inhnemna leh ka innghahna, ka thupui ber a ni si a. Chaw ei erawh a han siam ve ziah a, a chaw ei siam chhung thuthlengseia lo thut awn diai chu ka hahdam lai tak a ni ta ve ang.

Hetih lai tak hi a ni inleng a mak amak a tam ka duh ve hun lai chu ni….Thil hreawm ka tih leh deuh pakhat chu naupangin thil han tisualin emaw, a chhelamin lo awm palh se ‘A Pa’ te lam hi an chhun duh em em mai a. Exam-naah te han passed in emaw thil tih that an han neih chhun lahin ’A nu’ te lam hi an chhun leh em em ang lawi bawk si.

Chutiang teh nuai kan nih avang chuan,”Naupang hi puitling thuai thuaiin in awh hlum san rual han ni tawh se” emaw “Kan nu ber hi thinlung leh tih takzetin, nun inthlakthlengin han piangthar hlauh mai se” tih ka ngaihtuah chang hi chuan keimah chauhin ka nui leh deuh tut tut thin.

Engvanga hetiang dinhmun a ding nge ka nih ka inngaihtuah chang hi chuan, ka inthlahdah rei lutuk a ka tawrh phah ni te hian ka hre rum rum a. A nih loh leh ka lo zaidam lutuk em ni aw? Nge ka lo ngaihsam lu deuh hret aw? Tih te ka ngaihtuah mai mai thin. Kan pi leh puten “Vau sam loh leh Hmeichhe vau loh chu an pawng tual tual” an lo tih kha a dik leh dikloh prove tu ka ni ve ngei mai hian ka hre bawk thin.

A khai…..!!! ka duhtawk tawh teh ang, ka sawi thui poh leh ka mawng ka hlim sang a ni mai si a, sawi thui loh hi a hrisel ta berin ka hre ta mai. Hei mah mah ka khup chen chauh ka la hlim ta lehnghal a, mawng thleng chuan ka hlim ngam lo a ni e…..

Similar Posts:

• Min lo pui ve teh u
• Ka thianpa ve thung…. :-)
• Sunhlu zu siam dan?
• Engtin nge ka hnem ang?
• Valued system…………

Recent Posts:

• Pathian Malsawmna
• Doctor-ten min rawk em?
• Keini chu thingtlang mi kan ni a
• MIND-SET: MIZOTE LEH KAN RILRU SUK-THLEK
• ZoRO Press Release

This entry was posted on Thursday, August 4th, 2011 at 3:00 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.