(Ti ve tawh lak lawh si a, Inthlahrung tak chungin zawh ve law law a thain ka hria a, ka han chhunzawm leh law law lawk ang e)
Padu khua atang chuan Adipasi khua pan turin, Tukthuan eikhamah kan chhuak leh ta hnak hnak mai a. Kan chhuah dawn hian a khua mipui engemaw zat rawn pungkhawm lehin, Pathian thu tawi kan sawi leh thei a, Tawngtai rualna neiin kan inthlah liam ta a ni.
Adipasi khua hi a hmar tawh hle mai a, a tlang pawh alo sang tawh a, kawng chho kan kal nasa hle. Chawhnu thlang herah tlang dungah dan pangaiin, zig-zag awm miah lova kan chhoh leh ngar ngar hnuin, an khaw Buhin hmun kan thleng leh ta hlawl mai a.
Adipasi khua hi Thingtlang khaw lian ang reng taka lo ni a, an buhin pawh Mitthi khua niawm takin an lo ding ngaw leh khup mai a ni. Kohhran tlem a zawng kan neih ve avangin an Thalai hoten min lo hmuak a, Thingpui sen Thlum leh an Zochhang (E-ting) nen min lo hmuak a, ril atam tawh bawk a, a tui duh hle. Kan Ruksai ah zawng zawngte min han chhawk vek chu, a hlim awmin hah a dam sawng sawng mai a ni.
Adipasi khuaah hian Inthiar a ngai ta tlat mai a, Ekin an neih leh neih loh ka han zawt a, an pindan(bedroom) amaw ka tih, Parda an zar lam chu min kawhhmuh tat lat mai a ni. Ka hawi he haw lai chuan, ka thianpa chu alo nui ruh ruh a, “Va kal ve chhin teh, a nuam viau a nia†min ti mai a.
Ka va lut chu, Bang hrulah hian Mau pum 10 vel hi an lo dawh a, chutah chuan thut veng vawng a, ek thlak ziah ziah tawh mai tur hi alo ni a. Ka han thu chiah chu hnuai lam ari ta sun sun mai a, ka han hawi thlak nak chuan, a hnuai chu an vawkin alo ni nghal reng mai a, Vawk 4 vel hian nghakhlel takin an Lunch tur an lo nghak thap mai hi alo ni a, a tirah chuan a tim awm duh ang reng hle.
Mahse, ka Missionary rilru alo chhuak a, a chuh hap ber chu ka ngei deuh a, a cher deuh ber chu ka duhsakna ka hlan ta a. Adi khuaah hian khawi hmunah mah Tui hi a harsa ngai lova, mawng silna lam pang chu a buai thlak lem loh. Tichuan,Inah bawk Inkhawmna hun tha takin kan hmang a, Mipui pawh an lo kal tha leh hle mai.
A zan Li na chu.
A tuk chu, Inrinni ani a, Kan tum ber Damro khua kan pan ni a lo nita a. Kawng a hlat tham em avangin, Zing khawvar veleh a chhuah kan tum a ni. Khawvar hmain Pa berin Ar a puah a, thim tham hnuaiah Adi Terrace buh tui tak nen puar liahin kan ei ta a. An ar chu kan ni silo hian a hmui hiam mai a, “Enge an pawlh ang aw?†Ka ti rilru deuh a, Chaw fun lian tawk min siam sak a,Vai puan pan te hian Chi(Salt) min fun sak theuh bawk a.
Chu Chi chu ei tur amaw ka tih laiin, tiang hmawrah min tawn sak leh ang lawi a. A chhan ka han zawh chuan,†In kalna turah hian Vangvat hmun a awm a, a tam hian a tam lutuk a, kuta lak sen anni lo, Kuta lak zel dawn chuan in kal hman lovang, chuvangin in taksaa Vangvat lo kai apiang chu, he Chi hian in hawlh anga, an tla hmiah hmiah mai ang†an ti ta a ni.
An sawi ang ngei ngei chuan, Vangvat chu alo tam nangiang mai a, kuta han lak sen hi anni mawlh lo.
Kan tiang hmawra chi chu kan han khilai a, an tithei lo ve khawp mai, an hlawm tla tawp tawp mai a ni. Luite nuam tak hi kan thleng ta a, Lei(Hanging bridge) hi a awm bawk a. Chumi bul hmun nuam takah chuan Chaw kan fak ta a. Kan chawfun kan han theh chuan, a hmui hiam chhan chu ka hmu thei ta a.
Zing khawvar hmaa Ar a puah khan Pa ber khan Ar kha tuisoa leih a, a hmul pawtfai hmasa lovin, a rawh fai tawp kha ani a, a thim bawk si a, a hmul alo fai lo hle mai hi alo ni a, thil hmui hiam kha, arhmul rawh rim alo ni. Tui ti taka ei buan buan a har ta talh mai.
Damro hi Mariyang khaw bul lawka awm ani a, a zo tawh hle mai a, Tlang kan lawn nasa hle mai. Ogan-a lah chu kum 50 mi ve le ti lovin, chawn ping lan mai leh harhvang tak ani bawk a, “Hawk..hawk†ti pah hian a perh thoh thoh mai a, tluk loh rim a nam hle mai. Adipasi ho ang bawk khan, An khaw hnuaia an Buhin hmunah Thalai hoten Thingpui leh eitur nen min lo hmuak leh a, kan thawmhnaw min chhawk leh vek a, an tleirawl ho pawh hmun zoa awm anni bawk a, an tai sen tak hlawm mai.
Damro khua hi sawi tawh angin Adi hnam tha, Padam ho lo chhuahna hmun ani a, a khua pawh a lian ang reng hle a, Padam sub-clan hrang hrang, Tayeng, Borang, Perme, Pertin te kha a hlawm te te in an awm hrang thliah bawk a. Tin, Mariyang SDO hmun bul lawk anih tawh avangin, Electric Power Supply pawh a awm ve tawh a ni.
Zanah dan pangaiin In lian tak pakhatah kan inkhawm leh a, Thalai tleirawl 10 rual vel Lam thiam tak hi an lo awm a, Gospel Action Song an entir ve a, kan hlim tlang hle mai. Pathian thu pawh an ngaithla tha khawp mai.
A zan ngana chu.
A tuk zingah Baptisma chang mi 5 an awm a, Chhunah Biakin chhete, Mau rapa sak, bang pawh nei mumal lovah kan Inkhawm a, An Pastor lah chuan Kekawrbul a ha a, Adi half Jacket dum hma phel, hlui uk khak tawh chiah aha bawk a, Slipper nen inkhawm a kaihruai a, Ogan an Sacrament a buatsaih a, a Lem reuh hi ka ti khawp mai a.
Zan Lamah Inkhawm kan nei leh a, Hetah hian, Kan Tleirawl rual ho khan an thiam an show ve leh a, nuam antiin an hlim ve khawp mai. A khaw mi ho lah chuan hmuhnawm hi an han ti em em khawp bawk si a, a tihzia khawp mai.
A zan rukna chu.
A tuk thawhtanni, Tukthuan eikhama kan chhuak tur chuan buaina kan tawk ta. Chu chu eng dang ni lovin, Tleirawl rual Lam ho khan, kan kal an phal ta mang tlat lo mai a, Ogan an a han thlem ngial a, kan kal lui a, min zui zel a, “Khai le a tawk tawh e, haw tawh rawh u†a tih pawhin, Ipte hrui vuanin an tap ta tluar tluar mai a, an biang tai sa tak tak kha, a tai sen hlur tawh mai a ni. Min zui zel a, inthen a har ngei mai. Kan Tawngtai fe hnuin, Mariyang khaw Lan theih naah tap chungin min thlah thei ta tawk a ni.
Mariyang kan han thleng a, Motor tlan kan han hmu chu a mak duh ang reng khawp mai. A lo zo tak zet tawh a, Tlang sang tak tak vur khuh var vo te pawh a hmuh theih tawh a, Boruak hi a hit fim kak mai a ni. Chung tlang vur khuh var vo hmar lam pang chu China anih tawh thu min hrilh bawk a.
Mahse thlenna tur kan hnawng teuh hle. Kan pawl pawh ni lem lo Kristian ve hrim hrim ten min thleng ta hram a. PWD. I.B. a kan han kal chu, kan lo tawp leh thin zia ka inhre chhuak chauh maw le. Rin phak baka tam zanah an lo kal khawm leh a, Pathian thu lah chu an ngaithla kham thei lo amaw tih tur khawpin an duh a, a nuam hle mai.
A zan sarihna chu.
A Tukah chuan State Transport Busin kan kal a, An Chief Minister nilai Gegong Apanga Khawpui Yingkiong kan chhun pelh a, Boleng khhuaah kan chhuk a, Hetah hian Kristian Hmeithai pakhat Inah kan chawl a, uluk takin Thingpui a siam a, ka han in chu a al(salty) ta tlat mai a. Sadhu Sundar Singh-a chanchinah khan Tibet-ah Thingpui al a in thu ka lo chhiar tawh thin a, khatiang kha ni turah ka ngai a, thahnem ngai tak chuan kan in zawh ve tak hram kha.
Tun hnua ka ngaihtuah let leh chang hian, Kha Hmeithai khan Chi kha Chini amaw tiin, a thlum sual a nih ngei ka ring leh hnu hnawh deuh. Zan lamah Inkhawmna kan han nei chu rin ai daihin an rawn pungkhawm tam leh pek a, Thusawi lah chu ngaihnawm hi an han tih hmel mai mai khawp a, tum aia rei sawi a awl hle mai.
A zan riatna chu.
Boleng-ah hian Bus dang man lehin, a tuk zingah Pasighat kan pan leh ta a. Kawng min hlauhawm tak tak a awm nain, Tluang takin Pasighat Mission Centre kan thleng leh ta a. A hmaa Pasighat thing ka tih theih thin nen, ni 8 lek chhungin ‘Ropui’ ka ti thar ta hle mai. Kan Nula ho an lo nui tet tet a,â€Engatinge in nuih tet tet a?†ti a ka han zawh chuan, “Nangni Mizo 2 in rawn pawr haw fap lain, Adi 2 ve thung chu, an rawn mam haw maih mai a, a nuih zatthlak em alawm†tiin min chhang.
August 6th, 2011 at 11:37 am
chh1ar dawn ang aw. A nga1hnawm hmel khawp ma1
August 6th, 2011 at 11:46 am
Avan ngaihnawm em… hetiang chhiar hian chhungril a fan…
Ti daih ila naupan zual lai deuh kan ramvak vangvat saitial kan kai tam khawp mai a. Mi thlamah kan lut a, Hruaia nen chuan kan ngal vela bet chu kan chempui chuan kan ziat thla thawt thawt mai a. Hruaia chuan a kangro a, “A thithun” a tia a hmawm hmaks hmaks mai… pakhat ka ei ve chhin a hmui ve phian, chil a ti haw deuh a ka ei zawm ve talo.
August 6th, 2011 at 12:08 pm
Yingkiong…Pasighat…leh a paih hmar lam….In kal hla mai a.
Vangvat tamna hmuhna chuan ‘Snuff Tobacco’ pawh hi á¹hatak ani.
Ti ta daih ila, Hmung hrang hranga aá¹anga Pathian rawngbawl rawn kal an tam bawka Zangkawltuk ho hian Kohhran/Denomination chu an ngah ngawtin ka hria. Ring tawh sa a changin in inchuh lehnghala…7th Day ho hi an á¹utai lo ber chu anih hi, Vawksa nghei duh an awm hmel silova :-S
August 6th, 2011 at 12:10 pm
Avan ngaihnawm em…pilgrimage lam hi chu ngaihnawm tihzawng hi ni ve reng reng.
I ek na mawlh khi ka va nui ve 😀
Vangvat tamnaa in han kal te khian kan Bawng bo zawnnaa vangvat kan kai nasat zia min hriatchhuah tir a, kut in thenhmanloh tih khi chu ka hrethiam khawp mai. Thian tura din chuan a dang kan koh belh hi ni ringawt. Kap chhunga an luh kha ka hlau ber nimai 😀
Sacrament hi a serh leh sang kan lakrun ang ai hian a message hi kan hre lo em a, hmun á¹henkhata kan Kohhran pawl tih ang lova antih chuan mak/ho kan ti thei viau in ka ring. A message/purpose hriat erawh chuan bawl phuan vak lo mahse kan thinlung ah a hlutna in a hneh ve hrim2 ka ring bawk.
Post ngaihnawm (Y) Rawn chhunzawm zel teh 😉
August 6th, 2011 at 12:11 pm
A ngaihnawm thin hle mai. Pathianin malsawm rawh se. A dang pawh ka la chhiar zel peih.
August 6th, 2011 at 12:22 pm
post ngaihnawm,tha leh hlu tak niin ka hria (Y)
August 6th, 2011 at 12:50 pm
chhiar a nuam telh2 mai, khawngaih takin han chhunzawm zel teh. Paws hlu tak a ni.
August 6th, 2011 at 12:58 pm
Arabian nights ka chhiar amaw kan tih chu le.. ngaihnawm hle mai.. Chuan, chuhhap khi chuhhelh kan tih nen a inang em?
August 6th, 2011 at 1:07 pm
Vangvat hi hmeichhe kap ah a awm duh bik anti…post ngaih nawm tak a ni, chhiar a man hla khawp mai.
August 6th, 2011 at 1:12 pm
A ngaihnawm hle mai, Krista thisena kan zawmpuite nen hian inthlah/inthen a har duh teh asin! Inngainatna ril tak hi a awm a —then tawh lohna Lalrama inhmuhkhawm a tichakawm zual thin.
Pasighat-ah khan Arshang School ni tain ka hria, an Principal kha naupan laia ka classmate thin a lo ni a … ka kal ve hun lai chuan, chaw eiah te mi lo sawm a. Naupan lai chanchin kan her lum leh a, kan va hlim dun tak em!
Mission Compound of the Baptist Church-ah nuam takin min thlentir a … chuta an Pastor nupui lah kha kan farnu, inhre em em kan lo ni leh zel a … khi lam East Siang District khi nuam ka ti ve phian. Assam ramri-ah thirsakawr nen kan han che leh tak tak a … tet laia Bodo thiante nena lo khawsaho tawh kan ni bawk a, ka tlangnel viau zel a, pitta (chhang à wm) kan ei deuh reng bawk a. A nuam thei hle.
August 6th, 2011 at 1:16 pm
Baibing hnah kan hriat chuan, thliak ila, vangvat lak thlak nan a tha teh mai.
Tin, hmawlh hmawra chi fun hi chelek a nuam zawkin tuan a tirang zawk. Jungle Warfare lam thilah pawh nuam thei tak a ni.
Thailand ngaw pika Map reading beia kan platoon ka hruai laite kha min ngaihtir thar leh e.
August 6th, 2011 at 1:16 pm
Voikhat tal chu remchang se ka zui ve chak chhin khop mai hetianga hmun kilkhawr tak tak fang a kal missionary te hi.. US vel niloin..
August 6th, 2011 at 1:23 pm
-ka chunga chawnghilh comment #11 khi recent comments ah chuan hemi comment #12 hnungah om daih nia! Quite mak! :O
August 6th, 2011 at 1:42 pm
Amak hle tak mai
August 6th, 2011 at 1:44 pm
A ngaihnawm hle mai a,,
August 6th, 2011 at 2:11 pm
AP a mission compound vel hi chu ka kal ve chhin chak ngawt mai. mahni sum sengin kal ta ila, kohhran hming em em ni lo pawn, missionary ho khan min lo welcome tho angem?
August 6th, 2011 at 2:16 pm
A ngaihnawm hle mai,mi inpe te hi an hlu a ni.
August 6th, 2011 at 2:19 pm
Ngaihnawm lehpek hle mai.
Vangvat tamnaah chuan sakawrbakcheh hriam tha tak keng ila chet zung zung ila an rem ve duak thei.
I zinna ram chu ka la chian lohna hmun a ni a a namai lo hle mai.
Arunachalah hian ka thiante an awm nual a, hmuh ve pawh a chakawm khawp mai.
Han ti zel rawh le. (Y)
August 6th, 2011 at 2:30 pm
Comment pe tu zawng zawngte chungah Lawmthu ka sawi e. @Chhangte 11, Denomination lian tak tak atam viau chuan kristian an tam tawh hle tihna ani mai a, thil lawm awm lamah ngai mai ang aw. @Sammoo, chuh hap leh chuh helh chu thil thuhmun a ni e. @rempy doc_lib nen rawn in thurual ula, lo zin teh u. Kan lo duat viau ang che u. @Chawnghilh, dai loh leh expi. loh a hleih pawh i lo neih loh hi maw le. “Saptawng lam nalh lutuk” an tih kha i va ni awm ve? Ka nupui “Sweet charming eyes” ti a comment tu kha ini em aw? I theihnghilh tawh mai thei. Hmeichhia hian mi changkang deuh fak hi an lawm teh a nia. @ midangte, in la chhiar peih dawn phawt chuan, karleh lamah ‘Koyu lamtluang’ rawn ziah ka tum dawn nia. In zavaia chungah Ka lawm e.
August 6th, 2011 at 2:33 pm
a va ngaihnawp dup dup ve le aww….hahaii
August 6th, 2011 at 2:36 pm
@doc_lib : Kei pawh thil tul dang daiha han kal ka ni a, an hospitality thatzia chu Missionary ni awm reng an ni. Chawhmeh tui tak tak nen, riahna nuam tak min pe thlap a. Pasighat khua pawh an Maruti-in min fan chhuahpui vek a. Ka theihnghilh thei lo. Lehkha pawh ka thawn zui reng thin a, kan inngaina em em bawk.
Arshang School min tlawhpui phei chuan, an Principal khan students a ko khawm a, residential school a ni a. Students hmaah fuihna thu leh thil dang ngaihnawm sawi turin min ti tlat a, thiam lo chung chungin aw rawl ka’n chhuah ve tak kha!
Arunachal Pradesh mi leh sa hi thian tam tak ka nei nain, Mission Compound-a ka han thleng kher kher kha, ka zawn chhuah chawp tho an ni a, ka fak ning thei lo.
Kal ve mawlh teh.
August 6th, 2011 at 2:39 pm
@Pu Hv, i tha a ti za zak ang tih ka hre reng mai. I thianpa chu nang aiin ala pa mah e lo? $ Post leh pekah chuan Thlalak pawh telh hram ka rawn tum ang.
August 6th, 2011 at 2:42 pm
@Pkfanai tak takin ka la rawn tum dawn ania,2013 may hnu lam atang hi chuan ka thei tawh ang. chumi hma erawh chuan ka la theih hmel loh.
August 6th, 2011 at 2:49 pm
ka chhiar chhuak ve chiah part 1 leh 2. A ngaihnawm hle mai. In ngaihsanawm teh e. Ziak zel rawh. Mahni chanchin i ziak a nih pawn fimkhur la, miin i in sawi thei emaw an lo ti palh ang. Mi hi an mak teh ania. (H)
August 6th, 2011 at 2:56 pm
PKfanai, Zangkawltuk ram chu i chul ve hle tawh mai maw… thlalakah bak ka la hmu tlem ngang mai. Hetianga hreawm tuara kal chhuah ve hi alawm ka dil. Ka thinlung hian a chak thin a, kan pastor ka biakin “Remchang a awm mai ang,” a tih chu ka la nghak ve char2 anih hi. Ani chuan, “Khawiah nge i kal duh,” min ti ve bawk a, hre bik hek lovi, “Midang kal duhloh fo na hmun, a hreawm berah,” kan ti ve ngawt bawk a, khawilai tak ni ang maw hairehai. 🙂
Nangni ho lo penchhuah pui, kei drugs leh zu ngawl vei thin, khawvel hlimhlawp chen thin hian tun thlenga nungdama min la zuah tu tan hian chhungkaw pawnah engemaw han tih ve chakna hi ka nei ve thin ani ber awm e.
Nangni ho, jinx, sekibuhchhuak, keimah leh midang ho, hetiang nitin hnaa nei te hi ka chhuang thlawt che u a ni. Pathian pawhin in nitin nunah thlamuanna a pek ngei che u ka ring tlat a ni. (Y)
August 6th, 2011 at 3:01 pm
Hv/PKfanai-“Zangkawltuk ” heti hian an sawi chawk a-ka hriatna hi a beitham khawp a, khawngaihin a lo chhuah dan han sawi teh u.
August 6th, 2011 at 3:04 pm
PKfanai te chu ziak ngaihnawm in a ti tha viaua, mahse tunlai hi a chawlh lai nge mawni misual ah hian a mission hi a tam tawh zawk in ka hria 😀 NOI
August 6th, 2011 at 3:05 pm
Pu Hv, ka inpuang duh ve lo mai mai alawm, i chanchin ka chhiar hian in anna kan ngah lutuk. Arunachal in min hìp beh tlat chhan pawh hi, “SETANA BILL” kha zuk ni daih a.
August 6th, 2011 at 3:05 pm
vakul #26 an mahni an inkoh dan ni maiin ka hria, ka hre thui biklo khawp mai. Arunachal Pradesh tun hmaa “Nefa ram” kan tih ang deuh khan an hnam kohna dang nifahmiang ka ti mai!! PKfanai emaw chhangte_ll in an hre ngeiin ka ring.
August 6th, 2011 at 3:06 pm
hnathawk chung reng pawn a misual theih tho maithei a sin.. 🙁
August 6th, 2011 at 3:07 pm
PKfanai#28 alo nih daih tak chu mawle.
August 6th, 2011 at 3:08 pm
ruata #30 ka hnathawhna ang atang chuan , “hnathawk chung reng pawn a misual theih reng tho maithei asin,” lova a theih tlangpui zawk. 🙂
August 6th, 2011 at 3:09 pm
keipoh hei hna ka thawk mawp mawp pah.. tha deuh sin (Y)
August 6th, 2011 at 3:18 pm
26. Vakul, Zangkawltuk awmzia chu, Adi (Abor) mipa ho hian tunhmain an serh khuh chiah chiah velin thing an rek khuar a, chu chu an kawngah hruiin an hreng bet thin a, Zangkawl anih ber chu. Chutiang zangkawl an tuk thin avang chuan, Abor runna a tel mizo ho khan, ‘Zangkawl tuk ho’ tiin an ko ta a ni. An hriatah chuan hman chi miah lovang. @ Asteric, a dik ang reng khawp mai. Tunah hian Sikul Principal in ka awm a, zin chhuahna chance a tlem khawp mai. Keima mimal thahnem ngaihna in NERIST leh misual.com hì ka in pek belh ve ringawt a, thahnem ka ngaih ve mah nak lai a.
August 6th, 2011 at 3:20 pm
#34 (Y) ka hriatna a zau leh ta hairehai 🙂
August 6th, 2011 at 3:22 pm
PKfanai ka lawm e. Ka hre reng tawh ang.
August 6th, 2011 at 4:22 pm
Tet laiin NEFA boys-te nen kan inkawm nasa ve a. An ramah khian Mizo puan ang a tam nachhan hi eng dang a ni lo va, Pu Khawtinkhuma (Mizo MA hmasa ber) nupuiin ngawrh takin puantah dan a zirtir a. Kan puan design pawh hi a inan phah hle. Hnam mawl ve tak an ni a; mahse Mizo-te hi min lehpela hriatna ka nei tlat!
Zangkawltuk kan tih thin nachhan pawh sawi fiah a ni tawh a, zangkawl bun lo pawh an la tam em em laiin, chawhmeh bazar-ah te hian sazu lang hian an bazar mai thin a, kan Mizo Officer NEFA-a awm hmasate bawk khan bazar-na hmun ema saruak lutuka hmuh kha mit men nuam an ti lo va, hnahthial-a rawn tuam tur talin an fuih a. Thu an awih a, an rawn fun ve ngei a, ni a lo tlang sang a, hnathial kha a inkhawr tingtawm leh ta mai bawk si a, lehlamah hnathial a uai a, a lehlam tur chu!
UT kan ni rual a, State kan ni rual leh lawm ni kha? Mahse, ram hruaitu kan inneih fel hleih a ni ngei ang —DAM (tuikhuah puitling) power generate huau huau thei kan la nei hauh lo, anni erawh chuan an nei tlat!
Community Hall leh Playing Field tih vel hi chu senso tam tho mah se, ram hnuk berah ka ngai lo. Hma lak puitling nei thei tur Ministry hi Zoram chuan kan mamawh ve ta hle mai!
August 6th, 2011 at 4:31 pm
A ngaihnawm ngei mai, Hmana Ghy a kan awm lai in AP East nge West ka hre tawh lo bialtu Rev ZD Lalhmachhuanan AP a an rawngbawlna chanchin a sawi a , a ngaihnawm ngei mai.. Malsawmna a let tam takin dawng mawlh teh un.
August 6th, 2011 at 4:32 pm
PKfanai : In nu chu inhmachhawnin em ni ka lo compliment pek? Nge, misual.com through hian! Pa ber hian thikthu i lo tichhe ngawt ang e, mit meng mawi hi an awm ve chek a nia!
Tawngkam mawi takin tuemaw pawh ka compliment ngawt a, a lawm thiam hle na khan —ambiguity a nei ru ran mai si a ka tawngkam khan … mi chhuahchhal leh a. Ka sawi fiah nawn leh ngial asin le. 😀 😀 😀
Keini mimawl hi chuan awmna-thla-nge hre chang lo hian kan han ri pawp zel mai thin a, a lan dan ni ve miau hek! ha ha ha :thialpawn kheuh neuh neuh:
August 6th, 2011 at 6:15 pm
Pu Chawnghilh, thik lah love a, hmaichhanah ani lo. Mission compound ho hrilh a ni. Nula hovin min fak hian, a lo thik deuh thin a, miin amah an fakin, ka lawm theih teh reng nen. Keinin ‘Bap-tis’ kan tih kulh kulh lai a, “Bheb-tist” i han ti talh talh leh “Sweet charming eye” kha chu nula hovin an sawi zui rei a lawm.
August 6th, 2011 at 6:21 pm
Vangvat kai leh kailo……
Nangni zawng vangvat kai rau rau-ah, Nort East Frontier Agency (NEFA)kan lo tih thin, Mizo District, Mizoram tih a lo nih ve rual a, Arunachal Pradesh anlo tih ve tak ah Krista avanga vangvat in han kai hi a ropui e…. (Y)
In rawngbawlna zelah Pathianin Malsawm zel che u rawh se. (F) (C)
August 6th, 2011 at 8:18 pm
Mut dawna chhiar ah ka ka khek rih,. Chuak leh nghal.
August 6th, 2011 at 10:38 pm
Pkfanai, Lung i van tileng em!
In mission compound-ah khan thla khat vel zet zawt chu kan thleng tawh tak asin! Adi awmna Bial thingtlang khua chu kan fang ve nual hman. Roteah te khan, truck hnungah chuangin kan van khawmpui ve zak zak. An kut SOLUNG kha chhim kan tuma, missionary khan an phal ta chiah lo. Solung lawm zan khan, SEX free em ni kha ? 🙂
An khawmpuia an hlasak pawh, Mizorama Thalai ho hla sak tlanglawn tak tak kha; Music instructor Pu Mawia te ho khan an Adi tanwgin an letling nasa bawk a, Mizorama khawmpui ang mai kan ni!
Kam pona te law,
A sengme ke ku rengsa,
Dar ti… 🙂 He hla hi nalh kan ti thin khawpah!
August 6th, 2011 at 10:45 pm
Arunachal sawi chuan ekin mawlh hi 🙂 Vawkin chungah thingtuai tlawn pahnih an khama, kan e thla ta zawih zawih maia. Vawk te chuan an lo tep nghal hlawih hlawih mai a. Tui hi an han tih hmel mai mai khawp ah!
Khawthalo ek anih vaih erawh chuan, an hmaiah a kai luaia , chu chu a leiin an liak faii ta thin! :-))
August 6th, 2011 at 10:56 pm
Zangkawltuk tih tawngkam hi chu hmang tawh lo ang u. A nalh lo tlat. Rilru a na thei dawn tlat nia maw engatinge maw ni 😛 . Tin, a changkang lo chu awm bawk mahse,tluk lohna ka ngah ve khawp mai. PG entrance ah pawh mizo aiin all India a tang a tling an tam zawk tlat a ka hriat chu le. 🙂
August 6th, 2011 at 10:59 pm
#44 A MAN rem rem hle mai a hairehai 😛 😉
August 6th, 2011 at 11:03 pm
in comment a ngaihnawm!
August 7th, 2011 at 12:53 am
Ka chhiar chhuak ve ta. Ka rilrua lo awm chu, kan missonary sap ho te pawh khan, kan chanchin hi an ramah an han sawi ve ngei ang a, ngaihnawm an tiin mak an ti thei ve ngawt ang.
August 7th, 2011 at 5:48 am
Hriat mai mai tur: 1) Hemi Tour hi kum 17 liam tawh ami a ni. 2) Kan tour na lai hi Arunachal ah rau rau pawh a thingtlang pilril leh an la mawl na hmun a ni. 3) An than dan hi a zuanin an zuang a, Assam type in an nei ve lova, an original IN atangin RCC ah an zuang daih zel. Tin, an original In hi an ngaina a, Concrete in tha pui pui nei ho pawh hian a bulah an sa hram zel. 4) Khawtlang in enkawlna dan leh hrai a thain an zah hle. @Seki, Rote khua chu Koyu bul lawk ani tawh a lawm. In kal thui hle mai a.
August 7th, 2011 at 7:29 am
Tuna an Chief Engineer (PWD) zinga mi khi ka classmate, nuih tiza deuh mai thin a ni a. An hming pawh ka la hre nual hlawm. Ka rawn kal kum kha 1997 a ni tawh a, PKfanai hian mi hre riau tlat a, ka hre ve teh chek che chuan ka ring. Mi mikhualtu kha i ni ta hial pawhin ka ring e.
Thuk (hearth) chanchin in rawn ziakte kha, a thla hi ka la reng mai a. Chhuat zau tak hmun laili berah thuk an bun a, rapchung an nei ve vek a. An thing tuah hi rawltharin a put zawh tawk, tlawn sei tak tak hi star fire kalhmangin, an rawlh fur mai a, chhawm zel tura va pan hnaih chiam a ngai lo.
An ar chhiarte pawh a ni ve thlip thlep a. An leikapui lawn chhoh nan hian thing tum, rahbi intuk an han tung awn ngei a. Tar pawhin vawnchhan vuan lovin an zawh zawi zawi mai a, so very interesting.
An luhka kawngkapui sir hi vawk lu ro an tar iar uar mai a, sanghal lu ro pawh a ni mah na —mit a la thei khawp mai.
An ei ber buh hi chenna in atanga fal tawkah an sa kher a, a inhung thluah mai a. A chhan ka zawt chik hret a. Kangmei lo tawk palh pawh ni se, buh ber chu ni tina mamawh a nih avangin a him tur a ni, precaution an la thiam hle.
An thalai, sap sikula kalten min bawh uar hle a, Genesis Bung 1 chanchin tlem te ka hrilh ngei ngei thin, ni leh thla Siamtu Pathian chanchin an hriatin an surprise thei hle!
Ni khat chu Charali-a thingpui dawrah ka chawl a, chutah chuan rawlthar pakhat auto-rickshaw nei thar hian thianah mi chhar tlat mai a. A auto-rickshaw chu ka khalhsak a phut tlat mai a, nilengin a thar ka lawmsak ta a, ka duhna hmun zawng zawngah ka tlan kual a. Apanga thingpui huan mit tlin tawka zau pawh ka fang chipchiar hle. Tlai lam a lo ni a, pawisa pek ka tum a. A duh ta hauh lo mai a. Mahse, Rs 20 chu a kawr-hma ipte-ah chuar tawn khawpin ka hnawh lut lui ta a. Hreh takin min pawmsak ta a, inhmuh lehtik ni leh indawr chhunzawm a awm zui ta chuang lo, Zoram lam pan ka nih tak avang khan! La dam tak ang maw?
August 7th, 2011 at 7:31 am
PKfanai inpuang chiah la hairehai 🙂
August 7th, 2011 at 11:54 am
I article hi a hlui deuh tawh a ni maw?
“An Chief Minister nilai Gegong Apanga Khawpui Yingkiong kan chhun pelh a” i tih hian a hun lai awm chu a hriat theih tho ve.
“Kan Lalpa hmaah lawmna hla tur” tih hla te pawh i sa tui viau thei tawh dawn a nia…
Mariyang lam zin ai chuan Maryland lam zin chu ka chak zawk deuh ka ti, in sawi hmang han 😛
August 7th, 2011 at 2:20 pm
51. Pu Hv, hemi kawngah hi chuan ka tluk lo che a ni e. Nang angin kan nu ka ngam ve tlat lo. I thiannu hi a rilru a zau awm ngawt mai. Kei chu, Nula hovin min lo star ringawt pawhin a tùm bur zel.
August 7th, 2011 at 6:58 pm
a ngaihnawm e
August 9th, 2011 at 2:47 pm
A ngaihnawm hle mai. Rawn ziak zel teh, arunachal khi chuan chanchin a ngah ve ngawt mai.