mi(sual).com

1st. Friday: Assembly Dy. Speaker, John Rotluangliana chuan a bial chhung, Rajiv Nagar khuaa cheng nuai 60/- senga jeep kal theihna tur suspension bridge, metre 75-a sei leh cheng nuai 54.60/- senga sak RMSA hnuaia high school building thar a hawng.

2nd. Saturday: Salvation Army din champha vawi 146-na a ni a, he ni pual hian khawvel hmun dang ang bawkin Mizorama Chhandamna Sipai pawlte chuan vantlang tan thil chi hrang hrang an ti.

3rd. Sunday: Kolasib-a National Highway 54 kawngpui thlang khâmah police constable, Lalruatfela (41) s/o Thanzami, Electric Veng, Kolasib ruang chhar a ni a; khâmah hian a tla palh nia rin a ni.

4th. Monday: Mizoram Dy. Chief Minister hlui leh MPC president hlui, Lalhmingthanga chuan MPC pre sident hnenah an party atanga a bânna a thehlut. Hei hi a chhan nia lang chu party kalphung kalh zawngin a chê nia an hriat avangin MPC party chuan insawifiah turin a hriattir (show cause notice an pe) a; hei hi zahthlak leh mualphothlakah ngaiin Lalhmingthanga chuan, “Kan hotute hian party atanga báng lo thei loah min siam ta a ni,” tiin, bànna hi a thehlut a ni. Lalhmingthanga hi kum 1978 atangin MPC sub-headquarters, Lunglei president a ni a, kum 2000-2005 chhung khan MPC president a ni. MPC ticket-in MLA atan vawi ruk thlan tlin a ni tawh bawk.

5th. Tuesday: Tlabung Zodin Venga Din Bahadur-a in, chhungkaw pahnih luah lai chu a kâng a, in luahtute an awmloh vek avangin bungrua engmah chuh hman lohvin a kangral vek.

6th. Wednesday: Rohmingsanga (25) s/o Lalthangluaia, Hlimen chuan Lalhruaitluanga (22) s/o Lalliantluanga, Melthum chu a pumah a vit a, Civil Hospital-ah Lalhruaitluanga hi kalpuia zai nghal a ni. Thudawnna sawi danin, Lalhruaitluanga te hi Hlimenah hian an leng a, engemaw thu inbat fuh lo avanga inhnial buaiin Rohmingthanga hian a vit ta mai nia hriat a ni a, Kulikawn Policen-te’n an man nghal.

7th. Thursday: Mizoram State Assembly budget session chu ṭan a ni. Session tan ni-ah hian thil dang tih hmain legislator hlui leh ni mek – H.Lalsangzuala, H.Hrangdawla leh Arunachal Predesh CM, Dorjee Khandu te sûnna hun hman a ni; remna leh muanna a awm zel theihna atan mi tin in pe thar turin House chuan a ngen bawk.

8th. Friday: Lungleia Art & Culture department leh Mizo Academy of Letters Joint Hqrs., Lungleite chuan A&C Auditorium-ah ‘Chhiatni thatni sawngbawl dan’ tih thupui hmangin seminar an buatsaih a, resource person, Dr.Chawngkhuma Chawngthu, Saiha-in paper a present a, an sawiho nghal.

9th. Saturday: : Mizorama football website rintlak leh thalaite ngaihven tak, www.zofooty.com tih chu footbller S.Mal-sawmtluanga’n a hawng. Football ngaina thian intelkhawmin an din ZoFooty hi football chanchin ziahna a ni a, a bikin Mizoram football leh Mizo player-te telna chanchin an luhchilh bik dawn a, Indian football leh European football mai bakah world foot¬ball hrang hrang an ziak ṭhin a ni. Zo Footy hi internet hmang ṭhin football ngainatute chuan an hmelhriat viau tawh a; nimahsela, website mumal taka siam a la ni lo a ni. A buatsaihtute chuan, “He website-in a tum ber chu Mizo football chawisan a ni,” an ti.

10th. Sunday: Zemabawk Forest Check Gate bula cheng Lalrinfela (38) chuan Mizorama sualna rapthlak ber tur nia ngaih a ti. Lalrinfela hian nupui neiin he a nupui hi a sun hnuah nupui dang a nei leh a ni. Tichuan, a nupui hmasa laka a fapa kum 14 mi hnenah chuan a nuhrawn chu pawl turin a tia; a fapain a duhloh thua a chhan hnuah a pa chuan ‘Heti ang hi fapain nu chunga a tih dan tur a ni,’ tih pahin a fapa kekawr chu a hlihsak a, a thupek a zawm lo a nih chuan vuak hrepah a vau zui bawk a. A pa in a vau hnu-ah a nuhrawn hi a pawl ta a ni. Hemi hnu hian Lalrinfela hian duhtawk mai lovin, a fapa hmuh lai ngeiin a nupui hi a pawl zui ve leh a, duhtawk a ngah hnu-ah an nufa hian inkhawm turin a tir chhuak zui leh a ni. A rapthlak khawp mai.

11th. Monday: C.Lalruatpuia (24) s/o Lalthawmmawia, Tualte khua chu rama a hnathawh laiin tekin a denghlum.

12th. Tuesday: Synod Music Committee buatsaih Residential Choir Conductors’ Traning vawi 16-na chu Synod Conference Centre, Mission Vengah neih a ni a, Rev. Lalzuithanga, Executive Secretary-in Pathian hnenah a hlan. Traning hi Upa H. Lalhmingmawia, Upa Lalthansiama Tochhawng, Pu Lalromawia, Pu H. Lalrinmawia, Pu Benjamin Sailo leh Tv. H. Lalṭhazuala te’n Music leh a kaihhnawih thil pawimawh hrang hrangte zirtirna an pe a ni. Training hian July 16 (Inrinni) zing thleng a awh ang.

13th. Wednesday: Champhai District Jail-a duty Lalhmingmawia (27) S/o. Malsawma Chawlhhmun, Aizawl chuan a thianpa Home Guard ve tho Darthanzama (51) S/o. Sangnghilhlova Sawleng khua chu a siaii ken lai .303 Riffle hmangin khuma a mu lai chu a tukhumah a kap a, a hmai dinglam a chhe hneh hle a, Darthanzama hi ka pawh chhawn lovin a thi nghal. A hma in in tihthiam lohna an lo neih tawh vanga hetianga ti mai hi niin a lang.

14th. Thursday: Serchhipa Mini Swimming Pool hmasa ber tur IWMP Serchhip-I (2009-2010) kaltlanga siam Soil & Water Conservation Department Complex, P&E Veng, Serchhip ami chu District Bawrhsap Pu P. Lalchhuanga’n vantlang hman theih turin a hawng. Pool zau zawng hi a dung feet 54, a vang feet 19 a ni a, pool chanve hi feet 3 a thuk a ni a, a chanve dang hi feet 4 a thuk a ni bawk. Pool siam nan hian sumfai Rs 4,00,000/- sen a ni a, a chhuat RCC a sak niin, a bang chu leirawhchan sak chi (hard brick) hmanga sak a ni. Hei bakah hian inthiarna mumal taka siam a ni a, thawmhnaw in thlakna hmun a awm bawk a, eirawngbawlna hmun tur choka a awm bawk bakah inbualna tur pindan pawh siam leh tura ruahman mek a ni.

15th. Friday: Mizoram Minister hlui, H Vanlalauva (72) s/o. Sangkhuma (L), Chhinga Veng chu cancer natna avangin a boral. A nupui C Lalhmingmawii leh a tu leh fate thahnem tak a kalsan. H Vanlalauva hi July 1, 1939 khan Phulpuiah a piang a, January 1960-ah Aizawlah pêmin, Chhinga Veng dintute zinga mi, an khawtlang hruaitu hmasate zinga mi a ni H Vanlalauva hi kum 1961-a MNF a din atangin tel ve nghalin, hruaitu pawimawh tak pakhat a ni chho zel a, MNF rammu zingah telin, kum 1966-70 chhung khan jail-ah a táng nghe nghe. MLA term liamta pahnihahte khan Aizawl East II bialah thlantlin a niin Minister of State-ah kum hnih a awm hnuin Cabinet-ah hlan chhoh a ni.

16th. Saturday: Khawvela football club duhawm ber Arsenal ṭantute intelkhawm chuan ‘Arsenal Fan Club’ chu Silvermoon Restaurant, Aizawlah an din. Hruaitute pawh thlang nghalin OB pali, adviser pakhat leh Committee member 13 ruat/thlan anni.

17th. Sunday: Lunglei Ramthar Baptist Kohhran biak-in thar Rs 80,00,000/- senga sak chu BCM President, Rev. Dr. K. Thanzauva’n a hawng. Biak In hi a dung feet 100, a vâng feet 42 a ni.

18th. Monday: MNF Treasurer, Pu Vanlalzawma, MP hlui chuan MP a nih laia Mizoram tana a thil tih pawimawh te Hnam Run-a a thusawiah a tarlang. Pu Vanlalzawma chuan a thil tih zingah chuan Mizoram University din tura Bill pass ngai 16, kum 2000 March thlaa pass chu Human Resources Development Ministry-ah Standing Committee member a nih anga an hotute a nawrna rah niin a sawi a, hmarchhak State hrang hrang leh Jammu & Kashmir-a Mobile phone hman phal ve loh chu Parliament Standing Committee on IT, Chairman Pu Somnath Chaterjee-a a ngenna avanga hman phal a nih ve tak thu leh Mizorama Oil leh Natural Gas zawn chungchanga hmala turin Rajya Sabha MP Pu Lalhmingliana nen tan an la tih a sawi a, Parliamentary Standing Committee on External Affairs-ah a tel ve avangin Kolodyne Multi-Modal Transport Project-ah pawh kum 2008 April ni 2nd. khan hmalak tan tur a tih fel niin a sawi bawk.

19th. Tuesday: Lalhunliana (34) Sesawng Field veng chu a tupa (a farnu fa) Johan Lalmalsawma (21) chuan chempuiin a sathlum. Lalhunliana hian a nu pawisa a dil a, a nuin a pek duh loh vangin khawlaiah chem nen a um chhuak a, a tupa Johana hian lo hmuin Lalhunliana chu a lo dang a, Lalhunliana hi chem nen a inhrosa zui a, Johana hian bawhthluin a chem chu a chhuhsak a, a sat zui ta mai a ni.

20th. Wednesday: Mizo Hmeichhe Insuihkhawm Pawl (MHIP) Gen. Headquarters chuan an General Secretary, Lalbiakengi chu pawl hriatpui loh General Secretary a nihna hmanga pawl hminga ama mimal tana sum a pûk leh a lâk thin avang leh, kum 2009-2011 chhunga pawl sum tichingpen tua puh anih avangte’n, MHIP Dan Bu Bung X, sub no. 9 angin MHIP Gen. Hqrs Executive Committee chuan kum 2011-2013 term chhung atan MHIP General Secretary a nihna an ban.

21st.Thursday: Governor MM Lakhera leh Chief Minsiter Lal Thanhawlate chuan, Raj Bhavan sak ṭhatna tur lungphûm Raj Bhavan Annexe bulah an phúm. Raj Bhavan building hi kum 1899-a sak a niin British kutchhuak la awm tlemtê zinga mi a ni a, Mizorama thil hlui, hlutna sang tak nei a nih avangin a lung bangte chu thiat lovin, a thar nen inhne rem tura zuah a ni dawn a; building thar tur chu a hmun ngaiah RCC-a sak tura ruahman a ni.

22nd. Friday: Pu HB Laltlansanga Pehlawn in, Assam type chu bungrua engmah chuh hman lohvin a kangral vek. Thli a nat deuh avanga kang a nih rin a ni. A kan lai hian tarlan tak angin thli a na hle a; hei vang hian riakchhuakin bungrua pawh an chuh theihloh phah ta a ni.

23rd. Saturday: Pu Lal Thanzara, Parliamentary Secretary chuan Central YMA hnuaia ruihhlo do pawl Central Anti Drugs Squad (CADS) te’n tun hnaia an man khawm Ruihhlo Rs.16,58,680/- man hu chu Central YMA Office Tuikhuahtlang-ah a halral . Heng an halral takte hi: Parvon/Proxyvon – 38,436 capsules; Heroin (No.4) – 4 Hawng, 105 Cans, 62 Caps ; Nitrosun/Alprozelum – 2043 Tablets; Ganja – 2Kgs,1 pkt. Leh Cough Syrup – 82 Bottles-te anni.

24th. Sunday: Thenzawlah truck MZ-01 G-2437 Zonunsanga (19) s/o Pazawna, Thenzawl khalh chuan Lalrammawipuia (4) s/o Malsawmtluanga, Thenzawl Venghlun a sú hlum.

25th. Monday: MZP Headquarters Lunglei chuan, Feburary 9, 2011-a MGNREGS hnuaia Village Level Assistant atana lâk, tun thlenga party politics avanga hna la zawmtir loh a nih avang leh, hemi chungchanga Rural Development Minister hnena an ngennain awmzia a neih loh avangin, Lunglei Venglaiah Offer of Appointment copy an hâl.

26th. Tuesday: Sorkar laipui flagship prog. hrang hrang pholanna expedition, ni nga awh tur chu Sihphirah ṭan a ni. Directorate of Advertising and Visual Publicity (DAVP) buatsaih he expedition-ah hian NRHM leh sorkar flagship prog. dang hmanga a bikin thingtlang mipuite chawikanna hrang hrang tarlan a ni.

27th. Wednesday: Lalnunhlima (22) s/o Lalbeiseia, Zobawk Venglai chu Mat luiah tui hleuh kai zo lovin a tlahlum. A ni hian karhmasa Zirtawpni khan nupui anei a, a nupui nei hlim taka ram an kal chu luiah hian chesualin a tlahlum ta hlauh mai ani.

28th. Thursday: Ni 16 awh Mizoram Assembly Budget Session chu Dy. Dpeaker Pu John Rotluangliana’n a ti tawp. Session neih chhung hian stared question 329 zingah 81 chhan a nia; ziaka chhan chi (Un-stared question) 20 chhan a ni bawk. Sorkar lehkha pawimawh 10 pharh a nia; bill 17 lutin pakhat hnuhdawh leh tih loh a dang zawng chu pass vek a ni. Heng zinga 11 chu Governor-in a pawmpui tawh a ni.

Session chhung hian Official resolution pakhat, special motion pakhat, private member resolution pathum pawm a ni. Resolution pakhat hnawl a ni. Minister hrang hrangte’n an department enkawl hrang hranga an sum mamawhte chu house-ah pharhin house chuan lungrual takin a pawmpui a ni. Session neih zawh takah hian Mizoram budget Rs Vaibelchhe 4216 leh nuai kua pawm a ni bawk.

29th. Friday: Govt. Republic Higher Secondary School NSS Unit chuan Aizawl Civil Hospital-a damlote tan thisen unit 107 an pe. Thisen petute hi mipa 86 leh hmeichhia 21 an ni.

30th. Saturday: Pu C. Pahlira (87), Mizo Union hruaitu hlui, Mizoram tana vision nei ṭha berte zinga mi leh Mizoram hmasawnna tura huaisen taka bei a, achievement tam tak nei tawh tu chu Civil Hospital Aizawlah a, pumpui ulcer leh Jaundice avangin a boral. Amah hi Aizawl leh khaw hrang hranga CP Road sial chhuaktu hi a ni. CP Road tih pawh khua/veng hrang hranga a awm chuk hi.

31st. Sunday: Tlabung Zodin Vengah nausen kum khat leh a chanve mi, Esther Lalmuanawmi d/o. Rodney Hmingthansiama, Tlabung Zodin Veng chu maxi-cab , MZ-02 7542, K.Lalrinzuala (34), Lunglawn, Lunglei khalh in a chíl hlum. Driver hian mi a chil tih hi a inhriat lawk loh avangin a tlan tlanga; a hriatchhuah hnua a lo let leh chu an lo man ta a ni.

He diary hi kum 23 zet liam taa min boral santu ka nu hriatrengnan ka ti.

Similar Posts:

• Lily Veng atanga hnawhchhuah-in chhuahsan duh lo
• Aizawl Area TKP Meet 2007
• Delhi Mizo Kut 2008 – Outdoor
• Budget Session tiak
• India camp-ah mizo naupang 5 koh an ni

Recent Posts:

• Sehrep thenfai dan awlsam
• American flag thui hmasaber tu chu tunge?
• mi(sual).com hi!
• KA MITTUI A TLA!
• ȚAHNA NUNHLUI

This entry was posted on Sunday, August 7th, 2011 at 2:27 pm and is filed under Event, Mizoram. You can follow any responses to this entry through the RSS 2.0 feed. You can leave a response, or trackback from your own site.