Duhzawng a nih loh vanga lei lote leh a leina tur nei lote inkarah hian khuarkhurum zau tak a awm a, a hming chu ‘sum’ a ni. Engvangin nge chhungpui nu meuhin hahthiphulkaia vawk chaw a buaipui le? A vawk chaw chhum so ri phena sum so ri kha a ngaithla tlat a lawm.
Uih dang kianga rei thu thei lo kha nilengin nghathu uih kiangah kan thu thei tlat! Rim thang nghur mai tihmui rimtui tur hian sum aia hnar khuhna tha hi a awm thei dawn chuang lo. Rimtawng pawisa lo leh mutmu pawh tuah fumfe thei lo chunga phunnawi hauh lova kan buaipui theih hi sum bak a awm thei chuang dawn em ni?
Kan hlimpuia kan tahpui, kan mualphopui leh kan hmingthatpui, kan dampui leh kan thihpui ‘sum’ hian rau maktak zawng a pai a ni phawt mai.
Sum leh pai lalna khawvelah kan cheng a; kan lungngaih laia kan leklam ber leh kan hlim nia kan thawhchhuahpui sum hian damna chenin a lei thei hian kan hre tawh a, chu chang a ni ne’m- chatuan nunna pawh lei thei hiala ngaite lah bo lo. Mite lungawi lohna sum hmanga tilungawi thintute hian kan Pathian hi sum leh pai hmanga tihlungawi theihah an ngai ni fa hmiang!
Chu sumin an thluak a suksak tawhte mitah mawihawih dang a awm thei tawh lo va, engkim tehfung atan sum an hman tawh avangin. Mihringte hian zahawmna, ropuina, chawimawina leh thiltihtheihna hmawrvalh chu sum leh pai ngahte kut bawrah kan suihzawm tlat tawh avangin chu mi duh ve ta reng reng chuan tui luangin hmun hniam lam a pan ang mai hian sum lamah ‘haw-hai-haw’ tiin kan phek nawr a, kan tlan ta mup mup mai a ni ber.
Kan nitin titi leh sawi duh zawng hi sumah a innghat thui hlawm khawp mai, tumah kan bang si lo. Hlawk leh hlawk lo chu sumin kan teh a, a hming thlakin ‘hausa’ te kan han ti thul. A hming dang ‘lo ziak leh mai rawh’ tih ringawt paw’n thla khat tla kan inla ba thei hial.
Nupa pawh hi ‘sum hi hlimna a ni lo’ tih han sawi han sawi thin mahila sum a awm loh chuan kan him lo va, kan hlim thei hek lo. Hmela puak ti bik lo leh pa dar ben deuh-ding mai mai pawh kopang hal tum ang tau-mai nia kan ngaih vete pawh sum lama an phan loh miau chuan hnartu an kat nuk mai zel bawk a.
Thu leh hla fing tak neia kan ngaih bik lohte pawh an thusawi kan ngaih pawimawh viau chuan an lo neinung deuh nge nge a; chu’ng avangte chuan kan chhia leh tha hriatna hian a vawng tlat a, kan bawh lo thei lo.
Thil ti hlek ila sum nen lo chuan kan che thei lo achha chu a ni tawh si a, sum hian nawmsakna a kawl tih kan hre ru khiau bawk si; chu khawvel nawmsakna laimu han hnawltu nih chu mi mawl hnaah kan chan a a dik a dawk leh a thangmawi thlu lova khawsa tura min turtu kan chhehvela mi ringawt pawh hi phurh tham a ni.
Khawpuia mipui phe suau suau mai han hmuh changte hian ‘sum hian min lo va chettir nasa tak em ‘ tih mai tur a ni a, chung zingah chuan kan tel ve lo thei chuang si lo. Sana-in hun bi min hrilh a, sumin hun bi min thununsak thung; a tel lova hma kan sawn theih miah loh mahse kan tlakchhiatpui chu a va ni si em!!
Sum tel lo chuan kohhran pawh hi kaih loh khuang ang maiin a dul hnuk mai a, hringnun pawh hi a thlabar riau thin. A tel lo chuan chhungkua pawh ro hi a nawi nak mai a, hmachhawp a ropui thei lo. Sawrkar hlei hlei hian an lo ngaihlu, sum nei vak lo sawrkar-vehbur khawn reng mai an huai ngai lo.
Chu chu mimal chhungkua leh ramah hian a dik em avangin sum lamah hian kan tlan lo thei lo a ni ber. Neih loh laia indaih lo ngai lo neih chiaha indaih lo thin hringnunah khawsak thiampui a har ve bawk. Kan duh leh mamawh baka duh tur zawng, mamawh leh tul insiam chawp mihringte kan ni miau a kan la mamawh tam tual tual dawn chu a ni si a.
‘Lalpa, sum ka ngainep a, rangkachak tangka nen’ tia kan inawih tleina ramah hian kan hla sak thangkhawk reh fel hma hauhin kan hlawk dan tur kan chhut hman a, ngainep ber ang zia zanga kan sawt kual velna thakham pawh a reh hma hauhin sum vang bawkin seh ngam khawpin kan thinrim leh a; ‘Lal Isua ka neih phawt chuan ka rethei lo ve’ tiin han inchhamkhum chiam thin mahila han inringtawn tur kan awm tawh lo a nih ber hi.
Thenkhat Pathian hming lam tum leh tawh miah lo ang ziazangin sum kan han um ta dahrual a, zah tak aruangin kan la insawithei dahrawl nen; a vuak let leh dawn lo leka ngalhmul bari then phawk khawpa sum um lah bo lo, sarivaithun chaw zawng ang maiin a che hlek apiang kan bawh tharh tharh a ni ber mai.
Sum hi tuma do hneh rual a ni lo, mahse min bawihtu atana iaiawm tak a ni. Sum leh pai ringawt ngaihtuah a, a aia ropui reng reng hre lote ropuina chu sum a ni a; an mualphona pawh sum a ni. A nunna leh sum a inzawm ang bawkin an thihna leh sum a inzawm bawk.
Sum hi a pawimawh em em a, kan duh anga kan tuak tur pawh a ni. Amaherawhchu kan zahawmna leh nunna hralhna atan chuan a pamhmai ve bawk a ni. Sum thuneihna piaha la chawl tur kan ni si a.
August 9th, 2011 at 7:30 pm
Sum hi a pawimawh first a ni e….
Tangka sum ngainat hi sual tinreng bul a ni si a.. “
August 9th, 2011 at 7:35 pm
He khawvelah hian sum tel lo chuan a awm theih loh anih hi.
Sum duh lo hi an awm ka ring nek toh lo ve a.
Sum is tangka its can buy anythings.
August 9th, 2011 at 7:35 pm
(Y) last para khi ka (*) (*) (*) (Y) (Y)
August 9th, 2011 at 7:39 pm
Sum kan duh a nih pawhin taima tak leh rinawm takin thawhchhuah tum ila, tichuan Sum bawihah kan tang lovang.
August 9th, 2011 at 7:52 pm
Rim taka kan thawh chhuah hi chu mamawh lei nan bak hman a har khawp mai. Kan thianpa chuan ‘TANGKA’ a ti deuh kher thin a, a hlut hmel bik riau in ka hre thin.
August 9th, 2011 at 7:59 pm
I post tha lutuk e.. Chhiar a man hla hle mai! Kei pawh hei hi tunlai chu ka ngaihtuah nasa thin khawp mai.. Hlimna leh thlamuanna hi chu SUM ni lovin Pathian chauhin min pe thei a lo ni. (Y)
August 9th, 2011 at 8:03 pm
sum to sum. Nitin kan eikhawpin chaw min pe ang che kan ti a, nikhat ei lek tak tak nen hi chuan phanawm ve thin em a lawm le.
August 9th, 2011 at 8:03 pm
Pu Vakul chu, i han tih that duh tak tak chuan, ka rin ang rengin i lo ril e. Sikul zirlaibu a telhah pawh ka sit lo. A tawp kharna a tha bawk. Mahse, Sum chung changah chuan pawm dan nghet tak ka nei a, chu chu chu ka nun ka kaihhruai tir tlat bawk a ni. Chu chu hei hi a ni; ” Money is the best Servant; but, the worst Master”. Tih leh, “Money can Leads you to everywhere, except heaven” tih hi.
August 9th, 2011 at 8:06 pm
sum lam poh ni in ka selo.. Pumpuarna hi nilom ni pawimawh ber!
August 9th, 2011 at 8:08 pm
#7 Ozima a dik thui a sin.
PK, keini ve zawng kan ti ve mai mai a ni. I comment-ah ka lawm tawk.
Sum hi ngaihtuah chian a tul khawp chuan ka hre thin. Rilruah hian principle nghet tak kan vawn a tul ka ti thin.
August 9th, 2011 at 8:18 pm
Ka tlangval lai- tha leh fel nia inhriat lai leh huaisen vanglai kha chuan Pathian rawngbawltu sum leh hmeichhia ngaina em em tute hi ka ti thei hlek lo nia mawle! Hmeichhia hmuh apianga ZA ZAWR rawngbawltute hi ka pawm lo hle. Mahse tunah chuan ka ZIA ta!
Tha khawp mai! Sawi tam tur ka hre lem lo; keimahah hian a tla na lo.
August 9th, 2011 at 8:25 pm
Vakul nge nge, ngaihnawm lehpek mange! (Y)
August 9th, 2011 at 8:29 pm
Pu Vakul chu va ziak tha teh reng em (Y)
August 9th, 2011 at 8:55 pm
Ka ngaihtuahna a awm ve fo, mumal taka ka sawi chhuah thiam si loh i rawn chhep chhuak a, ka lawm hle mai. (Y)
#8 pkfanai comment khi a tha ka ti bawk e.
August 9th, 2011 at 8:58 pm
Thra hle mai.
August 9th, 2011 at 9:14 pm
SUM….a mawi a ni…
Ziak chhiar a nuan dap dap hle mai….a tel lovin kan nung thei lova, amaherawhchu…nei lo mahila kan thla a phang tur a ni lo..Lal Isua kan nei si a..
August 9th, 2011 at 9:30 pm
Sawi ngaihnawm thiam hle mai.
August 9th, 2011 at 9:38 pm
A nalh thawn thawn lutuk 😀 (Y)
August 9th, 2011 at 9:45 pm
sum hi zawng a pawimawh a nia..OT lawk,MI te hi a hnai leh tawh lo a maw ni le,Aizawla awm ve lai hian 🙂
August 9th, 2011 at 10:14 pm
bk, ka hriat che ka va ring em!
August 9th, 2011 at 10:36 pm
Sum to sum.. hei tluka mihring min ti a thei hi a tam lo viau ang. Good post (Y)
August 9th, 2011 at 11:48 pm
A ngaihnawm leh hle mai. Sum hi a lakluh dan thiam a ngai a, a hman dan thiam a ngai bawk niin ka hre hnuhnawh. Khawvelah hi chuan sum hian thil a lo tithei ber chu anih hi.
August 10th, 2011 at 12:27 am
Sum leh motor neih loh vanga ke a kal ai chuan, sum leh motor pawh nei reng ke a han kal nen chuan a in ang love an tih chu. 😛
August 10th, 2011 at 1:26 am
Rs.98 GPRS hmangin ka rawn misual ve a ni e. Sum hi a pawimawh a nih hi.
August 10th, 2011 at 6:24 am
ava`n mai em.. (Y) chhiar anuam bawk si…
August 10th, 2011 at 7:19 am
Financial markets a sawi dual dual laia sum pawimawh zia (a chhe lam pawn tha lam pawn) lo sawi chu a inhmeh kher mai.
August 10th, 2011 at 9:25 am
Hmanah chuan Pu Francis Bacon-a khan “Knowledge is power”a lo ti a,tunah chuan la dam se,money is power a tih ka ring.SUM hi khap ang u ti ila,mi a ka ni mai awm si a,sum tel lo chuan ka khawsa thei bik lo,ka zawhte chu a khawsa thei.
August 10th, 2011 at 9:37 am
Sum tel lovin ka khawsa thei lova,ka zawhte erawh chu a khawsa thei.Sum tam tak ai chuan hmingthat ka duh zawk.Sum tam tak neih a,hmingthat phei chu ka ka duh lehzual.A last para khi a pawimawh ka ti.
August 10th, 2011 at 9:56 am
Vakul… (Y)
August 10th, 2011 at 10:05 am
#19 @van damme… MI ila a ni mai alawm… 🙂
August 10th, 2011 at 5:44 pm
hre awm taka ka awm ka la hriat loh-ka junior vang nge ka benghawn loh vang zep lohah chuan ‘MI’hi a awmzia ka la hre miah lo….lei chhuah.
Abbreviation nge acronym? nge enge? tel ve erawh ka chak viau.