mi(sual).com

Lapa khua hi, Nepal hmar lam, Dhading District a awm a ni a. A mi cheng te hi Nepali hnam chi khat (ethnic group)Tamang ti a koh te an ni. An hnam hian tawng hranpa an nei a, Nepali lam aiin, Tibetan lam a pawl zawk a.Mizo tawng leh Tibetan inhnaih ai mahin, Tamang nen hian tawng thu hlaah inhnaihna kan nei a.

Tibetan ang thovin, kan tawng (vocabulary) thenkhat in ang ala awm ve nual bawk. Hemi Lapa khua Tamang tamtakte hi chuan mahni hnam tawng (Tamang) an hman uar bakah upa lam te hi chuan Nepali tawng hi an thiam meuh lo. Mizo ang deuh thovin, midang te pawh awm ve tho mahse, an mahni hnam pahnih/pathum awmnaah chuan, an hnam tawng hman an ching ve hle.

Tamang nu, uluk taka inchei:

An khua hi a pilril bakah a thingtlang hle a, tlangsang thengthaw leh hmun nuam tak a ni a, Thlasikah te chuan vur in a khuh ve hial thin a vangin April thla pawh hian ala vawt var var hle. An rethei hle a, buh leh bal lamah an harsa ve hle. In duhsakna atan chaw te chu an han chhum ve tak na-in, an chhum hmin ruallo a, ei a harsa hle, bal leh kodo hi chaw-ah an ei ber a. Kodo hi chu chaw ang in an chhum ve mai a, a tui ve phian tho. Mahse bal hi an uar mah mah a, “Chaw ei tawh ang u hmiang” an han tih ve pawh hian, chhuatah puan an phah a, Bal chhum hmin la khu vut vut hi an rawn bun a, hnah themah chi uk-khek khawk (sakawr chi kan tih thin ang deuh) an rawn chhawp tel a, Bal kha kheh a, chi nen a ei mawlh mawlh mai tur. A tui ve khawp tho mai.

Lapa khua

Hlapa kan luh zan atang hian, rawngbawlna kan tan ta a. An khua ah hian in pakhat, thil tihkhawmna atana an hman thin a awm a, chu chu inkhawmnan kan hmang ve mai a. Thingtlang mi, lonei mite an nih fur hlawm avangin, zan lam inkhawm pawh, an rawn thlenkim a, an han tan meuh chuan, dar 9:30 (p.m) alo ri tawh a. Buddhist khua mahnise, khawtlang huap a, in tihhlimna leh han pun khawmna tur program a khat ve thin em a vangin, inkhawmna pawh an khat tha thap thap hle. Pa tling /nutling thankin chin chuan Pathian thuchah an ngaithla ngun hle, hawklak leh, buaina siam tum an awm hauh lo. Inkhawm kan han ban meuh chuan – duhthawh a na bawk nen, dar 1:00 (a..m) alo ri der tawh mai a.

Inkhawm ban hnu chuan, kan thlenna in ah kan han haw thla ta a…kan chauh deuh tawh avangin, mut pawh a chhuak ta raih mai. Thing in rawih ve tawh tak, chhawngah min luh chhohpui a, an step ve lah chu, thing mum pakhat tlema rah bi reh ve deuh a ni a, fit deuh tan lo chuan, chhuk chhoh fo a huphurh awm ve hle. Sleeping bag ka keng hlauh a, a jeeper ka hawng a, ka inthawlh mai a. Pokhara atanga ka hruai ve, kan nau, Phurbu chu mut-bu a ken ve loh avangin, kan thlenin pa chuan, thimthamah rizai pakhat a rawn pe a, electricte a awm ve loh avangin, saidawi-um- bati, pawnchhe phiarmum, phi-taa an hman, khawnvar -tui hmanga chhit alh chi kha an hmang ber a, an chhem hlum tawh kha chuan a thim a ni mai.

A vawt deuh bawk nen, Phurbu chu rizai sin chuan a han mu deuh vang vang a, a phu ta zawk zawk mai a, a in hiat sawt sawt reng bawk a. A tawpah chuan ‘hui – ha’ tih pah in, a rizai sin lai chu a tlawh hlim ta dawrh mai a. “Engatinge” ka han tih chuan, ‘Hrik a tam lutuk’ ti ngawt in a chhang a. Tichuan, a vawh bawk si avangin, sleeping bag chu ka hawng tlang a, “lokal mai rawh” tiin, sleeping bag chu blanket ang a ti pharh-in, ka zawn ta ngawt a. Chutia ka Sleeping bag chhunga a rawn inthawlh hnu chuan, eng emaw hian kei pawh chu min zar min zar ve ta mai a, kan chau bawk nen mut phei chu an mu ve sek a, mahse kan mutui fahran ta lo hle.

Atuk zing khua alo var meuh chuan, khaw engah Phurbu a rizai tlawh hlim tak kha kan han en chu, ‘hrik-hrah’ anlo khat hi a ni ringawt, Phurbu chuan, rizai chu a tel khawm a, bang kilkarah chuan a va dah tha ta ngawt a, sleeping bagah pawh chuan tlem alo kai hman a, an theih ang tawk chuan an han thian fai a, vawt hle mahse kan inbualfai a, kan thawmhnaw hakte kan thianfai a, kan inthlak nghal bawk, kan zia ta deuh. (Pokhara kan thlen hnu-ah an han su fai a, hrik-hrah pahnih chu anla man tho).

Nu pakhatin phir alo hring a, phir hmuh te a khat ta bawk nen, kan va en ve a.

………………………………………………………………………………………………………………..

Thalai deuh ho leh pa thenkhat Bible Study darkar hnih an han neihpui leh hnu-in, chaw an ei a, a nawlpui chu lo lamah an feh bo leh ta duak a. A hma zan ang bawkin zan dar 9:30 bawrah anlo kal kim leh a, ngun taka Pathianthu an ngaihthlak leh hnu-in zung dar 1:00 a.m velah an bang leh a. Mahse, an thinlung ah Pathian in hna a thawk zel a. Lal Isua Lal leh chhandamtu a pawm, baptisma chang tur a hming pe 97 lai an lo tling chho ta a.

Baptisma chan ni tur atan Inrin-ni 8th. April, 2000 kan ruat fel ta a. Buddhist lam hoten an lo hre ve kar a. April ni 8^th. tak hian School ah programme siam a, High School naupang nula leh tlangval – baptisma changlo tur a dan beh na kawng anlo zawng ve bawk nge ni?

Chhunlam inkhawmna

Inrin ni, April ni 8, 2000 alo in her chhuak ta a, kan inkhawmna thin In ah inkhawmna kan nei leh phawt a, Baptisma awmzia/Chhandamna chungchang kan zir ho leh te te a. Tichuan lui lam kan pan ta dul dul mai a. Nepali Kristian hla, Dhanyabad Isu (Isu, Ka lawm e) tih hla lui panna kawngah chuan an sa thup thup mai a. Baptisma chu, tlang atang a tui lo luang thla, malpui thleng vel a tui tling vawt raih mai ah chuan kan inchantir ta a ni.

Mi 107 in Baptisma an chang.

School lamah Buddhist hovin program anlo siam bawk nen, baptisma chang tur hming pe te zingah khan mi 90 pawh anlo kal theih kan ring lo na a, Baptisma program kan han tan ta a, pakhat in a chang tura apiang te hming leh Pa hming alo ziaklut zel a. Tui a vawt bawk a, din rei a ngai nen, a tawp lamah chuan ka khur hle tawh mai. Petera ten mi 2000 an baptis chhung rei tur zia min ngaihtuah tir hial a. Pathian kgawngaihna azarah Baptisma an chan zawh vek meuh chuan, baptisma chang zawng chu, mi 107 lai mai anlo tling der mai a ni. High School naupang Baptisma chang hman ta lo pawh an awm nual a, hun leh atan kan khek ta a.

Ka in hruhul a, ka inhak lum bakah shawl an rawn sintir a, ka vawt tih zualpui chu a reh ta deuh a. Tichuan, Inkhawmna hmun lam ah chhuk thla leh in, Kalhlen Beram No (Juda Calendera, Abib ni 14 tlai a, talh a nih a, a thisen Aigupt Saltang, Israela faten kawngkhar biang a an tah avang a, thihna kut vawt in, (Beram No thisen awm na) kalkan (Passover) a, Aigupta fa u ber a hmeh hlum hmiah hmiah chung chang thu… a tan in, Kha Beram No kha Kan Lalpa Isua Krista Pathian Beram No (Jn.1: 29, 1Co. 5:7, 1 Pe 1: 19, Re 5:6; 6:1 etc.) hlimthla a nih zia leh, an tu leh fa te’n kha Aigupta Sal ata Pathian kut ngeiin a chhanchhuah zia, an theihnghilh mai lohnan – kum tin kalhlen kut hmang thin tur a, Chungnungber Pathianin thu a pek (Exo. 12: 14, 26-27, Lev. 23: 5 etc.) zui tak zia te. A tak, Pathian Beram No a lo lan hma loh chu, kum tin Kalhlen kut an hman tak ziah chung chang te – an ngaithla ngun hle mai.

Tichuan Pathian Beram No diktak a lo lang ta a. Kalhlen kut hmang turin, Abib ni 13 tlaiah Jerusalem an lut a, ni a tla (Sunset) a, Abib ni 14 a lo intan zui ta, (Pathian in ni chhiar dan a lo pek – tlai lam atang a, a tuk tlai thleng ni 1 -Lev. 23:32) Zanriah hnuhnung an kil a, engkim peihfel a ni ta, Beram No talh hun (Kei ni tan a, a tuk tlai chu, talh a a awm hun tur a lo ni mai tawh si a. Tichuan, ….“ Chhang a la a, lawmthu a sawi zawhin a phel a, an hnen ah a pe a, ‘Hei hi ka taksa, in ai a pek tura chu a ni; mi hriat reng nan hei hi ti thin rawh,’ a ti a.(Lk. 22:19) “Tin, zanriah ei zawh in, chutiang bawkin no chu a la a, ‘In za in, in rawh u; hei hi ka thisen, sualte ngaihdam nan mi tamtak tana chhuak tur, thuthlunna chu a ni…..’” (Matt: 26: 28).

Tichuan, a tuk, Kalhlen kut Beram an talh huntakah chuan ..Pathian Beram No tak tak zawk chu talh in a awm ta a ni. Tichuan Kut sa leh chhang dawidim telh loh an ei thin chu, Kan Lalpa chuan a ei ve hman ta lo, a ai ah talh in a awm ta.(1 Co. 5: 6-8). A ma taksa leh thisen chu kan tan a pe ta zawk a ni. Kan tana, a taksa leh thisen, a pek chu a mah ringtu (Baptisma chang tawh) te chuan Amah hriat reng nan kan ti thin ta a nih hi. Aigupta atang a Israelte chhanchhuah a, an awmna leh Pathian thin ur na lak a humhim a an awm theihnan, Pathian in kawng a siam sak ang bawk in, keini pawh Setan a kut atang a kan chhuahna tur leh Pathian thinur na lak ata kan him theihnan Lalpa Pathian chuan kawng min hawn sak ta in , “thu A rawn thlung thar ” ta a ni. Chu mi ringtu leh changtu te chuan Amah hriat reng nan a, ti thin tur a min duh ang in……tiin, a tumkhatna leh hmasa ber atan, Lalpa zanriah kan kil ho ta a.

Kan han peih fel meuh chuan khua pawh a thim hnai ta, khual-khua (Lapa chheh vel) atang a lokal te pawh haw hmanlo an awm ta nual. Chaw ei turin an tindarh ta rih a, zan inkhawm kan nei leh a, Drama leh lam te an entir ve a. An mahni anlo in enkawl theihnan upa (temporary atan) mi pasarih leh deacon pakhat kan ruat fel a. Tichuan, upa te mawphurhna tlangpui leh rawngbawlna awmzia te hmangin thuchah sawina kan nei leh a. Inkhawm han ban dawn meuh chuan damlo, nu tling/patling, a tar a zur, thalai etc. tawngtai tur an rawn intlar hnem hle, kan han tawngtaisak leh zung zung a. Tichuan, in khawm dar 11:30 velah bangin, kan tin darh ta. A tuk zingah dar 6:30 – 8:30 inkar ah hruaitu thar puala thuchah sawina inkhawm kan nei leh a, Pathian hnena hlanna neiin hun kan ti tawp ta a.

Kan thlen ni atanga kan haw leh thleng hian Pathian awmpuina kan chang a, Buddhist hovin an harsatna an rawn siam kan lo hlauhthawn ruk deuh pawh, thawm ri va engmah an nei ta lo. An puithiam kawnga kan tawh te pawh that akin kan inbia a. Kan kal hma a min sawithaih ang em kha engmah a thleng ta lo a ni.

Tichuan, chaw (bal) te eikhamin, April ni 9^th.ah, dar 10 rik hma deuh in Pokhara lam pan in an chhuak ta a, an khaw kawtchhuah thlengin mi thenkhat in min rawn thlah ve a, Bal fun (chaw fun ang deuh) min hawn tir bakah, tlangval pakhat leh nupa tuak khat in Pokhara thleng min zui haw a. April ni 11 ah damtakin Lalpa’n Pokhara min hruai thleng leh ta a ni.

Lapa khuaa damlo kan tawngtaite Pathianin tamtak alo ti dam a, Pathian tihdamna beisei a, Pokhara thlenga min rawn pan zui an awm nual bawk.

Thlahnih hnu-ah a ral hnu-ah, thalai thenkhat leh kohhran hruaitu ruat thar bakah khaw hran atangin mi 2, an vaiin mi 17 Pokhara ah lo pheiin Discipleship training ni 25 chhung kan pek a, damteiin, an khua Lapa a pathian rawngbawl turin leh an khawchhehvela chanchin tha hril zel turin an haw phei leh ta a ni.

Lalpa fakin awm rawh se.

Bonus Pics

This entry was posted on Sunday, August 21st, 2011 at 10:30 pm and is filed under Religion, Travel. Both comments and pings are currently closed.