mi(sual).com

Dâwt a sawi leh khawp ang. A mawlzia a lang leh dawn e.
Buckingham Palace a septic tank khur zawng zawng khu ama laih vek a ni a, Taj Mahal an sak laia a lungphum phum tu leh Star cement nge tha ang a Valley strong tia buai ve êm êm thin, thawhhlawk tak a nih leh nih loh chu tuman an hre lo.

Kar hnih zet thanga a zin hnu in, tunkar Nilaithawhtan ni lo Ningani ah a lo thleng leh a. Vawiin-ni ni lo vawiin khan Eirukna a ruite enkawlna atana an sak, cheng vaibelchhe sawm senna tura cheng vaibelchhe hnih chauh seng a an sak zawh tak chu hawngin heti hian thu a sawi-

“A thei leh duh chuan ei mai mai rawh se, nakinah rorel saktu in ro a la rel sak dawn a. A hremna chu a hmu em em ang. Aikal la thei kan awm pawhin, la rawh se a tha vek” a ti.

A sawi zel naah chuan, ” Khawvel a changkang tawh a, eirukna chu changkanna pakhat ve mai a ni” a ti hmiah. Tunlaia Cancer a thi kan tam êm êm mai chu mak a ti hle a, cancer leh AIDS heti taka kan buaipui ta hi Pathian hremna ah a ngaihthu a sawi bawk.

Lalruotmawi reh a ti hle a, Buonglienkung a ngaih thu a sawi tel zauh bawk. Ruotmawi lar vanglai khan, kum 18 tling awrh pawhin nupui an han nei a fa pakhat an nei dek dek a, “Keini pa ho chuan Ruotmawi kan ngaisang” an ti leh ringawt zel chu a nuih ti za tu awmchhun a ni.

Zaithiamah chuan Celine Dion leh Rebecca Saimawii in ang a ti hle a, Mafa-a leh Stephen Auhmun in ang a ti bawk a. Footballer-ah chuan Gervinho leh Bacary Sagna hi unau an nih duh hmel a ti.

Thu leh hla lam ah sulhnu a ngah vak lem lova, a hlaphuah a chhuan ve êm êm chu-
“Bhawan hnuaiah buh lem ka thap chiam a, aw ring mai rawh,kan la sawrkar leh dawn” tih hi a ni pawh kan ti miah lo.

Mizoram in eng nge kan mamawh ber ni a i hriat? tia zawhna chu,”Kan mawmawhte” tiin a chhang ringawt a. Zawhbelhna chhangin,”Eng nge kan mamawh te chu?” tia zawhna chu,”Use your brain” a ti al hmuk.

He mihring rothap tak hi “Association Tam Tawh Lutuk Hua Association” an tih mai ATTLHA President a ni a. Bin Laden khan fianrial a hmanna a khati taka beih a tawk kha an dem hle a, President Obama chu a chhungte hnenah zangna dawmna pe turin an phut tlat tih an thuchhuah ah an tarlang bawk a. A nupui fanau te refugee camp atanga la let leh ngei turin an phut tlat tih an sawi kan ti lo.

Kan kawmchhak nu hian Vai pasalah a nei a, kan kawmthlang nu hian Chakma pasal ah a nei bawk a. Hnamdang nei tiin an sawi duh hle a, kan kawmthlang thlang leh a mi chuan Sap pasalah a nei ve thung a, hnamdang nei an ti duh miah lo an ti a ti.
A zing tho a pawr ve thei hle tih mit ngeia hmu tu an awm. Hmaiphiha han in nawt fai hmasa ve phawt tura ngaih a nih laia, thingpui in pup pup chi, phun leh bul bul thin mihring a ni bawk.

Mite sawichhiat leh puhchhiat a tawh tam tawh em avangin a ngai neih tawh a, fuihna ah a ngai tawh zawk. Veng chhunga PHE ten tui an sem that lova an nuar a nih pawhin, a bul tum tu ah an la puh tho va. Current a awm that loh leh veng in ên chhawk a awm chang pawhin, electric stove a hman ruk avangah an ngai thlarawk fo erawh kan hriatpui miah lo.
Ruihhlo do tih vel chu a sawi peih der vel hle a. Mahse, ataka bawhzui chu a chhungkhat laina hnai te tan a pawi dawn avangin sawi kur ve hluai chiah a tih tur a ni a. An check dawn a nih ngat phei chuan a lo hrilh lawk diam tur a ni tih hi kan rinthu mai mai a ni pawh kan ti chuang lo.

Emo ngaisang êm êm a nih kan hria a. Facebook-ah pawh Emo group hi a siam. Nupui pasal nei lai rengte ngaizawng tlat ching, a dawtsawi thup nâna thihsak ngam reng, khawngaih a hlawh theih nân a zawldawh thiam chungchuang a ni.

Melh loh lama bawh chut ching mi a nih kan hre chiang khawp. Independence day August ni 20 a hman tum tlat mi a ni a. Republic Day hi MHIP din champha a ngai tlat leh proxyvon hi vawk kah rai na a ngai tlat a nih erawh hria an awm lo.
Zun leh ek thlahdah ve tak vantlang zun in a e ching tlat mi a ni kher kher hi a ngeiawmna a ni. Bawlhhlawh paih phal lohna a paih lui tlat thin mi a nihna hian a luhlul zia a entir em tih erawh kan hre si se lo. Chhuk zawnga tlu ngai miah lo, chho zawnga tlu leh chut ching, chapo ve hle si mihring laktlak loh tawpkhawk a ni. Puitlin leh insiamthat reng reng tum lo hian sawngnawi takin mual a liam ang tih erawh kan hlau hlel love kan ti ta ringawt.

He mihring hi Detective Denga a ni kan ti lova, Angel in Man pawh kan ti chuang hauh lo. Engmah ni lem si lova chapo ve ar si, sawisel tur leh hnathawk peih si lova awm mai mai- LALNUNBUAI an tih kha a ni e.

This entry was posted on Friday, August 26th, 2011 at 1:00 pm and is filed under More than words. Both comments and pings are currently closed.