mi(sual).com

A kum leh pumrua in a phu ve tawh miau avangin mi-pangai ( normal )nihna ah ngaiin membership fee chu a pe ve a, kalkhawm/programme ah  regular takin la dingchhuak  ve ngamlo mahse a phaktawkin a chik ve a, inlungrual taka zaiho leh inkawmkhawm chu ala tawn ngailoh thil a nih avangin nuam a tiin a nun pawh a harh sawng sawng thin.

Theihtawp chhuah a chhunzawm zel  a chak a, midang tanpuina hlu tak tak a dawn chu malsawmnaah chantirin mahni aia chaklote tanpui theitu nih ve ngei a tum tlat bawk thin.

Hun a kal a, reilote hnuah chuan thil inthup leh inmung chu hai rual lohin alo langchhuak ta. Rilru chhungril taka duhsak thintute leh thiantha tak tak ni ngeia a ngaihte khan anlo duhsak tak tak lova, an hmusit satliah mai pawh nilovin kawrah hmangin  midang laka tlaktlumnan chauh anlo be tha ve satliah mai mai si.

An kianga michaklo leh harsa zawkte’n  hrehawm an tawrh lai ngeia mahni hmasial taka nun hman chu a tan chuan thil namailo tak a ni a, a ngaihtuah phak bak hlirin hmun a chang zo ta.

Thlakhat awrh chuah liam ta a ngilnei leh rinawm em em ni a langte khan  an kianga  tlawmngaihna leh dikna an tlanchhiatsan lai mit ngeia a hmuh ve tak miau avangin lemchanthiam, vervek leh mumal neilo bula khawsak chu a duh bik ta hauh silo. A inhmang tlem tial tial a, a nun chhungril leh nihna diktak hrechiang silova demna leh sawichhiat a tawrh chu a pung zel bawk a, tunah chuan mi zawng zawngin an dem rawn ta hial a ni.

A famkimlohna leh tlinlohnate chu thupsak a hnekin Biak In kawngkhar kiangah an thailang kuau a, a nun chhungril leh mizia diktak chu hriatchian hlau ni awm takin an melh hrek hrek bawk a, a tan chuan khawvel a thim takzet a ni. Kum tam a liam hmaa a nun hrechiangtu, midik leh rinawm  a tawnglo a nih ngat chuan mi zawng zawngin an dem ang a, tlawmngaihna neilo hulhualah ngaiin misual leh vervek hmuhin an hmu ngei bawk ang . Mahse chu chu a nihna a ni hauh silo. Chu a hnekin a mah an hmuhchhiatna zawng zawng chu an ngaihsan em em an hruaitute leh anmahni nihna diktak chu a ni zawk si .

Mi pakhat testimony sawi ka la hriat reng chu, lehkhazirin hmundangah a awm a, chu hmuna mizo awm vete chuan Inkhawmna hmun hran neiin hun an hmang ve thin a. Mahse chu hmun, mizo inkhawmna hmun chu zawm duh lovin an kianga hnamdang inkhawmnaah chuan a inkhawm ziah thung.  A chhan chu, a nunkawng tana tha zawk tur niin a ring tlat a ni. Demna leh sawichhiatna a tuar dawn tih pawh a hresa a, mahse engkim a huam thung. Pathian rawn chunga a zirlai a beih hram hramna chuan result tha tak a pe a, an class ah pawh a titha pawl tak a ni ve reng thin.

Chutianga mifel leh taima ni a lang chu engvanginnge mahni hnampuite inkhawmna a inkhawm ve mai lova a inlakhran kual vel ni ? A chapo vang leh sual vangin a hnampuite a hmisit em ni ? A nun chhungril leh mize diktak hrechianglotute tan chuan a demawm thlawt ang a, mahse a hrechiangtute tan erawh chuan a demawm miahlo thung thei a ni .

Kawngkhat atang chauha thlir chuan khawvelah hian lungawina tur a awm thlawt lova, mahni hmasialna hlir niin a khat a ni. Kawnglehlam atang erawh chuan hmasawnna leh changkanna hlirin a khat thung si. Tichuan, hmuhdan leh duhdan inanlohna chuan buaina a rawn pianchhuahtir ta a, mifel leh nungchang tha tak tak nithei turte pawh vervekna leh itsikna hmanga beih an nih takah chuan an tlahniam rawih rawih thin a ni .

Mi tamtak piansualna thlentu ber pakhat chu, zahzumna leh mahni insitna hi niin mithiamte chuan an sawi a, a dikna chin chu a awm ngei ang. Tunah chuan khawi hmunah pawh kal ila, mizo awmkhawm let let tawhna hmunah chuan thu tlinglo sawi neuh neuh te, midangte tihsual leh tihdikloh hre thei em em te, inhek kual renga hun hmanna hmun hi a tam a ni. Chutiang karah chuan mahni insitna ngah leh zakzum deuhte tan chuan a hrehawm mai thin a, an nun a chhiat phah hial thin niin a lang.

Inkhawm taima deuhte’n inkhawm tlem deuhte an vei a, inkhawm tlem deuhte’n  mahni inngaipawimawh em em , mi chaklo zawkte laka chapo hlur leh midang thik/er ran chunga inkhawm thinte pianthar hun an nghakhlel ve em em thung .

Mahse, chutianga an invei em em chhan erawh chu thil tha an duh vang chu a ni hauh silo.  Inkhawm taima em em khan inkhawm ngailo kha midang laka mark score nan a sawichhuak chhen a, inkhawm ngailo thung erawh chuan chutiang mitlinglote chu ralkhat atangin thathnemngai takin a lo runluih ve thung thin. Tichuan, an chhungril nun an inhriatchian sak tawh miau avangin khawsak tlan ngaihna a awm talo a ni.

Veng chhung Group/ Association a inhmang lutuk lemlo tam takte hi chu an duh vang renga inhmanglo pawh anni kherlo thei a, an dinhmun hriatthiampuitu leh  ngaihsaktu tha an hmuhloh vang te, mirethei leh chaklo zawkte hnuaichhiahna hmun ni a an hriat a vangte’n hrehawm tuar chungin an inhmang duhlo/ngamlo pawh a ni thei bawk a ni. Chuvangin, khawtlanga inhmang ve lemlo tamtak te hi chu dem ngawt theih anni biklo thin. Chutiang bawkin hruaitu leh chanvo pawimawh chelh mifel leh tha tak tak karah pawh phu reng vang leh tlawmngaihna ngah vang ni lova, politics diklo leh vervekna kara dingchhuak an awm ve thei tho bawk a ni.

Engpawhnise, mimal nun leh rilru chhungril chhut chiang hmasa lova Group/Association luhchilh ve lem lote misual leh diklo hulhual ang a an langchhuak ta thin a nihin emaw, midangte nena inkarzau lutuk  anga an lang a nih chuan, chu hmuna  hruaitute chu an rilru chhungril nihna leh mizia diktak a langchiang ta hle tihna a ni thei a, zui tlakloh leh hnaih tlakloh anni hial zawk tihna a ni thei .

Zui duhlova kalhrang ngamte chu tlemte pawh nise mi-fakawm leh thurualpui tlak anni daih zawk thei a ni. Mimal nundan zirchiang duh hauh silova, a tam zawk duhdan leh ngaihdan pawm thiam hram hram tura inzirtirna hian dawihzepna min pe a, muang changin rinawmlohna leh mahni hmasialna-ah min hruailut a, dikna leh rinawmna tlansanin min hnuk hniam tial tial thin niin a lang.

Hruaitu tha, zui tlak leh rinawm chuan a hnuaia mite tlinlohna leh diklohna a thupmawi sak hram hram a, inngaihthiamtawnna pawimawhzia a hre chiang a, mi te ber leh lian ber thlengin intluktlang thei ang bera lanchhuahtir a tum hram hram thin a, a hnuaiah tumah an mualpho ngailo a ni . Chutiang inkaihhruaina hnuaiah chuan misual ber paw’n chanvo leh zahawmna an nei a, mirethei leh chaklo zawkte pawhin ngaihsak leh ngaihpawimawh an hlawh thin. Amaherawhchu, suamhmang te, tualthah ching te, hek hmangte leh uire te tan erawh a bika siam hmun a nei a, chutah chuan a khungkhawm mai thin a ni .

(PS : Group/Association sawihnawmna leh mimal nun sawi chhiatna lam a nilo ,tih ka sawilang nise, ngaihkawih palh takin. Midang nun diklo leh sualna hailang/khaikhin thei turin khawvel mihring zingah fel famkim pakhat pawh kan awm si lova. )

This entry was posted on Sunday, September 4th, 2011 at 5:00 pm and is filed under Luangliam. Both comments and pings are currently closed.