Nakin deuhvah chuan, mi zawng zawng hriat an lo ni ta a, anmahni pawhin inthup reng theih niin an hre ta lo va, Tichuan, mihring zingah pawh an cheng ta lo va, an vak chhuak a, khawtin maiah an hrang ta a, an hlau em em mai a, Pasaltha pawh an pasaltha hlei thei lo va, feh te hi an kham thiap thuap fo mai a ni.
Hlawndawhthanga chuan, a unaute chu fimkhur turin a hrilh fo va; tin, amah tak hi chu a unaute angin a hrang nasa ve mang lo reng bawk a. Ran an seh zin luattuk te hian, a unaute chu a zilh thin a; mahse, an sawt chuang lo va, an nghal em em mai a. Rei vak lovah chuan Laicherhnawma leh Zahrama te chu Pasalthain an kap hlum ta mai a; tichuan, Hlawndawhthanga chauh chu a awm ta a, chuta chinah erawh chuan, Hlawndawhthanga pawh chu a hrangin a kawlh ve ta hle mai a ni.
Khaw pakhatah hian nula tleirawl te hi a awm a, nuhrawn sual tak mai hi a hrawn a. Chu khua chu Hlawndawhthanga hlauvin feh an kham thup mai a; mahse, kha nula tleirawlte kha chu a nuhrawnin thing phur turin a tirlui tlat mai a; a hnial ngam si lova, a chhuak ta a.
Thing phur takngial pawhin tumah dang an chhuak ngam lova. Khua atanga hla em em lo, lungdawh awmna a va thlen chuan, tlangval hmeltha tak mai pakhat a va hmu ta a, amah chu chak awm leh lian tawk tak a ni a, lungdawhah chuan a lo thu a ni. Tlangval chuan nula tleirawl chu hmeltha a ti hle mai a, a lo bia a, “Hei engtizia nge, in khuaa mi tumah pawh an vak chhuak na nge? Mitthi an awm em ni?” a lo ti a.
Nula tleirawl chuan, “Hlawndawhthanga a hrang a, tumah chhuak ngam an awm lo a ni,” a ti a. “Engtizia nge nang I lo chhuah ngam si, I hlau ve na nge?” a ti a. Nula chuan, “Hlau ve teh lul mai, mahse, ka nuhrawnin min tir lui tlat a, ka hnial thei si lo va; ka lo kal mai a ni,” a ti a. Tlangval chuan, “A nih tak chu, kal rawh keima’n ka zui ang che, hlau reng reng suh,” a ti a, thing chu an fawm dun ta a.
Tin, thing an fawm zawh chuan tlangval chuan, “Tikhan haw ta vang vang la, heti lai atang hian ka lo en zui zel ang che. Khilai tlang I thlen hma khian chuan lo lehhawi hauh suh la, tlang atang erawh khian chuan min han en leh ang che. I thing phurh kha chu sumhmuna keuh lovin tual laiah keuh la, I nuhrawnin tlaia seng tura atirh che pawhin seng duh hlek suh ang che,” a ti tlat a.
Nula chu lawm takin a haw ta a, tlang chu a han thleng ta a, dai bul lawk a ni tawh a; tah chuan a han hawi kir ta a, Hlawndawhthanga kha Sakei lian em em maiah a lo chang tawh a, chumi a zuk hmu chu a hlau nasa khawp a, a tlan haw ta a ni. In a thlen chuan a thing phurh chu tualah ngei chuan a keuh ta a.
Khua a lo tlai a, a thim thut thut tawh a, tuala thing kha seng loh a la ni ta a. A nuhrawn chuan thinur takin thing seng turin nula kha a han tir a. Mahse, Hlawndawhthanga hrilh lawk ang ngeiin a hnial ta tlat a, Chuvang chuan, amah chuan ang ang chungin a va seng dawn a, a han tikhawm hman chauh va, Hlawndawhthanga chuan a la ta lawp mai a, a seh hlum ta der mai a. Chuta tanga rei vak lovah chuan kha nula kha a lo rai a, fapa a rawn hring a, Hlawndawhthanga thlahte bul chu a lo ni ta a ni.
A thih dan chu ziak tawh lo mai ila, He thawnthu ka han post chhan chu, Post a tlem vang anih piah lamah Hlawndawhthanga hian Thlahtu bul chhuinaah hian hmun pawimawh tak a chang ve tlat mai a. Primary School-ah khan, “ Fanai thlahtu bul Zachhuma unaupa Hlawndawhthanga chu Keimiah a chang” tiin kan zir thin a.
He thawnthu Pu Ps.Dahrawka ziahah hian chuan Hlawndawhthanga Unaute chu Laicherhnawma leh Zahrama niin Keimiah an chang a, chithlah nei hman lova kahhlum anni si a. Fanai thlahtu bul Zachhuma hi Hlawndawhthanga Fapa hi a ni thei mai zawk ang em? Tin, Fanai ho hi, Sakei hual leh aih nikhua hian an tel ve duh ngai lova, Tin, Sakeiin Fanai ho hi a seh ngai lo ti a hriat a ni bawk.
Hlawndawhthanga hi Samsona ang deuhvin a bialnu Tialtangi puihnain a hmelma ten Falpui hmangin an tihlum a ni. Tunlai hian, Fiction movies, abikin super heroes film hoah leh Warewolf film hoah hian hetiang lam rawngkai hi a awm nual mai a, Hlawndawhthanga te unau thawnthu hi thil thleng tak tak a ni ve thei mai ang em? I han sawiho ang u hmiang.
(Y)
September 8th, 2011 at 5:01 pm
Hetianga nihna inthlak theih hi tet lai khan ka dream nasa thei mai mai. A ngaihnawm khawp mai.
Report this comment
September 8th, 2011 at 5:06 pm
Report this comment
September 8th, 2011 at 5:47 pm
hawh u
Report this comment
September 8th, 2011 at 6:01 pm
Tsa post lo nghak teh ang. Thil chiang zawk a hriat theih turah ngai ila.
Report this comment
September 8th, 2011 at 6:02 pm
Post hmasa pawh chhiar hman lo, tuna mi pawh chhiar hman rih lo fo. Inkhawm banah muangmar fan raihin ka la chhiar ang. Pakhatna leh tun ami pahnihna pawh hi. Naupan lai atanga tun thlenga ka thianpa ve ber pawh Lalramenga Fanai a nia.
Report this comment
September 8th, 2011 at 6:04 pm
Fanai inthlahchhawn dan leh an trobul hi lehkha bu pakhat ah ziak in a awma, ka kawl ve ngei a. Remchang hmasa berah commentah hian ziak ka tum ang. Ka lehkha bu tunah ka kiangah a awm mai lova.
Report this comment
September 8th, 2011 at 6:04 pm
A ngaihnawm hle mai
Report this comment
September 8th, 2011 at 6:04 pm
A ngaihnawm mang e aw! Hlawndawhthanga thawnthuah hian phuahchawp leh zeldin thu eng emaw zat chu a awm ngei ang; mahse, amah hi a awm ngei a, Fanai thlahtu lamah pawh mi pawimawh tak a ni tih a chiang. I zawhna zawng zawng khi ka post rawn chhuak turin a rawn chhan ka beisei.
Report this comment
September 8th, 2011 at 6:36 pm
Ka va kham love, part 1 pawh chhiar chhuak dap. A ngaihnawm thlawt e.
Report this comment
September 8th, 2011 at 7:45 pm
Ka hriat tawh mangloh thawnthu ngaihnawm deuh mai min rawn hrilh thar leh a, a lawmawm ka ti hle mai. Zanin chu mut dawnah ka fate’n thawnthu ngaihnawm deuh an ngaithla dawn a nih hi.
I post chhan tak erawh chu ngaihdan ka nei lo hle mai. Tin, keimi hi an awm tak tak ka ring chiah lo e.
Report this comment
September 8th, 2011 at 9:29 pm
A ngaihnawm lunglenthlak hle mai.
Ka ni(aunty) te mikhual Liana kha chu sakei ang maiin a chang thin ngei mai a. Hlo thlawh laklawh lai tak te khan lo lu lamah huk dum dum chunga tlan chhovin khamah te lung a lum nasa thei khawp mai. Tin, Rul leh laiking hlothlawhnaa a hmuh tawh phawt chu an lu-ah a seh chhum hmak hmak zel nia mawle. Rul a nung chunga mana an lei pawh dawh sak te kha a va sam lam tak em. A hnua an hriat leh hnuhnawh danin Kawl Dawithiamin a dawi sual vang a ni awm e. A chet tak tak kha chuan hei chu Keimi ngei a ni tih mai lo chu sawi tur dang a vang khawp.Sakei zia a pawl khawp mai. Keimi hi chu an awm ka ring ta zauh zauh mai.
Report this comment
September 8th, 2011 at 11:01 pm
Post-tupa hi chuan keimi an awm tak tak a rin ka ring miah lo. Keimi thisen kai nih ai chuan Adam thlah nihna lam hi a chian hmel zawkin ka hria. Tak taka kan Pathian Thu nen hian a inrem hleithei tlat lo a ni ber mai. Nebukadnezara kha a chapo avangin Pathianin a hrem a, khua ata an hnawt chhuak a, bawng angin hnim a pet a, van daiin amah chu a tihuh a, a samte chu mupui thla chen chenin a thang sei a, a tinte pawh sava tin ang mai a ni ta a. Hei hi kan Bible-a keimi ang teuh ber kan hmuh theih awmchhun niin ka hria. Kan Mizo thawnthu hi chu phuahchawp leh awihawm loh tak hi an ni hlawm tlangpuiin ka hria, mahse chu chuan kan thawnthu hlutna leh ngaihnawmna a tihnep phah tihna chu a ni chuang awm lo e.
Report this comment
September 8th, 2011 at 11:08 pm
Naga ho pawh khuan keimi thawnthu ang deuh hi an nei ve, anni keimi tih ve chu mihring kha sakeiah chang lovin a zawlin an zawl ve thung…. tun thleng khuan an la awm thung… An zawl sakei kha an lo kah hlum hlauh chuan a zawltu mihring kha chhan awm mang lovin a thi ve nghalmai thin an ti…thil mak ve tak ani… Pathiana piantharna an chan hnuah pawh nasa taka tawngtaina nena an beih hnuah chauh a reh thei an ti… College kan kal velai khan shillongah kan naga thian pa 1 chu a pami ( uncle) in a sakei zawl kha rawn tirin a lehkhazir leh zir loh vel a rawn enthla thin a, a hniak an hmu nual mai… mak ve mai mai khawp mai !
Report this comment
September 8th, 2011 at 11:41 pm
I post tha khawp mai mahse”Fanai ho hi,sakei hual leh aih nikhua hian an tel ve duh ngai love” an tih thrin hi chu ka pawmlo….Vanlaiphai,Darzo leh Lungtian ram a hlaiba kap cherem tute pawh Fanai ho anni kan ti thei ang.Pu.Sakeia larlai hre hman kan awm em?
Report this comment
September 9th, 2011 at 12:06 am
Hlawndawhthanga hi Fanai thlahtu bula chhui niin an sawi ve fo thin. Ka hriat chinah chuan Fanaia hi Thatinkuala fapa pasarih(?) te zinga mi a ni a, a fate zingah hian Zarepa te, Pakhupa te, Nihliapa te…ldt an awm.
#14 Dopawrha leh Tialpari-te fapa Sakeia f/o F. Laltuaia (fam) kha em ni i sawi?
Report this comment
September 9th, 2011 at 12:10 am
Hmanlai Fanai pasaltha hovin Sakei-ah pawh sai ral an tih ang chi Hlaiba an kahhlum chu ka va ring lo em! Pi Darbilhi leh a fate khaw ho hian an kap lul lovang.
Report this comment
September 9th, 2011 at 12:37 am
muante, Fanai thlah te: Pakhup, Airawn, Chhuanchhir, Chengpawl, Khirtin, Nichhing, Nihliap, Zarep, Zakham, Torel, Ruahngai, Thaai, Hniarlawn, Hrangtling, Hniarcheng leh Suakthing. Fanai unau (pianpui) ka hriat chu Cenhrang (Chenhrang tia lam tur).
Kum 1850’s (?) a Fanai lal: ka lehkhabuah a inziak langlo tlat.
https://i51.tinypic.com/22jnky.jpg
Report this comment
September 9th, 2011 at 12:43 am
#17 kawreksawn : 1909 ka tihna, a inziak reng alawm le a. Apology
Report this comment
September 9th, 2011 at 1:01 am
Part 1&2 ngaih nawm hle..hemi thawnthu hi ka lo la hre ngai miah lo..
Report this comment
September 9th, 2011 at 1:50 am
Ngaihnawm hle mai. Part I leh II ka chhiar chhuak, ka kham lo..
Tangkhul (Naga hnam) ho pawh hian tun thlengin werewolf ang deuh hi sawi tur an la nei mawle. Ka classmate thin Manipur Ukhrul district (tangkhul ho awmna) ami in min hrilh ania. Ukhrul district huam chhunga khaw pakhata cheng te chu an vaiin chutiangah chuan vaimim (corn) season lai hian an chang thin a. An chan lai chuan khua chhuahsanin ramah te an awm thin a, sa te an seh thin. Mihringin an tih nat hmasak loh chuan engtin mah an ti ngai lem lo, a ti.
Report this comment
September 9th, 2011 at 2:10 am
“Lai” thlahtu an chhui thui theih ber chu Pu Thuan Kaia niin a langa, Pu Thuan Kaia hi AD 1400 velah a unau te nen “Lailun” hmun, tuna Falam khua kiang, Chin state ah awmhmun an khuar ta a.
Pu Thuan Kaia leh Pi Mang Tiali te chuan fa (thlahte) 6 an nei a;
1. Hringlum
2. Tlaisun
3. Chinzah
4. FANAI
5. Hlawnchhing
6. Hlawncheu
FANAI thlahte chu
1.Tha Ai
2. Pakhup
3. Lau
4. Hiar Cheng
5.Khingtin
6. Zarep
7.Hranleh
8. Zakham
9. Nihliap
10. Airawn
11. Suaktling
12. Thanhrang te an ni.
FANAI-a pianpui Hringluma thlahte chu “Zahau, Hauhulh, Tuallawt, Chawnghlut, Bansawt, Huha, Sawnset(Chhawnchhek), Lalvawng” te an ni.
(Source: Falam Christian Literature Society, FCLS, Kalemyo buatsaih lehkha bu, 2008)
Report this comment
September 9th, 2011 at 6:13 am
Part-1 & 11Comment tu zawng zawng te, in ti lawm awm e. Hnam bil thil anih avangin ngaitheilo leh chhiar hrehawm a awm ka hlauthawng viau a, mahse comments chhiar a nuam hlawm hle mai. Thangthar tan chuan, thawnthu ruahtham loh dangdai leh ngaihnawm tak anih ka bei sei.
Report this comment
September 9th, 2011 at 8:49 am
@RDAC: A va dangdai bik ve.
Report this comment
September 9th, 2011 at 11:33 am
Ngaihnawm e.
Report this comment
September 9th, 2011 at 2:18 pm
#21, Fanai thlah a ‘Nihliap’ hi ka chhiarsual emaw ka ti a….!
@PKF : Hlawndawhthanga hi a thih dan i ziak tel law law lova…!
Thawnthu hi rawn post zeuh zeuh rawh u, inhnial luai luaina ai chuan a chhiar a nuam zawk
Report this comment
September 9th, 2011 at 7:23 pm
HLAWNDAWHTHANGA THIH DAN:
Lushai-er an min request si a, a zahawm em mai a, sei hle mahse, kan ti hram ang e.
Hlawndawhthanga chuan Vuichhip tlang hnuai nula Tialtangi a ngaizawng em em mai a, nitin hian a rim thin a. A kalkawngah chuan khaw pakhat a awm a, chu khuaa ran pakhat chu Tialtangi rim tura a kal pah chuan a la ziah mai a, mihring tam fe a suat tawh bawk a ni. Chuvang chuan, chu khuaa mite chuan Tialtangi an be ta a, an inthawi ta chiam mai a. An tawngtaina leh dilnate chu Tialtangi chuan a lo hria a, an duh anga tihsak a lo tum ta a ni. Khuaa mite kha an khaw dai a falpui siam turin a hrilh ta ngawt mai a, an falpui siam chu Hlawndawhthanga veivahna lam kawtchhuahah a ni a.
Chutia falpui an siam zawh tawh hnu rei lo deuhvah chuan, Tialtangi chuan, “Hlawndawhthang, i lo kalna kawtchhuaha falpui an siam kha i hmu thin na nge?” a ti a, ani chuan, “Hmu ang chu,” a ti a. Tialtangi chuan, “I hel thin a ni maw?” a ti a. Hlawndawhthanga chuan, “Hel lo ve,” a ti a. Tialtangi chuan, “a nih leh engtin nge i tih?” a ti a. Ani chuan, “Tlangval na chuan le kan zuankahlen theuh zel mai,” a ti a. Tialtangi chuan, “Ka awih lo deuh mang e, i zuankahlen zo maw? I va chak awm ve!” a ti a. Ani chuan, “I awih loh leh mi va en teh reng ta che,” a ti a.
Tichuan, an kal dun ta a, Tialtangi hmuh lai ngei chuan Hlawndawhthanga chuan falpui chu a han zuan khum zak mai a, a han zuan khum let leh thauh nghal mai a. Tialtangi chuan, “A hnuaiah khan i lut ngam na nge?” a ti a; ani chuan, “Ngam ang chu, mahse, min delh ang asin,” a ti a. Tialtangi chuan, “I lut ngam lo tihna a nih chu, a delh i hlauh chuan,” a ti a. Hlawndawhthanga, tlangval huaisen inti chuan, a ngaihzawng hmaa ngamlo nih chu a hreh ta hle mai a, “A nih en rawh, engah nge ka ngam loh vang,” a ti a; a lut a, a kamna chu a han khawih per ta a, a delh ta nghek mai a. Hlawndawhthanga chu a zangthal hman a, chutia falpui tuma tihkan zawh loh tura an siam chu a nam kang ta vu mai a. “Tialtang he falpui hi ka tichhe vek mai thei asin,” a ti a. Tialtangi chuan, “Nam kang vu lo khan han indelhtir chhin teh,” a ti leh zel a. Ani chuan a hreh viau mai a; mahse, a ngaihzawng thu chu a hnial hreh si a, a han indelhtir ta a. Chutia a delh beh tak si chuan tan a siam leh zo ta lo va, a delhhlum ta a ni, an ti.
A tawp ta.
Report this comment
September 9th, 2011 at 7:49 pm
a ngaihnawm hle mai naupan lai thawn thu ah kan ngaithla thin kha maw le
Report this comment
September 9th, 2011 at 8:15 pm
@PKF : Thankhiu
Khi khi ka hriat ve dan ani a, midang hriat dan nen a dang thei a, ka confi deuh ta sawt mai 
Report this comment
September 12th, 2011 at 8:34 am
Keimi, Mizo version of Werewolf. Engtik emaw hun lai khan Phawngpuibawr-ah sawn keimi ang deuh hi awm a an sawi thin tak kha maw le. A hniak chu mihring hniak ang, an la ti ta deuh deuh. Phawngpui leh a ral, Burma ram khi a kar tawn thin in an sawi a. Very Interesting…
Report this comment