mi(sual).com

I&PR Minister Zodintluanga’s SPEECH @ CONSULTATION on WOMEN’S PARTICIPATION in POLITICS
9th September 2011 – I&PR Conference Hall

Pi Chairperson, Centre for Peace & Development hruaitute, MHIP hruaitute, thian duh tak te, leh vawiina he hun hmang tura lo kal zawng zawngte in zavaiin chibai ka buk a che u.

Kei tehlul in programme hlu tak maia min awm hi lawmawm ka ti a, he consultation programme buatsaihtute chungah pawh lawmthu ka sawi a ni.

Khawvel thang chho zelah hmeichhiate pawimawhna hi a lian tial tial a, Mizoramah pawh hmeichhiate dinhmunin hma nasa takin a sawn a. Heng zawng zawng hi Mizo hmeichhiate taimakna leh thawh rah a ni.

Hmeichhiate hi Pathianin a siam dan phungah in ropui hle a, mipa tam takin ho te te leh ngaihtuah ngai loa kan ngaihte thlengin in ngaihtuahin in chhut thlip thlep thin a. Chutiang hmeichhe awmna inah chuan chhungkaw khawsak rel pawh a fel ngeiin ka ring thin.

Keini pawh sumdawng chhungkua kan ni a, kan naupanlai atang tawhin ka nu-in kan chhungkaw sumdawnna min relfelpui a, keiniina ngaihtuah nachang kan hriat lohte pawh hi ani chuan a ngaihtuah kim biai thin a ni. Tunah pawh ka nupui chuan kan chhungkaw sumdawnna a enkawl leh a, kei phei chu sumdawnnaa hman theih lohin ram rawngbawl hna tling lo takin kan thawk a, ka nu leh nupuiten min chawm a ni ngawt tawh a ni.

Vawiin Mizoramah chuan khawtlang leh Kohhranah hmeichhiate an inhnamhnawih nasa ve tawh hle a, an hnathawh pawh hmun tam takah kan hmu a ni. Veng thenkhatah chuan miten puanthui an zir theihna turin puanthui zirna hmun te hawngin mi tam tak tan eizawnna an lo siamsak tawh bawk a ni. Heng zawng zawng kan ngaihtuah hian kan Mizo hmeichhiate hnathawh hi a ropui kan ti lo thei lo a ni.

Zirna lamah pawh kan hmeichhiate hi an duai lo hle mai a, HSLC, HSSLC leh College leh University exam result te pawh kan en chuan hmun tam takah kan Mizo hmeichhiate an chungnung zawk fo a ni. Hun lo kal zel turah pawh hei aia nasa zawk hmasawnna hian kan Mizo hmeichhiate a hmuak tlat ni hian ka hre ve thin.

Kohhranah hlimna a lo thlen pawhin kan Mizo hmeichhiate, Kohhran Hmeichhiate chu a phusa leh Kohhranah hlimna boruak lantir tam berte an ni bawk a, kan Kohhran leh khawtlang sukthlek hi nangmahniah hian thui tak a innghat a ni.

Vawiina kan kalkhawm chhan hi kan hre theuh a, engtin nge Mizo hmeichhiaten tun aia nasa zawka politics leh sorkar rorelnaah an tel tam theih zawk ang tih a ni a. Ka han sawi duh chu, kan Mizo hmeichhiate hian politics leh sorkar inrelbawlnaah nasa takin hma an sawn tawh niin ka lo hria a.

Kan hriat theuh angin nikuma Aizawl Municipal Council inthlanah pawh hmeichhe ward siamin hmeichhe councillor pawh 6 lai kan nei tawh nghe nghe a ni. Hengte kan en chuan kan Mizo hmeichhiate hian kawng tam takin politics-ah hma in sawn tawh kan ti thei ang.

In rilrua awm tur niawma ka han ralrin chu: Engtin nge hmeichhiate hi MLA in nih ve theih ang a, ram rorelna sang berah engtin nge in tel ve theih ang? tih a ni. Vawiina kalkhawmte hmaa ka sawi duh chu MLA emaw Minister emaw nih laite hi kan mitthlaah a awm ang tih ka hlau a. MLA emaw Minister emaw ni tur hian mahni nun leh hun tam tak insenral ve ngai a awm a, mahni thuthmuna chu dinhmun chu pek ngawt kan inbeisei chuan a fel lo theiin ka ring.

Ram hmangaihna kan neia ram rorelnaa kan tel duh a nih chuan chhel leh taima taka kan awm hi a pawimawh a, hruaitute hnungzui thiam nih leh hruaitu nih thiam kawp pawh a pawimawh hlein ka hria.

MLA dinhmun te, Minister dinhmunte hi dinhmun itawm leh nuama kan sawi dawn a nih chuan kan rilru kan inenfiah a tul ngeiin ka ring, MLA emaw Minister emaw kan lo nih hian ram aiawha hnathawk turin kan awm a ni tih hi kan hriat reng a tul a ni. MLA emaw Minister emaw kan nih hian kan chu ngah mawhphurhna lian tak mai a awm a ni tih kan hriat reng a tul a, kan kutah ram hnuk a innghat a ni.

Chuvangin kan la lap thiang lo a ni. Thutlukna dik lo leh felhlel kan siam chuan kan ramin a chhiatpui mai bakah kan thlah lo kal zel tur, kan tu leh fate thlengin an nunah a chhe zawngin nghawng a nei thei a ni. Tin, nunphung pawh mi zawng zawng aiin fimkhur a ngai a, mi vantlang nena kan thil tih inang reng pawh hi dinhmun pawimawh chelh chuan a ni lo zawng leh aa leiko zawng hian a thang duh em em a ni.

Hla-in ‘mi ten min chhiar, min thlir reng e’ tih ang deuh hi a ni a, nun hi a lehlamah chuan a chepna chen pawh hi a awm ve a nia. Chu’ng zawng zawng leh thil dang tamtak nen he ram rawngbawl hna hi thawh inhuam a ngai a ni.

Mihring nun hrim hrimah hian kan hlawhtling dawn a nih ngai chuan taimak kan chhuah a, a man kan pek hi a ngai a ni. Zirlai pawhin examna-a tihthat a duh chuan taima leh rim takin lehkha a zir a, a thawhrimna rah chu a hnuah a tel ta mai thin a ni. Chu chhiarkawp dan tho chu politics-ah pawh a ni.

Vawiina ram hruaitu hmeichhehote hi han en ila, an dinhmun chelh hi hmeichhia an nihna vanga an chelh a ni ngawt lo tih chu kan hre theuh awm e. Pi Sonia Gandhi chu hruaitu nih tling, rorel thiam leh taima a nih vangin political giant a ni a, Pi Mamata Banerjee pawh West Bengal Chief Minister a nih theihna chhan chu ama fel vang leh taimak vang a ni.

Chutiang zelin UP CM Pi Mayawati te, Delhi CM Pi Shiela Dikshit te, Israel Prime Minister hlui Golda Meir te leh khawvel huap pawha hriat hlawh Pi Indira Gandhi te pawh an ni. Chutiang chuan hmeichhe ropuite chu anmahnia thiamna, theihna, taimakna leh inpekna theihna vangin vawiina an dinhmun luah hi an luah thei a ni.

Chu thudik, engtik lai pawha phat ngaihna awm lo chu Mizo hmeichhiate chauh ni lo Mizo mipate pawh hian kan hriat reng a tul a ni. Mitha chu hmeichhia emaw mipa emaw a nih vang ni ngawt lovin amah chu a hmantlak avang zawkin mi tam tak zing atanga lo chhuakin hruaitu dinhmunah a lo ding thei ta zawk a ni.

He khawvela kan awm chhungin hna leh kawng hrang hrang kan thawh leh zawhna kawngah vanduai te chu a awm thei tehmeuh mai, chu chu kan thunun theih piahlam thil a ni. Amaherawhchu, thil pangngaiah chuan kan thawhrima rilru kan sen a ngai a ni.

Chuvang tak chuan vawiina Mizo hmeichhiat duhawm tak tak lo kal kkhawmte hnena ka sawi duh chu ‘mipa tih theih ang chu ka ti ve thei tur a ni’ tiin insangmar ula, tute emaw duhsakna leh tlawnna avang mai mai ni lovin, mahni inchhuang thei khawpin politics lamtluang pawh hi zawh ula ka duhsak tak meuh che u a ni.

Chutianga mahni thawhchhuah leh hlawhchhuah ngeia in hunte in hmanhlel chuan in hlawhtling emaw hlawhchham emaw pawh ni se tumahin an dahhniam ngai lo ang che u.

Vawiina consultation programme kan hman pawh hian rilru zau tak leh changkang tak, pe che u se la ka duh a, in awmna atanga hmasawn zel turin duhsakna ka hlan che u a ni.

Ka lawm e.

This entry was posted on Saturday, September 10th, 2011 at 2:00 pm and is filed under Mizoram, Politics. Both comments and pings are currently closed.