mi(sual).com

Uangpui chang suh ila, ka mawl êm êm na leh a mawl zawnga thil ka chhut peih êm êm hi ka taihmak ve na a ni. Marksheet leh certificate lei chawpa Matric pass ve mai ka nih avangin, ka fin vak ring duh suh. Mawl vanga doctorate degree dawngtur chu ni ila, ka hming bulah mai nilo a tawp lamah pawh Dr. tih hlir a khat tawh ang.

Ka thianpa khan a Car thar lawm tur leh enpui tur khan min han sawm ve chu nia. Khai aw, ka han hmuh thuak khan Satel lian leh changkang takah ka ngaithla rawk a. Sawi tur vak ka hre tlat lo, ka ngawi vung vung a.

“Shock a dawl ang em, eng zat man maw?” ka ti puak phawng a. A sawi danah chuan, cheng sing sawmthum (aw sing hlira,sing sawmthum) leh tlem vel. Ka phu zawk a, cheng chuti zat man hu a ni reng em han lepse teh ang.

A kawngkhar ka hawng thiam tlat lo, darthlalang lian pui a chhawm tel ni awm tak atang chuan ka han bih duk duk a. A chhungah chuan, Sofa sei pakhat leh single chair ang reng tak pahnih a lo chhawm bawk a. A vaia man belhkhawma ka dahsak chu cheng sang sawm a ni.

Darthlalang lian zet zet paruk zet a tel bawk. A hmaah pakhat, a hnungah pakhat, a kawngkharah pali. A man atan cheng sing sawm tling lo mah se, dah sak leh phawt ang.

Wiring a lo awm nual a, wiring manah leh wire velah, atam berah cheng sang nga aw. Battery a lo tel khanglang a, mahse hei chu lei tul lo a ni. An Inverter battery hman tur a nei reng tho si a, aw a va han mawl theih ngai ve aw.

A ke pali leh a spare a la tel bawk. Hei pawh hi a tul thlawt lo. Thingzai phek pahnih lei ta ang se, a ke pali leh a spare chu a daih lutuk tlat. Kan tuk bial chawp mai dawn a, tube chu thenawmte ta pawh ka dil chawp sak mai ang. Thingzai phek manah cheng sangkhat bak kan seng lo hrim hrim.

Aw, a thirchhe chhawm zo zai kha. Vai thirchhe zawng ho hnenah khan, a to berah kilogram khatah cheng nga ang pawhin pe dawn ta ila. Kan hmuh theih a ka rin chu a tam lo khawp, cheng sing sawm a tling pha lo tih ka chiang. Engpawh nise, cheng singsawmah dah sak reng reng ang.

A light bulb chhawm tel zawng zawng ang kha thil tul lo bawk a ni. An inah khan tube light leh bulb pangngai a ngah lutuk tlat. Cheng sangnga ah ka han dah chhin a, a side glass ah kha chuan cheng zahnih bak ka dahsak phal lo.

A clutch, brake, steering leh neuh neuh dang kha chu thirchhe dahkhawmnaah kan zawng mai dâwn a, senso tul lovah a lo in sêng chiam a lo ni. Chubakah, a tui thun reng a ngai a la ti deuh deuh. Phone anga a battery down huna charge leh mai turah ka ngai ngawt a, a lo ni reng reng lo. A charger a lian duh awm te ka ti rilru a, ka tisual chhia va. Aw fin ve deuh ka va chak tak…

Ka thil awh zawk mah chu, chempui atana chher tlak tak tak a ke sira inthuah tin ten kha a ni. Ka lam thiam ve dan chuan, a sipiring an ti ta in ka hria.

A thil chhawm lian zual ka hriat ve chin chu khang zawng kha a ni a, a dang ka hriatloh neuh neuh dangah thlavengah cheng sing sawm seng tawp ang. A senso hetiang hian ka han dah khawm a-
1. Seat- Rs.10000/-
2. Glass-Rs10000/-
3. A ke-Rs.1000/-
4. Thirchhia-Rs.10000/-
5. Side glass-Rs.200/-
6. Wiring+Light-Rs.5000/-
7. Others-Rs.10000/-

Total Rs.46200/-
Heti zat bak hi ka chhut danah chuan seng turah ka ngai lo. Ka hriat loh tam tak nen pawh singnga pawh lo tling ta ang se tia ka ngaihtuah vung vung lai chuan, a horn ka lo bawh ri tuar tuar awm tak a ni.

Hriat lohna hi chu a lo va mawlin, a lo va â thei tak ngai em. Mahse, RV nan a tha a, nula rim nan a tha tih zawng zawng kha hre pha ta ang ila chuan, ka thianpa kha ka thik awm si a.

Khalh kha a chak tlat mai si a, thiamlo leh thiamlo kan inzirtir phei kha chu a rapthlak tak zet. Hman zana inlarna chhete ka hmuh nên belhkhawmin kan risk dun ta a nih kha. Hei hi back gear a ni chiang, hei ve thung hi chu first gear- khalh rawh le kan han inti rap a. Back tuma hnunglam a melh vung vung laiin, hmalamah duh aia chakin kan tlan leh fua thin. Khawvel hi a lo chhe tawh hle a nih hi ka ti ta ringawt.

Ka thianpa hi chu harh leh nung ve tak a nih avangin a thiam thuai ka beisei. Hman niah pawh ka arpa sual huai ka hawh tir a, a nghawng kawi vekin a rawn dah. Pakhat phei chu ramtuileilo-ah a chhuah der a, zawngte pawh nei se a khal hlum leh tho ang.

Kut hmang miah lova kawngkapui chunga in seh tang thei mi kha a ni ve tlat. Chuvangin, a car thar nên a la rawn inhawl chhuak thuai dawn a, petrol pump leh khawpui a la rawn ti chep belh ngawt ang. Lo hrethiam hram hram la, i lo chibai lawp lawp dawn nia.

Similar Posts:

• Hringchar ah Mizo kidnap
• Ka thianpa ve thung…. :-)
• Dawr luah man
• Fiamthu Kan Thawh Ve Lawks!!
• A mak ka ti!

Recent Posts:

• Bawihpuia kha
• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO

This entry was posted on Monday, September 12th, 2011 at 11:30 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.