mi(sual).com

                                                                                                                   Matluanga Fanai

( A sei leh khawp maia,mahse a chhiar chhuak peih chu in in chhir hauh lo ang)

Kha mi zan khan  ka lu nat riai riai vangin thut muan ar khuan vel awmah mut-mu tuahin, rei pawh rial lovin Pathian leh Paracetamol  hna thawh zarah  chuan ka muhil mai renga. Leng hawn ar khuan hun awmah chuan thangharh lehin zun ram thiara kan tho harh chu mut chhuakna reng reng in min zar ta lo mai.

TV te ka ena, naupang satel khalh taka Remote Control ka khalh hnu chuan a tuk zing thawh tlai lutuk hlau chuan khumah bawk kan lawn kai leh a. Mut thilh ka tum poh leh ka harh tulh tulh mai a. Nghate rep ang maia meng kar chungin ka Ngharmut ngat reng mai.

Chhungte lah chu camping chhuak hlim ni mai a mawi hian thlamuang em em in an muhil siai siai mai si. Tichuan ka tun hma leh tun hunte ngaihtuahin ka rilru chu a vakvek a, lunglenna, lawmna leh thinrimna fe fe a awm. Nuihzat thlak fe fe leh zah ngawih ngawihna te chu Screen lianah chuan an rawn lang zut zut reng mai a.

Sephung leh Microsoft word te, Lehkhachaih leh Apache Helicopter te, Tawlailir leh Mercedes carte, Mangkhawh leh Hawaii beach te, Lalmanga nu lawm rawih`s Day leh Valentine`s Day-te, Lalnu Ropuiliani leh Margaret  Thatcher-te  kan mitthla tawn zak zak hnu chuan kan Zoram tunlai nun chu ka ngaihtuah chhunzawm zel a.

Kristian ram tia kan chhal mekah Lucifera leh a hoten sualna hrang hrang hmanga min sawi sak danzia te hi lawm fe fe leh lawm lo fe fe chu an awm ang tia ka ngaihtuah fe hnu chuan mut chhuakin min zem ta  chiai chiai a.

 Chutia kan muhil chuan ka rilru suangtuahna-na ram chu lo mang phanin Lucifer-a leh a hote High Level Committee na bulah hian lo awmin an Cabinet meeting thu leh hlate chu puanzar phen atang hian ka lo ngaithla vel meka. An Boss Lucifera a hmel a uang hlea, min hmuh chuan, “E khai, nang Zoram, i hming pum kha  Zoramhmangaiha maw kha, helai hmunah hian damlai tan hmun hi  a awm zen zen lova sin, mahse  i  lo kal ta sa sa, i  hmangaih i  ram ka sawisak dan leh ka thangkam te hi kan lo hrilh ang che.

Tu hmalakna nge chak in sawi dun teh ang . Kid No.3 Nuaia, va kai la, ka kiangah hian lo thu se, Zorama hi a ram khi kan lo thlir tir ang e” a tia. Nuaia ngei mai chuan min rawn kai a. Vawk kaw chhunga lo awm tawh a ni tih chu a rimah chuan a hriat hle, a thi thun rim te pawh a nam hialin ka hria.

Lucifera bula thut hmun kan rem zo, ka han hawi velin an hmel ka han hmu chiang chuh!  rapthlak leh tihbaiawm over bawn tawps, Kan Chief Minister a nihloh hlauh avangin ka thlarau chu Lalpa chungh a lawm ta em em a. Mahse maw, engemaw taka mi hip theihna riau nei ni hian ka hmu a. Kei pawh chu an thanga in awk hnawk lo turin ka rilru leh ngaihtuahna zawng zawnga tan lak tumin ka in sehruh nasa hle.

Thutna kan han rem fel hnu chuan, kan ngawi dun vang vanga. Nakinah chuan a mah Lucifer-a chuan ti hian a rawn tawng chhuak hmasaa. “Zoram, han thlir teh I ram khi.  Thang tam tak kam in, thil tha leh nuam awm deuh deuh ka tawkdarh a. Chung a awk laklawh tawh te chu an chhuak leh mawh teh a sin. Heng ka tawkdarh hman; Corruption, Sex leh Drugs te ngat phei chi chu an ngul hi a khauhvin ka awh tawh te chhuak leh hi sawi tur an tlem teh a sin.

Ka hreawmna min tawm pui tura ka hnena ka lak hun hi an lo Sakuh ser nghah tawp zel mai a ni” tiin deusawh deuh hian min nuih san huau huauva. Thinrim tak, in sum tak siin “Engvangin nge ka thalai tam takte hreawm tuar tura  i lo bum reng reng ? Engte nge ka mipuite i  en a  i lawmna riau thin?” tiin zawldawh takin, amah do letna tangkaia hman ka duh avangin ka han zawt a.

Kan ram thlalak fiah tak mai min thlir tir chung chuan, “Ni e hei tak hi a lawm in hriatthiam loh chu. I pi leh pute pian hma daih khan Vanah indona kan lo nei tawhin chutah chuan tuna in Pathian Jehova lakah hian mualpho takin ka lo tlawm tawha, Chuvangin  i  mipuite ka huat em em vang pawh ni lovin in Jehova huat hrim hrimna vang zawk khian a mi leh sa tihbuai leh lak pen bak hi tum ka nei lo.

Chu chu in Pathian huat ber leh a lungngaihna ber pawh a ni tih hi ka hre chiang. Chuvangin kei leh ka hote hian kan bei zel dawn. Ka lawmna maw i hriat duh ka hrilh mawlh ang che. In milian leh hausa ho, Eiru Lalpate khi a hring a hrana ka tirhkohte, a lang a pauva ka Appostol-te an nih khi. En mah ta che. Khi a eiruk hmanga a thawhlawm thawh leh ramthim vei te khi, ka tan khi lo liama hnung lama sa barh a awm chuang hlei nem.

Mahse Corruption lam hi chu hun dang ah chiang leh zualin ka la kawh hmuh ang che. Tun tumah chuan tunlaia in vei em em RUIHHLO, YMA pawhin kumpuan a hmanga in DO mek hmang ngeia ka suasam dan hi kan thlir tir ang che. Tunge hnehtu zawk in thlir ila. Kid No. 1, Belzebul, thingpui hang no hnih leh kurtai lian tawk rawn la rawh” a ti zui nghala.

Thingpui rawn kengtu Belzebula chu ka lo suangtuah thin aiin a tihbaiawm, a kutte chu in chibai a chakawm loh kher a sin! Ka tehkhin ber chu Khawmhma dam neih kuma mangkhawh zo hlim hi ang ber in ka hria.  “Ali-a, J.Malsawma, Armed Veng ‘S’, MZU a Geology Dept. ah PhD ti lai mek hi I hri em”?  tih tuma ka an zuau laiin, “Madawnga, Ramhlun ‘N’ nen khi chuan Nipui laiin Meidil beach ah kan in pho ut fe tawh” tiin min chhang dawn thova ka hriat avangin ka thulh leh ta a. Kei erawh zawng,  ‘In chhungkhatna kan lo neilo hi Lalpa zahngaihna a lo ni’ ka ti rilru nghe nghe a.

Belzebula`n thingpui a rawn kal lai mekin Lucifera chuan Remote Control chuan channel dang a hmet a.  Ruihhlovin  kan ram a tihchhiat dan chu Live telecast chuan min en tir ta. Thalai tam tak, kum bithliah hrang hrang, hmeichhia leh mipa, hmun hrang hrang a mi chu focus in an corespondent rinawm leh rintlak lutuk mai Varparha ngei mai chuan a narrate zeih zeih maia.

An tawng ka hriat fiah zan loh avangin amah Lucifera chuan min hrilh fiah sak zel a. “En ta che, khing tleirawl rualho khi, tunhma chuan khing dinhmunah khian an awm an in ring bik hlei nem. Hlim taka chhungte thlazar hnuaia thlamuang taka awma, a thlum a la ei zaa chhungkuaa nuih ho dar darte an duh ve a sin. Mahse an chhungkua ah Sum duhna thlarau kan tuha, an pa ber khian khi pawisa map lovin sorkar pawisa chu a sawisa hmiah hmih mai a nih khi.

Chhungkuaah ti ti hona an nei lo. Nu leh pa ten sum an nei, mahse an faten inah hlimna an hmu lova, khawlaiah hlimna an zawnga, an pate sum lak luh diklo ngei mai chu kan lo hman dikloh tir vein tunah chuan ka pawlah hian Patron member an ni tawh a sin. Khi khi, in chhunga thlamuanga nuih chu ka ha se, chhungte leh tlawmngai pawh hlau reng rengin ramhnuai leh luikawr-ah thahnemngai takin ka rawng an bawl mek khi.

Enteh, a thianpa khi chu an hausa hran lova, engemaw chen chu a thiante ta kan rin tirin a rui ve zela, mahse ka hnenah a lo hawn hun a hnai tawha, a mamawhna a sangin a thiante`n an hmui reng thei tawh lo. A mah leh a chhungte thil a hmuh a piang a ru chhuakin a hralha, Gospel campingah vawi 7 leh central Jail ah vawi 7 ka luh tir a, Police leh JAC kut pawh a tuar nasa. A inchhir in sim pawh a duh.

A piang thar zingin a sim ngun malh malh e. Mahse kan Life member a ni tawha,  khi tiang mi le lo leh tumruh lo lutuk khi chu thlem tluk pawh an harsa hran lo. A awn sa bui reng mai a nih khi. Nuam veng veng tak a ni” tiin a nui huau huau a. Kei chuan, “A nih leh an chan tur hi in hrilh lawk lo vem ni?” ka tih chuan, ani chuan, “An naupan tet atangin in hrilha, a hrilhtu chiang hek suh, a hrilha te chiang hek suh.

In chanchintha ai chuan kan chanchintha hi pawm leh zawm nuam an ti zawk. Ka thang tawkdarhte hi an tan a awhawmin, ka agent te hi an nih ang anga lang thin an nih a vangin zui nuam an ti fe zawk. Nang ni zawng Chawlhni leh Thawhtan in  hman dan a in ang hlawl lo.Chuvangin min beivak duh suh u.In hah thlawn tam mai mai”an ti zui leh a.

“A nih leh a dang min en tir leh ta che” ka tih chuan. “Teh reng mai”,tih pahin hmun dang an focus leha. “En rawh le, khi laia nupa valai tak te khi. Thla mang laia luikawrh culvert hnuaia Proxivon hmanga ka in kut suih tirte an nih khi. A hmeichhia khi chuan khami zan atang chiah khan  kan pawlah a rawn in enroll ve a. Tun thleng khian a khaipa/khainu berah chuan a tel duh lo. Mahse, a hmangaih a pasal khi kan adviser a ni tawh si.

Engmah a ngaihtuah thei tawh lo. A nupui ai chuan Proxivon mum thum a mamawh zawka. An bungrua zawng zawng a hralh zo deuh vek tawh. A nupui a hralh lo chauh a ni tawh. Hlim taka ina inkawm te chu vana rah a ni ringawt. An nu khi a in chhirin tawh ngawt a sin. In then turin a chhungte a hlau tawh si.  Mahse rei lo teah thihna hmangin ka la pawt then tho tho dawn. En rawn, an fate pahnih leh an pai lai te khi.

Pawisawi lovin natna khirh an pai ru tih hi keimah chiahin ka hria, an ni pawhin an hre lo. I hre ve ta a nih chu. An fate khi eng tin tin emaw lo thanglian ta pawh nise, an mahni puala Nauhual programme hmangin Cake kan zai  daih tawh a sin.  Khing aia nupa hlim lo hi kei leh ka tirhkohte hian an la tuahrem thiam bik lo. Damlai hremhmun an hmang mek a nih khi”,a han tih chuan ka tim ur ur a, naupangte ka lainat lutuk chuan ka mitui a hnam hial a.

“Lucifer, hriat belh leh tur ka nei em?” kan ti leh a, rapthlak ti teh mah ila hmalak nan a tangkai dawn tlat si. A ni chuan a ki sei pui chu an dah thla in, “E, I duh a thu le, khing tlangval ho khi, putar emaw I ti ange, kum 23-30 in kar vek an nih khi. An naupan deuhlai chuan Sipai lal nih te, Officer nih te, inkhel thiam tak nihte leh zai hmanga in Pathian rawng bawl tumte an nih khi. YMA leh KTP conference ah te pawh vawi duailo an lo kal tawh thin.

Khawvel changkanna te pawh an hmu ve ruau ruau tawh thin. Mahse, in ram mi lian-ho corrupt nasa lutukin pawisa a hman lohna turah a liam nasa a, in ram hmasawnna in a thuan-awp phah si. An nun tuihalin hlimna zawng chuan an hmabak awm chhun nia an hriat, ka thang tawkdarh eng mawi mai chu rawn temin ka hnenah admission an rawn la ta a nih khi.

Tlangval thalai, In ram leh in Pathian tana lu chhum ban chum huama Martar tura in lo beisei ve em em thin te chu tunah chuan kut–ke vung ber bur, hnathawka chhawr tlak si loh, nangmahni tih dan takin ban lian tak, hnek na si lo an nih tak khi. Laipui nena hmelma do tura lo in hisap thin tute khi hriau te reuh te hmangin an mahni leh mahni an in kap thal hual reng mai.

In Lal Isua chanchintha rammut pui tum thintu te kha ka campaigner rinrawl ber ah chang zo ta. Biakin-a in lam mup mup lai khan nuna thapin mi puanpho leh vawkchaw bel trick tur zawngin an lo hman hlel ve a sin. Khawtlang leh Kophhran tana in hman te chu sawi loh, khi puipun nikhuaah pawh an eitur siamte chu nula hovin an ten tlat tawh.

Mitthi lumen zana an chhang semte pawh khi, loh theihlova lo dawngte pawhin an kuta an khawihna lai chhinchhiahin  an paih daih zel tawh khi. YMA Social meeting ah pawh an bula thu duh pawh an awm tawh mang hleinem. Rualpawl nana ka hnena rawn in tulutte khian rual an pawl thei tawh lo a chha chu a ni e. Han ngheiin han sim ve thin mahse, `Tunah rih chuan a fel khawp mai` in ti duh chauhva.

An damlaiin in hmusita, an thih hnuah kan lo diriam ve thung dawn a nih hlawm khi” a ti tun tun mai. Ka rilru a var uar uara. Lucifera min bumna, Ruihhlo laka fihlim tura kan thalai te hrilh thuai thui ka chak tawh lutuk chu ka uak keh lo chauhvin, thang harh san daih mai chu ka duh rum ruma.

Mahse, hriattur pawimawh hre kim lova kalsan ka hlau bawh si chuan a dang ka zawt leh ta a. A ni chuan, a lema min en tir zel pahin, “Ka thuruk tawp, In thalai tam tak te hriatloh kan hrilh ang che. Mahse nangpawh hei hi chu khawiah mah I sawi chhuah loh a tha ang. I tan a pawi ang” a tih chuan , Kei chuan, “Sawi phawt la, ka tana a tullo te a nih phei chuan ka sawi chhuak lo ang ni mai” tiin ka lo chhanga.

Mahse a tak takah chuan thup hi ka tum chhete lo. A ni chuan, “Heng Ruihhlo hmanga ka sawisak na chhan che u pakhat chu, Kristian ram in in tih fo hi ka kham tawh lutuk, Missionary thawn chhuah ti te hi ka tan beng chheng tawp a ni. Ka tan chuan Piang-Uak Thar-Thui a ni ringawt. Khing zawng zawng khi ti theilo tura hnam dang hmanga chimral tir che u ka tum a ni. Tunah pawh in thalai tam tak te chu tang thei tawh miah lo turin sang chuang teh meuh ka laksak tawh che u in, tan pawh tang chhin ngam tawh miahlo tur sing tel an awma sin.

Ka hrilh dawts mai ang che, Zoram, tun anga ka hma lakna a tluan zel chuan tuna tang kum 10-ah chua Mizo ho khi chu eng hnam tan pawh in zuamawm khawp ang. Chutih hunah chuan Kristian ram tih leh  Chanchintha rammutpui tih te chu Chemtatrawta thawnthu ang chauh a ni ang a. In culture tha zawng zawngte chu `Kawi bat nai` a ni zo vek

Engemaw zawh tuma ka an zuau lai chuan a chhiahhlawh te zinga a rin rawl ber niawma lang pakhat a hming Thundera hi a lo lut a. Ani chuan “Boss Luci, hei nikum maia kan pawl a rawn in enroll, Setanic Gang member tura Baptisma chang tawh ngat, mi hausa fapa kha ka rawn ti OD thei ta hram e, thawk tha min tih ve ngei pawh ka beisei” tiin tleirawl pakhat hi dim lo baksak hian  a rawn hnuk luta.

Ka han enin chuan mipa tleirawl pawh chu a hlau hle tih a hmelah a lang reng maia, ka lainat hle mai a. Chutih lai chuan Lucifera chuan,  “Kid No 2, Lal-thunder, i ti tha thlawt e, i pu lawmna ah lut rawh,vawiin atan chawlh ka pe ang che. Chubak chawlh la hman i ni lo tih erawh i hre dawn nia. Chawl hahdam pahin hmalak leh dan tur lo va ruahman ang che” a tih zawh chuan ka lam chu hmel uang fahran chuan a lo hawi phei a, “En rawh le, he tlangval an vui dan khi ka en tir ang che” tih pah chuan a ruang chu mi han thlir tir a.

A tak ngei hmu ka nih avangin min hrilhfiah sak pawh ka ngai lo. Ngawi reng chuan kan thlir dun  a. Chu tleirawl awmna venga Mitthi an awm thu YMA Secretary-in a tlangaupui lai chuan a thih chhan an puan chu a zawi riauva, ka hre thei hlek lo maia. Biak in dar muang fan raih maia a rik lai chuan an thenrual tha niawma lang thin thenkhatte chuan ui hmel loh fahran hian “A thi ta nge nge maw”, “ A awm  tawh bawk e a” an ti sam et a.

Thenrual na zawng chuan ruang kil chu an duh lo. A ruang chu YMA te chuan a rang thei ang berin sarang hian an pack mawlh mawlh lai ka hmua, a chhungten an ui tehlul nen a rang thei ang bera phum bo turin mimir chu an phe suau suau mai si. Ui em em vang nge pawh hriat lohvin thenkhat chuan pangpar man tlawm te te, a thu ziak lah chu dawr neitute phuahsa chu an rawn dah ve a, hul takin an chhuak leh nghal zel a.

A chanchin ziahna ah chuan a thih chhan ziah dan tur ah an lo in hnial meka, a tawpah Val Upa, YMA Vice President ni bawk thuin O.D tih chu tawi leh fiah takin an ziak ta kuau mai. Kuang siam tute chuan fiamthu thawh nan an hmangin, thlanlai tlangval ho lah chuan an thianpa chanchin mawilo lai, a leibatna hmun leh veng hrang hrang VDP hma a a lo interview tawh dante  sawi in an lo haw haw dur dur mek bawk a.

Nula thingpui sem ho hah bawk si lah chuan an zinbo lai a nilo chu pawi an tih thu hahip-in an lo sawia. Nu ho lah chuan mitthi chanchin ai chuan Kasauti sawiin Debu-a thi chu an ui hmel zawk mah a.  Vui hunserh a lo thlen chuan Pa ber lo dingin a chanchin an sawi tan ta.

A naupan lai chanchin, a fel thin zia leh thu a awih thin zia te, tirh a nawmzia leh chhungkaw tihlimtu ber a nih thu chu engemaw chen an sawi hnu chuan a thih hma nia chhung inkhawm naa a tel thu leh a khum bula Bible a awm thu chu uar takin a sawi a. Pastor lo ding chhuak ve leh pawh chuan sawi tur a van hle tih a hmelah a lang chiang hle. A chhungte lungawi tawk tura vui chu a ngai si, pawn lama pathlawi rualho mit mei ven ngai bawk si.

A khum bula Bible awm thu bawk chu sawiin a thih dawn darkarah a chungah enge lo thleng tih mihring ten an hriat loh thute, Sande School a a hming ziak a nih thu leh chawlhni hmasa pawhin a in khawm thu te a sawi hnu chuan mi zawng zawng hmangaihtu Pathian ang chhungah hlim takin, Ruihhlo tih buai tawh loh tur a awm a beisei thu te a sawi hnu chuan hunserh a tawpa, thlalak an han tan chuan a thian leh rualte an tlem hle a.

Huaisen fal pahnih/thum rawn thu te pawh chu camera flash phet rual rualin  an tho leh nghalin mipui karah an bibo vat zel a. Tichuan thlanmual an pan pui ta nghal a. Amah lah chu hlau thlabarin Lucifera lock-up ah a sa lai district pan mai turin a khur a khur mai bawk si. Chu theirawl ka khawngaih lutuk chu ka mur uai uai a. Kan en chhung zawng chuan Luci ber mai chu Hnehtu in ti ni awm fahran hian a kiai suk suk renga, a hnar a tum kuk kuk awl lo mai bawk si.

Thangharh duh tawh viau mah ila thil pakhat hriat duh ka la nei tlat. Zawhna ka zawt leha. “A nih Lucifer, he Indona ah hian Hnehtu ni tawh hial in i in sawi a, tan la tak tak ta ila i thla a muang meuh ang maw” ka ti leh a. A ni chuan, “Ram chu kan zauh zel a lawm, Hnehna chu ka la puang chiahlo deuh.

In Pathian tih tak taktu mi tlemte, mahni tan nilova tawngtai thinho vang khian ka hmalakna a thuanawp leh thin. Khingho sawi khi chu in Jehova pawh hian a ngai pawimawh riauva, ka hote pawh beidawng fe fe a an lo hawn chang a tam tawh mai. Chung ho kut tichak leh zual tur chuan khi YMA hovin beihpui in han thlak khi chu ka rilrem zawng a nilo khawp mai. I ramah ruihhlo a tlem tawha, a awm chhun lah a to tawh si.

A tum leh duh reng vang pawh nilovin tam takin min  hawisan tawh. Mahse ka zam lo, kei leh ka hote hian tan kan la sauh dawn. Theihtawpin do  mah ula, ka tan a thih huam, sum bawiha ka awh laklawh tawh, mahni hnam leh mihring puite chhiat  pawisa lo mi engemawzat ka nei. Hnehna chu ka chang tho vang. Chawla muang hman ka ni lo. Chuvang a lawm Thundera pawh kha nikhat bak leave ka pek phal loh.

He indona hi nang ni chuan Ram hmangaihtu leh Phatsantu indona-ah in ngaia, kei erawh chuan Kei leh in Jehova indona ah kan puang mek tih hi ilo hre dawn nia” a ti chhum hmuka. A hmel pawh chu a nelawm loh sawt hlein kei pawh chu ka hmulthi a ding dawn uai uaia, mahse hmul a kara  thi leh nghal tiin ka in khap dai hram a.

 Lucifera kid ho zingah chuan BM-a hmu ve dawna in hriatna ka nei tlat peka, ka zawt ta dawt maia. Lucifer-a chuan,  “BM-a, Durtlang Leitan kha maw, KTP Fellowship tlan bovin Mizotawng chungchang tih thupui hmangiin LENGZEM a chhuah tur a ziak a ni awm e. A rawtna mawlte khi a mawl ang anga hnawl a ni ang tih ka hlauh pui khawp a sin” tiin min chhang chhum hmuk a.

Chutih lai chuan a kid dang, chak tak leh na tak taka mi su buaih buaih thin, Tsunami-a chu beidawn hmel deuhvin a lo lut a, bawkkhupa chibai bukin, “Sory Luci Boss, min hrethiam la, hremhmun thing tuah tur min put tir loh hram ka beisei” a rawn ti dek dek a.

An Boss chuan, “Enge chutiang thu i rawn hawn leh tak, tunhnaiah vawi thumna ani tawh. Chanchinthalo ka hre duh hleinem. Hei Zorama awm lai a ni leh nghala, mualpho ka duh miahlo. Report kimchang pela` chumi hnuah hremna chu ka sawi ang” a ti khur khur maia.

Tsunami chu rawn dak chhuakin, “Boss pawi ka ti khawp mai, Kum nga lai  i  tana thahnemngai taka thawk thin leh rinawm tlat thin, an thawhhlawk vanga i hnena rawn hruai mai pawh ka phal loh Lalrawngbawla leh Lalrinawmate kha hman ni khan YMA Duty in an mana, Police pein Gospel Campingah an luta, vanduaithlak takin an piang thar ta ani. Theihtawp chhuaha laklet leh ka tum ve reng avangin hrilh pawh ka hrilh lawk lo che a, tunah chuan ka hlawhchham ta ani.

Tin, Lalhmangaihi khi tun thlengin ka la thlem thlu thei lo. A nu leh paten an Pathian an tih lutuka, hmalak leh dan tur min hrilh bawk ang che, Aw Lalber” a ti dek dek, Lucifera chu a sen awp awpa, a ki a vuah leh voh a, a ding hluai a. “Chu chanchin chuan min va ti lungngai em! Vantirhkoh-ho nui hmel khi ka hmu peih lo.

Mi hrilh vat tur che a lawm, kan chan nasa a nih chu. I beih leh tang tang a ngai ang. Lalhmangaihi chu i la hneh lo fo a maw. Ti hian ti ang che. A pa khi sumin vur la, in sak belh tir la, an thenawmte nen innghirngho rawh se. Tin, a nu khi Dospatti zirtir vat rawh.

A mah khi zalen deuhva a khawsak theih dan tur ngaihtuah vat ang che. I fail aiah Hreipui la la, vawiin hian thingtuah vawi thum  i  pu ang. Naktuk zing atangin i  hna i  chhunzawm nghal ang” a ti khur khur mai a. Tsunami-a  kal liam hnu chuan a mualphona avang chuan mi pawh a zah ru ve hle a. Roomah mi luhsan daih maia. Chutia keimaha ka awm chuan thil ka ngaihtuah nasa maia.

Ka ramin Lucifera thang kan hriatthiam loh zia leh a mi bumna zawng zawngte leh chhum lo chat lova an thawhziate ka ngaihtuah chuan  ka thin a rim in, thangharh thuai thuaia hma lak ka duh hle maia. Zoram a boral ai chuan Kei ZORAMHMANGAIHA hian nuna thap tak meuh meuhva chet ka lak a tul a nih hi tih chu ka rilrua awm ber a nia.

Kan thalaite ruihhlo bawiha an in tukluh ruala Lucifera leh a hote lawm zia ka hriat leh hmuhte chuan min ti thinrim hluah hluaha, chutihlaiin tawngtai mite leh YMA hmalakna in Luci-a te hmalakna a tih thuan-awpzia ka hriat chuan phurna thar min pe nasa hle thung a.

Chutiang a rilru senga hun ka hman lai chuan thil ri dut dut chuan min kaitho  tho hlawl maia, Khum atanga thovin Parda keuva ka  han en nak chuan naupang zing exer la tur field lam pan thawm chu lo niin, ka thil hmuh leh hriat zawng zawng te chu ka mumang a lo ni reng mai tih ka hre chiang ta hle a. Khum lai zawlah exer la in Zokhawthar vawi thum ka kawka, kut zungchal elh ri thak chungin vawi hnih tlawng `iau` ka tih hnu chuan mit-ek ka chum thla thawta,  thingpui in turin ka tho ta tham tham a.

This entry was posted on Monday, September 12th, 2011 at 9:30 pm and is filed under Religion. You can follow any responses to this entry through the RSS 2.0 feed. Both comments and pings are currently closed.