Nunn neia ka lo pian ve chin atang khan hun leh kum bi ka chhiar let kauh kauh a,engmah reng hi changchawi tur ni duhawm alo awm silo! Hlimna zawngin nitin mai ka thawk a, hahchawlh ni reng neiloin ka tisa chu ka chhawr thin. Hringnun a tha lai lai te chu fawm tumin ka phebuai a, mahse hriatloh karah a tha lo lai te pawh lohtheihloh a fawm tel a lo ngai a, a chang chuan lungchhe tak a tah ni te, a chang chuan hlimna avanga tah hial ni te ka paltlang thin.
Ngun tak a ngaihtuah chuan ka hmachhawn tur thil la inthuah tun mai te avang chuan ka pik em em a, hlauhna leh khurhna nasa tak te chuan min zem buai bawk a. Chutihlaiin chawthleng zenpui te ngeiin kirleh tawhlo tura min han muthilsan vang vang chang phei chuan hringnun chu inveng leh titna in alo khat zo ta! Mal leh khawhar tak si kha mi hlimthei tak ang a ka lan alo tul a, zan mutmu erawh thawpikna hlir a ni si. Chuti chung chuan ka thawhrimna leh ka huaisenna chu engmahlo mai alo ni leh bawk a, nun hi engmahlo mai a ni, mifel pawh, misual pawh an thi ve ve dawn si a, nunna hi ka hua a ni, nunna hi engmah lo mai a ni e!
Hringnun hi thawnthu ang mai a ni a, suangtuahna in a thamral thin. Ka manghriat ruai te hi ka la hmachhawn zel a,duhtehlo mah ila he taksa ah hian rim taka thawk turin ka chen a tul a. Nun hi engmahlo mai a ni tiin thih chak ngawih ngawih thin mah ila tihtur tam tak te chuan ka nun chu anlo chelh ru ve hram hram a ni tih ka hre ta! Hringnuna thil harsa leh beihdawnthlak tak tak te chu ka thawnthu ti ngaihnawmtu an la ni ang a, a chhiartu ten chhelna ropui tak anlo la nei dawn a ni. Beiseina avangin nitin ka la thaw ve tawk tawk a, huaisenna nei turin hlimni leh lungngaih ni ka paltlang thin. Thuril tak tak hrechhuak turin khawhar ni leh lunglen ni te chuan min zem thin a ,engkim mai chu a hun te ah alo thleng zel a, retheih leh hausak ni te, tah ni leh nuih ni te.
Hringnun hi suangtuah na mai a ni,a zamral thuai thin. Ro phumruk ang erawh a ni lawi bawk si a, chu chu chak ber ber te damkhawchhuahna tual chu a ni. Nunna hi thil mak tak mai a ni. Engvang a lo awm nge! Hei hi ka hre reng thin, mak tak a siam kan nih hi!Hei hi ka mitthla ngailo a, ka suangtuah ngailo. Eng emaw atan a duan ka nih hi! Thuhruk theih tura siam ka ni a, nunna awmzia leh a kentel hlimna, hringnun hlimna mai piah a thlarau nun zawm pha hlimna zir tur te, min din chhan tihhlawhtlin te chu an ni.
Chuvangin nithar lo chhuaka min tibuai thei thil te hi min tifamkim tu te an ni. Lungngaihna avangin hlimna alo awm a,thatna avangin sualna. Nitin indo na ah awmin, hringnun hi indona hmun chu alo ni e! Chumi avang chuan midang te rual a nuih te, hmai hnih neih te alo tul ta thin a ni. Puitu awmlo a hringnun che thei reng renglo hmangaihna tuiptuia alo tluk phah pawh hi ka dem ta hran lo e. Tihian ti ila, midam tha sa te aichuan damlam pan mek te nun hi a hlimawm a,a nghet bik a ni.
Atawp berah chuan min siamtu Pathian hnenah bat tam tak kan nei. Ni alo chhuak a, zan alo thlen leh te hian zir tur tam tak min hlui a. Kan huaisenna chhe te hian taima taka zir tur alo ni. Mi tam tak chuan hma hun tihna avangin thih an inpeih diam thin a, hringnun huaisen tak erawhin a beilet thin. Hmuh ngailoh suangtuahna leh beiseina hi mi ropuite chakna a ni ang hian hmuhngailoh chu hringnun piah hi a ni. Chutah chuan min siamtu leh kei, hringnun alo awmna chhan chu pharh ala ni ang a, mihring hi pathian nena lengdun tur alo ni reng a ni tih kan hre tawh ang. Chhiar tu te Pathianin malsawm rawh se.
September 17th, 2011 at 11:17 am
A ngaihnawm khawp mai. (Y)
Tunlai chu in luangliam hlawm hle mai 🙂
Ivan chiar thiam hma bik vele hairehai 😉 :tlanchhe daih:
September 17th, 2011 at 11:41 am
A ril raih mai.
Hring nun hi a ho zawnga thlir chuan ho tak mai a ni reng a sin. Thi turin ka piang a. Kan pian ni atangin kan thih ni tur panin ni kan chhiar a, kan dam rei poh leh kan hah rei, kan thawkrim rahte lah chu thih hnu khawvela chhawm theih reng kan nei bawk si lo. Hringnun kan chan chhunga kan thawhrin rahte hi a thlawn mai zawng an lo ni e. Mahse, he hringnun ho tak mai hi A dintu duhdan a hmana, a dintu nena hman chuan a chhenfakawm a, hlutna a lang chhuak thin a, hringnun hlutna chu hmuhchhuahin a awm thin. ‘Lalpa’n in a sak loh chuan a satute chu an thawkrim thlawn mai a ni’ tih kha a dik ngawt mai.
September 17th, 2011 at 12:03 pm
Ni e, Hringnun hi kan hmanthiam, chhiar thiam angai reng ani. Ziak tha lutuk e.
September 17th, 2011 at 12:07 pm
Hringnun khawvel hi a mak ngawt mai! A dam tha leh chak tha apiang inngaihsak tawnna, fahrah leh rethei chhumchhia zawkten ngaihthah an hlawhna khawvel zuk ni fo a! Dam hi thlahlel miah lo mahila, kan hmabak hlenchhuah tur avang talin kan inti paukhauh fo tur a ni lawi si. Kan mawl emaw kan fing emaw kan hmabak tih tura lum a nih phawt chuan, engkim mai hi face ve thawr mai tur a lo ni e. Post ril tha ngun ngun khawp mai. Ka KZP ka rawn chhawng e i lam hawiin. (Y)
September 17th, 2011 at 12:37 pm
Ka ngaihtuah chhuah ni awm zawk tak a ni. A va tha thuai thuai ve. Dam reng ang che. KZP KZP…
September 17th, 2011 at 12:46 pm
He tisa thi thei(mortal body) chauh hi amaw nun nei leh thi thei ni a hria, Thlarau chatuana thi ve tawh ngailo tur nei tih inhre lo, chumi avanga engemaw hlek a mahni nunna chhat duh mai thinte hi, mi khawngaihthlak ber an ni.
September 17th, 2011 at 1:48 pm
A va ril in a va ngaihnawm em! Tiang lam ril deuh hi ziah tumin ka rilru kan tintuah ve thin bawk a, ka thiamna a la beitham deuh a ni mahna.. ka thiamna zawng zawng fâwk khawm pawhin ka la puitlin thei lo chu nih hi le.. ka la ziak ve khawp ang… Good Post
September 17th, 2011 at 2:23 pm
Zan ah vanlam hawiin han dak vang vang teh,tu emaw lo thlirtu awm tlat a hriat chuan he rilru hi a khawhar em em a ni! (L) Chulovah tunlai thangthar nun chau leh khawhar,mal ngawih ngawih ni a inhria te hian thih chak reng rengin khawvel hi an nih thin.An nun ram ka zu lut vel chu he rilru hi put alo harlo e.Thangthar te tan ka hlan bawk e 😀 (E)