Nikhat chu thian ten Canteen-ah min hnuk lut lui. Dawhkan pakhat kan kil dawn emaw tih nak alaiin, a hran theuhah an thu darh diak. Chhuah leh nghal mai ka tum a, ka zak deuh tawh si. Ka indap a, cheng nga thir tlang ka lo ak. Nula a lo kal nal nal a, “Eng nge ni ang le?.” Thingpui sen hang no khat leh zo chhang kan ngat le. A phei leh nal nal a.
Ka pawisa neih khan a thlum leh zo chhang kan bak a hen lo an ti tlat a nih kha, a hang ka dil mai loh nákah. Ka thiante ka melh ru a, a tui tui an ei nghawng nghawng. Ka bula tui bottle khan ka vawm bur chak hlawm zia kha.
An rawn dah thlap. Thingpui ka lem khawlh khawlh a, zo chhang khan ka vawi hnih peh bak a daih lo. Ka kut mawm hlep leh an rawn chhawpna plate-a mawm nên lam ka zut fai leng a, ka lu-ah ka thih mawm hmar. Pa min ti hlawm rem rem khawp ang. Nge mawl min ti, min en hrek hrek hlawm.
Ka thinrim deuh thut a. Ka cheng nga thir tlang chuan, an chala ‘5’ lang thawt thawt khawpa ben ka chák zek zek. A thente phei chu ‘Bharat’ tia Hindi-a inziak lang kawlh khawp a ben ka chák.
“Unaupa, i pek ai ka pek sak ang che.” Ka duh therte lo. I thawhchhuah pawh nilo, i nu leh pa hlep ruk khan min peksak ang maw? Engtikah nge i unaupa ka nìh a, ka nu hnute ringa i insawizawi ve? tia hauh deuh tur an awm lem lova. Mit pawng zawr zawr khawpin ka en a, ka pe. Ka chhuak hmak a, ka hmel an hmu khat leh khawp ang.
Chumai a ni lo, bike nên an rawn ri phei leh piat piat ang. R-15, Karizma an ti, ka hre seng nek love. Petrol a hek em mai, keizawng thenawmpa thing Thela nên ka rawn innawr phei tek tek mai ang. Cigarette inti leh maw? Silk cut, Navy cut inti a, Mizo cut a tui fe zawk. Van lampang hawiin ka tan khu tual ang a, lei lampang enin ka phuh khu luih ang.
Perfume an ti leh ta. Green Tea chu a hmeichhe hman chi, Oasis a rim a rei lo- an hming pawh ka hriat vawikhatna. Dangpuithu hman kuma ka dah that kha a la awm alawm, ka chawhmeh khawp ang. Ka ha ka rawn náwt hauh lovang, a rimtui khawp ang le. Retheihna zawng kil tin kil tang a fan zo a ni e.
Ha pui leh ha pui intauh ri bawp bawp khawp a damloh kha nia, hreawm zual chu. Mutna bulah tui thianghlim leh damdawi mum chauhvin min han nghak a, patling meuh pawh a patling lo lek lek fova. “Ka tum nge ruh saruh?” an ti maw? Saruh chu a ruh sa alawm tih mai a awl thin.
Thlasikah nise, vawt ti reng rengin thlasik ka thlah liam zak ang a. Ke-ar-tuiin mawngkaw hup chutin ka mu thlep hnuk ang a, damloh vang ni miah lovin ka khur ka khur ringawt ang.
Mahse e, retheihna hian mihringah min siam a, mi pangngaiah min din zawk a lo ni. Mite angin hausa ve ila, ka sual viau mai thei a. Mi fate neih ang nei ve ila, ka chapo mai thei. Ka neih chák leh duh ang ang ka nei thei lo hi, ka tan malsawmna an ni zawk.
Bike ka awh êm êm ka nei lo kha damna a ni a, bike-ah chuan ka thi dawn lo tih a chiang alawm. Pi leh pu ten, “Tui thiam tuiah an thi a, thing thiam thingah an thi thin.” an ti a ni lawm ni?
Chutiang a nih si chuan, Bike thiam bike-ah, motor thiam motorah, nula thiam nula-ah an thi dawn tihna a lo ni. Heng zawng zawng hi awlsam tein ka kal pel tihna an ni reng mai.
Retheihna khán min ti beidawng se, ka hlawhchham kumkhua tihna a ni ang a. Ka hlawhchham chuan, ka beidawng fo dawn si a. Retheihna khán hei hi min zirtir a, “Mi beidawng an hlawhchham a, mi hlawhchham an beidawng thin” tih hi.
Mite ka tluk pha ka ti hauh lo, mite angin ka finga ka ropui ka ti hek love. Mahse, vawiina mihring hi hmana mihring rethei beidawng duh hauh lo kha a ni.
Retheihna hian chhelna min pe a, taihmakna leh inngaihtlawmna chenin min zirtir a. Sual kawng zawh lo tur leh mi tumruh ni turin kaihruai hlauh a. Retheihna hi nelawm lo mah se, malsawmna tam tak a lo pai ru reng hi a lo ni.
It’s okay to cry as hard ang as long as you want to. Just make sure that when you stop crying, you won’t cry for the same reason anymore…..
October 5th, 2011 at 11:37 am
Ka like e, education hi a pawimawh reng a ni
Report this comment
October 5th, 2011 at 11:43 am
Chhiar zo tam, ngaihnawm e, post tupa ingaihsanawm hle mai
Report this comment
October 5th, 2011 at 11:52 am
ngaihnawm
Report this comment
October 5th, 2011 at 11:58 am
Ngaihnawm viau zel mai. Mitthlain ka hmu pha ruai ruai zel e..
Report this comment
October 5th, 2011 at 12:15 pm
A ropui e, post tha tak anih hi a..Post hi atam thin hle mai. Tunah pawh scheduled 5 a awm a, mahni blog ai pawn misual hi chu ka tlawh hawng zing zawk..post taima te u, vul zel roh u.
Report this comment
October 5th, 2011 at 12:22 pm
Adik ngawt mai. Keipawh ka retheihna hian ka nun hi a chhandam ka ti ve thin. ‘Bike ka awh em em ka nei lo kha damna..’ itih lai phei hi chu like bon top. Kan harsat mangan retheihna te hi chhandamna tluantling ni mah suh se, kan damkhawchhuahna ani letling tak2 ani. Amen amen
Report this comment
October 5th, 2011 at 12:23 pm
One is only poor when he chooses to be…an ti emaw ni kha…
Report this comment
October 5th, 2011 at 12:32 pm
A ngaihnawm viau e. Perfume lai tak hi kan belh ve teh ang. Kei pawh German siam AZZARO Roll on (zawk hnawih) hi ka nei ve mial a….a hma lam chuan Burma chhuak Top Country hi ka hmang ve thin a. Ka room a nula lo kal ho lah hian a changkan nen nen khawi a mi nge i neih a min ti teh fova. I lei chu a ni lo chiang min la ti zui. Shala…..changkang lo hmuh hian min va hmu ve le mawle….A nihna takah chuan ka lei chu a ni der lo. Sangthum man vel lai a ni awm e. Kan unaunu sap ram kal (lawnga thawk) in a rawn hawn a, a unaupa in a la lo laksak ka lo hijack ve leh chhawng a nia. Top Country ai chuan a rim chu a tui em aw ka ti a, mahsea rim a tak lo zawk a nih hi te ka ti mai mai….
Report this comment
October 5th, 2011 at 1:07 pm
I post chu a chapo khawp mai.Mahse chapo na tello chuan inrintawkna hi awm thei der silo a
Fuihna tha tak a ni.ka like e.
Report this comment
October 5th, 2011 at 1:23 pm
Nang anga tuarchhel leh tumruh hi mi ngaihsanawm in ni e.
Retheihna awmzia leh retheite dinhmun hrethiam tura retheihna min temtirtu leh min paltlangtirtu Pathian chungah hian kei pawh tun hnu hian ka lawm fo thin. A hun lai erawh chuan retheihna hi thian duhawm lo ber pakhat chu a ni chiang e. Amaherawhchu, kan retheih lai bera min duhsaktute kha chu dam chhungin ka theihnghilh ngai tawh lo thung.
Good post.
Report this comment
October 5th, 2011 at 1:25 pm
Pu SandmanL Pls check your mail
Report this comment
October 5th, 2011 at 1:26 pm
Report this comment
October 5th, 2011 at 2:18 pm
Like mawlh mawlh e.(Y)
Report this comment
October 5th, 2011 at 2:35 pm
A tha in a ngaihnawm e hei pawh
Report this comment
October 5th, 2011 at 2:36 pm
I ziak tha
Report this comment
October 5th, 2011 at 3:30 pm
Ava tha lehzel ve.
Rilru hah a hui pap2 te, lungngaia rum vawng2 chang te, mi chunga thleng tura kan dah mahni chunga a lo thlen chang te hian hriatthiam ava har thin ngai em…mahse ENGKIM in ta A lo ti tawh a. Kan ta ni miau hek le… nakinah A ropuina pawh kan tawm ve phal tu chuan engmah hi a thlawn in min tawrh tir phal ka ring love!! Duah mai a.:-D
Report this comment
October 5th, 2011 at 3:57 pm
a ngaihnawm e..when poverty come in the indoor,love goes out the window(retheihna chuan hmangaihna a hnawt bo thin) tihte pawh ka hre chhuak chuai alawm le.
Report this comment
October 5th, 2011 at 4:39 pm
Rethei taka lehkha zir ve tang tanga, a hnu a zir chhuak ta si lo hi ka hre nual a, an hrehawmna kha ka hriatthiam pui rualin harsa taka zir hram hram ho hi chu hlawhtling vek se ka tihpui khawp mai……
Report this comment
October 5th, 2011 at 8:11 pm
I sawi chhuak thiam hle mai! A ngaihnawm e. Nun a chawm bawk!
Harsatna hi mitin hian kan tawng theuh a keimahni tawk theuhah- tuar nasa nia inhriat chang a tam thin hle! A eng zawnga thil thlirmi nih tum tlat tur. Chutah tak chuan A puihna chang turin a thu kan AWIH bawk tur a ni ang. Tawngtaina thiltihtheihna leh Bible-a A thutiamte hi kan ring tlat bawk tur niin ka hre bawk.
Rethei viau mah ila ka hausa tlatin ka inhre thin, a chhan chu ka mamawh hi a tlem miau a. Chhungte hnen atanga dawn tur awm chu a la zia; kawng laka thingpuidawra chawlhna tur chiah nei chunga Colege kai tura Zawlkhawpui pan nite kha a hahthlak deuh chuan ka hria.
Incheina hi engahmah ngaih tur a ni lem lo. Ka retheihna hi miin hre mah se pawi ka ti der lo. A lang chhuak fo reng! Zah tur a ni lem lo!
Tumkhat, ” Kekawrtlawn i lo hak fo thin hi cricket khelnaa hak chi…. I siliper bun kha Bual Ina bun chi… Mi angin classah lo kal ve rawh” ti a min deusawh ve tu kha chu ka lainat khawp mai. Nunphung a hrechiang lo miau a. Incheina leh a behbawmah a luang ral ni ve ngei tur a ni!
Ka misual member, a inneih ni bakah Kamis ha lo pawh ka hria! A ngaihsan awm ka ti thlawt!
Retheihna hneh tur hian pawimawh lutuk- Amah a awm a nia aw.
Report this comment
October 5th, 2011 at 8:49 pm
Mahni phu tawka khawsak tum hi changkanna dik tluangtlam tak a ni bawk. Kan neih phu lova khawsak tum hian min ti retheih mai bakah kan zahawmna a tibo leh zual. Chutah tak chuan kan peng sual mai thin.
In leh lo engmah ni si lo nalh tak taka inchei tamzawkte hian thil an hresual duai a ni. Hip Hop, Rap leh Rock music ngainat changkannaa ngaihte hi a dik hlel viau! Mi huaisen leh hlawhtling ni tur hian rilru pau khauh a ngai a, midangin an tih buai mai mai theih loh nih a ngai reng a ni.
Mahni nihna diktak- ORIGINALITY hi hlauh hauh loh tur a ni. Kei ngei pawh hian ka VILLAGE BOY nihna hi tunthleng hian ka la hlauh miah lovin ka hre bawk. Hlauh ni ila zawng tun dinhmun hi ka thleng hauh lovang le! Chutiang bawkin nu leh pa, chhungte, in leh lo kan zahpui tur a ni lo.
You may be poor but people can find you like flower, beautiful but not aware of it!
Report this comment
October 5th, 2011 at 9:27 pm
@Ignatia…. i email check rawh….. ka out leh mai teh ang… mangtha ule..
Report this comment
October 5th, 2011 at 9:57 pm
Vawiin tlai chu kutdawh naia 10 ka puk bus fare tur a daih loh vangin.kutdawh pawisa puk in awm ve tawh em?????
He kutdawh tih ah bus stationa guiter nen a zai a indawh a ni a ka pe ve fo a piah ah chuan ATM a awm tho a sum ka lak chuan dawr neitu ten comission cheng 8 helam cheng an ei dawn vangin mahni bank ah ngei lo lak a tam duh si bawk nen pawisa 10 puk a hlawk zawk hahahahahaha
Report this comment