mi(sual).com

Ka thu sawi tur hi a tak tak a ni a, amah Dawngte-a phalna ang ngeiin, anihna ang ang a rawn post a ni.

CHHIARCHHUAK HRAM RAWH
Dawngte a hi kum 2004 Deceember atang khan tun thlengin Christian Hospital Serkawn ah a kawng a chin hnuailam che thei lovin a awm tawh a. Vawiin hi a Birthday a ni a, chhunah ka zuk tlawh a, ‘Thu Ngaihnawm Huang’ chanchin ka hrilh ve atangin ti hian ama sawi ang ngeiin a chanchin hi he huangah hian rawn tarlan ve kan duh ta tlat a, kan rawn post ve a ni e.

Amah Dawngte a nen hian thisen a inzawmna nei lo mah ila, U anga min en ve tlat vang leh kan inkawm ngeih ve tlat avang hian ka phak tawk tawkin ka buaipui ve thin a, in entir, inkhawm, chawei khawm leh tawngtai damthei pan tih vel in hmun hrang hrangah, kan in paw kual ve tawh a, Aizawlah te pawh kan hruai tawh nghe nghe a, a rem chan angin detail zawkin kan sawi zelbturah ngai ila, he post in chhiar atang hian in khawngaihin in theih ang anga tawngtaina ah te pawh in lo hriat ve ngei hi kan beisei tlat a ni. Tin, amah lainattu a piangte hi a chhungte in ni tih in lo hre dawn nia.

Dawngte-a chuan ka hnenah tihian a chanchin mi hrilh a: Lunglei thlang Lalnutui khua a awm kan ni a, unau 4 zinga upa ber ka ni. Kan te ber kum khat pawh a la tlin hma in ka nu leh pa te hi an inthen a, ka pa kan bel a, mahse nupui dang a nei leh ta bawk si a, kan unau chu kan vakvai tan ta der a ni.

Ka naute chu mi hrang hrangin an la darh a, kan te ber an hruaichhuak tur tap vawn vawn ri kha ka ngaihtuah chhuah a piangin ka tap leh dawn thin. Tichuan, kei chuan ka Ni te ka bel ve thung ta a. Ka ni pasal hi Mizo ani lo va, mahse a fel khawp mai. Naupang dang angin thian kawm leh infiamna hun hi ka nei ve vak lo a, lehkha pawh ka zir ta mang lo.

Ka ni te hian Truck an nei a, ka zui ve thin a, contract thawhna ah leh supply phurhna velah an driver vai ho zingah chuan ka tal ve ta chawt a, hetatang hian vaitawng pawh ka thiam phah a ni ( nal takin Hindi in a tawng thei tlat) Naupang mai mah ni ila hna ka thawk tam ve em em a, naupang dang angin thian ka kawm hman meuh lo, chak viau mah ila hun awl nei miau hek lo le, Huan te ka en kawl a, kel ka veng bawk thin a; tin, truck ka zui thin avang hian in lum ai in, khawkar kawng vel a, labour ho camp vela ka riah hi a tam zawkmah awm e.

Chutih rual chuan Ina ka awm phawt chuan inkhawm ka thulh ngai bik lo a, naupang te mah ni ila, Biakin dar vuak leh Biakin phiahfai hi ka tih turah ka dah tlat a, ka thulh ngai lo.

Ka pa hi tunah Tlabungah a la awm a, ka nu hi chu Lungleiah a awm a ni awm e, ka nau te hi pakhat Tlabung ah, Pakhat chu Aizawl-ah, pakhat dang chu chhim lamah sawn a awm a ni awm e. Tlabung a ka Pa hnen atanga kan in thendarh hnu khan kan inhmu leh tawh hlawm lo va, in hmu mah ila kan inhre tawh awm si lo, an lian ve tawh viau ang. Ka naute hi ka ngaihtuahin ka ngai thin tak tak a ni, Pathian zarah kan la inmuh leh ngei ka beisei tlat (a mittui a tla a, a ngawi leh rih a, Coffee ka zuk lam a kan han in dun leh te te a)

Tichuan, a sawi zawm leh ta a: Vanduai tur renga piang ka ni aniang te hi ka ti thin. Nikhat chu Kel ka venna ah ka tlu a, ka ke ka tina ta tlat mai a, dam mai lovin a septic zui a, Lunglei Civil Hospital-ah min dah chho ta hial a, rei vaklo ka awm a, ka chhuak ve leh mai a, mahse a hnu lawk ah kan inkhelhna atangin ka ke chu a rawn na tha leh ta tlat mai, ka zung thei ta miah lo bawk a; tichuan, a rang arangin Christian Hospital Serkawn-ah min dah chho leh ta a.

Damdawiin kan thlen chuan ka kawng achin hnuailam chuan na a hre talo a, ka che thei ta miah lo mai a, ka mang ava han ang teh reng em, ka zun leh ek takngial pawh ka hre talo. Zanah chuan ka tap zawi zawih ringawt mai a ni. Nu leh pa Unaute ngaih a na khawp mai, mahse tumah hmuh tur an awm si lo.

December thla a nia, hemi kum Christmas hi damdawiin-ah ka hman vawi khatna a ni a, tun thleng hian kum tin ka hmang ta ziah a nih hi a mak thei khawp mai, mihring hian kan hmalam hun kan va sawi theilo tehreng em! Ka khawhar lutuk hi ka tap ru reng mai a ni, ka zak ve bawk si. That lam ka pan thei si lo, Nu leh pa Unaute awm si lo chu ngaihsak reng theih ka lo ni ta lo a, chhungte tan pawh tlawh reng aharsat chin alo thlenga, ka khua a har thin ngei mai, dam lo dang an chhungten an rawn kan a an enkawl ka hmuh te hian ka thik lek lek thin.

Tichuan, hun a lo kal zel a, that lam ka pan thei ta chuang silo; damdawiin atangin chhuak ila in lamah enkawl ngaihna ka awm si lo, khumah ka mu tawp a, engkim tihsak ngai ka ni bawk si; tin, han pan tur ka nei mai tawh chuang si lo, ka awmman lah keia tan pek rual a ni si lo, mahniin khawhar takin ka tuar ta tlawk tlawk mai a ni.

Mahse Pathian hi a tha em a, min hmangaihtu Doctor leh Nurse te min pe zel a, Bill pek tur nei lo mah ila ka mamawh ang treatment min pek an thulh chuang lo. A ngai rengin min duat a, tun thleng hian an chungah vuina tur ka nei lo, an chungah hian ka lawm tak tak a ni.

Tin, an zarah midangin ka chanchin an lo hre ve zel a, hmelhriat leh thian lainattu ka tawng ve ta zel bawk a, (kei nen pawh kan inhre ve ta a, kan inkawm ngeih nghal ve mai a ni) Serkawn Baptist Kohhran phei chuan ka awm man bill engemawzat min pek sak ta hial a, an chungah ka va lawm em; tin, thilpek ka mamawh ang min petu hi Pathian zarah an awm ve zel a, engmah hi ka nghei tak tak bik lo, thiante tih tur pawh ka nei ve teuh tawh mai, mimal pawl leh Kohhran anga min tlawhtu leh tanpuitu tam tak ka hmu tawh bawk a ni. LALPA chu fakin awm rawh se.

Mahse vanduaina hi ka chungah a thleng duh bik emaw ni tih turin harsatna dang dangin min tlakbuak leh ta tlat mai. Dam lo chutia khuma mu ta reng chu natna dang dangin min bawm a, Zai pui vawithum lai ka tawk der tawh a ni, ka mit a lungte awm an paih a, ka rilphir an paih tawh bawk a, ka kal an zai tawh bawk, mi pakhat naupang te lehnghal tuarah chuan nasa tak a ni ve a sin. Mi te chu an zai dawnin an chhungten an rawn awmpui liam liam a mahse keichuan chhungte awmpuitu ka nei ve ngai meuh lo a, mahse Pathianin min hre reng a, thiantha min pe zel tho.

Ka U ka tih mai tuna ka chanchin sawi mektu leh Zotlanga ka chhungte chhar chawp te hian min awm puiin min riah pui ve mai thin a, ka khawhar lutuk lo ve; tin, inkhawm, hmundanga in entir, tawngtai damthei pan, leh a khat tawk a ka lenchhuah ve tum te, pawn lama chaw ei khawm tura chhuah a tul chang pawhin kalna tur Motor hi ka hmu ve zel tawh mai nia.

Ka U te leh thian dang te hian min paw chhuak ve lawp lawp mai zel a; tin, hmundanga inentir a ka kal te hian Doctorte hian a man an la ngai mang lo a a,ka lawm thin tak tak a ni. Ka mamawh min lei sak a, thilpek min petu hi an awm ve zel bawk a, a mak ka ti thin zawk. Tin, damdawi in atang hian ziak leh chhiar engkim a lo zir theih vek mai tih hi keimah ah hian a chiang khawp mai. Ka ni te leh chhungte dang pawh hian min rawn tlawh ve ta fo mai, ka ni pasal phei hi chu ka chungah a tha ka ti thin khawp mai.

Ka nat rei tawh avang hian ka ke te hi chu a kawm in an te em em tawh a, ka zun hi siak reng a ni bawk a, min hmangaihtu Doctor leh Nurse te kutah ka innghat pumhlum tawp a ni ber e. Tin, mu reng ka nih avangin ka in delh pan na hi dressing ngai ka nei reng bawk a, heng hi in tawngtaina ah min lo hriat sak hram teh u.

Vawiin hi ka kum 21 na niin damdawiinah kum 6 chuang ka lo mu reng tawh bawk, mihring tak chuan lungawi hi a har ka va ti thin em, ka naute pathum kha eng tiat nge an nih ve tawh ang a, engtin tak tunah te hian awm ang maw. Ka Birthday te hi an hre der awm si lo va, keipawn an Birthday ka hre bik chuang hek lo, mahse ka Piangthar tawh a ka vui lo e, ka natna hi min hmangaihtu Pathian min pek a ni tih hi ka pawm e. Nakinah vanramah chuan natna awm lovin hlim takin ka la zai ve dawn a ni. He leiah pawh hmangaihtu tam tak min pe zel a ka lawm tho mai.

Mak ka tih chu min lainattu mak tak mai a ka tawng leh tlat thin hi a ni. Keia damlo khuma mu rengin ka beisei phak miah lohin Aizawl hmuhna hun remchang kan hmu tlat mai te kha! (a tan chuan ropui tak a ni, ka rawn hruai nghe nghe) damdawiin a rawn awm ve Officer pakhat Pu Hruaizela (Daduhi U) leh Bazara mi Pu Vena ten Hruaitu tur i neih phawt chuan Aizawl-a CT Scan i tih na tur senso kan tum vek ang an rawn ti hlauh mai a, ka phur kher mai.

Ka dam chhunga Aizawl vawikhat tal hmuh hi Pathian hnenah ka dil thin a, a chhanna ka hmu ta. Ka u leh Nurse min duat em em tu U Mazawngin min kalpui a, U Muanpuian petrol manchiah in tumin a Taxi a thawh bawk a, kan kal ta a, Trinity clinic a Doctor leh thawktu dang fel zia te kha, CT Scan mai duh tawk lovin MRI in a thlawnin min check vek a, in entirna man an la duh miah lo; tin, rawn kal nawn a buai thlak vawiinah zo law law ang an ti avangin kan thlen niin min en nghal char char a, zan dar 9:30 ai a rei mah keimahni vangin an in hawn phah nghe nghe.

Tichuan, a tukah Aizawl te fangin Durtlanga Pi Sangpuii Thlan in te ka han hmu ve hial a ka lawm tak tak a ni. Millenium Centre a kan bazar a, thawmhnaw tlawm tak tak a min pe tu leh pawisa min petu te chungah te khan ka va lawm em. Tichuan, Tourist Lodge Chaltlanga kan thlen man leh chaw ei man min tlawm te kha ka tan chuan hlu tak a ni, khawlai lun laiah puak ka ngai si, kawng cross dawn a min lo pui thin tu kan hmel hriat pawh ni lo te leh Traffic Police te kha kan tan chuan hlu tak an ni. Chhungte hi ka lo va ngah em, tuna damdawiina min tlawh a, ka mamawh min pe thin tu te hi ka tan chuan Vantirhkoh ang an ni ka ti thin.

Ka dam chhung hun chu Damdawiina hmang tur ka ni tih hi ka pawm tawh a, in zavaia tawngtaipuina ka ngen mawlh mawlh a ni e, ka chhungte, ka ni te ho pawhin min rawn tlawh ve fo a, ka ni te chhungkaw chungah lawmthu sawi tur ka ba nasa hle in ka hria, thiantha hmelhriat tam tak Pathianin min pe zel bawk a ka va lawm em.

Doctor leh Nurse ho mawlh hi ka chungah an va tha em, damdawiin fa chuam ang mai in min enkawl thin hi ka lawm tak tak a ni. He ka chanchin lo chhiartu zawng zawng te in mi tawngtaipuina ka ngen a, ka naute ka dam chhung ngei a ka hmuh leh ngei theihnan min lo tawngtaipui dawn nia, sawitur tam tak a awm ang, mahse a sei lutuk palh a nge, in za vai chungah ka lawm e.

THU BELH: Dawngte a hi mihlim thei tak Pathian hre tlat leh zai ngaina em em a ni a. A dinhmun anga ding heti taka a hlim thei hi a mak ka ti a, kan tluk lo hle in ka hre thin, a chanchin thenkhat a sawi khawngaih thlak tak tak leh nuihzatthlak tak tak hi a awm nual a, mahse sawi vek sen a ni si lo, Christmas an ward a vai pa pakhat nen chauh a an hman tum a a khawhar zia te a sawi a; tum khat lir a nghin chiam tuma an tlan chhuah san vek tuma a tlan ve thei si lo mangan zia te a sawi a, kan han nui dun leh rih thin.

Durtlanga Pi Sangpuii Thlan kan tlawh tuma Step-a ka paw chho kan hah zia te kan sawi a a hlimawm lehling phian mai. Tuna a chanchin tlangpui kan han tarlan te hi, a hun te hlim tak a a hman ve nan a kan tawngtaipui theih nan leh kan vanneih zia kan in hriat chhuah theih nan hmang theuh ila tih hi kan duhthusam a ni e.

A mah lainattu tam tak ‘Misual.com’ ah in awm tih kan hriat hian kan lawmin thla a muang huai e, a chhungte hi dem vak theih an ni lo va, harsatna lian tak an tawk ve a ni ngei ang tih hi rin sak zawk i la; tin, a nu hi hmeichhe thatlohna a neih avangin a buaithlak nachin a awm ve a ni ange. Tin, amah lainattu a ma sawi dan in Chhungte Thar Pathian in a pek belh zel a, hei hi a lawm em em a ni.

Thil pakhat ka khawngaih leh em em chu, July thla vel khan Nurse zir thar tur mi 20 an la thar a, Aizawl lam atangin a Nau hming ang chiah Tling ve a lo awm a, phur em em in min rawn hrilh a, min zawn chhuah sak rawh a ti a, ka va zawt chiang a mi dang daih a lo ni si, a hrilh hai hmel kha, ka mittui a ti tla lo thei lo, mahse a ni chu Pathianin a awmpui a, a nui veleh thei mai zawk a, amak ka ti khawp thin mai.

Amah Dawngte a hmutu leh hre chiang tan chuan theih ang kawng kawnga tanpui loh hi a har em zawk a ni. Tin, a chhungte hi kan dem lo hram dawn nia, engemaw tak harsatna a nei a niang tih hi rin sak ila. A natna hi a chetsual vang ni lovin thildang vang zawk a lo ni tih Dr. Judy Trinity Clinic ami khan kan rawn entir tum khan min hrilh a, phai lama Doctor thiam zawkte pawh heng CT Scan leh MRI result hi a entir vek tawh a ni.

Mahse amah Dawngtea hi chu a natna dik tak hi engmah kan hrilh chiang duh ta rih lo tih hi kan hriat a tha awm e. SSA atanga Wheel chair a dawng leh Matress Electric Current hmanga tih puar theih dam lo mu rengte tan bik a hman tur a a dawng thar a a lawm em em a ni tih hi ka sawi duh bawk.

Bible chhiar a peih em em a, tawngtai mi a ni bawk a, a mut hmunah hian a zai ret ret peih reng bawk a, kan tluk lo khawp zawk mai. Naktuk hian a Lu Met turin kan in paw chhuak leh dawn a, pawnlam boruak han hip te hi a chak ve thin a, nuam a ti leh khawp ang, in awmna hmun theuh ah in lo hre rengin in lo lawmpui ve dawn nia, amah hria a ngaihsaktu te hi a ro hlu ber te an ni si a.

Facebook-a THU NGAIHNAWM HUANG GROUP chuan Dawngtea unau tehi zawnchhuah saka hruaikhawm sak turin hma ala mek a; tin, mi inphal te hnenah Vehbur a khawnsak mek bawk a ni.

DAWNGTEA CHRISTIAN HOSPITAL SERKAWN A AWM MEK Tanpuina pe duh tan LUNGLEI lamah:

John Hrahsel
PHE,LWSM Division
Venglai Lunglei
Ph.9862716435 hnenah leh AIZAWL lam leh hmundang a awm tan SBI A/C ah emaw post ofice atanga TMO emaw,sumo ah emaw rawn thawn duh tan ka hnen ah:
R.Lalhmangaiha
C/O R.Thangkhuma
Kulikawn,796005
H.no: 3/x/52
Ph 9612839836
SBI Ac No: 31716057716
ah tun thla chhungin a pek khawm theih e.Tlem lua awm lo,tam lua awm lo remchan ang ang ani mai.

This entry was posted on Tuesday, October 11th, 2011 at 6:00 pm and is filed under Health, Information. Both comments and pings are currently closed.