mi(sual).com

(Series 1)

 -    Dr. Zokhuma (Vety)

[Mizoram Civil Pensioners Assoctiation Annual Magazine 1996-ah a chhuak tawh a, MUP Tlangau-ah pawh a chhuak tawhin ka hria. Tin, MPWD S.A Association Souvenier, adt., ah te  pawh  chhuah a ni tawh in ka hria.]

Mizoten record kan neih mumal loh hrerengin, keima mimal hriat leh ka dap khawm theih ang ang ka rawn tarlang ve a, dik lo leh kim lo apiangah a hria te chuan chona angah lo ngai ngei turin ka sawm bawk a ni.

Mizoten TECHNICAL deuh bera kan hriat Engineering(P.W.D) lam lo luhchilh hmasa dawn ila.

Mizorama British lo luh (1890) Chhim leh Hmar District pahnih a min awp chhung chuan PWD hotu-ah District Engineer te pawh an awm thin a. Kum 1898-a Lushai Hills District pakhat Assam hnuaia Superintendent hova kan awm chinah  tih danglam a ni ta. Bawrhsap ber chu PWD thuneihna sang tak (Superintending Engineer ang) pek niin, Technical mi tak chu Supervisor (SDO ang vel) chauhvin an ho ta a.

Mizorama PWD hna hmasaber-ah chuan thawktu (mistiri) te chu Khasi leh Punjabi te anni ber. Contractor anga kan hriat hmasakber tr pawh Sohan Roy (Khasi) leh Indar Singh (Punjabi) te anni. Lungchher hmasate pawh Khasi anni.

Superintendent hnuaia PWD (DC PWD tia vuah tak) ten lamlian enkawl chungchanga an hman kumkhua tak “Melveng System” pawh kha District Engineer hmasaber Mr.Hodgkins-a lo duan chhuah a ni. Lamlian dungah a khat tawkin Melveng te chu Mel Upa hovin an awm thin a. Road Mohurer ( tuna Section Assistant nita) ten Labour thenkhat leh Melvengte chu bial chin neiin an hova, chutiang engemaw zat chungah Overseer (tuna J.E nita) an awm thin ani.

Mizo Mohurer hmasaber Pu THANGSAVUNGA CHONGTHU hian kum 1900-a thawk tan angin Pu Zatluanga Mizo Chanchin (p209)-ah kan hmu. A fanu la dam, Pi Thangi(86), Durtlang Vengthar sawi dan chuan a pa hnathawhna Taitaw Bangla-ah kum 1910-ah piangin, Lunglei atanga a chawlh chuan nula a ni tawh a ti. Durtlanga inlo bengbel tura bansan a dil hnu kum khat lai Tuichawng Lei dawh zo turin an chelh tlai ani a ti bawk. Tunlai Work-Charge ang hian pension a la awm rih lo.

A hun lai midang chanchin kan hre tam lova, a hnu lamah chuan lehkha zir sang deuhte pawh an lut belh zelin, Lunglei lama Pu Darruma ang te kha Overseer-in an pension ngei mai.

India independent hnu kum 1948-a Assam Engineering School, Gauhati-a an hawn hmalam zawng kha chuan India hmarchhak Dacca-a Asanullah Engineering School kha a awm chhun ni awm tak a ni. He institute-ah hian Subordinate Engineering Course chihnih, Upper (Overseer kum 4 course) leh Lower(Sub-Overseer, kum 2 course) a awm a. He School-a kan Mizo tlangval lut hmasaber chu Pu THANGNGHILHLOVA RALTE [L] kha a ni.

Kum 1912-a Govt. High School , Shillong atanga Matric a pass hnu-ah zirin 1916-ah Sub Overseer pass hmasaber a ni. Kum 1917-ah Sawrkar hna a thawk tan a, kaisanna scope te a awm loh avangin kum 1950 bawr vel khan Overseer-in a pension a. Kum 1954-1960 inkar khan Community Project hnuaiah Aizawl leh Lunglei-ah re-employed niin a thawk zui leh a ni.  A ni dawttu hi Pu RUALKHUMA (Rev.Zairema Patea), Indopui I-na a War Service candidate angin Matric pass lova Sub Overseer hi zir chhuak niin a lang. A zir chhuah pawh 1920 hnu lam ni ngeiin a lang. A ni pawh kha Assam hmun hrang hrangah te thawkin Overseer bawkin a pension a ni.

Kum 1934-ah chuan Pu KAPBUANGA KHIANGTE khan Overseer puitling kum 4 course chu a lo pass ta a, Mizo Overseer pass hmasaber a ni. Mizoram leh Assam hmun dang dangah thawkin kum 1951-ah SDO, PWD niin Halflong PWD Division-ah a awm tawh. Mizo SDO,PWD kai hmasaber a ni leh bawk. Mizoram PWD Division hnuaiah Kolasib leh A-L (Aizawl-Lunglei) Road Sub-Division-ah te kum engemaw zat  rawn thawk vein, Mizoram pawnah transfer leh a ni a. SDO-in a pension ta.

A ni hnungah hian Pu S.LALNGHINGA (EE Rtd., Chanmari) leh Pu LALHMUAKA HRAHSEL (SDO Rtd. Chanmari) te hian an zir ve leh a. Pu Lalhmuaka hian Sub-Overseer kum 2 zir a pass a, Pu Lalnghinga hian Overseer kum 4 course zir zovin finalah a fail thung a ni. Tunah tlangval takin an la dam dun.

Kum 1948 August thla khan vanneih asiamin Dacca-a kan mi hmasate lo zirna sikul hi Mizo Police thianten min fan pui ve tlat.

Kum 1948-a Assam Engineering School, Gauhati-a an hawn rual hian Mizo tlangval pali an lut ve nghal a. An zinga pahnih, Pu K.M.THANSEIA (Rev.Zairema nau) leh Pu LALZUIA (Dr.Zoremi Pa) chuan kum 1951 khan Overseer pass chhuakin Pu Kapbuanga dawttu te anni. An inkarah kum 17 zet a tla anih chu.

Pu K.M.Thanseia kha Shillong Govt. High School atanga Addl.Maths nen Matric First Div. pass, King Scout ni bawk, Indopui-2 na a Army Supply Corp-a Ex-Subedar, PWD Clerk thawk leh mek a ni a. Pu Lalzuia lah Textile Clerk thawk lai, nupui fanau nei diah tawh hnu a ni a. Khati taka rilru puitling sa a Overseer zir chhuak kha anni bawk nen, anni thian dun kha chuan Mizoram Technical (PWD) pawh a nghawr tham hle reng a ni.

Tun hmalama Overseer ten an Mohurer te hriat ve phak loh anga technical thil an lo zep thin ang zawng zawng kha an rawn tlangzarh ta ani ber mai. A lo bengkhawn peih deuhte chu in lamah te hial an zirtir peih ta mai a ni. Chuvangin an hunlai a Mohurer te chuan an chhawr nasain, kawng inhawng thar zel te vang nen tam tak SDO te thlengin an chho ta a ni.

Pu Thanseia Assam PWD hnuaia Halflong Division-ah reilote thawkin Aizawl Division lo chhuak hmasa-ah a rawn tel ve zui a. Pu Lalzuia, DC PWD hnuaia awmin Aizawlah a lo awm bawk a. An thiandun khan Mizo District Council ding tir leh Community Project awm tir te kha an tanpui nasain an insak tam ber te kha an mahni kutchhuak a ni kan ti thei ang.

 Mizoram RCC Biakin hmasaber Mission Veng ami pawh Pu K.M.Thanseia thurawn angin sak zawh ani a. A tawpah lawmman an offer leh a la duh si lova, an Upa te hrilhhai tur hnem nan kum khat Sande Sikul kal kim angin ziak turin a ngen a, an in then ta a nih kha.

Mizoramin Development hmel kan hmuh ve tirh lai TECHNICAL lama kan pachhiat zual lai taka zir chhuak anni bawk a, anni thiandun ang tlauka OVERSEER lar leh mi hriat hlawh kha thil awm hauh thei tur a ni tawh lo. Pu THanseia kha Lunglei lama SDO anih laiin Road Accident-in a boral a; Pu Lalzuia pawh SDO bawka pensionin Bombay-ah a zuk boral ve thung.

Overseer pass hmasaber leh a dawttu te kum 17 laia an inhlat laiin MIzo Engineering College rap hmasaber  Pu DURRA CHONGTHU leh a dawttu Pute ROBULA PACHUAU leh KHIANGTE THANGZUALA te chu kum 30 zetin an inthlau thung. Pu Durra khan 1925-ah Cotton College, Gauhati atangin I.Sc First Divisionah passin Bengal Engineering College, Sibpur, Calcutta-ah B.E a lo zir daih mai. Mizote tana vanduaithlak takin a zir puitling lo hlauh.

Pute ROBULA leh THANGZUALA te hian Assam Engineering College atangin, Pu Robula (April) leh Pu Thangzuala (Nov) 1960 khan B.E an rawn pass ta. Mizo B.E Pass hmasaber anni.

India Independent hmalam hun kha chuan Mizoram Bawrhsap hnuaiah, Supervisor hovin Overseer leh Mohurer tlem an awm ve chauh kan tih tawh kha. India 5-year plan hmasa zarah kum 1952-53 khan Assam PWD hnuaiah Aizawl Division chu Silcharah an rawn hawng ve ta.

Kum 1953-ah Aizawl Sub-Division (SDO Purkayastha ho) Aizawlah an lo chhuak hmasaber a. Hetah hian Pu Thanseia pawh lo tel ve thuaiin Kolasib tlangdung motor kawng, Kawnpui-Sairang inkar ang te hi ama zawn vek kan ti thei ang. Laipuitlang tuikhuah hna a enkawl tel thin bawk. Division puma Mizo technical lam awm chhun a ni bawk (Pu Zuia kha DC PWD anih kha) a, An EE A.K.Kundu nen pawh an inzui dun nasa hle thin.

Kum 1954-ah Lunglei leh Aizawl-Lunglei Road Sub-Division te an hawng leh a,kum 1956-ah chuan Silchar atangin Aizawl Division Office pawh Aizawlah an rawn sawn chho ta ani. Mizo Overseer pawh an lo pung ve ta zel a ni.

Mizote hi Technical lamah hian kan lo hnufual rei bik hle mai. Kan mi hmasa fal ten an lo hlenchhuah loh hlauh thin vang kan ti deuh awm e. EE lo chhuak hmasaber A.K.Kundu AMIE chu, Khasi F.Kharkhongor, B.E-in a rawn thlak a. Khasi vek N.Rynjah, AMIE-in a rawn thlak leh a, a dawt lehah pawh Khasi bawk Hector Roy, B.E a lo chhuak leh a ni. Chung lai chuan Shillong tlanga Assam PWD hotu ber pawl, S.E/Addl. C.E hna lo chelhin Garo Sangma a lo awm tawh a ni. A hnuah Assam Chief Engineer a ni zui ta nghe nghe.

Keini Mizo B.E hmasaber ten 1960-ah an pass ve chauh kan tih kha. Zoram Technical (PWD, PHE & P&E) lamah hnamdang awpin kan awm rei hle. Kan B.E hmasaber leh sulsutu ni chho ta zel Pu ROBULA chuan Mizo EE hmasaber 1965-ah kaiin, UT chinah a hotu ber chhang dawltu a ni chho zelin kum 1985-ah Chief Engineer hmasaber a lo ni ta. Commissionerin a pension. A dawttu Pu K.Thangzuala pawh CE pahnihna niin, Commissioner bawkin a pension leh a. Tunah chuan hnamdangin min la pawlh ve hle tih chauh a ni ta thung; RAM TAN I THAWK TAK TAK TAWH ANG U.

Similar Posts:

• Mizote leh Sawrkar Hna ( Civil lam thung)- Dr.Zokhuma (Vety) Rtd., Chawnpui.
• Mizo Technical Graduate te !
• Mizo Love Song Hmasa ber “Tleitirah Tleitiri” Vrs “Annie Laurie”
• CCPUR ah Kawnpui khua Veng fai ber
• Zirlai 1588 in technical course seat 239 inchuh dawn

Recent Posts:

• The Alaskan serial killer
• Thanglian, Aw…… Thanglian !
• CFL Hmingthanga Thihcham Vawikhatna Pualin
• NGAIHNAWM KAWLEKSAWN – 2 :
• Pathian Kut Dinglam {Sunday Pual}

This entry was posted on Wednesday, October 12th, 2011 at 7:30 am and is filed under Copy Paste, Information, Mizoram. You can follow any responses to this entry through the RSS 2.0 feed. You can leave a response, or trackback from your own site.