Teh tawp mai a! Mi ang chiah lo ka nih duh hmel viau mai.
Nia, mi ka ang chiah lo te pawh a lo ni mahna, ka pangngai lo miau si a le. Hetiang ka nih tanna hi kum tam fu a lo ni ta.. Engpawhnise, a chhan leh vang ka han sawi dawn teh ang.
Furpui nat kum, khuangruahpui sur avanga harsatna tam tak a thlen kum a nih vang pawh a niang, Favang hun nuam leh boruak thengthaw nuam tak kan han chuangkai leh ta chu, rilru a hlim surh mai a. Tlangval rilru thawveng keini ho rual tan phei chuan enghelh reng kan nei lo. Khawchen thin vanga nula rim thulh a ngaih zan vawi tam kan paltlang tawh a, tunah zawng hun khirh kha a liam ta si.
October thla arkaiden zan a ni a, duhthusam ai maha tha zawkin khua a thiang a. Lungrun theih tawpa a mawina zawng zawng phochhuah ngei tum niawm takin Chhawrthlapui chu kawlah a chhuak tan ta phut mai!
A eng no teh ang chu! Chhan leh vang awm lem lo tan pawh tih deuh nghulhna tur a ni ve hrim hrim. Chutih laiin he hun Tlumtea thlir taka lo thlirtu tan phei chuan zan duhawm a va ni teh lul em! Helhhawlh avanga zanriah pawh ei thathum thei tawh lo, ka tan ngat phei chuan sawi ngaihna tak pawh a awm lo a ni ber zawk e…
Kei, hmangaihna sawifiah thiam ve lo hian sawifiah lo tul ta thut ta ang se, ‘A laka ka rilru put dan hi hmangaihna chu a ni,’ ti-a ka kawh mai tur mihring nen hun hlu tak hmandun kan tum zan a ni a, ka phur tawh takzet a ni. Khawvela ka hmangaih awm chhun, ka damchhunga ka phatsan tawh ngai loh tur leh min hmangaih ve em em tu a ni miau alawm le. Chhawrthlapui hi kan tan a lo hlu tawh thin a, kan inkar hmangaihna min hriatpuitu leh min nemngheh puitu rinawm tak a ni tlat thin bawk.
Kumin Full Moon lawm kan tum dan phei hi chu kum dang zawng aiin kan urhsun a, a chhan chu thlaleh lo awm tur maiah hian ‘Kumtluang atan’ ti-a inkutsuih kan tum ve tawh vang a ni. Palai te intir fel tawhin phur taka inbuatsaihna kan kalpui ve ve hunlai a ni.
Nulat tlangval hun hnuhnung a ni tawh dawn a, damchhung sawi tling tur khawpa hun hlimawm hman kha thil tihawm tak a ni ve reng a. Dam te-a kan awm a, tum anga hun a inher chhuak a nih ngai chuan vanglai hunte a lo la liam ve anga, kan la ngai dawn si a… kan ti a ni.
Tichuan, phur takin ka chhuak a, phur tak veka min lo dawngsawngtu turte run lam chu ka pan ta a. Veng hran daiha kal tur ka nih vang leh kar a hlat deuh avangin hmanhmawh rilru takin ka pen sauh sauh a. Hah reng ka hre lo. Veng hrang hrang pathum lai ka paltlang hnu chuan ka kal tumna veng ramri ka lut tan ta a..
Khaih khaih khaih…
Lo ngaithla theuh rawh u,
Veng chhung chhiat tawh thu ka han puang ange.
Tun maiah khan ……… a boral a!!
Veng chhung mipuite kan inhriattir a ni e.
……………………………………
Karei!! Ka bing mup mup mai. Ka tlan vak tih ka la hria, ka thlen dan ka hre tawh lo. Mahse, ka thleng hlawl. Mi an lo phu sup sup. Ka au ruai ruai. Dawt ni tlata ka hriat kha a lo dik si tih ka hmu… Ka ngawi. Tin, ka khawvel a tawp ta!
Kha zana ka mualpho dan zawng zawng kha sawi vek dawn ila, mahni mawng hlim mai ka ni dawn si. A chhan chu ka patling thei mawlh lo a ni. Tin, chiangkuang takin ka hre lo hrim hrim bawk. Mi tam fe hian min buaipui a, eng eng emaw min hrilh teuh hlawm tih ka la hre thei.
Mahse, ka hmui hian chhang let turin chakna a nei lova, ka lei hian a thil thiam hi a hmang thei tawh lo. Nih dan pangngaia a tih ngei ngei tur ka mit hian mittui reng a pechhuak thei tawh hek lo. A sakruang rial ang dai hnu melh ringawtin mitkhap zai reng rel lovin ka tlingtla ni ta berin ka hria.
Khami tlai khan pangngai takin zanriah an kil ho a, kan inneih tur chungchang sawiin hlim takin an ti ti ho a lo ni. Mahse, nat lawk pawh awm miah lovin a chaw ei kham chu a tlu thut a, a mel awrh awrh a, khuma an mut hnu rei vak lovah mihring a tling zo ta lo nghal mai a lo ni. Kan in barakhaih dan hi barakhaih an tih pangngai hian a sawifiah zo thlawt lova, mahse, sawina tur dang tawngkam a awm miau si lova, min barakhaih takzet a ni ber e.
Dan ang vekin thil kalpui a ni a. Kan tlaivar a, kan tuar tlang a, a tukah kan vui a, hun hi a liam puat puat a ni ber mai. A chhungte nat dan leh tawrh dan te ka hriatpui lo va, ka chhungte buai dan leh chi-ai dan te lah ka hre tawh si se hek lo. Ka aa ruai a. Ka nghilh dup bawk a. Ngaihtuahna reng ka seng thei lo. Engkim hi a tawp vek a, ka tawp ve ta ni berin ka hria.
Tichuan, vaivuta siam chu vaivutah vek chang leh turin kan vui liam ta a. A thlan chu engvang maha kalsan thei ka ni lo, tihluih theih ka ni lo bur. A thlan an vurna lei vung vum pawng chungah chuan ka thu tlat a, laina hnai te’n min awmpui tawp.
Zan hmasa aia tlai hretah chuan kan tiam chhawrthlapui ngei chu engmah hre ve lo niawm tak hian a lo lang leh ta! Rilru a kal thui ngaih ngaih khawp mai. Ngaihtuah tur ber hi ka hre thei tlat lo! A hma zawnga tap thei miah lo kha ka tap thei ve tan. Mahse, ka tah chhan tur ber kha ka thutna hnuai lei chhung thuk takah chuan an lo zalh tawh si. Ka mittui hi hruksen rual a ni lova, min awmpuitu, ka lainate mittui lah dan rual a ni hek lo.
Thil zawng zawng hi sawi a tul tawh lo. Mahse hei, kum tam fu a lo liam ta! Tun thleng mai hian….
October thla a lo thlen hian ka pangngai thin lo!
Similar Posts:
- Inbâwl hrât hi a lo tha lo hle mai a!
- Abortion hi tualthahna a ni
- Runginu leh thialtea
- Khawinge Hmangaihna zawk niang le?
- Par lai a par rual ta silo!! Lenlai a ruallo hi a sawi rem theih??
October 24th, 2011 at 10:04 pm
Chhiar a kal zaih mai ka ti.
Report this comment
October 24th, 2011 at 10:05 pm
lunglen iti zual
Report this comment
October 24th, 2011 at 10:05 pm
A awm tho mai. Thla a lo hnaia, i taksa tui awm te kha a hipa, chu chuan nangmahah effect a nei a niang. Hehehe
Report this comment
October 24th, 2011 at 10:19 pm
A ni maw…a hrehawm ngawt ang.
Mahse, ka van hrethiamlo tak.
I Thuziak a kal nalh zaih mai.Ngaihnawm zawk a lawm le..
(Tak Tak a Mi…??!!!)
Report this comment
October 24th, 2011 at 10:23 pm
Ngaihnawm leh ang chu, kawnga kutchhuak a ni tlat! Chhiar tan te’ngsss…
Report this comment
October 24th, 2011 at 10:31 pm
Fiction-Ngaihnawm…
Report this comment
October 24th, 2011 at 10:41 pm
@mate ainawn, tak tak a ni mai thei. Ka sawi thei lo.
@kawlhawk, hman zan lawmthu sawi nan khan nizanah ka han ti ve hram a ni e. Sawisel teh.
Report this comment
October 24th, 2011 at 10:42 pm
I va thawh lungchhiatthlak ve le.
Report this comment
October 24th, 2011 at 10:43 pm
A ngaihnawm lungkuai ngeih ngawih hle mai
Report this comment
October 24th, 2011 at 10:48 pm
A ngaihnawm reuh hle mai a…
Ti daih ila… ‘Love and other drugs’ kha in en ve tawh hlawm em?a thi chiah lo na a,a hmuhnawm reuh khups mai. Sex scene pawh a tam. 
Report this comment
October 24th, 2011 at 10:52 pm
Love leh Tragedy a nih tawh hi chuan, ‘Kawnga is the best’ a ni tawp. I tluk tir awlsam lua tih lohvah chuan sawisel bo a ni hawt e.. nang nge nge. October thla hian lung a ti leng ve fo.
Report this comment
October 24th, 2011 at 10:53 pm
Similar Post ho, Similar lo lutuk si khian min ti ho zo vek. Ka’n lak run teh lul dawn nen..
Report this comment
October 24th, 2011 at 11:05 pm
Ka rin/beisei ang ngeiin a va ngaihnawm leh tehlul em! Ka chhiar laiin kan nuin vawi 3 min bia-a ka chhang lo! Min bia tih ka hria, eng nge a sawi ka hre lo… Kawnga vang vek!
Kawnga, I thawnthu reng2 hi ka lo chik thin a – “Nuthlawi an ti si che maw” tih te, “Pu Rova” tih te leh tuna mi te… hun hlimawm takah min hruai lut a. A hlimawmna leh a boruak nawmna kan thinlungah I tuh te te a.
Chutah, beisei loh ram lamah (hringnuna thil thleng thei ni si hmangin) thawklehkhatah min hnuk-lut thut a. Patling hi kan insum zo lo thelg thin zuk nia le!
I thluak leh I suangtuahna vak vel thu-a I chantir thiam lutuk thin hi ka awt thin ngawt mai. (Yp
Report this comment
October 24th, 2011 at 11:09 pm
#13, Para 3-na tlar tawp — *tep*
Report this comment
October 24th, 2011 at 11:17 pm
@kawlhawk, ka lo kalkhat lutuk deuh a va ni mai awm ve? I han sawi takah chuan ‘a ni riau mai’. Next-ah chuan a tirah hrehawm reng rengin ka awmtir ve tawh anga, tichuan, a tawpah hlim takin ka awmtir ngei ang.
I mi fakder thinna hi phu lo teh mah ila, min tiphur fo thintu a ni e, ka thatchhe em mai pawh a..
@lianchhiara, ni ngawt mai, duhaiin a thi hma teh thut lutuk a, thluaka kawthalo lut deuh thut ang chi hi a ni tlat a, a ngaihna a awm lo a ni. Min barakhaih teh asin!
Report this comment
October 24th, 2011 at 11:45 pm
kai tho leh mai teh a
Report this comment
October 24th, 2011 at 11:51 pm
Ngaihnawm rem rem…
Report this comment
October 25th, 2011 at 3:09 am
A beidawn thlak dan tur a bangbo thlak dawn mange aw, huiham
Ngaihnawm thuai thuai khawp mai
OT mai aw (ngaidam ngaidam)
Tlangau 1 ka hriat kha a pui khawp mai. N.Vanlaiphai lamah ka pi damlo kan phur haw a (damdawi inah an beidawng tawh niin ka hria). Ruah a sur nasa khawp mai a, mahse kan kal zel a.
Khawlailung kan pel, Lungchhuan hnuai zawn kan thlen chuan leiminin min karcheh ta si. Lehlam lehlam kan leimin, chirh rawn tawlh thla tun tun mai chuan min hual vel ta si a buaithlak hle mai. Pa Tluanga (kan makpa) leh keimah kha mipa awm kan ni deuh mai si a, Lungchhuan khaw ho pui turin kham pangah chuan ka lawn chho ta a.
Lungchhuan khua ka luh chuan VC chuan tlangau a ko vat a, hetiang deuh hian a au ta a.
Khaih2 khaih, lo ngaithla ru khai. Vanlaiphai Pu Dina nu chuanna motor kan khaw hnuai kawngah khuan leiminin a karcheh a. Mipa ka ni ti, mipa zahmawh nei zawng2 i chhuak vek ang u,” tiin.
Nuih a za deuh bawk si, ka hah bawk si, vangvat saitial ka inziat thla mawlh2 a, za lo taka nui vur vur chung chuan ka tlan liam thla ve leh nghal a. Leimin an buaipui lai chuan Lungchhuan atang hian N.Vanlaiphai ka han tlan leh a, Pu Dina te inah chanchin ka han hrilh leh… ka tum. ka hrilh lawk theilo. A chhan chu an inchhung ka luhin ka thal tawp a, ka tawng thei tawhlo. Km fe ka tlan ka ring Lungchhuan to Vanlaiphai hi engtia hla nge?
Report this comment
October 25th, 2011 at 7:46 am
#18..Pu HV va hre pui thak thak ve le.. Chuan chhiar a nuam dap dap khawp mai, mahse lungchhiat thlak lutuk nih khi le….
Report this comment
October 25th, 2011 at 9:47 am
A ngaihnawm e.
Report this comment
October 25th, 2011 at 11:05 am
Hnuk ulh teuhin ka chhiar chu. Ka tawng ve ang tih ka hlau
Report this comment
October 25th, 2011 at 11:59 am
Same moon shines … — Queens
Tuizangkhauh, suar leh khawkrawk-ah pawh i che thiam dap dap hle mai! James Dokhuma Thla Hleinga Zan phek hma lama zeh tel hial tlak amawi!
A tlangpui thuin September/October full moon hi Jews-ho Bawkte te Kut (Feast of Tabernacles) hun lai a ni ngei ngei a. October-ah hian a thleng tam zawk a, Kumpui kumah September hian a thleng ve thin. Chenchilh tih thumal hi Grik tawngin SKENOO a ni a, Mizo awphawi pawhin SIKAINA kan tih ve thin hi, Hebrai-hovin SEKINAH an ti bawk a. Pathianin a mite a rawn chenchilh hriat rengna Kut hun lai a ni a. Hmangaih Johana 1:14-ah pawh “Thu chu tisa-ah a lo chang a, kan zingah a rawn SKENOO (in-bawkte) ta, tih a ni. October thla en ber zan hi Thu —tisaa rawn chang PIAN HUN dika Ringtu hmasaten an lo ngaih thin a ni a, Bawkte Kut ni riatna-ah a SERHTAN hun nena lo celebrate thin an ni. Mahse, hun a lo kal zel a, Rome kristianna chuan thil a her danglam zel a, an Rome milem-biakna serh leh sang chu Kristianna huangah chhawm lut zelin Tammuz-a piancham December 25 hi Isua pian ni atan an lo hmang chhawm ve ta mai bawk a ni.
October Full Moon hi hmasang Apostol Kohhran leh ka tan chuan ISUA PIANCHAM a ni tlat fo.
Report this comment
October 25th, 2011 at 12:01 pm
Ava zialo ve
Report this comment
October 25th, 2011 at 1:55 pm
GOA A AWM TAWH, AWM MEK, KAL TUM LEH INTEREST HRIM2 TE NEN LAM Mizo United Goa group AH WELCOME VEK KAN NI E. HNATHAWH TUR ZAWNG DUH TAN PAWN SHARE KAN UPDATE RENG E…LO JOIN VE RAWH U
Report this comment