mi(sual).com

Elle-i chuan a fapa Frings-a chu kawrlum hak tirin a thuam lum mawlh mawlha. Ur lawk ni a ni a, Frings-a chu an in atanga km 4 vela hlaa awm a Pi leh a Pu ten an farmah leng tura an sawm avangin a phur hle mai a. A Pi  chhang ur lum leh sai ar sa siam, chhun chaw a a hmang tur mawlh mai chuan a ti phur zual a ni. A nu in a siam lai chuan Frings-a chuan, “A nu, zaninah Santa in eng thil nge min pek ang le, truck lem ka duh e..min lo pe se ka ti” tiin a tawng siam siama. Elle-i chuan a fapa sam chul sak hauh hauh pah chuan, “Mamte, santa chuan I duh ang thil chu a rawn pek ngei che ka ring, Sunday sikul a in thuvawn kha I la hria em?” tiin a han zawt nghal a.

Frings-a chuan phur zet hian Sam 25 na chu Sunday sikula an zirititu Pa in a hrilh ang chuan a sawi zat zata. A nu chuan, “Ka hmangaih che Mamte” tih pah chuan a biangah chuan a fawp zauha. Pawn lama Frings-a Pa hnathawk pawh chu a rawn luta. Frings-a hi an fa mal neih chhun a ni a. Duat theih pa tawpin an duat a ni. Frings-a Pi leh a Pu te hi a Nu Elle nu leh Pa te an ni.

Tukthuan an ei kham chuan Frings-a chu a Pi leh Pute awmna lam pan tur chuan a chhuak ta a. An in atang chuan a hla lem lo bawka, ni dangah pawh a kal fo tawh avangin a nu leh pa pawh chuan kawng velah harsatna a awm an ring lo. Frings-a chuan chhun chaw a ei a nga, tlai thim hmain a haw let leh tur a ni. Thlasik lai a nih avangin tlai lamah khua a thim hma thina, dar 4:30 pm ah chuan khua a thim ngei ngei tawha, chumi hma chuan a haw hman tur a ni. Zan lama vur a tlak avang chuan a lum thei ang berin a inthuama.

A tuk lawk chu krismas a nih  tawh avangin Strasbourg khua chu krismas hmuak tur chuan a in singsa nasa hle mai a. Mitin mai chu an mamawh lamkhawm chuan an buaia, indopui lai a nih avangin khawlaiah chuan sipai hmuh tur an awm reng bawka, hmun tin deuh thawah chuan an duty hlawm a ni. Frings-a chuan mite che tla vel chu hmuhnawm a tiin a thlir zui vang vang thina, sipai tank leh motor khawlaia vei vak te chuan a mit a la hlawm hle a. A nu leh pa thusawi, “khawiah mah pen loh tur” tih erawh a theihnghilh lo.

Strasbourg khua hi Alsace huam chhunga khaw pawimawh tak pakhat, France ram chhak lama awm a ni a. Germany leh France inrinna a lui luang, Rhine luipui kianga khua a nih avang hian he ram pahnihte tan hian a pawimawh hle. Germany ram a hnaih tawh em avang hian a mi cheng a te pawh hi German mi deuh vek an ni hlawm a, a khaw hming Strasbourg tih pawh hi  German tawng ngat a ni bawk. Khaw hlun tak a ni a, Rome lal Nero hunlai pawh khan he khua hi an lo awp daih tawh thin a. Indopui pakhatna a chhuah pawh khan Germany depa awm a nih avangin German lam leh Tangrual pawl ho tan chuan khaw thlahthlam chi loh, khaw pawimawh tak a ni a, a la ni chhunzawm zel bawk.

Frings-a chuan a Pi te in a thlen chuan a Pi leh Pu chuan an lo lawm hle a. Frings-a Pi te hian an farm ah hian bawng, beram, kel leh ar te an vulha, khua a bazaar lamah heng an ranvulh hnutetui leh artui te hi an hralh thina. An ranvulh te hi Frings-a hian a lawm thei em em a, a Pi leh Pu in an chaw an pek laite hian a zui a, a theih ang tawkin chawte a lo pek pui ve thin a ni. Khua atangin an farm awmna hi hla lutuk chu ni lo mahse, khaw boruak chuan a chim pha tawh lem lo a, hmun nuam tak a ni

“Chhun chaw tui ber”

Farm a thlen hnu chuan Frings-a chu a awm leh hle hle thei lo. A Pi leh pute ran vulh ho en kual tur chuan a kal nghala. Bawnginah a kal hmasa bera, buhpawl chu a theih ang tawk chuan a la khawma, an ei tur chuan a dahsaka. A Pi chu in lamah ei tur siamin a buaia, a Pu nen chuan an farm chu an fang duna, ar in ah te chuan kalin ar tui te chu a la a, a pu chuan hlim takin a zui zela.

A Pi chuan eitur a siam zawh chuan chhun chaw ei turin a rawn ko ta a. Frings-a chu phur zetin in lamah chuan a tlan nghala. A Pi cake ur rim chuan a ti hlim kher mai. “A Pi sai ar I siam em?” tiin a pi chu a han zawta. A  Pi chuan, “Mamte, I duh ang chi tak kha a ni e ka siam” tih pah chuan a sai ar sa siam chu a rawn chawi chhuaka. A Pi thil rawn chawi chhuah a hmuh chuan Frings-a chu a lawm ngei mai, “Chhun chaw tui ber ka ei dawn a nih hi” a ti a. A Pi chuan, “Mamte, ur lawk ni te a ni bawk si a, I ei tui loh ka hlau em a, a tui thei ang berin ka siamsak che lawm” a ti a. Chhun chaw ei tur chuan dawhkan chu an kil ho ta a.

Chhun chaw an ei zawh chuan an in hnung lama thingpui in ho na lamah chuan an awma. Frings-a chuan a Pi leh a Pu te chu a tuk lawka an in a kirsmas hmanpui turin a sawma. A Pi leh Pu pawh chuan hmanpui ngei an tum ang tiin an tiama. “A Pu, naktuk krismas te a ni si a, in in te hi inchei dawn lo em ni” tiin Frings-a chuan a zawta. A pu chuan, “Mamte, keini tan chuan chei a ngei tawh hlei nem, chei loh pawh hian a nalh tho alawm” a ti a. A pi chuan theitui a siam chu a rawn pe a, hlim tak chuan an inkawm ho a.

A tlai zel hmain a Pi leh a Pu chuan Frings-a chu haw turin an buatsaih tan ta a. A pi chuan a cake ur, an ei bang ho chu a fun saka, zana a ei atan a hawan tira. An farm gate thleng chuan an thlah phei a. Farm hi kawngpui atanga pen phei ngaiah a awma, kawngpui hi Strsbourg panna a ni a, thla hmasa lamah thlawhna in bomb a thlak chiam avanign kawngpuite chu a khuar dek duk hlawma. Chhun lamah hi chuan a ralmuang viau tawha

Khua a lut tep tawh tihah chuan kawng chhak lam atang hian sazupui var lian deuh, duhzawm zet mai hi a rawn lang thuta. Frings-a chuan man a chak khawp mai a. Sazupui pawh chu tlansawn mai lo chuan kawng sirah chuan a ding ve renga. Frings-a chuan a kalsan thei lawk bik lo. Sazupui chu a thut ngai chuan a thu renga, a hawi kuala. Frings-a chu a insum zo tawh lo. Man tum chuan sazupui chu a  pan ta a. Chu veleh chuan sazupui chu a tlanchhia a, a man dawn chiah tih chuan a tlan sawn leh hman zela. A rawn chhuahna kawng chhak lam thing hmun lamah chuan a tlan luta. A man teuh theih em avang chuan Frings-a chuan a um ve ta zel a. An in um lut thuk tial tiala. Ni lah chu a her liam zel, Frings-a chuan chu erawh a hre chang tawh lo. Sazupui mawlh chuan a rilru a la tlat tawh.

“Ur lawk zana thih ka duh lo”

Kum 1939 atanga in tan indopui chuan kum 4 lai a awh ta. Hitlera pawl Nazi chuan Europe ram chu thunun theih vek inbeiseiin hma a la a, Asia lamah lah Japan ramin Asia khawmualpui thunnun theih veka, Pacific tuipui pawh a dai darh a. He a thil tum avang hian America ram pawh indonaah a zuan luh phah. German leh a tanrualpui Italy leh Japan te hi Axis an ti a. Britain, America leh Russia te hi tangrual pawl, Allied an ti thunga, an ni hian Axis ho hmalakna chu an beia. December 24, 1944 thleng pawh chuan indona chuan tawp lam a la pan thei lo.

June 6,  1944 khan Allied pawlte chuan D-Day indonaah German ho hmun pawimawh tak pakhat France rem leh a khawpui Paris an hneh laka, he hnehna hi tangrual pawl tan chuan pawimawh vet vet tak a ni. France ram atang hian Germany chu an bei thei dawn si a. November 23 ah France leh Germany inrina bula khaw pakhat,Strasbourg, Gemany hoin an awpbeh reng thin chu tangrual pawl lam chuan an bomb vaka, an thu hnuaiah an daha. Strasbourg hi P.O.W dah nan an hmanga zuia. Ramri dep a nih avangin an ngaipawimawh hle a, venhimna pawh hmun dang zawng aia khauha siam a ni.

Boruak chu a vawt vin tuk tawha, khua pawh a thim fel tawh, chu chuan khawvawt pawh a ti zual hle a. Strasbourg thlen hma deuh thing hmunah chuan Britsh sipai platoon khat hi an camp a. Khua chu zanlai law lawa luh an tuma. An German sipai man 20 rual vel nen chuan chulaiah chuan an awm a. Meipui chhepin eirawng an bawla. Germna sipai an man 20 rual vel chu an kut an hnung khirha an thingthit tir hlawma.

An German sipai man pakhat pet chawrh pah chuan Clive-a chuan, “Nangni phiangsen ho vang hian mumal tak pawhin ur lawk zan pawh ka hman lohna a rei tawh lutuk” a ti a. A bula lo ding reng Owen chuan, “Clive, duh tawk rawh, kah hlum tur an ni tho a, sawisak vak khan awmzia a nei tawh lo” a rawn ti a. Rhine luipui kai tum German sipai enge maw zat chu British sipai, Clive-a te platoon hian an nangchinga, lui an kai hmain an man a, Strasbourg lamah P.O.W a hruai an tuma, mahse Strasbourg lama an hotuten kap hlum tura thu an pek avangin Strasbourg an thlen hma hian thing hmunah hian an inkulha. He hmunah hian an hotute thupek chu tih puitlin an tum a ni.

Clive-a te platoon British sipai Lieutenant chuan, “Strasbourg kan thleng tepa, hei hotute thu angin helai hmunah hian heng ho hi chu kan dah tha mai dawn nia, kan lance corpral Clive leh Owen leh midangte kha inring rawh u” tiin a rawn sawia. Clive-a chu a phur ngang mai. Nazi ho huatna lian tak nei a nih avang chuan Nazi sipai thisen chhuak chu atan chuan hmuhnawm, ennawm a ni zawk. Clive-a erawh chuan Ur lawk ni a ni bawk nen indo lai mah ni se thisen chhuah chu a chak lo kher mai. Nazi sipai ho chu a han en thin, amah ang thoin an chhungte chuan an thlahlel ve awm si a, tun ang hun te hi hlim taka hman an chak awm si a tihna rilru a nei tlat mai a. Sipai rilru puta, sipai taka chu darkara awm chu harsa a ti takzeta, tlanchhiatsan thei lah a ni si lo.

German sipai ho chu an din tlar tir ta a. British sipai ho chu an in ring thep thawp tawh hle a. Kah tum chuan an tin far hlawma. Kah tuma an tin thap tawh hnu chuan , German sipai pakhat chu a rawn tap chhuaka, eng eng emawni hi a rawn sawia, Lieutenant chuan tanwglettu hnenah chuan a thil sawi chu a lehtira, tawng lettu chuan, “Vawiin hi ur lawk ni a ni si a, khawngaihin vawiin chuan min kap suh u, duh leh krismas zawhah min tihlum dawn nia, ur lawk zana thih ka duh lo’ a ti a nih chu Sir” tiin a hrilh nghala. Britsih sipai pakhat chuan a lo ngaithei awzawng lo mai, chu thusawitu German sipai chu a silai kawm chuan a va chhu zawta, a hnar a thi nghal zawih zaiwha.

Lieutenant chuan German sipai thusawi chu a han ngaihtuaha, dikna chen pawh a awmin a hria. Mahse thupek hmu tawh an nih bakah a sipai hruai, nazi huatnaa khat te chu engti kawng mahin a dang zo dawn lo tih a hria. A rilru tak chuan kahhlum loh rih pawh chu a pawiti vak lo. Mahse a hote, mi 30 rual lai han hnial chu zana ni chhuah tir tum ang vel a ni dawn tih a hria, a rilru a buai ta hle mai.

Kap tur chuan thu a han pe ta, British sipaite chuan an silai chu an han kau ta sang sanga. Silai leh a mu,  hmangaihna leh lainatna reng reng nei lo, krismas pawh hre ve lo, mihringte sawi thin induhsakna leh inhmangaihna pawh hre lo hmanga, Remna lal piancham hmang chak em em te nun  tihtawp mai a ni tur chu Liutenant chuan a khawngaih ru viau mai. A sipai rilru a lang thei bik lo. A rilruah chuan krismas leh German sipai thusawi chu a ri nawn a ri nawna.

‘Enna a rawn thleng ta”

Kap mai tawh tura an awm lai chuan rimawi tliang em em mai hi a rawn ri ta riai riaia. Chu rimawi ri chuan an awmna bul vel chu a luah khat veka. A tirah chuan zawi ang reng tak, tliang tak siin a rawn ri a, a rei hnuah chuan a rawn ring tial tiala. Britsh sipai ho pawh chuan an silai kah tur pawh chu an kap thei tawh lo, chu rimawi mak tak ri ngaithla chuan an ding ta renga. Clive-a chuan a lo ning hman khawp maia, kah vat vat a duh tawh, ti khaw muangtu an awm zel chu a ngai thei lo ngei mai. Midang ho chuan rimawi chu an ngaithla veka, che chang their reng reng an awm lo.

An ngaihthlak lai chuan German sipai pakhat chuan, “Still Nacht..Still Nacht…!!”hi arawn ti a. British sipai ho pawh chuan a thusawi chu an hrefiah thiam thuai mai. Chu rimawi chu eng dang ni lo in, kirsmas hla a zawnga hla mawi ber “Silent night”  ngei mai a lo ni. Mak ti tak chuan an ding khawng reng ringawt mai a. Chu rimawi nalh danglam tak chuan an tiril a fan zo a, chu hmun chu a hma kha chuan a vawt vur a, rimawi rawn rik hnuah chuan a rawn lum tulh tulh tih pawh an hai lo. Britsh sipai 30 rual leh an mi man German sipai 20 rual vel te chu chu rimawi chuan mak tak maiin a rawn khawih danglama. An han hawi kuala, mihring hmel reng reng an hmu bawk si lo.

Thawk leh khatah an awmna chu a rawn eng ta pupa. Mi Eng em em mai hi an awmna chung zawnah chuan an rawn lang ta teuh mai. Sipai ho chu an tha a khur nasa ta mai, British sipai ho chu silai keng thei pawh an awm twah lo. An awmnaah chuan an ding khur hlawk hlawk hlawma. Clive-a phei chu a lo hlau zual ni ngei tur a ni. A bawkkhup daiha. “Hai rual an ni lo vantirhkoh an ni” tiin Owen chuan a sawi sap a. Chung vantirhkohte chuan Bethlehem daia Krismas zan hmasa ber ang mai khan “Remthu leng rawh se” tih thuchah chu hla hmangin, chung sipai, in hmelma tawn ve ve, nitin zantina inthah tuma in veh rengte hnenah chuan an rawn puang ta.

An ropuina chuan chulai sipai awm ho chu a luah hneh ngang mai. An ropuina leh an thuchah chuan sipai ho hinlung chu a ti tuiral zo a ni ber mai. An hlasak chu German ho chuan an tawngin an hriaa, British ho erawh chuan English angin an hre thunga. Van hlapui an rem zawh chuan, vantirhkohte chu an kiang leh ta veka, chulai hmun pawh chu a thim leh ta mup mai. Mahse an kalsan tak sipai ho thinlung erawh chu a thim zui ve hauh lo. An thinlungah chuan enna a rawn thleng ta.

Vantirhkohte an bo leh duak hnu chuan an rawn lan hmaa rimawi tak kha a lo ri leh. An lam pan chuan a rawn ri hnai zel tih pawh an hre thei. Mak ti tak chuan an lo thlir thapa. An awmna lam chu a rawn hnaih hret hret zela. An awmna a rawn hnaih telh telh hnu chuan chu rimawi tak chu a danglam tial tiala. A hma a an hriat ang khan a ri zui ta zel lo. An awmna chu chil chhak phak lekin a la thleng lo a, hnim chu a rawn ri phei a, rimawi ni loin zai ri an hre ta zawka. Sipai ho chuan mak tiin an lo thlir thap mai. Rimawi an hriat hnu lawkah khan vantirhkohte kha an rawn inlara, vantirhkohte an rawn inlar hnuah rimawi chu an hre leha. Rimawi chu a rawn hnai zel tihah a danglam ta daih si.

Sipai ho chu an lo ding thap hlawm. An awmna zawlah chuan rimawi tak, a hnua zai ri a lo changta chu hmuh chakin an lo thlir thapa, chutah an rin loh tak maiin an awmnaah chuan naupang, sazupui var pawm hi “Silent night” hla sa chung chuan a rawn lang ta hlawl mai. Naupangte chuan sipai ho a han hmu chu mak tiin a ding chata, a zai pawh chu a tawp nghala, a zai a tawp chiah chuan a reh ta vang vanga, rimawi mawi tak a hnua zai ri ni ta daih chu a reh ta daiha, thawm dang engmah a awm tawh lo.

Sipai ho chuan an en thap mai a, rimawi tak an hriat, a hnua zai ri ni ta chu an hmaa naupang kum 10 mi vel zai lek chu a lo ni chu mak an ti lutuka, tawng na chang pawh hre lo chuan an ngawi reng hlawma. Naupangte chuan a hlau ru angreng khawp maia, ngawi reng chuan a dinga. An ngawih reng lai chuan Lieutenant chuan, “Ekhai, a ropui ngei mai, zanin hian he naupangte hi kan hnenah Pathianin kan kirsmas lawmman atan min rawn pe a nih hi. A zai ri kha Remna Lal chuan rimawi, mawi takah siamin vana vantirhkohte a ko thla hiala, kan hnenah kirsmas thuchah an rawn paung ta a nih kha.

“Zanin hian tumah kan in that lo ang. Kan mi mante pawh hi kan chhuah vek a nga, kan vaiin helaiah hian ur lawk zan kan hmang dawn a ni. Kirsmas hi remna Lal lo pianni a nih ang ngeiin inremna hun atan kan hmang dawn zawk a ni. Indo lai mah ni I la, Lei leh van lal fapa lo pian ni a ni a, zanin na na chu indo kan bansan tur a ni a ti a.” Naupangte chu a ko a, “Mama, lokal hnai rawh, kan hlauhawm loh, tunge ni I hming?” tiin a han zawta. Naupangte chuan, “Ka hming chu Frings-a a ni e ka Pu” tiin a chhanga.

“Ur lawk zanah ka fapa a thi ang maw?”

Banga an sana intar chuan dar 9:00 pm a kawk tih hriat tak hian a inkhawng ri a, Elle chu a ngaih a tha thei tawh lo. A tap a tap tawh mai a. A fapa Frings-a chu a thi tawh ni ngei turah a ngai a, a rilru a chi aiin a buai zo a ni ber tawh mai. “Urlawk zanah hetiang hi a thleng ang tih ka ring pha lo, ka fapa hi tun ang zanah hian ka chan ang tih ka lo ring ngai lo” ti a a sawi lai chuan a tap zawih zawiha. Pindan atang chuan a pasal chu a lo chhuaka, Frings-a zawng tur chuan chhuah a tum a ni. Indopui lai, zan ralmuan loh lai ni mahse an fapa chhanchhuah ngaiin a awm miau si a, pawna a chhuah chuan thihna ko tlanga dak tluk a ni dawn tih pawh a inhria mahse a fapa zawng tur a nih vangin pawisak a nei tawh lo.

Elle-i chuan thlaphang tak chung chuan a pasal kal chhuak tur chu kawngkhar thlenga va thlah a tuma, kawngkhar an thleng chiah tih chuan an kawngkhar chu an rawn kik ta karh karha.Kut khur zawih zawih chunga Elle’n kawngkhar a han hawn chuan, a phu zawka, a mittui a tla ta zawih zawiha.

Britihs sipai pathum hi an kawngkharah chuan an lo dinga, pakhat chuan Frings-a chu a lo koki chhuana. Elle-i te nupa hlim lutuk, lawm bawk si chuan mittui tla zawih zawih chung chuan an en renga. Sipai pakhat chuan, “Ka Pi, Elle-i I ni ang maw? Hei in fapa hi naupang fel tak a ni, a sazupui umna lamah ramhnuaiah a bo a, mahse a kawng bo avang chuan hei kan nuna kan la tawn ngai loh thil ropui tak kan tawn phah ta a, kan lawm takzet a ni. In fapa avang hian kan nuna kirsmas hlimawm ber leh tha ber, hlu ber ni bawk kan hman theih phah dawn a ni” tiin a sawi a. An hmanhmawh em avang chuan sipai ho chu an kal leh thuaia.

Sipai ho kal hnu chuan Frings-a chuan a nu leh Pa chu thil awm dan a hrilh ta a. A sazupui um kha a man lawk loh avang khan a um zela, khua a lo thim ti tih a, let a tum khan kawng a hre tawh bawk si lo. Let leh tuma a kal lai chuan a ke bulah sazupui chu a rawn kal teh thuta, a man ta a ni. Hawna kawng a hriat loh avang chuan Sunday sikula an hotupain, “Kawng te in bo a kalna tur in hriat loh chuan tangtai u la, Pathian fakin zai thin ang che u. Pathianin naupangte tawngtaina hi a ngaithla thin a, thil ropui tak a ti thin a ni” ti a a hrilh chu a hre renga, krismas ni a an rem tur atana an hotupain a zirtir “Silent Night” tih chu a sa a, a hnu rei vak loah sipai ho mei chhem kha a hmuh thu leh a va pan tak thu a sawi a. An ni chuan an lo lawm viau thu leh an in lama an hruai haw tak dan chu hlim tak chuan a nu leh pa chu a hrilh mawlh mawlha.

“Silent night”

Frings-a hruai hawtu sipai te chu an thiante awmna lamah chuan an thleng leh thuaia, khaw chhungah chuan let leh thei vek tawh mahse let erawh an tum lem lo. An awmna hmun tluka boruak hlimawm dang reng a awm dawn lo tih chu tumahin an hai lo. Chu zan thianghlim, Chhandamtu pian zanah chuan hmelma leh hmelma te chu unauah an insiama, hmangaihna silaia kah an ni ta.

British sipai ho chun Nazi siapi an man ho chu an phaurna te chu an phelh saka, meipui an chhepa, an eitur neih ang angte chu an siama, krismas hla an hriat ang angte chu an sa a, an tawng chu in hriat pawh tawn lem lo mahse a thluk atang chuan an sa ho thei zel a. An hla sak zin ber erawh Germna ho in “Still Natch” an tih, Britsih ho in “Silent Night” ti a an hriat chu a ni.

An chhungte chungchangte sawiin an ti ti a. Indo an nin tawh zia leh, indona chuan nun pangangai lo a a nun tir nasat zia te chu an sawi mawlh mawlh hlawma. Chu zan mak danglam takah chuan indo lai mah ni se German sipai 20 rual leh British sipai platoon khat zet te chu unau ang main hlim takin an zai a, an inkawm ho a. An nuna krismas hlu ber leh danglam ber, an damchhunga an nun her danglamtu, hun pawimawh tak mai chu an hmang ho ta a.

This entry was posted on Saturday, December 17th, 2011 at 9:30 pm and is filed under Christmas. Both comments and pings are currently closed.