mi(sual).com

The Fourth (other) Wise Man.(Christmas Pual) Part-2
Adapted from Henry Van Dyke by Joy Swartley Sawatzky

Mifing palina chuan Aigupta atanga tanin a zawng ta zel a, mi chi hrang hrang khawngaihthlak tak tak, Eitur neihloh avanga riltama thi turte eitur a pe a, Sal tang te a tlan chhuak a, mahse Pathian anga han biak tur em chu a hmu lo.

Chutiang chuan hun leh kumte chu a lo ral ve zel a. Kum sawmthum leh pathum chhung zet chu a zawng ta, a la beidawng bik chuang lova, a la zawng ta zel a. A sam te pawh chu alo tuak ve ta bum mai a, he khawvel a a zinkawng chu a lo zawh tawp hnai ve ta tih pawh a inhre chiang hle mai. A thih hma ngeiin tum khat na reng reng chu Jerusalem velah va zawn leh a tum ta a, hmu dawn ngeia inhriatna a nei tlat a ni.

Chutih hunlai chu Juda ho Kalhlen Kut hmang tura an inbuatsaih hun lai a ni a. Jerusalem chu mikhualin an lo zi nuai nuai mai a ni. Nimahsela, chumi ni kher kher chuan Khawpum mai chu thil pakhat buaiin an lo buai nuai nuai mai a. Chungho zing ami chu thil awmzia ahan zawhchian chuan, “Golgotha-ah kan kal dawn, I hre ve lo em ni? Suamhmang hmingthang deuh deuh mai pahnih an khengbet dawn a, Tin, an rual chuan Nazareth Isua an tih mai chu an khengbet tel dawn bawk a, Midangte tanpui an ngaihna a tanpui thin leh thilmak tam tak ti thin ani a, Mahse, Kan Puithiam ho leh Sakhaw rawngbawltute hovin “Pathian Fapaah a inchhal avangin thi tlak a ni” an ti miau si a, Roreltu Pilatan ‘Judate Lal’ a intih avangin Kraws a khenbeh turin thu a pe ta a ni. Tiin an lo hrilh a.

Artabana thin chu a inthumrawn ta tlut tlut mai a, “He mi hi kum 33 liam taa, Nausen piang kha ani thei mai ang a?, Lunghlu pakhat ka la nei a, hei hian ka tlanchhuak thei mai angem le?” tiin a suangtuah nasa ta mai a. Chu Nazareth Isua hmuh a, chhanchhuah ngei tum chuan mipuite chu a zui ve ta a. Mahse, Sipai ho Camp awmna an thlen lai chuan Makedonia mi Sipai thenkhat chuan tleirawl te pakhat kawr thler hnuang tawh hi a samah thamin an rawn hnuk a. Chu Putar thinlung chu khawngaihnain a lo luah khat leh ta a.

Chu tleirawl lah chu amah khawngaihna mita lo thlir rengtu putar ke bulah chuan bawk thlawpin a ke a vuan a, “Min khawngaih hram teh ka Pu, Pathian dik leh nung betu ka ni a, ka pa pawh hi Parthis mi Sumdawn a eizawng a ni thin a, nimahsela, hunlo takin a thi ta a. Kan lo rethei ta em em mai a, leiba te a lo nei nual si a, a leibatnate chuan ka pa leiba rulhnan chuan Salah min hralh an tum a ni. Chu chu thih aiin ka tan hian a thalo zawk a ni. Khawngaih takin min chhanchhuak hram teh” a ti ta lawm lawm mai a.

Chutah zet chuan Chu Putar chu a buai ta takzet mai. Babulon a Damlo kawnglaia lo tlu reng a hmuh tum leh Bethlehem a Nausen a chhanchhuah tum ang tho khan a rilru a buai a ni. He Khawvel Chhandamtu tur Lal Chibai a buk a duhna leh a phu tawh thilpek hlan ngei a duhna leh, a bul maia tanpui ngai ngawih ngawih leh chhanchhuah ngai ngawih ngawih awm reng chu bukin thutlukna siam a ngai leh ta.

A bul maia tanpui ngai ngawih ngawih awm reng chu a tlanchhiatsan leh thei ta ngang lo mai le. A Lunghlu neih chhun Lal Chibai buk nan a a lo hum tang tang chu a phawrh leh ta nge nge a, chu tleirawl chu a pe ta a. “Chemte, he ka rohlu neihchhun Lal chibai buk nan a ka lo vawnhim ve tang tang hi, la la, intlanchhuak rawh le” a ti ta nge nge a.
Chutia a Lunghlu a pek pah a a la tawng mawlh mawlh lai chuan, Khua chu a lo thim ta khup khup mai a, Lirte a lo nghing ta der der mai a. Chu an awmna in te pawh chu a insawi ta hlawk hlawk mai a. bang te chu a khi tuar tuar a, Leirawhchante chu an bal ta hlawk hlawk mai a. Sipai ho chu hlauvin baklengin an tlandarh zo ta a. Mahse Artabana leh tleirawl erawh chu han tlanchhiat ngaihna chuang an hriat loh avang chuan an la awm ta reng a. Enge hlauh tur a neih tawh chuan ang? Enge damchhan a neih tawh chuan? A damchhan ber Lal chibai buk na tura a tih a Lunghlu 3 te a hmang zo tawh si a, tunah chuan, Zawnhmuh a inring lo ta tak tak a, a thilzawn kawng chu a lo tawp ta niin a hria a, a Hlawhchham lailet der niin a inhria a ni.

Nimahsela, mak tak main Lungawina leh thlamuan em em na erawhchu a thinlung chhungril takah a awm tlat si a ni. A chhan chu a Lalpa hmuh ngei tuma a zawnna kawngah a theihtawp takmeuh a chhuah tih a in hrechiang tlat a. Tin, a Lunghlu a hmanna leh a tlai chhante pawh kha a dikin a hre tlat a, khatiang dihmunah khan ding leh pawh ni se, a tih ang ngai bawk kha a ti leh thovang tih a inhrechiang em em a ni.

Lir chu a rawn nasa leh zual sauh a, inchung te hial chu a rawn chim tan ta mai a, Inchung atanga lung lo tla thla chuan Artabana chu a Luah a rawn deng ta hlauh mai a, a tlu ta a. A bula tleirawl chuan a han ngaihven vat a, a malchungah a lu a nghat a, a thi ni ngei hian a hria a.
Chutih lai tak chuan eng deuh ri riai kar atang chuan aw zawi fiah tak si, mawi em em mai hi alo ri chhuak a. Chu aw lo chhuahna chu chunglam pang tukverh atang ni mai hian a hriat a, tleirawli chu a han hawi vel vat vat a, tumah a hmu si lo. Chutah chu Putar zahawm tak hmui chu a lo che a, mi biak nei niawm takin ti hian Parthian tawngin a rawng tawng chhuak ta a.

“Ani thei lo, ka Lalpa, engtik laiin nge ka hmuh reng reng che??” tiin.

A han ngawi leh vang vang a, chutah aw mawi dam diai mai chu a lo ri leh a, Chu tleirawlte-i pawh chuan a hreve leh tho a, mahse, a zawiin hla tak atanga lokal ang mai hi a ni a. Chu aw chuan he thu hi a sawi a ni.

“Tih tak meuhvin, tihtak meuhvin ka hrilh a che, heng mi te berte chunga I tih hi ka chung ti ini a sin” tiin.

Chu Putar zahawm tak mai chuan, Mak tih avanga hlim leh lawm em em leh thlamuang em em mai hmel hi a pu a. A sam tuak var vo kara a hmel hlim leh thlamuang siah mai chu zing ni chhuak mawi tak maiin Vur tlang thianghlim tak mai a rawn chhun eng phet ang mai hi a ni a. Tichuan, thlamuang takin a Lalpa a lo zawn thin chu hmuin a hnenah a lo chawl ta a ni.
A zinkawng chu a lo tawp ta a, A thilpekte chu Lawm taka pawm anni a, Chu mifing palina chuan Lal chu a hmu ta.

Chhiartu duh tak, He Krismas hunpui hlimawm leh Lawmawm tak mai boruak lo thlengah hian, Hmangaihna leh Khawngaihna lo luangchhuak atanga I thilpek hlu tak atangin Beiseina leh Eng duhawm tak chu lo chang ve ngei turin duhsakna ka hlan che a. Hei hi hre reng ang che He kan zinkawng hi a chhanna chu a ni a, A chhanna chu he kan zinkawng a kan thiltih hian a hril dawn bawk a ni.

Krismas Chibai vek u le.

This entry was posted on Sunday, December 18th, 2011 at 4:00 pm and is filed under Christmas. Both comments and pings are currently closed.