mi(sual).com

The Fourth (other) Wise Man.(Sunday & Christmas pual)
Adapted from Henry Van Dyke by Joy Swartley Sawatzky.

Augusta Kaisaran Lalram tam tak a awp khawm lai khan Jerusalemah chuan Heroda’n Lal a lo hrawt ve bawk a. Chutih lai vek chuan Persia Ramah chuan Mifing pakhat Artaban Media mi chu tudang mah ngai bik lovin a awm ve bawk a ni.
Artabana chuan Arsi danglam tak lo lang chu a hmu a, Lal thar Ropui tak mai a piang dawn tih a hrechiang em em mai a, Nimahsela, a thiante leh thawhpuite chuan an awih sak si lo. Nimahsela ama lama a chian em em si avangin, a in leh Lo leh neih zawng zawng hralhin Chu Lal thar Ropui tak lo piang tur chu Chibai buk nan Lunghlu chi hrang hrang chi thum a lei a. Chung hun laia Van lam pang zirmi leh mifingte zingah chuan a ngaihdan ang chiah nei mifing dang pathum an awm ve bawk a, an hming chu, Gasper-a te, Melchior-a te leh Balthezar-a te an ni.

Artabana chuan a ip chu a han zen a, Lung mantam mawi em em mai pathum chu a han phawrhchhuak a. Pakhat chu Van thiang tak dumpawl kak ang maia dumpawl nalh hi a ni a, Pakhat erawh thung chu Zing nichhuak aimah a senlar nalh hi a ni bawk a. A pathumna ve thung erawh chu Zing nichhuak hlimin Vur tlang a chhun tlet sur ang maia thianghlim leh var nalh hi a ni bawk a. Lal tana thilpek atan pawh an hluin an tling tawk tak zet mai. “Sakhua ni ve si beiseina nung awm reng reng lo mai chu, Maicham mei mit duk ang chauh ani si a, awmzia reng a nei si lo. Artabana chuan chu nausen lo la piang tura chu mihringte tana chatuan nun neih leh theihna tur atana beiseina awmchhun ani tih hi a ringhlel hauh lo va, a ring nghet tlat zawk a ni.

Khua a lo thim a, Vanah Arsite an han inlar tan leh sap sap takah chuan, Arsi danglam bik tak mai pawh chu a lo lang leh ta a, Artabana chuan a rilruin, “Hei ngei hi chhinchhiahna chu ani e, Lal chu a lo kal ta ngei mai le. Amah hmu turin muangchan hman ani ta lo” a ti mawlh mawlh a. Zing vartianah thoin, ni chhuah hmain a sakawr chungah chuangin a chhuak hman der tawh a ni. A thiante a hun taka va pawh thei tur chuan, a hmanhmawhin a kal tluan hle a ngai tih a hre chiang em em a ni.

Chutia a thiante a hun taka va nan hman a tum ruh hle lai chuan, zan tlai khaw thim thet thet tawhah hian, a hmalam thim ruih leh reh ruih maiah chuan kawng kham zawng hian mipakhat thichhawnga lo let reng chu a va hmu ta tlat mai a. Hebrai mi dan pawna hnawhchhuah ani ngeiin a hria a, a thi ni ngei hian a lang bawk a. Mahse, a han belhchian chuan a lo la thaw feih feih a, a rawn rum chhuak ta bawk a. Artabana kawrfualah chuan nghet tak maiin a rawn vuan ta tlat mai le. Artabana chu a phu deuh zawk a, hlauh vang erawhchu a ni lo. A hrawk te chu a ro hulhin a hria a ni. A chhan tak zawk chu, muangchang hman anih loh zia a inhrechiang em em mai a, darkar hnih-khat lek pawha a khawtlai vaih chuan a thiante chuan an kalsan anga, a damchhunga a thil thlakhlelh ber mai leh a in leh Lo zawng zawng pawh alo hralh vek phahna chu a hloh kumkhua thei mai dawn a ni.

A lehlamah chuan, Chu hliam natak tuar chu a kalsan chuan, a damchhuak hauh lovang tih a hrechiang hle mai bawk si a, a inngaihtuahbuai ta tak zet mai le. Tichuan a rilru chhungril ber atangin a tawngtai ta a, “Aw, Pathian thianghlim ber, ka kawng zawh tur dik tak min han kawhhmuh teh, Nang chauh lo chuan kawng dik hria an awm si lo va” tiin. Tichuan Chu hliam tuar damlo thi lek lek lam chu va pan lehin a pawm kang a, hmun nuam tak Thingbuk nuam tak hnuaiahah chuan a mut ta a. A damdawi ken chu tuiah pawlhin a hmuiah chuan tlem a han far a. Damdawi lam thiam tak ani bawk a, a damdawi pawh chuan a thawk chak hle mai. Zawite hian a rawn tawngchhuak thei ta mai a.

Chu Damlo chau tak chuan, Artabana chu tunge anih leh enge tih a tum te a han zawt a, Artabana chuan, a hming te hrilhin Khawvel mihring zawng zawngte Chhandamtu tur Jerusalemah Judate Lal a piang dawn tih Chhinchhiahna an hmuh thu leh chu nausen lo piang chu chibai buk a tum thu a hrilh bakah ei leh in tur a neih ang angte chu hnuchhiahin Hnim atanga siam damdawi pawh chu a hnuchhiah ta a. Chu Damlo chuan Artabana chu a han en a, “Ka chunga I thatna zawng zawngah hian engmah han pek let ve theih che ka nei hauh lo mai. Amaherawhchu, Messiah I zawn hi Kan Sakhaw Lehkhabu sawi dan chuan Jerusalemah piang lovin Khaw lian tehchiam lo Bethlehemah a lo piang dawn a, chutah chuan va zawng la, I hmu ngei zawk ang. Damlo chunga Khawngaihna I lantir avangin Lalpan I tum ram chu hruaithleng ngei che rawh se” a ti ta a.

Tunah chuan Zanlai a pel ta hial mai a, Artabana chuan a theih ang tawpa chakin a Sakawr chu a tlan tir a, a lo chawlh hahdam hman tawh avangin tlan pawh a tlan chak hle a ni. Innghahkhawmna hmun tura an ruat ‘Temple of the seven Spheres’ an tih hmun pawh chu a va thleng thuai a. Nimahsela, a thiante thawm leh hnuhma awm reng reng a va hmu ta lo a, a lo reh thiap mai a ni. Huan kil sirah chuan Leirawnchan hian Lehkha them hi alo indelh a, chu chu a han la a, a han chhiar chuan, “Zanlai pel rawk thlengin kan nghak che a, Nimahsela, ilo lan theih tak si loh avangin tlai a hlauhawm tawh bawk si a, Lal thar lo piang tur zawng turin kan kalsan ta mai che a ni. Thlaler lamah min rawn um dawn nia” tih hi a lo inziak a.

Artabana chu beidawng takin a thu hnawk a. Ei leh in tur a tlachham tawh si; a Sakawr lah chu a chau tawngkhawng tawh bawk si, Thlaler zau tak han kalchhuak thei chi ziazang ani lo tih a inhrechiang hle mai. Tichuan “Babulon lamah ka kir leh phawt anga, ka Lunghlu pakhat hi hralhin ka mamawhte ka lam khawm phawt teh mai ang” tiin a rilru a siam fel ta a. Tichuan Babulon lamah kir leh rihin a Sapphire lunghlu chu hralhin a mamawh ang ang chu a lei khawm leh ta rih a, tichuan Thlaler lamah hmanhmawh takin a phekchhuak ve leh ta a ni.

A tawp a tawpah chuan Artabana chuan Bethlehem chu ava thleng ve ta hlawl mai a. “He hmun ngei hi Kha Hebrai damlo pa min hrilhna hmun kha ani a, ka Lunghlu la neih te hi ka hlan thei ngei dawn e” tiin a inngaihtuah hlim ta hle mai a. Nausen pianghlim awmna awm in chu a zawng ta a. Kawtthler chu a reh tlawk tlawk mai a, mi reng reng chu an tang deuh hru ni hian a hmu a. In chhete pakhat a nau awi paha zai riai riai thawm a hriat chuan chu Inah chuan a va lut a. Nu pakhat hian a fa sen te chu a lo awi mu mek a. Chu Nu chuan, “ Ni thum kalta mai khan Khawchhak lam atangin mifing pathum an lo kal a, Nazareth mi Josefa leh Mari te Fapa nausen pianghlim chu Lal angin chibai an rawn buk a, Chu nausen chawimawi nan chuan Thilpek hlu tak tak an rawn pe a ni” tiin a lo hrilh a.

“Mahse, mak tak main chung mifing pathumte chu an rawn lan thut ang bawkin an bo leh ta thut mai a, Kha Nazareth pa lah khan a nupui leh a fapa nausen te chu a zan azanin Aigupta ram lamah a tlanbopui nghal ani awm e” tiin a sawi bawk a.
Chtih laitak chuan, Khawlaiah chuan thawm ri nuai nuai leh rak buai nuai nuai thawm alo ri ta chuah chuah mai a. Nu rak leh tap vawn vawn thawm karah chuan Rom Sipai ho Sakawr ke pen ri leh an fei leh Ngunhnamte inkhak ri te a ri ta rum rum mai a, “Rom Sipai, Rom Sipai, kan nausen an that vek dawn, an hmuh apiang an rawn that ringawt mai” ti a au thawm leh tap thawm chuan khua chu a khat ta a.

Chu thawmah chuan Nausen nu chu hlau leh mangangin a dang ta sawp sawp mai a, a nausen chu a pawm a, a harh a, a tah hlau em emin pindan kil thim lai ber lam chu a pan a. Chuveleh Artabana chu Kawngkaah ava ding ta tlat a, a kawrfual lian tak chuan kawngkhar chu a hnawhkhat vek a, inchhung chu a hmuh theih ta miah lo va. Sipai ho lah chu an Ngunhnama thisen kai leh far zawih zawihin an vakvel ruai mai a, Artabana awmna In an rawn thlen chuan kawngkhar a mi ropui leh Lal hmel tak lo ding an hmuh chuan an phawk hle mai a.
Artabana chuan dam thlap hian, He Inah hian keimah lo chu midang tumah an awm lo. He Lunghlu man to tak hi La ula, in hotupa ber va pe rawh u” a ti a. Ruby Lunghlu sen mawi em em mai chu la chhuakin an Captain chu a pe ta chawt mai a. An Captain chu hreh awm deuhin a han lang deuh na a, a hnar phal ta ngang lo va, a kut rawn phar chhuakin a la ta nge nge a. “He inah hian nausen an awm lo, kha lamah khan zawng zel rawh u” tiin thu a pe tuar tuar a.

Sipai ho an liam fel hnuah chuan, Artabana chu inchhungah chuan a lut a, khawchhak lam hawiin a tawngtai ta a. “Aw Dikna Pathian, Ka thil tihsual kha min ngaidam ang che, he nausen nunna chhanhim a a awm theih nan dawt ka sawi ta a ni. Tin, Ka thilpek tur pahnih chu ka chan ta si a, He Lunghlu pakhat nen chauh hian, Lal lo piang chu chibai buk tlak ka la ni ang em aw?” tiin.

Mahse, a hnunglam atang chuan Nu chuan aw dam diai hian, “Ka fasen te nunna I chhanhim avang hian, Lalpa chuan thlamuanin veng zel che sela, Thlamuanna pe zel che rawh se” tiin a lo tawng thlamuan a.

(A sei ta riau mai. Part-2 siam mai ang)

This entry was posted on Sunday, December 18th, 2011 at 6:00 am and is filed under Christmas. Both comments and pings are currently closed.