mi(sual).com

(Nimin, tahrikni 18, December, 2011 kha, Ka Nu duh tak Rochhiari Ralte-in, thawhlehna ni ropui nghak a, lei hrehawm a chhuahsan champhaphak vawi thumna a ni a. He thu ziak hi atan ka hlan e…)

Panlai nun

Kum tawp exam kan zo a. Enghelh tur engdangmah a awm tawh lo. Kan hma lawk a Lal pian hun lawmawm lo thleng tur chu; engemaw tak in min mawlh avangin, nghakhlel in kan phur ve em em thin. Naupangchhia ni mah ila, siamtu duan lawk: tlangsam par te chuan chu hun ropui lo thleng tur chu min hriattir ve bawk a. Thlasik chat paw hreu hro, hmui rep khi char reu ro chung pawn, chu hun hlimawm chuan kan tawn ah a ngaihnobeina a hloh eih chuang lo.

Tlang-buh phurh
Thingtlang ah chuan sawrkar hnathawk awm chhun te kha sikul zirtirtute an ni mai a. Ziritirtu chhungkua, kohhran tan a thahnemngai deuhin, Krismas ruai atan, an vawk vulh lai, rosum a lei aiin an buhphurh hlawh turin kohhran an han sawm ngei a. Pathianni tlai atangin a tuk lawk a buh phurh hnatlang kan neih tur chu kan sawi ho a, nuam thin tak a ni

Tichuan le, tlang buh phur turin kawtchhuah ah innghakkhawm in; a-pui-a-nawiin kan inzui kawi nguah nguah a. Rawlthar phur deuh in dar leh khuang te vua in kan ri bung bung thin. Nidang a buhphurh a hahthlak theih thin nen, tlang buhphurh ni meuh hi chuan hah hi kan hre hman ngailo a ni ber e.

Lunglei ka zin ve chak
Thian te zawng zawng Krismas chawlhkar ah chuan Lunglei ah zin in Krismas thuamhnaw, silailem, hampuar leh thil dang dang lei turin an kal a. Keini chhhungkaw berh ve taka seilian tan zawng, thiante Lunglei zin tur chu, awt em em in kan thlir liam a. An lo haw hnu a an thil thar neih te awt ru ve em em a ralkhat atang thlir mai loh zawng tih tur dang kan nei mawlh si lo.

Urlawk zan
Urlawk zan a nula tlangval tlaivar thak a an zai thin te. Khawvar dawn ah, “Khualbuk vengtu I ui lo’m ni, Tlantu mual liam tur saw” ti a an han zai fawn dup dup mai thin te kha aw. Zaikhawm an hlim chang a; hla pakhat vawi sawmhnih chuang zet an han sa nawn tluk tluk mai thin te, khuangpu tan chuan a hahthlak ve ngawt in ka ring thin. Mahse, hlimna Lal fak a zai kha zawng hahthlak a hnekin, a phurawm em em zawk si!

Krismas kawr
Ka nu hi puanthui a nih vang in pawltlak thla tir atangin Krismas thuamhnaw thuiin a buai thei hle thin a. Mitin-mitang kan inah rawn kalin, an thuamhnaw thar thui tir a; thui zawh hun a an hawn kir thin te chu kan nitin hian kan hmuh hmaih lo. Keini erawh zawng, Krismas kawr thar kan neih ve dawn meuh chuan urlawk zan kan thlen phawt a ngai thin.

Mi thuamhnaw zawng zawng a thui zo ta maw tih ah, ka pa puanthan lei ngei chu, ka nu’n tlaivar dawn in a’n thui a. Krismas tuk kan thawh meuh chuan sukfai sa thlap in tlangban a inzar, ka nu Krismas kawr thui ngei chu kan hmu chauh thin. Chaw eikham ah hmanhmawh takin ka nu chuan kan kawrthar chu Istiri in a’n nawt sawk sawk a. Vai film-a a tawp lam a changtupa a che tha thin iang in, Krismas ni tak ah Krismas kawr kan nei chauh thin. Tunlai tawng takin Krismas kawr kan nei fresh thei khawp mai.

Hnah pu ang aw…
Krismas tuk inkhawm kan bang a. Laklawh rual (inti-tlangval ve deuh tawh, nula la rim ngam silo) kan nih vangin ruaithehna tur changel hnah pu turin thian za ho in ramhnuai kan pan a. Thosi kar ah changel hnah kan lakhawm sawk sawk a. Tlai lam vawksa ei tur rilru a hre reng in, mahni tawk a inla-ramvachal takin kan zai haw rawng rawng thin.

In kan thlen meuh chuan chawhnu thlangher lo ni tawh in, zaikhawm pawh an lo thahnem tawh a. Krismas ruai chhum rim a tui, zaikhawm an tui bawk. Hmanhmawh takin kan inbual sawk sawk a, kan changel hnah put theuh chu zaikhawmna in ah kan va dah diat diat a. Kan hna kan zo ta. Tlai ruaitheh nghak in, a ruk te a star ve deuh te; pawh ngam chiah si lo in, ralkhat atangin kan han chhaih fiam vel thin te kha aw.., a nuam thin in a va ngaihawm tak em!

Ruai nawn
Kohhran a’n hlim a; awllen lai, buhzem nise a khah hun lai tak a ni bawk nen. A tuk a khawhar tak a hun hman ringawt zawng tuma’n an thlahlel mawlh lo. Mi thahnemngai deuh te’n ruai nawn an duh thu an sawi ru sap sap tan a. Zaikhawm an tin dawn meuh chuan Kohhran ziaktu lo dingchhuak in, a tuk a ruai kan nawn tur thu a’n puan meuh kha chuan zaikhawm tan tlaivar kha thil huphurhawm tak a ni ngailo.

Ziah tur a va tam em! Ti hian tlip phawt mai ang aw…

“Kumsul liam hnu kan nun ngaihlai tho leh thin,
Rem lal pian hun champha hmatiang ah kan thlir;
Sikni eng mawi leh zan boruak thiang leng vel.
Ngaihlai ti zualtu reng a’n maw…”

Similar Posts:

• Krismas Ruai Theh Ni
• Krismas a lo hnai leh ta
• “Masi” ka nghahhlelh thin kha
• Ruai theh
• Kan khuaa krismas

Recent Posts:

• Ka lawm e, Mi(sual)-nu!
• MIZORAM SUM LEH PAI DINHMUN IN HMA A SAWN NASA
• ZoRO Press Release
• MIZO KRISTIAN MARTAR THENKHAT TE
• BEIDAWNG SUH

This entry was posted on Monday, December 19th, 2011 at 11:00 pm and is filed under Christmas. You can follow any responses to this entry through the RSS 2.0 feed. You can leave a response, or trackback from your own site.