mi(sual).com

Ṭhangkhat lian chu a vei ve ta reng mai, hmanlai a chang mai dawn…..ka harsatna tawh chhe tê zing a ka theihnghilh ngai loh, ka rawlthar laia ka thil tawn, ka lung ti leng tu leh a hunlai aia Pathian thu ka hriat zawk tawh hnu thleng pawha ka rinna a min fuih ṭhin tu, (ka blog a ka ziah hi tihtawp ka tum sia) ka lo share ve mai mai ang che u….. Silchar chu sawi loh Aizawl ka vawikhat pelhna a ni a, train ka vawikhat hmuhna leh chuanna a ni.

Chumi ṭum chuan orissa aṭang mahni a haw leh turin ka inbuatsaiha, ka thiante chuan train station lam pan tur truck(407) hnunga ka chuang chu min vai liam a.  Ka thianpa  min ngaihtuahnaa a ṭawngkam chu ka la hre reng a, “Nangmaha i vawikhat haw na tur a ni si a ka ngaihtuah hle mai che a. Hindi i thiam bawk silo, i rel chuanna tur ila hre bawk silo, train exchange te lo ngai ta se i bo maiang tih ka hlau mang e aw” a tih chu ka rilru ah a cham reng a.

Chutia min tih lai chuan “Nie, Ṭhianpa, in telo lova haw hi ka thinlung takin ka châk lo a sin, i sawi ang zawng zawng te hi  hlauh rukna ka nei ve tho a ni. Min ngaihtuah tih ka hria, mahse Pathian a awm alawm a kut ah in nghat ila min hruai thleng ve mai ang” ti a ka chhanna chu hmachhuanin mahni leh mahni in hnem nan ka hmang chawp ve zel bawk a.

Zan thim hnuaiah chuan Balugaon Station, tê ve tak leh reh tak mai chu kan va thleng a, truck atang chuan mi ṭhenkhat chuang ve te nen chuan min unload a. Engmah chinchang ka hriatloh avangin mi a tam thei ang ber biak ka rilruk sa rêng a. Ka chuan pui zing ah chuan ka haw kawng chanve thleng Train-a kalve tur sipai chawlh hmang tur(chhutri) hi alo awma, a nelawm vakloh nangin biak nel ka tum hram hram a. Tih dan leh kalphung ṭhenkhat chu chianglo takin min han hrilh ve bawk a, mahse a ni chuan Ticket confirm sa a neih avangin keia ticket confirm loh buaipui tur chuan ka beisei lemlo. A tih dan te ka han zawt a, min kawhhmuh ang chuan ka ti ve zel a.

Rel ah chuan seat ruak a awm tawhloh avangin Military compartment a ka inhnawh ve angaia, chutah chuan mutna pakhatmah a awmlo mai niloin thutna tur pawh a awmlo a, a seat pawh thingphel hlir a ni. Chumi a nih takah chuan min be tha vaklo mahse min tanpui thei tura ka ngaih sipai pa bulhnaia awm chu ka tum ta zawk a. Min biak thatnan tiin a bulah thu in Chips ka lei te chu ka han pe a, kan titi ve ta bawrh bawrh a. Zan alo reia min mangtha a, reilo te ah a hnar zui ta maia, light an off ta sap sap hlawma ka thutna pawh chu mi mutna tur anih avangin ka thawhsan ve alo ngaia.

Rel kawngkhar bulah chuan ka ding a, thli a thaw nuama, pawnlam tlir rengin ka zai ta rat rat a. Chutih lai chuan police form ha inti thu tak hian kawngkhar chu alo khar hmak a. Zan a reia ka mut a chhuak ve ta hle maia, din reng chu ke alo khama mi ke tawmna laiah chuan ka va thu ve ta tawp a, an rawn mar lehin ka thoa ke tawmna lai apiangah chuan ka thu kual ta zak zak maia.

Khua alo var a ka thianpa pawh chu alo harh ve ta hlawla, ka chaua ka mut a chhuak ve ngawih ngawih a ni. Rs 1000 chiah ka neia, ka kalna tur chinchang ka hriatloh avangin ka hmanloh theih chhung chu hmanloh ka tum tlata, thil ei ka insum bawk a. Guwahati atanga Aizawl kalnan Rs 500 bak ah chaw ei na ka mamawh dawn tih ka hriaa ka theih chin chin ka tuar ve hrih kha a ṭha in ka hriaa.

Chhun Dar 10 alo rik chuan kan chuanna chu a ding a, kawngdang a zawh tawh dawn avangin ka chhuk angaia, ka ṭhianpa sawi ang ngeiin Rel dang ka chan leh chu a ngai ta a ni. Thil chinchang hriatloh nen mutchhuak nen chuan engmah tih kha a phurawm tawhloh hle a.

Khawchhak hmelpu ni awm ka zawng ta ringawt maia, an vang em em maia. Ka hmuh chhun chu Nepali (sipai) a ni a, English kei aiin a thiamlo leh chhawng a, Hindi ka thiam bawk siloa kan inbe hleitheilo a. Train lam hna thawktu te niawma ka hriat khawlum lai pawha Coat dum ha reng ho chu ka pan a, “Ghy train khawiah nge alo kal ang?” tiin ka zawt ta a, Ghy train a awmloa Ghy pan tur chu a awm thu min hrilh a, “Platform No.11 ah kal rawh” min ti tawp maia. Platform no.11….!! midang zawt chawpin ka va pan ve leh maia, mahse train reng reng a awmloa ka Hindi thiamloh nen tumah biak theih reng reng an awmlo.

Ka mut a chhuak bawk si a ‘Ka bo dawn anih ber hi’ ka ti tawh a, ka bag chu leiah nghatin ka thu ve ta tawp maia. Ka rilru chu a mangang ve ta hle maia, “Engtinnge ka tih ang, chhungte min lam turin PCO ka zawng mai dawn amawnle?”  tiin k awmna ber pawh chu a hming ka vawikhat hriatna a ni si a.

Nakin lawkah chuan ka piahah hian khawchhak hmelpu sipai pakhat leh vai mutria hi anlo inhnial ka hmu taa, chupa chuan khawchhak hmel a put ve avangin tanpui dil tawp mai teh ang tiin ka va pan hnaia. An inhau ti dawn ila inhau hmel an pu chiahlo niin ka hmu a. An titi chu hre lem hleilo in an kiangah chuan ka ding ve ta reng a, khawchhak hmelpu pa zawk chu a confusing hmel hle maia.

Ka lam a rawn hawi chuan hmel in ang khat nanana chu min chibai pah chuan vai tawngin khawi atanga lokal nge ka nih min han zawt a, Orissa ka ti a, Vai tawng bawkin “khawiah nge i kal dawn?” a han ti leh a, ka la thiam ve zel a “Guwahati” tiin ka chhang leh a. Vai tawngin sei takin min han biaa, vaipa chu a han kawk bawk a, chhan ngaihna ka hriatlohah chuan “I don’t know Hindi” ka ti ta a, a ngawi vang vang a Mizo tawng ngeiin “Mizo i ni em?” min han ti ta a!…chhan ngaihna pawh ka hre lawk lo, rei vak lo chu ka han ngawi vang vanga “Nie” ka ti a, “Mak iva ti awm ve Ghy i pan dawn avang khan i nih ka ring ve deuh hleka, kei pawh ka haw dawn a” a ti a.

A rilru alo buaina chu ‘Ghy train tlai dar 3 a chhuak tur chan nge, station dang kan awmna atanga hnai ber darkar khat ral hmaa nanghman chiah tura chhuah’ alo ni a. Keichu min han rawn zui ve taa, keichuan tlai dar 3 a mi chu chan mai ka duh thu ka hrilh chuan vai mutria pawh chu a kal tir taa.

Kei pawisa nei mumal lo, zan pawh mu lo chu Sainik rest house ah chuan Rail kan nghah chhung chawl turin min kalpuia, chaw kan ei a, ka inbuala, khum nuam takah ka mu a, ka ei in zawng zawng leh ka mutna te chu a card hmang chuan tlawmte in a pe vek a, a chungah ka lawm em em a ni.

Kan pahnih chuan kan chuana tur lam pan chuan kan chhuaka, Rel chu kan hmu a thlamuang takin ka chuang ve ta a. Guwahati kan thlenga, ei leh in a sum indaihloh ka hlauh em em te kha min pek sak zel a, engmah ka buaipui hah ngailo in Aizawl chu tluang takin ka haw thleng ta.

In ka thlen chuan ka inbual faia ka room tur an tih ah chuan ka han lut a, bang ah chuan Banner hlui deuh tawh, bal ve tak, têreuhte pakhat hi alo in tar va va maia, ka han en chianga, “LALPA, nangmah ngei hi a ni, mahni chauh pawha him taka mi awmtir thin hi ni.” (Sam 4:8) tih hi alo inziak a. Ka zinkawng ka ngaihtuaha, mihring tihrualloh Lalpan ka chunga a tih chu ka dawn kir a ka mittui ka sum zo ta lo a. He Bible changin min lo hmuah dan te ka ngaihtuah hian Pathianin min lo hruai reng a ni tih min hriat tir na ah ka ngai ta tlat a ni.

Hemi ni a ka chunga thil thleng zawng zawng te, engmah la hrelo vai ram vawikhat kalnaa mahnia thlaphang taka ka awm a, rilru hah tak chunga ka chauhna zawng zawng te kha ziak leh ka a sawi fiah mai ka thiam tawklo, amaherawh chu Ka nun hian Pathian phatsanin, sual khur daiin lo tlu palh pawh ni sela, khami huna min hruaitu kha ṭawngṭaia ka auh PATHIAN ngei hi a ni ka la ti fan in ka ring. Mi ṭhenkhat chuan heng hi vannei na ah an ruat ṭhin; Ani, keini tan chuan “A hmel mawi min hmuh tir tu.”

 :)

Similar Posts:

• Mizo Youths eager to learn Hindi
• Ka hming an hriat chhuah changin an lung a leng ve ngei ang!!
• Indian!
• Kan mawhphurhna a ni em?
• Khawpui zin thu-III

Recent Posts:

• Triau Trackx-Lungtat Par (official music video)
• Triau Trackx – LUNGTAT A PAR
• September 2016, Mizo(ram) Diary
• A VA LUNGLEN THLAK EM!!!
• August 2016, Mizo(ram) Diary

This entry was posted on Wednesday, January 11th, 2012 at 7:00 pm and is filed under Event, Luangliam, Religion. You can follow any responses to this entry through the RSS 2.0 feed. You can leave a response, or trackback from your own site.