mi(sual).com

Dt. 27.12.1910 ah Bukpui khua-ah a pianga. Kum 1923 -ah Hrangliana khua Nisapui-ah an pem ta a ni. Kum1924 -ah Lower Primary a zo a. Tin, 1925 -ah Pu Banga, Assam Rifle bel nawt a inhlawh in kum 1927 -ah Middle English School chu Second Division -ah a passed a ni. ME School a zawh hnu hian mizo lo neiin kum nga lai hna a thawk a.

Hetih lai hian Kuli a kal a ngaih fo avangin thingtlang tlangval nih a Kuli a kal fo loh dan tur ringawt a ngaihtuah ta a. May Myo (Burma) -ah a chhova 1st Battalion Burma Rifles -ah Dt. 23.05.1933 -ah a lut ve ta a ni.

A vannei hle a Dt. 1.4.1937 -ah ‘Less Naik’ ah a kai a, Dt. 1.5.1938 -ah ‘Naik’ ah a kai leh a, Dt. 1.11.1941 -ah Jamedar -ah kai in Quarter Master hna a chelh a ni. Dt. 15.8.1942 -ah ‘Subedar’ -ah a kai sang leh a, sipai a a tan lai hian I.A. First Division -ah a zo leh a ni. Hetih lai hian Intelligence Officer hna a chelh a, a thawhhlawk hle an ti.

Sipai a tan chhunga Medal a lakte :
1) Dt. 24.04.1945 ah BGM & MC & Oak Leave
2) Indian Defence Medal
3) Star Medal 1945
4) Star Medal (Pacific War)
5) War Medal (Pacific War)
6) Star Burma Medal 1943

Military Cross a hmuh chhan tlemte han tarlang ila :

1. Japan nen an in pawmchilhna tuma Sap sipai pali ruang a hlawm vang leh,
2. Japan sipai sawmli rual lai bûk sa a lo awm chu Gorkha Regiment hotupa, Major Blakera hova mi pariat in an beihnaah Japan sipai 27 kap hlum in, engemaw zat an tlan chhuak thei a ni.

Laipui 4 an mansak bawk a, he an chanchin hi Headquarter lamah hriattir a nih veleh Admiral Lord Mount Batten -a leh General Wingati -a te chu Helicopter a chuangin an awmna ah an kal ta nghal a. Thlawhna tumhmun a awm loh avangin hruizen leilawn (ladder) hmangin an chhuk a.

An thawh that em avangin ani hi ‘Military Cross’ pek a nih thu an hrilh ta nghal a ni. Hei hi a huaisen vang nilovin a vanneih vanga hmu a nih thu a sawi thin.
Tichuan, Indo te a lo reh a chawlh lain Aizawl -ah a lo kal a, Aizawl Bawrhsap Pu H.R.H. Mc Donald I.C.S. chuan Kawnpui Lal atan a lo ruat ta a. Dt. 1.1.1946 -ah Pu Saitulera thlakin Kawnpui LAL a lo ni ta a ni. Tichuan, ‘LAL’ -ah dah a lo nih tak avangin sipai lam atang chuan Dt. 1.8.1946 -ah a pension zui ta a ni.

Dt. 1.1.1946 atanga 1954 (8 yrs) thleng Kawnpui Lal -ah a awm a. Lal ban a nih dawn hian Lal tam tak chu an khua leh tui ten nasa taka ân khumin an in te hial lungin an vawm hlawm a. Ani erawh chuan hetiang harsatna hi a tawk ve lova. A khua leh tuite nen khawlaiah kawngzawh in “Lal bang rawh se” tiin an au rual a. Lal ban annih hnuah Mizo Union a lo ding a, chutah chuan President hmasa berah a tang zui leh ta a ni.

A Lal chhung hian a khua leh tui te an tha a, a hlim tlang hle a, Salam chawi tir tur pawh an hmu lova, a khawnbawlten an khak fiamthu hial an ti. Tin, khawtlang tan thil tha a tih sawi tham a awm lo hle a, a thil tih awm chhun chu Field No. 1 laih zauh hi a ni. A hunlai chuan Field No. 1 hi a la zim hle a. Bawrhsap hnenah phalna lain field laih zauh hna chu an thawk tan ta a. Bawng te talh in khaw thenawmte nen field laih hnatlang an nei thin a. Tichuan, inkhelhna tham a lo nih veleh Inkelhpui an buatsaih ta a, Team 36 lai an chhuak a, amah chauh Referee -ah a tang tluan zak a ni.

Sport hmang hian khaw thenawmte nena inkawmngeihna kawng a zawng a. Tlangval ho pawhin inkhelhah hma an sawn nasa em em a ni. A khawnbawl upa Upa Dara chuan Cup (No mawi) a chhuah sak a. Hetia inkhelhpui an neih lai hian Pu Dengsailova chuan heti hian hla a phuah sak a :

1. MC Khawma, MC Khawma Lal lai par ang vul zel se,
Kan leng dial dial chhingkhual val nen;
Kawn Khawpui kan sumtualah,
Kan Khaw perpui field phei duaiah, Football a leng duai e. (v-2)

2. ‘Hip hip hurray, hip hip hurray’ tiin leng zawng zai zel se,
Kan leng dial dial chhingkhual val nen;
Kawn Khawpui kan sumtualah,
Hip hip hurray, Pu Duai ngai lo, Dara haimawi kan awi e. (v-2)

He hla sa hian nula leh tlangvalten field kotlangah inkhelte an lo awi dual dual chuan boruak a ti nuam in a ti hlimawm hle thin an ti.

Tin, zirna lamah hmasawnna tur ngaihtuahin Middle English School Mualvum/Kawnpui (MK) ME School te a ho hian din a ni a. Board Chairman -ah dah a ni.

A mizia a tha a, mi khawngaihna nei mi leh midangte tana in sengso peih mi tak, mi taima leh hlim thei, fiamthu leh titi thiam mi a ni. Tu leh fate hmangaih leh duat thei tak a ni. Tin, a hriselna a tha a, mit fiah tak leh bengvar takin kum 100 mi anih thleng in a awm a ni. Mi vannei tak a ni a, Pathianah lawmna leh thlamuanna tha tak a nei a, Pathian fak leh chawimawi nuam ti mi a ni. Kum 99 anih in a nupui leh a tupa pakhat a sun a, hei hi a chhungkaw bik atanga a lusun hmasak ber a ni.

A NAT DAN :
A natna ber chu Prostrate Gland Enlargement a nei a, hei hi zai chi a ni lova, damdawi a enkawl a ni. Hei hian kum 2005 atangin zawi zawi in a ti buai chho ve a, khawsik neiin kum 2011 April thlaah a boral thelh a, vanneihthlak takin a tha chhuak leh a.

Dt. 25.12.2011 zan atangin a khua a sik tan leh a, a zual tial tial a, Dt. 30.12.2011 zan phei chuan thlaphan awm takin a awm a, Oxygen te kan pe tan ta a. That chhuah lam aiin chauh lam a pan zel a, vanneih thlak takin kum thar 2012 chu kan chuang kai leh ta hram a. A chauh tawh em avangin Dt. 2.1.2012 ah phei chuan mumal nei vak lovin a awm ta a ni.

A damloh chhung hian nâ a neih vawi khatmah a sawi lova, nâ tuar hmel a pu ngai lo bawk a ni. Dt. 03.01.2012 tlai dar 4:45 PM khan kum 102 mi niin chatuan ram min pansan ta.
A damloh chhung zawng hian thenrual thaten nasa taka min ngaihsakin min ngaihven em em a ni. Min khawngaih a min lainattu zawng zawngte chungah Lawmthu kan sawi tak meuh a ni.

Sub. R.Khawma, M.C. B.G.M. Ex-Chief of Kawnpui boral chungchangah Kawnpui Jt. VC leh Jt. YMA -te hmalakna avanga ropui taka vuiliam a ni hi an chungah lawmthu kan sawi tak meuh a ni. Chaltlang Bialtu MLA Pu R.Romawia, Chaltlang Br. YMA leh Chaltlang ‘S’ Kohhrante, Ex- Servicemen leh thenrual thaten ropui takin min thlah liam a, an chungah kan lawm tak zet a ni.

Tin, Kawnpui bialtu MLA Pu Hmingdailova Khiangte in ruang phurhna min pe a, Dr. C.Lalthanmawia, Director, H&F.W. Deptt. in Bus min hire sak bawk a. Aizawl atanga min zuitu tam takte nen an chungah kan va han lawm tak em!

Kawnpui Jt. VC leh Jt. YMA leh lirthei nei zawng zawngten a Lalram chinah zan rei tawh takah a ruang lo lain min lo hmuak a, kuang mawi tak a hmel lang thei tura siamah dahin, Havildar Thanchungnunga motor mawi taka cheiah phurin a Lalram chhung lirthei nei zawng zawngte nena fanpui a ni te, in tinah pawndum leh flag dum zara sun a ni te, a thlan thuk taka laih leh puan vara lining thlap a ni te hi a va ropui em!

Kawnpui mipui, Jt. VC, Jt. YMA, MUP, MHIP, Ex-Servicemen, Mistiri Asstn., Kawnpui Bazar Asstn., Kawnpui Senior Asstn., Kawnpui khua a lirthei nei zawng zawng leh Aizawl atanga min zuitu zawng zawngte leh khaw dang atanga rawn kalte, ka pa R.Khawma vuina leh thlahna atana sum leh pai leh hun tam tak sengtute zawng zawng chungah a tu leh fate’n lawmthu kan sawi tak meuh meuh a ni.

Similar Posts:

• Ex-Chief of Kawnpui vuina
• Kawnpui Lal R.Khawma (MC BGM) in Kum 100 Hmel
• CCPUR ah Kawnpui khua Veng fai ber
• Khuga Dam
• ‘Kawnkhawpui” leh a chhehvel chhinchhiahtlakte

Recent Posts:

• ENGVANGIN NGE CHAKMA TE HI AN RAM AȚANGA TLANCHHIA IN MIZORAMAH AN RAWN PUN LUAI NA CHHAN HI.
• MIN PHATSAN SI!
• Misual Apps
• MNF LEH CHAKMA POLITICS; TU NGE A KAIKUANG CHHUI A NGAI E !!!
• Android Games

This entry was posted on Tuesday, January 17th, 2012 at 5:00 pm and is filed under Obituary. You can follow any responses to this entry through the RSS 2.0 feed. You can leave a response, or trackback from your own site.